Acts 25 - Yak'usda Ooghuni

Paul lerwe ꞌukꞌenus díztiꞌ-un but neóoyaꞌ-un yutsꞌu húkwaꞌ ꞌutni

¹ ꞋInkꞌez tat dzin inleꞌ Festus yun moodih Judea yun kꞌut tsꞌe oozya. ꞋEt hukwꞌelhꞌaz keyoh Caesarea whédinya ꞌinkꞌez Jerusalem tsꞌe oozya.

² ꞋEt lubret ꞌukꞌenus díztiꞌ-un ꞌinkꞌez Lizwif bumoodihne Festus tsꞌu hoozdil whe Paul hichꞌaz yálhduk ꞌinkꞌez Festus highu tédudlih,

³ Paul Jerusalem tsꞌe naitoolhꞌaꞌ hukwaꞌ hunínzun ꞌet whe dulaꞌ ooneh huyúlhni, ꞌonilha highun lhaóodinla ti whuya uyalh de ꞌet hituzilhghelh ꞌet wheni.

⁴ ꞋEt Festus ꞌutni, “Paul Caesarea ꞌet ꞌadinꞌai-un unli whe ꞌuntꞌoh. ꞋEt sichꞌoh cha ꞌaho ꞌet whuz natísdalh.

⁵ ꞋInka nohmoodihne sulh náhutoodilh ꞌet si hichꞌaz yaóolhduk Paul nintaꞌuntꞌen-un hoonli de,” ubúlhni.

⁶ ꞋEt whunizyat dzin atꞌen ꞌet butoh nadaꞌ ꞌinkꞌez Caesarea tsꞌe whenya. ꞋEt ꞌom bun ꞌawet dune ba nahidilh-un hukwꞌé tlꞌa didaꞌ ꞌinkꞌez, “Paul daháyolhtelh,” ubúlhni.

⁷ ꞋEt Paul danínya whe Lizwifne Jerusalem tsꞌe haíndilne higha óozdil ꞌinkꞌez lhat-un hooncha ꞌet nintaꞌuntꞌen huyúlhni whe hichꞌaz yálhduk ꞌaw tsꞌihꞌun ꞌalhaꞌ hutni huhoolhtselh ꞌaítꞌoh.

⁸ ꞋEt hoontsꞌi Paul duba yanalduk whe uyúlhni, “ꞋAw Lizwifne be buba nahisda-i cha, ꞌinkꞌez bulugliz whucho cha, ꞌinkꞌez Romanne bulerwe cha butsꞌun cha ninta lheꞌustꞌel.”

⁹ ꞋEt Festus Lizwifne soo cho soo nubanaꞌa ꞌinka Paul yoodulhkut, “Jerusalem tsꞌe ndi hiye nchꞌaz yálhduk-i, ꞌi gha whuz sbut tanyin hukwaꞌ ninzun eh?”

¹⁰ Paul ꞌutni, “Njan lerwe ꞌukꞌenus díztiꞌ-un dichꞌoh nahíyilh-un, ꞌet mbut susyin ꞌet sba nahoodeh hubaꞌ ꞌustꞌoh. Lizwifne butsꞌun nintalheꞌústꞌel nyunchꞌoh soo cho tꞌeoonínzun.

¹¹ ꞋEt be ba nahisda-i kꞌunusyuz de kꞌus hoonliyaz hukwꞌelha daóosah hubaꞌ hoontꞌoh-un ꞌusja de, ꞌaw whuchꞌa neꞌóostꞌen ꞌaítꞌoh. ꞋEt ꞌaw daja ꞌúhutni-un ꞌalhaꞌ lheꞌhóotꞌoh de ꞌaw dune butlꞌa sóolhtelhne hooloh. Lerwe ꞌukꞌenus díztiꞌ-un ꞌen but neóosyaꞌ ꞌet ntsꞌu húkwaꞌ dusni.”

¹² ꞋEt Festus dugha utníne naboodalkut hukwꞌelhꞌaz, ꞌet Paul ꞌulhni, “Lerwe ꞌukꞌenus díztiꞌ-un but netányalh-un hukwaꞌ ninzun ꞌet huwa lerwe ꞌukꞌenus díztiꞌ-un, ꞌen la but neóonyaꞌ!” yúlhni.

Festus Lerwe Agrippa ꞌen Paul ghun yulh yálhduk

¹³ ꞋAw saꞌ iloh hukwꞌelhꞌaz Lerwe Agrippa huyúlhni-un ꞌinkꞌez tsꞌeke yúlh naꞌas-un, Bernice huyulhni-un cha, Caesarea tsꞌe hoozꞌaz Festus kꞌeke hidutatnelh wheni.

