Acts 28 - Yak'usda Ooghuni

Paul Malta whutꞌenne bulaꞌtitꞌelh

¹ Soo yatsꞌúzdil ndi noo ꞌi Malta huyúlhni ꞌet tꞌetsꞌonanzin.

² ꞋEt whutꞌenne tube netsꞌun hínzoo. Náwhewhunilhtan ꞌinkꞌez whuzkꞌuz. Kwun neba húdulhkꞌan ꞌinkꞌez soo cho neneꞌhulhꞌen.

³ Paul tsuz naidalhdzoo-i nus tsídule whe tlꞌughus oolhchꞌoolh-i kwun be nílghaz whe Paul yula súlhchꞌulh.

⁴ ꞋEt whutꞌenne nyoo tlꞌughus Paul yula yé dintꞌi hinilhꞌen ꞌet ꞌulhodútni, “Ndun dune ughan-un la ꞌuntꞌoh. Wheni neyakꞌusda, ꞌen booziꞌ, ꞌi ꞌahoolhyiz ꞌukꞌelháhoolhꞌi-un tsꞌútni, ꞌen hutinalh-un yughá hoꞌalh ꞌaítꞌoh, yatoo kꞌut dujih hóontsꞌi.”

⁵ ꞋEt hoontsꞌi Paul ꞌaw dálhinel whe kwun kꞌut dula yuzghat ꞌet tlꞌughus ootsꞌa ha yánkat.

⁶ Hiba sulhꞌi ꞌólkꞌet tilah kꞌus khuntsul tilah nadílduz ꞌinkꞌez daóotsa. Saꞌ hiba ꞌilhꞌeꞌ hukwꞌelhꞌaz ꞌaw hoonli lheꞌínel ꞌinka ꞌutsꞌun unꞌa naꞌhunudzun ꞌinkꞌez ndun duyakꞌusda bulh ꞌilhoghun la ꞌuntꞌoh huninzun.

⁷ ꞋAw bughu nilhdzaꞌ iloh ꞌet tlꞌo kꞌut whuzdla, noo kꞌut whudayi, Publius huyúlhni, ꞌen oochꞌeꞌ hoonli. Soo ooꞌih te ooghu dáznindil ꞌinkꞌez tat dzin oozih ꞌuzdáltsꞌiꞌ.

⁸ Publius oobá lili kꞌut sulhti dada be cha ꞌinkꞌez dubut kꞌedzoh nuzut. Paul sulhtí-un, ꞌet yughu danínya ꞌinkꞌez tenadidli, yukꞌudálni, ꞌinkꞌez soo náꞌyinla.

⁹ ꞋEt ndúhooja hukwꞌélhꞌaz noo kꞌut whutꞌenne ndudáne tsꞌiyawh whusahándil ꞌinkꞌez ꞌenne cha soo náꞌhuja.

¹⁰ ꞋEt hoonliyaz lhai netsꞌótilhdil ꞌinkꞌez uztizki whe ndai la ookaꞌ tsꞌun tizilh-i cha netlꞌa náhayilya.

Malta whutsꞌun Rome tsꞌe hutizki

¹¹ Ta sanun inleꞌ hukwꞌelhꞌaz, keyoh Alexandria tsꞌe haínkez-i, ꞌi Lhulhutsin Lhtꞌudánkeꞌ huyúlhni, ꞌi tsꞌi khit noo kꞌut intan, ꞌi be uztízki.

¹² ꞋInkꞌez keyoh Syracuse huwhútni ꞌet uzninki ꞌinkꞌez tat dzin ꞌet ꞌuzdáltsꞌiꞌ.

¹³ ꞋEt whezdinki ꞌet doo cha keyoh Rhegium huwhútni-un whuz tsꞌoozki. ꞋEt ꞌom bun ꞌet nꞌaz ha tistsꞌi ꞌet nat dzin inleꞌ ꞌet keyoh whuyaz Puteoli huwhútni ꞌet yatsꞌúzki.

¹⁴ Whulohne ooba ꞌálhaꞌ hoontꞌohne nabutsꞌínla whe ꞌilhoh lisman ꞌet duzih ꞌuzdóltsꞌiꞌ nehútni. ꞋEt ꞌawet no ꞌutsꞌuja whe Rome tsꞌe tsꞌoozdil.

¹⁵ ꞋEt ndunne neulhutsínkene Rome ꞌet nebulh ꞌúhudantsꞌo whe, ꞌeꞌóoket-un, Appius huwhútni-un, ꞌinkꞌez tsꞌuztez bayoh cha tat-un ꞌutꞌalh-un huwhútni-un, ꞌet lheꞌhooldzoh tsꞌe whuz nedodizdil. ꞋEt Paul ꞌubutilhꞌen whe, Yakꞌusda, “Musi,” yudániꞌ ꞌinkꞌez ꞌawet oodzi donáꞌuja.

Paul Rome ꞌet Jesus Christ ghun dune bubulh yálhduk

¹⁶ ꞋEt Rome tsꞌe tsꞌoozdil whe Paul ndun lhugan-un ꞌilhoghun za yughunli whe dichꞌoh whútꞌi-un higha óoninꞌai.

¹⁷ ꞋEt hukwꞌelhꞌaz tat dzin inleꞌ whe Paul ꞌet whutꞌenne Lizwif dune unchane bubulh yátilhduk ha usda tsꞌe toodilh ubúlhni. Whusahándil whe ꞌet ubúlhni, “Dunene ꞌinkꞌez sulh Lizwifne ꞌaw hoonli sulh didowhne buchꞌa nulhéꞌustꞌel ꞌinkꞌez netsodáꞌne bukꞌoh tsꞌe néꞌwhutꞌen-un ꞌoh cha whuchꞌa nulhéꞌustꞌel. ꞋEt hoontsꞌi Jerusalem ꞌet ꞌasodilhꞌai ꞌinkꞌez Rome whutꞌenne, ꞌenne butlꞌá sahalhti.

