Acts 23 - Yak'usda Ooghuni

Paul nahíyilhne bubut usyin

¹ Paul nahíyilhne bubut usyin Paul soo cho ꞌubunilhꞌen ꞌinkꞌez ubúlhni, “Sulhutsinkene neyo tsꞌe oogha tꞌetsꞌoninzun-i ꞌi gha Yakꞌusda but ꞌahoolhyiz wheni be khusna-i tsꞌihꞌun unꞌa ꞌustꞌoh.”

² Lubret ꞌukꞌenus díztiꞌ-un, Ananias, ꞌen Paul zih usyinne hize hookuk ꞌubulhni.

³ ꞋEt Paul uyúlhni, “Yakꞌusda ꞌen cha la nyunookuk. Sih dutsun-i nadistlꞌus-i leꞌ ꞌintꞌoh whe nyo ꞌet sinda ꞌinkꞌez ndai la Yakꞌusda ye nébalhúhizyeꞌ-i, ꞌi gha sba nahutanyeh ꞌet hoontsꞌi sonookuk huwa bilhꞌa, ꞌet whuz unꞌa Yakꞌusda ooghuni kꞌuninyis wheꞌ dini!”

⁴ Ndunne dune Paul zih nudilhyanne ꞌuhuyúlhni, “Ndun Yakꞌusda oolubret ꞌukꞌenus díztiꞌ-un ooba dzoh ꞌudinja.”

⁵ ꞋEt Paul ꞌutni, “Sulhutsinke ꞌaw tꞌéoonuzúszun ꞌen lubret ꞌukꞌenus díztiꞌ-un ꞌuntꞌoh. Yakꞌusda ooghuni ꞌukꞌu nusguz-i kꞌut ndutni, ‘Nohmoodih ꞌen dzoh tsꞌe ooghu yaoolhduk junih.’”

⁶ ꞋEt Paul ꞌubunilhꞌen ꞌilhozdílne whulohne Sadduceene ꞌuhintꞌoh ꞌinkꞌez whulohne cha Phariseene ꞌuhintꞌoh whe la tube cho bubulh yátilhduk, “Sulhutsinke si cha Pharisee ꞌustꞌoh! Pharisee yeꞌ usdli, ꞌinkꞌez sba ꞌalha ꞌuhoontꞌoh yaidlane dunáhudutádulh ꞌet huwa ꞌandit sba nahutideh-un huba susda!”

⁷ ꞋEt ndúdija whe Phariseene ꞌinkꞌez Sadduceene te lhéwhehundunidulh ꞌet huwa ꞌilhozdilne nawh ꞌuhudija suliꞌ.

⁸ ꞋEt Sadduceene yaidláne dunahudutádulh ꞌinkꞌez lizas cha, nudúdehne cha hoonli ꞌet ꞌaw buba ꞌálhaꞌ lheꞌhóotꞌoh, ꞌet hoontsꞌi Phariseene nahooltꞌoh ꞌet buba ꞌálhaꞌ hoontꞌoh.

⁹ ꞋEt ꞌon nus ꞌulcho-i be ꞌa whe húnildzul ꞌinkꞌez Moses ooghuni ꞌukꞌu néyuzguz-i hodulhꞌehne, Pharisee didowhne, ꞌenne dodindil ꞌinkꞌez tube cho whuchꞌa ꞌuhutni, “Ndun dune ꞌaw hoontsiꞌ-un ooghú nalhtsꞌuhóoꞌal. Lizas tilah kꞌus nududeh-i tilah yulh yálhduk whutilah ꞌutni! ꞋEt huwa Yakꞌusda bulh dulhyoh ꞌuzdooniꞌ ꞌaitꞌoh.”

¹⁰ Whuz tube lhdulhyoh ꞌuhutni kꞌet, Roman lhuganne moodih whénilhjoot Paul yahayidólhchꞌoolh la ninzun ꞌinka dulhuganne Paul bugha ha náhuyoltelh ꞌinkꞌez lhuganne dilhtsꞌi tsꞌe whuz hitoolhteꞌ ubúlhni.

¹¹ ꞋEt ꞌulhdzis za neMoodihti Paul yuzih usyin ꞌinkꞌez uyúlhni, “Ndo ꞌuduniltꞌi. Njan Jerusalem ntsꞌenꞌa la si sghun tsꞌihꞌun ubudániꞌ ꞌet Rome cha whuz unꞌa za ꞌudutánelh.”

Whulohne Lizwifne Paul hituzilhghelh hukwaꞌ huninzun

¹² ꞋEt ꞌom bun budadaꞌ whulohne Lizwifne ꞌilhúhozdil ꞌinkꞌez ꞌalhgoh nahúhizya whe nduhútni, “Lhéꞌtsꞌoosꞌal ꞌinkꞌez too cha lhtsꞌoosdnaiꞌ Paul tsꞌutuzilhghelh whutsꞌun.”

¹³ ꞋAlhgoh dit whunizyane ꞌon ꞌun ꞌuhuniltsuk ꞌenne hukwꞌu núhuhilhyeꞌ.

¹⁴ ꞋEt Lizwif lubret ꞌukꞌenus díztiꞌne ꞌinkꞌez butso whúdilhzulhne cha bugho nindil ꞌinkꞌez ꞌubuhútni, “Tsꞌiyawh ꞌalhgoh natsꞌúhizya ꞌaw hoonli lhtsꞌutisꞌulh Paul tsꞌutuzilhghelh whutsꞌun.

¹⁵ ꞋEt huwa ꞌandit ꞌet nohni ꞌinkꞌez nahíyilhne tubulh ndun Roman lhganne moodih ꞌen ootsꞌótlꞌa khuni uhꞌaih ꞌonilha Paul ndiz náhitoolhteꞌ ꞌon nus soo cho be ꞌutꞌen kꞌoh tꞌewhuntihzeh ꞌet wheni doohniꞌ la. ꞋEt wheni ooba lhazdootꞌeꞌ njan nenátidalh whutsꞌo la tsꞌuzoolhghelh,” hubuhútni.

¹⁶ ꞋEt hoontsꞌi Paul bulhtus ooyeꞌ ꞌen la khuna bundunátsꞌo ꞌinka lhuganne dilhtsꞌi tsꞌe oozya ꞌinkꞌez Paul dániꞌ.

¹⁷ ꞋEt Paul ꞌilhoghun neilhchuk-un, “ꞋAnih,” yudániꞌ ꞌinkꞌez uyúlhni, “Ndun chilh lhuganne moodih tsꞌun ílhtelh hoonliyaz yudutánelh.”

¹⁸ ꞋEt neilhchuk-un yílhchoot ꞌinkꞌez lhuganne moodih tsꞌu whe yalhti ꞌinkꞌez uyúlhni, “Paul ꞌadinꞌai-un, ꞌanih sulhni ꞌinkꞌez ndun chilh ntsꞌu tóosteꞌ súlhni, hoonliyaz nyudutánelh ꞌinka.”

¹⁹ ꞋEt nyoon lhuganne moodih yula ilhchoot ꞌinkꞌez disoh tsꞌe neínilhti ꞌinkꞌez yoodulhkut, “Dahoontꞌoh-un huwun sudutánelh?” yúlhni.

²⁰ ꞋEt uyúlhni, “Nyoonne Lizwif moodihne bunde nyuhóodútálhkut Paul nahíyilhne tsꞌun tolhteꞌ nyodutánelh, ꞌonilha ꞌon nus soo cho highu tꞌewhuntizeh, ꞌet wheni hudutinelh.

²¹ ꞋEt hoontsꞌi khun te uboozólhtsꞌaiꞌ junih! Dit whunizyane ꞌon ꞌun Lizwifne, ꞌenne ti hika óodilhtsꞌi, ꞌenne tsꞌiyawh hitizilhghelh whutsꞌun ꞌaw lheꞌhutisꞌulh ꞌinkꞌez too lhotisnel hutni whe nahúhizya. ꞋAndit ꞌaho ꞌuhutinelh huba lhahúdintꞌoh nyun nahútanyeh-un za ubahilhꞌi,” yúlhni.

²² ꞋEt lhuganne moodih ꞌutni, “Khun te ꞌuyoonne dóniꞌ junih, njan sudániꞌ-un huwun.” ꞋEt ꞌawet chilh whenáyalhꞌaꞌ.

Paul Felix yun moodih tsꞌu whe húyalhti

²³ ꞋEt ndun lhuganne moodih neilhchukne moodih nane, ꞌenne bukaꞌ daniꞌ ꞌinkꞌez ubúlhni, “200ne lhuganne lhábudahleh keyoh Caesarea tsꞌe tidulhne, lhtakꞌantꞌi whunizyane yeztli be nudilhne cha, ꞌinkꞌez 200ne sohtuz nudúlene cha, ꞌulhdzis de ꞌilho hooloh sadzi hukwꞌé hunintꞌo de atꞌen (9:00) ꞌet whe húdutadulh wheni lhahúdootꞌeꞌ.

²⁴ Paul cha yeztli ooba lhadáhleh soo cho ooghohleꞌ whe Felix, yun moodih, ꞌen ooghu yólhtelh.”

²⁵ ꞋEt lhuganne moodih yutsꞌo kꞌeyanguz-i ndutni,

²⁶ “Felix yun moodih díztiꞌ-un si Claudius Lysias ntsꞌó kꞌeꞌusges, hadih.

²⁷ Lizwifne ndun dune huyílhchoot ꞌinkꞌez hituzilhghelh ínleꞌ. Rome keyoh whutꞌen-un unli ꞌet whulh ꞌúdustsꞌo ꞌinka sulh lhuganne úschoot ꞌinkꞌez bugha hunaínuzti.

²⁸ Ndet huwa huyílhchoot ꞌet nahootásꞌalh ꞌinka bunahíyilhne tsꞌu whésti.

²⁹ ꞋAw hoonliyaz tankꞌus ꞌútꞌen-un ooghu nálhuwhúsꞌal datítsah kꞌus huwa ꞌátiltsꞌulh huba. ꞋAntsꞌi dukꞌunꞌa hiba nahooyeh hukwaꞌ hutni. ꞋEt huwa hichꞌaz yálhduk.

³⁰ ꞋInkꞌez ndet la Lizwifne ndun dune hituzilhghelh-un huwa yahulhduk sodániꞌ whe, ꞌaho ntsꞌu whesꞌaꞌ, ꞋInkꞌez mbene la yuchꞌaz yalhdukne cha, nyun whulh ntsꞌo tooyaꞌ ꞌubudúsni. ꞋAwet za.”

³¹ ꞋEt lhuganne dahóotꞌen ubúlhni te, ꞌoh te neꞌhustꞌen, Paul huyílhchoot ꞌinkꞌez ꞌet ꞌulhdzis za keyoh Antipatris huwhútni tsꞌe huyoolhti.

³² ꞋEt ꞌom bun lhuganne núdilhne tsꞌiyawh lhuganne dilhtsꞌi tsꞌe nahoosdil ꞌinkꞌez yeztli be ꞌútꞌenne za ꞌenne Paul bulh hútoodilh ha.

³³ ꞋEt keyoh Caesarea tsꞌe huyóolhti, ꞌet yun moodih cha yutsꞌó kꞌeyanguz-i hitlꞌá hayanꞌai, ꞌinkꞌez Paul cha hitlꞌa háyalhti.

³⁴ ꞋEt yun moodih nyoo yutsꞌo kꞌeyanguz-i yukꞌuyailhduk ꞌinkꞌez Paul oodulhkut, “Ntsꞌez de yun kꞌut haínya?” yúlhni. ꞋEt yun kꞌut Cilicia huwhútni tsꞌe haínya tꞌéoonanzin whe,

³⁵ ꞌet ꞌutni, “Nyoonne nchꞌaz yálhdukne whusahándil de, ꞌet la nyoozóstsꞌaiꞌ.” ꞋEt Paul Herod ooyoh whucho tsꞌe hitoolhteꞌ, ꞌinkꞌez higholeꞌ ubúlhni.