Acts 22 - Yak'usda Ooghuni

¹ “Sulh dunene, sulhutsinke, ꞌinkꞌez ꞌubákene, soo zúlhtsꞌai, ꞌandit nohbulh duba yanatizduk!” ubúlhni.

² ꞋEt Hebrew kꞌunꞌa bubulh yawhénilhduk hiditsꞌo whe ꞌon nus tꞌehudínel. ꞋEt Paul ꞌutni,

³ “Si Lizwif ꞌustꞌoh. Tarsus, Cilicia yun kꞌut whuzꞌai ꞌet whuzúsdli. Jerusalem nísyai, Gamaliel ꞌen whusodalhꞌeꞌ whe netsodaꞌne hikꞌúneꞌ ꞌutꞌen-i soo cho yusodalhꞌeꞌ. Nohni ꞌandit Yakꞌusda ba dahtꞌoh la, whuz unꞌa nohunduztꞌoh inleꞌ.

⁴ Mbene la Jesus unidúlhne tsꞌiyawh dahútitsah whutsꞌun bubezúsdla inleꞌ. Dune cha tsꞌekoo cha tsꞌiyawh ꞌabusdle ínleꞌ.

⁵ ꞋEt Lubret ꞌukꞌenus diztiꞌ-un ꞌinkꞌez tsꞌiyawh dune tso whudilhdzulhne, ꞌenne tsꞌiyawh tsꞌihꞌun ꞌudusni, ꞌenne cha la nohodóniꞌ, ndai la Lizwif didowhne Damascus dilhtsꞌine butsꞌó kꞌehuyanguz-i si stlꞌa húyanla ꞌi gha dune butsꞌú usyalh ubitáschulh ꞌinkꞌez lhuztih tlꞌool be ubutisghel ꞌinkꞌez Jerusalem tsꞌe dzoh nubotilhdzut wheni whuz whebusdlih ínleꞌ.”

Paul Jesus tsꞌu nálhꞌa-un huwu yalhduk

⁶ “ꞋEt ꞌoh whuya usyalh whe ꞌuhooja, ꞌawet Damascus whenghun dzetniz atꞌen khuntsul ndus de kwun ulhtus-i hadanat, ꞌinkꞌez snat núdiznat.

⁷ ꞋInkꞌez yun nadízduz ꞌinkꞌez ꞌet la whudustsꞌo ꞌinkꞌez nduwhutni-un whudustsꞌo, ‘Saul, Saul di ha dzoh sezínla whe ꞌintꞌen?’

⁸ ‘SMoodihti mbe inli?’ dusni whe ooduskut. ‘Jesus Nazareth whutꞌen-un usdli, si ꞌusilhꞌen sezínla,’ sulhni.

⁹ ꞋInkꞌez ndunne dune sulh nudilhne ndi kwun hiyanꞌen ