Acts 27 - Yak'usda Ooghuni

Paul Rome tsꞌe whe húyalhti

¹ ꞋEt ꞌawet lhgha ꞌúhudija whe Italy tsꞌe luwel be uztóokeꞌ hutni. ꞋInka Julius huyúlhni ꞌen Roman lhuganne moodih unli, nyoonne lhuganne, ꞌenne lerwe díztiꞌ-un ooduneꞌne lhuganne ꞌubuhútni, ꞌen Paul ꞌinkꞌez ꞌuyoonne ꞌadinlane cha, Julius ꞌen hitlꞌá banla.

² Tsꞌi cho, keyoh Adramyttium tsꞌe haínkez, ꞌi Asia tsꞌe yatoo ba tsꞌi yanákuk-un whutunutíkwus, ꞌi be tsꞌándil ꞌinkꞌez ꞌawet uztizki. ꞋIlhoghun dune Aristarchus huyúlhni-un, ꞌen keyoh Thessalonica Macedonia yun kꞌut whuzꞌai tsꞌe whuz de haínya, ꞌen cha nebulh ꞌúja.

³ ꞋOm bun ꞌet ꞌawet keyoh Sidon tsꞌe tsꞌozki. Julius ꞌen Paul tsꞌun unzoo dukꞌekene nabootꞌen ha ꞌet yugha óoninꞌai, ndai la ye ndunindzit-i higha óolelh ꞌet wheni.

⁴ ꞋEt whuchꞌa tsꞌuzki whe nedudiztsꞌi ꞌet whuchꞌa noo Cyprus ꞌi ooꞌih lhutsꞌúzki.

⁵ Yatoo Cilicia ꞌinkꞌez Pamphylia huyúlhni ꞌohwhi hukwꞌu tsꞌoozki ꞌinkꞌez keyoh Myra, ꞌet Lycia yun kꞌut whuzꞌai, ꞌet yatsꞌúzki.

⁶ ꞋEt ndun lhuganne moodih tsꞌi cho keyoh Alexandria tsꞌe haínkez-i, Italy tsꞌe tíkwus, ꞌi ye néanla.

⁷ Lhat dzin ꞌet nánilhtsa za tsꞌikelh tube huwa whulnaꞌ whe tsꞌikelh. ꞋEt ꞌudekꞌez keyoh Cnidus ꞌet whuzih lhutsꞌúzki. Nedudiztsꞌi huwun ꞌaw ꞌá uztookeꞌ ꞌaitꞌoh. ꞋEt huwa nus sih noo cho Crete huyúlhni ꞌi ootsꞌun ꞌútsꞌuja, Salmone huwhútni, ꞌoh whuya lhutsꞌúzki, ꞌinkꞌez noo ooꞌih za tsꞌutꞌen whe,

⁸ no whuzih za tsꞌíkelh, tube huwa whulnaꞌ whe Tlꞌoh Dizghel huwhútni-un, ꞌet keyoh Lasea huwhútni-un, ꞌet huwu nilhdzaꞌ iloh, ꞌet yatsꞌúzki.

⁹ ꞋEt saꞌ whe ꞌet ꞌuzdáltsꞌiꞌ. ꞋEt ꞌawet Lizwifne soo húhooni-un dzin ꞌet cha ꞌudaꞌ whengho dizut, tube huwa ꞌóodli-un whudizulh nutsꞌúke huba. ꞋInka Paul bugha dániꞌ whe njan ndúbuhni,

¹⁰ “Dunene ꞌawet njan whutsꞌun tube huwa oodli tileh. Tsꞌi cha ꞌinkꞌez be yuzdla-i cha nintaꞌtitꞌelh, ꞌinkꞌez whulohne cha yaitádlah wheꞌ hoontꞌoh.”

¹¹ ꞋEt hoontsꞌi nyoon lhuganne moodih Paul yuba ꞌalhaꞌ lheꞌdusnih. Tsꞌi niz tsꞌe usda-un, ꞌinkꞌez tsꞌi oochꞌeꞌ yinlí-un, ꞌenne za hiba ꞌálhaꞌ ꞌutni.

¹² Nyo hudilhtsꞌí-un khit hudutáltsꞌilh huba nekꞌeꞌ hootꞌoh. ꞋInka nyoonne dune kꞌus lhane, ꞌenne nus hutikelh hukwaꞌ huninzun, sooꞌ hutinelh de keyoh Phoenix tsꞌe hutikelh hutni. ꞋEt noo cho kꞌut tlꞌoh whucho whuzꞌai, yándzuz nilhtsꞌi ꞌinkꞌez nus nilhtsꞌi cha chꞌa whuꞌih whuzꞌai, ꞌet khit hutileh hukwaꞌ huninzun.

