Acts 24 - Yak'usda Ooghuni

Lizwifne Paul chꞌaz yahalhduk

¹ ꞋEt ꞌawet kwulat dzin inleꞌ whe la lubret ꞌukꞌenus díztiꞌ-un, Ananias huyúlhni, butso whúdilhdzulhne te, ꞌinkꞌez ꞌilhoghun dune yalhduk-un, Tertulus huyúlhni-un, ꞌenne Caesarea tsꞌe hoozdil. ꞋEnne yun moodih, Felix huyúlhni-un, hibut ꞌet Paul chꞌaz yáhalhduk.

² ꞋEt Paul dáhinilhti ꞌinkꞌez la nyoon Tertulus dune yalhduk-un, Paul chꞌaz yáwhenilhduk whe ndutni, “ꞋUkꞌenus díztiꞌ-un hoonih whe neghinli ꞌet huwa saꞌ whe neyun kꞌut whudizghelh ꞌet ndúhontꞌeꞌ ꞌinkꞌez lhat-un cha neyun kꞌut wheꞌ tsꞌootꞌeꞌ-un neba naꞌhóonle.

³ ꞋEt huwa ꞌahoolhyiz tsꞌuhóontꞌiꞌ neyilhꞌi tube kꞌeke-un ntsꞌuyútni.

⁴ ꞋAw sda saꞌ nyostun ꞌaítꞌoh ꞌet hoontsꞌi hoondukw-unyaz yaztílhduk-un neoozílhtsꞌai ntsꞌu tédusdlih.

⁵ Tꞌétsꞌonínzun ndun dune tube wheóonujut whe ntsiꞌ-un dune unli. Yun kꞌut ndulcho whe ꞌen gha Lizwifne cha lhtáhúwhútꞌaih ꞌinkꞌez Nazarenne butso nuyá-un unli.

⁶ ꞋInkꞌez Lizwif bulugliz whucho ꞌet cha me neba whulhtsi ꞌinka tsꞌílhchoot whenichꞌoh nekꞌunꞌa ooba natsꞌotiyeh hukwa ꞌuzninzun.

⁷ ꞋEt hoontsꞌi ndun lhuganne moodih, Lysias huyúlhni, danínya ꞌinkꞌez negha ha náyulti.

⁸ ꞋEt Lysias ꞌen Paul chꞌaz yálhdukne nyun ntsꞌó toodilh ubúlhni. ꞋEt nyunchꞌoh ndun dune oodilhkut de tube lhat-un whe óoghu yatsꞌulhduk-un la tꞌéwhunonzeh.”

⁹ ꞋEt Lizwifne cha Paul chꞌaz yalhduk-un tsꞌiyawh ꞌalhaꞌ hutni, hutni la.

Felix oobut Paul duba yanalduk

¹⁰ ꞋEt yun moodih Paul yatilhduk-un yutlꞌa hónꞌai whe ndutni, “Tꞌéoonúszun ndi yun kꞌut lhat naoodizut ꞌet nahíyilh-un inleꞌ ꞌet huwa hoonústꞌiꞌ mbut duba yanazduk.

¹¹ ꞋEt nyunchꞌoh la nahónꞌalh ꞌaw whunizyat ꞌon ꞌat nat dzin atꞌen inleꞌ teni ntisdzilh ha Jerusalem tsꞌe tisya.

¹² ꞋAw Lizwif bulugliz whucho ꞌet dune dulhyo ꞌúdusni whe Lizwif sulh úhisꞌen, ꞌinkꞌez bulugliz cha, ꞌinkꞌez bukeyoh ꞌet dune lhebusdulh whe cha sulh úhisꞌen.

¹³ ꞋAw daja suhútni-un tsꞌihꞌun mba nehúhoꞌalh ꞌaítꞌoh.

¹⁴ ꞋEt njan nyudúsni Jesus kꞌunꞌa ꞌuninzunne ꞌet whuz unꞌa si cha netso whudilhdzulhne buYakꞌusda ootsꞌun teni nusdzun. ꞋInkꞌez Moses ooghuni ꞌukꞌu nusguz-i ꞌinkꞌez Yakꞌusda be nus hóoꞌenne ꞌukꞌu nuhúyuzguz-i cha sba ꞌalhaꞌ ꞌuntꞌoh.