¹⁴ Lhat dzin ꞌet hankeꞌ hukwꞌelhꞌaz Festus Lerwe Agrippa Paul ghun dáhoontꞌoh tsꞌiyawh yulh náhoolnuk, “Njan ꞌawhuz ꞌilhoghun ꞌadinꞌai-un ꞌet usda, ꞌen la Felix ꞌayanꞌai ínleꞌ.

¹⁵ ꞋInkꞌez Jerusalem tsꞌe oozúsya whe Lizwif lubret ꞌukꞌenus diztiꞌne ꞌinkꞌez butso whudilhdzulhne cha hichꞌaz yálhduk ꞌinkꞌez datítsah huba ooba nahoosyeh ha stsꞌu téhududlih.

¹⁶ ꞋEt hoontsꞌi ꞌubudusni, ‘Romanne bukꞌunꞌa ꞌet ndúlhuhootꞌoh, dune nintaꞌuntꞌen dáhni-un ꞌudechoo yuchꞌaz yálhdukne bubut inyin ꞌinkꞌez duba yaooduk hubaꞌ hoontꞌoh, ꞌaw ꞌet de za ooba nahutideh.’

¹⁷ ꞋEt whusahándil whe ꞌom bun ꞌahoh dune ba nahudeh-un, ꞌet nátlꞌa disdaꞌ ꞌinkꞌez, ‘Nyoon dune daháyolhtelh,’ ꞌubudúsni.

¹⁸ ꞋEt yuchꞌaz ditnine dodindil tube la ꞌuhidóniꞌ nuszun whe ꞌaw daja lhuhidínel.

¹⁹ Lizwif dulugliz huwun ꞌinkꞌez ꞌilhoghun dune, Jesus huyúlhni-un, dazsai inleꞌ ꞌet hoontsꞌi Paul ꞌutni, ‘Khuna,’ ni. ꞋOh huwun za lhdulhyoh ꞌuhuditniꞌ.

²⁰ ꞋAw whe náhosꞌalh tsꞌe hooloh njan ꞌuwhutni-un huwun, ꞌinka Paul oodaskut, soo tilah Jerusalem tsꞌe tooyaꞌ ꞌet nahíyilh-un but ootáldzih huba.

²¹ ꞋEt Paul butsꞌu húkwaꞌ daniꞌ ꞌadodoolhꞌaꞌ ꞌinkꞌez lerwe ꞌukꞌenus díztiꞌ-un, ꞌen duba nahooyeh ni, ꞌinka lerwe ꞌukꞌenus díztiꞌ-un, ꞌen tsꞌun tísꞌalh ꞌet whutsꞌun ꞌadooꞌaꞌ dusni,” ni Festus.

²² ꞋEt Agrippa Festus ꞌulhni, “Ndun dune sichꞌoh ootuzastsꞌilh hukwaꞌ nuszun,” yúlhni. ꞋEt Festus ꞌutni, “Bunde si oozólhtsꞌaiꞌ,” yúlhni.

²³ ꞋEt ꞌom bun Agrippa Bernice bulh soo buba hodílhtiꞌ whe whusahánꞌaz. ꞋEt lhugan moodihne ꞌinkꞌez keyoh whumoodihne cha dune ꞌilhodulh-un bubulh dahánindil. ꞋEt Festus, “Paul daháyolhtelh,” ubúlhni, ꞌinka dáhinilhti.

²⁴ Festus ꞌutni, “Lerwe Agrippa ꞌinkꞌez nohni dune njan dilhtsꞌine tsꞌiyawh ndun dune nulhꞌen. Lizwifne njan ꞌinkꞌez Jerusalem cha sulh náwhuhulnuk whe Paul tankꞌús neꞌustꞌen, hutni. Soo tube cho ꞌuhutni, ꞌaw khoonaꞌ huba lheꞌítꞌoh.

²⁵ ꞋEt hoontsꞌi ꞌaw tankꞌus neꞌustꞌen-un hukwꞌelha daóotsa-un ooghu nalhuwhúsꞌal ꞌinkꞌez dichꞌoh lerwe ꞌukꞌenus díztiꞌ-un yutsꞌu húkwaꞌ daniꞌ ꞌet huwa ꞌen ootsꞌítisꞌalh.

²⁶ ꞋEt lerwe ꞌukꞌenus díztiꞌ-un ootsꞌo kꞌetisgus hoontsꞌi ꞌaw Paul whe tankꞌus ꞌuja-un tsꞌihꞌun ooghun nálhuwhúsꞌal. ꞋEt huwa njan nohbut nenústi, nyun soo Lerwe Agrippa mbut nenústi, khun si hoonli ooghun náwhuhꞌai de, ꞌet la ꞌukꞌehóosges.

²⁷ ꞋAw ndun dune hoonli ooghun nalhtsꞌoohóoꞌal whe whuz whe tsꞌálhꞌaꞌ de ꞌaw tsꞌihꞌun sba lheꞌhóotꞌoh.”