Yatoo kꞌut whudutilhtsꞌut

¹³ ꞋEt nánilhtsulyaz yandzuz tiztsꞌi ꞌinkꞌez nyoonne dune sooꞌ hutinelh huninzun ꞌinka tsꞌi bulh too ꞌusꞌai-i too ha nahayanꞌai ꞌinkꞌez nus huzki ꞌinkꞌez noo cho Crete ꞌi soo oozih kꞌut za hutizki.

¹⁴ ꞋEt ꞌaw lhotuszit whuza nilhtsꞌi ulhtus, ndaz danus huyúlhni-i, noo soo ootsꞌu haíntsꞌi whe tiztsꞌi.

¹⁵ Tsꞌi udilhtsꞌut whe ꞌaw nilhtsꞌi dulhyoh uztookeꞌ ꞌaítꞌoh suliꞌ. ꞋInka hukwa tsꞌutꞌen-un ꞌetsul ꞌutsꞌuja ꞌinkꞌez whute nilhtsꞌi be uzdutílhduz.

¹⁶ ꞋUyoo nooyaz Clauda huyúlhni-i, ꞌi ooꞌih tsꞌánki, ꞌet ꞌankwꞌusyaz nebaꞌ hóntꞌeꞌ. ꞋEt soo ꞌuznutꞌen whe tsꞌiyaz dézdiltꞌi-i dutsꞌo tsꞌúlhtsi,

¹⁷ ꞌinkꞌez detsꞌántan. ꞋEt tsꞌi cho tlꞌoolh be oonaneꞌtsꞌuzguz. Luwel nanáhayanla, Lybia ꞌoh ho taba deskꞌut ꞌinkꞌez teh whudutle ꞌi hikꞌé talulh ꞌet whe hunuljut ꞌet huwa. ꞋInkꞌez ꞌantsꞌi nilhtsꞌi be uzdildus.

¹⁸ Whéwhunujut whe nilhtsꞌi zaꞌ whutꞌen ꞌinka ꞌom bun tsꞌi be ꞌusdla-i ooloh táwhehinilhdil.

¹⁹ ꞋEt doo cha whulh tat dzin nyoo tsꞌi bet be neꞌwhutꞌen-i cha whenichꞌoh tatsꞌálhdil.

²⁰ Lhat dzin inleꞌ ꞌet sa cha ꞌinkꞌez sum cha ꞌaw lhtsꞌísꞌen ꞌinkꞌez whuz tube nílhtsꞌi zaꞌ whutꞌen. ꞋUdekꞌez ꞌawet ꞌuzdutijih-un whula nízdunande.

²¹ ꞋEt saꞌ whe dune ꞌaw lheꞌhusꞌal whe Paul butoh usyin ꞌinkꞌez ubúlhni, “Dunene soo sólhtsꞌaiꞌ hubaꞌ hoontꞌoh, noo cho Crete ꞌaw whuchꞌa tsꞌookeꞌ huba lheꞌhóotꞌoh. ꞋEt ꞌutsꞌúja de, ꞌet de daꞌ ꞌaw hoonli nechꞌa ninta lheꞌoostꞌel ꞌinkꞌez nintalheꞌtsꞌílel ooleꞌ daꞌ.

²² ꞋEt hoontsꞌi ꞌandit nohghu tédusdlih, nohdzi ulhtus cho ulhꞌi! ꞋAw nohtoh ꞌilhoghun hoontsꞌi dálhtisa, tsꞌi za nintaꞌtitꞌelh.

²³ Yakꞌusda oochꞌeꞌ usdli-un, ꞌinkꞌez ooba neꞌustꞌen-un, ꞌen ꞌulhdzis daꞌ oolizas ꞌen szih be hóodiltsai

²⁴ ꞌinkꞌez ꞌutni, ‘Paul whéniljut iloh! Lerwe díztiꞌ-un oobut tanyin wheꞌ hoontꞌoh, ꞌinkꞌez Yakꞌusda nyudántsꞌo whe ye únzoo-i, ꞌi gha nyulh dédilhtsꞌine yalhotásdla.’

²⁵ ꞋEt huwa dunene nohdzi ulhtus cho ooleꞌ! ꞋEt sba ꞌálhaꞌ hoontꞌoh ntsꞌenꞌa Yakꞌusda ꞌusúlhni, whuz unꞌa la ꞌuhótꞌeꞌ.

²⁶ ꞋEt hoontsꞌi ꞌilho nooyaz kꞌut ꞌet yázdutaldus.”

²⁷ ꞋAwet nat lisman inleꞌ ꞌet Adria yatoo kꞌut ꞌawhuz uzdildus. ꞋEt tuzniz atꞌen nyoonne tsꞌi bet ꞌutꞌenne yun enghoh ꞌutsꞌutꞌen huninzun.