¹⁵ Ndunne yaidláne unzoo kꞌus ntsiꞌ inleꞌne tsꞌiyawh dunahudutádulh Lizwifne buba ꞌalha ꞌuhoontꞌoh, whuz unꞌa si cha Yakꞌusda sba ꞌalhaꞌ ꞌuntꞌoh.

¹⁶ ꞋEt huwa si ꞌahoolhyiz Yakꞌusda tsꞌun ꞌinkꞌez dune cha tsꞌun neyo tsꞌe oogha tꞌetsꞌoninzun-i ꞌi gha tsꞌihꞌun unꞌa oostꞌeꞌ hukwa ꞌustꞌen.

¹⁷ ꞋEt lhat nawhudizut Jerusalem whuchꞌoh ꞌistꞌen inleꞌ whe sulh whutꞌenne ba ndai sooniya buba lhunayostꞌai-i butsꞌu naítusꞌai ꞌinkꞌez Yakꞌusda tsꞌun loodel kꞌut ꞌudutáskꞌun wheni whuz naoozúsja.

¹⁸ ꞋEt bulugliz whucho Lizwifne bubunaꞌudeh kꞌunꞌa lhaóodusdla inleꞌ. ꞋEt whutoh ndustꞌen whe suhanꞌen. ꞋAw dune ꞌilhozdil ꞌinkꞌez ꞌaw lhtsꞌu déꞌ hadulh iloh inleꞌ.

¹⁹ ꞋEt ndunne njan mbut nehóodilh hubaꞌ hoontꞌoh ꞌinkꞌez schꞌaz yáhoolhduk hoonliyaz whe sdulhyoh ꞌúhintꞌoh de.

²⁰ Kꞌus ndunne te nyodóniꞌ ndet whe nintaꞌnustꞌén-un sghu náháhóonꞌai nahíyilh-un but susyin whe,

²¹ ꞌet hoontsꞌi ꞌilhoghun za disniꞌ nahíyilh-un but susyin whe, ‘Yaidláne dunahudutádulh sba ꞌalha ꞌuhoontꞌoh,’ ꞌet huwa ꞌandit dzin ꞌet sba nahinyeh.”

²² ꞋEt Felix ndai la Jesus kꞌunꞌa ꞌuntꞌoh-i ghun soo tꞌeóoninzun. ꞋEt Paul yuba nahooyeh hukwa lheꞌnízun ꞌinka ubúlhni, “Kꞌat le lhuganne moodih Lysias whusaínya de la mba nahoosyeh.”

²³ ꞋEt Paul neilhchuk-un yughunli-un ꞌulhni, “ꞋAhoolhyiz ooghinli hoontsꞌi, ꞌon nus kꞌúneꞌ ootꞌen whute ookꞌekoone hitsꞌú kꞌunaoodulh ꞌinkꞌez ye ndunidzit-i be higholeꞌ ha.”

Paul Felix ꞌinkꞌez Drusila bubut nenínya

²⁴ ꞋEt dzoh lhat dzin inleꞌ whe Felix duꞌat Drusila bulh whúsainꞌaz, ꞌen cha Lizwif ꞌuntꞌoh. ꞋEt Paul hikunáwhulhꞌaꞌ, ntsꞌenꞌa la Christ ooba ꞌálhaꞌ ꞌuntꞌoh-un ꞌet huwun bubulh yálhduk, ꞌinkꞌez huyoozílhtsꞌai.

²⁵ ꞋEt Paul, be tsꞌihꞌun unꞌa ꞌuhoontꞌoh-un, ꞌinkꞌez whenichꞌoh khutsꞌudli-un cha, ꞌinkꞌez neba nahutideh dzin whusáwhutiltsꞌulh de huwun whúbunoolhtun hukwa ꞌutni. ꞋEt Felix nílhjoot ꞌinkꞌez ꞌutni, “ꞋAwet ꞌandit naindalh, doo cha nkanaꞌdoosniꞌ la sghá whultsꞌut de.”

²⁶ ꞋEt yalhduk whutoh la, “Khun tilah Paul sooniya sgha óoꞌalh, ꞌet la oola nadoosnih,” ninzun. ꞋEt huwa lhat whe yukaꞌdunih ꞌinkꞌez yulh yálhduk.

²⁷ ꞋEt hoontsꞌi nat yus kꞌut naoodizut inleꞌ la, Porcius Festus huyúlhni-un, ꞌen Felix yun moodih kꞌenádija. Felix ꞌen la Lizwifne dune unzoo donózin ninzun ꞌet huwa za Paul ꞌaidilhꞌai.