¹⁸ ꞋEt ꞌenne suhoodalhkut ꞌinkꞌez hoonli whe níntaꞌ nustꞌen-un hukwꞌelha datísah sghun nálhuhuhóoꞌalh ꞌet huwa sla nahudutitnih hukwaꞌ huninzun.

¹⁹ ꞋEt hoontsꞌi Lizwifne whanchꞌaz nehúnindil ꞌinkꞌez sulh dunene ꞌaw whe tankꞌus unꞌa bughu yaoosduk ꞌaitꞌoh ꞌet hoontsꞌi oosneh hubaꞌ hoontꞌoh ꞌet huwa lerwe díztiꞌ-un oobut netísyalh ꞌinkꞌez ootsꞌu tédutisdlih.

²⁰ Ndi Israel ootsꞌu hainzutne hika tse hóoli-un, ꞌet sba ꞌálhaꞌ ꞌuntꞌoh huwa ndi lhuztih tlꞌool be suzghel. ꞋEt huwa nohtisꞌelh ꞌinkꞌez nohbulh yátisduk-un hukwáꞌ dísniꞌ.”

²¹ ꞋEt njan nduhúyulhni, “ꞋAw nyun nghun yun kꞌut Judea whutsꞌun ꞌudustlꞌus netsꞌó tlꞌa lhúhusdloh, ꞌaw neulhutsinkene cha whuz de haíndilne cha nyun hoontsiꞌ kꞌunꞌa nghu yalhuhulhduk.

²² ꞋEt hoontsꞌi daja dutanelh-un ntsꞌu yootuzalhtsꞌilh hukwa tsꞌuninzun. Tꞌetsꞌonínzun duneꞌne butsꞌú dintnine ndulcho whe yun ka buchꞌaz yáhalhduk ꞌet huwa.”

²³ ꞋEt Paul tsꞌun lhahódinla ndet dzin hitsꞌu tídulh-un. ꞋEt ꞌon nus ꞌultsukne, ꞌenne ꞌet dzin hitsꞌu whúsaindil. ꞋEt bundadaꞌ hulhgha whutsꞌun Yakꞌusda dune kꞌúneꞌ bulꞌen-un huwun hubodulhꞌeh. Yakꞌusda be nus hóoꞌenne ꞌukꞌu nuhúyuzguz ꞌinkꞌez Moses ꞌukꞌu núyuzguz-i cha ꞌi gha Jesus buba ꞌalha ꞌootꞌeꞌ hooleꞌ ubúlhni.

²⁴ Whulohne buba ꞌalhaꞌ dija ꞌet hoontsꞌi ꞌonghunne, ꞌenne ꞌaw buba ꞌalhaꞌ lheꞌdusnih.

²⁵ ꞋEt Lizwifne lhdulhyo ꞌuhudutni. ꞋEt ꞌaz náhidulh whe Paul njan dúbulhni, “Dalcho-i be Ndoni ꞌen Yakꞌusda be nus hóoꞌen-un Isaiah huyúlhni-un, yudániꞌ ndi khuni nohtsodáꞌne butlꞌa ídooꞌalh ha.

²⁶ ꞋEt ꞌutni, ‘Inyalh ꞌinkꞌez ndunne dune ndubudini, soo cho oozúlhtsꞌai ꞌet hoontsꞌi ꞌaw tꞌeoonoohzeh ꞌaítꞌoh; soo cho whunulhꞌen ꞌet hoontsꞌi lhozíhꞌen.

²⁷ Ndunne dune budzi dútsꞌo, dudzeh cha whudáꞌhudinla, ꞌinkꞌez hunílhtsꞌul cha ꞌuhintꞌoh. ꞋEt njan ꞌaw ndulhúhitꞌoh de soo daꞌ huhooꞌen, ꞌinkꞌez ꞌuhudótsꞌo, ꞌinkꞌez bubeni cha daꞌ tꞌéoonoozeh óoleꞌ. ꞋEt de daꞌ stsꞌun náhalhya ꞌinkꞌez daꞌ soo náꞌboosdleh, ni Yakꞌusda.’”

²⁸ ꞋInkꞌez Paul ꞌudekꞌez ubúlhni, “ꞋEt huwa njan tꞌéoonohzin hubaꞌ hoontꞌoh, Yakꞌusda ooghuni be uzdujih-i ꞌudun yun kꞌut whutꞌenne, ꞌenne butsꞌo tlꞌaidanꞌai ꞌinkꞌez huyoozólhtsꞌaiꞌ la!”

²⁹ ꞋInkꞌez Paul ꞌet ndudániꞌ hukwꞌelhꞌaz tube cho lhdulhyo ꞌuhudutni whe Lizwifne whenáhidil.

³⁰ Nat yus kꞌut ꞌet Paul nyo hukwꞌelha hoolhꞌi-un ꞌet hootꞌeꞌ. Mbene la yughundilhne duꞌih te bubutulhꞌih,

³¹ tsꞌet whucho Yakꞌusda dune kꞌúneꞌ bulꞌen-un, ꞌinkꞌez Jesus Christ neMoodihti ꞌen ghun cha dune hodulhꞌeh. ꞋAw dune whuchꞌa lhinúsyoot whe ndutni.