²⁸ Tlꞌoolh ndaz-i huyé dinguz ꞌinkꞌez tahúyanꞌai. ꞋEt nahuhoonꞌai tube takhulh 120 feet ꞌet taꞌdikhulh. ꞋEt hukwꞌelhꞌaz ꞌet doo cha za whundunaꞌhoolhdzai, ꞌet 90 feet taꞌdikhulh.

²⁹ Tse kꞌetsꞌítalꞌulh-un whéznuljut ꞌinka dunghi tsꞌi bulh too ꞌusdla-i, ꞌi tsꞌi niz tsꞌe taháyanla ꞌinkꞌez soo ꞌa úncha yulhkai húninzun.

³⁰ Tsꞌi bet ꞌutꞌenne neghu déhahunoolꞌilh hukwaꞌ hútꞌen. Tsꞌiyaz tahítitelh ꞌinkꞌez tsꞌi bulh too ꞌusdla-i nus tahítilelh nahahoolhꞌi.

³¹ ꞋEt Paul nyoonne lhuganne ꞌinkꞌez bumoodih cha ubúlhni, “Ndunne dune ꞌutꞌenne ꞌaw tsꞌi be lhódiltsꞌih de, ꞌaw doohjih ꞌaítꞌoh.”

³² ꞋInka nyoonne lhuganne tlꞌoolh kꞌuhiníntꞌaz ꞌinkꞌez tsꞌiyaz hila ditni.

³³ ꞋAwet yutílhkalh whe Paul ubúlhni, “ꞋUhooꞌalh, ꞌawet nat lisman hubalhꞌeꞌ ꞌet ndúhoolyiz whe ꞌaw hoonli lhuzahꞌal.

³⁴ Nohghu tédusdlih ꞌahꞌalh! ꞋEt whutꞌaz dutihjih wheꞌ hoontꞌoh. Nohtsighaꞌ ꞌilho hoontsꞌi nintalhdutáskwus.”

³⁵ ꞋEt ndudániꞌ hukwꞌelhꞌaz, Paul lhes yílhchoot tsꞌiyawh bubut Yakꞌusda tsꞌun, “Musi,” daniꞌ, taídanyuz ꞌinkꞌez whe ninꞌal.

³⁶ ꞋEt budzi ulhtus násdliꞌ ꞌinkꞌez ꞌilhoghun hinli whe ꞌúhanꞌal.

³⁷ ꞋAlhgoh 276ne tsinli whe tsꞌi bez dilhtsꞌi.

³⁸ Tsꞌiyanne soo ꞌultsuk nahítꞌal hukwꞌelhꞌaz, tsꞌi ndza ooleꞌ ha, lhes ha níyeh-i desdzai-i tahúyalhdil.

Deskꞌéhinki whe tatsi be tsꞌi yaijut

³⁹ ꞋEt ꞌawet yulhkai whe tsꞌi bet ꞌútꞌenne no yun nalhúhuhóoltsulh. Tlꞌoh taba hoonli-un, ꞌet hotilhꞌen, sooꞌ hutinelh de whute tsꞌi yahítajooh huninzun.

⁴⁰ ꞋEt ꞌinka tsꞌi bulh too yuzdla-i kꞌunuhúyuztꞌaz ꞌinkꞌez nyo ꞌawet hila ditni. Tlꞌoolh tsꞌi be nuhunukes-i be dintꞌi ꞌi cha kꞌunuhúyuztꞌaz ꞌinkꞌez nus luwel ꞌi whe náhidintsi nilhtsꞌi be no yádoldis ha. ꞋEt ꞌawet no hudutilhduz.

⁴¹ Nyo lhedli ndúwhultꞌoh sai dutlé-i haínꞌa ꞌi tsꞌi yukꞌénkez ꞌinkꞌez nus tsꞌi bintsit dutsꞌo súliꞌ ꞌaw nuhóotnah ꞌaítꞌoh. ꞋInkꞌez niz tsꞌe ꞌet ꞌawet tatsi be yawhínanꞌil.

⁴² ꞋEt lhuganne nyoonne ꞌadinlane hubotighan ha lhahódinla, doo ka la yahálhꞌil ꞌinkꞌez ninta nahoolghas.

⁴³ ꞋEt hoontsꞌi lhuganne moodih Paul yutilhyih hukwaꞌ ninzun ꞌinka, “Dah,” bubúlhni. “Mbene la dune núlꞌilh tꞌéwhunínzunne, tsꞌiyawh ꞌenne cho tahóollhat ꞌinkꞌez no hútoolꞌilh,” bubúlhni.

⁴⁴ ꞋEt ꞌonghunne, ꞌenne dzihtel kꞌus tsꞌi ootsꞌu há nidistuk-i ꞌohwhi hitꞌaz yahúlhꞌil. ꞋEt whuz unꞌa tsꞌiyawh dálhtsꞌinel whe yatsꞌúzdil.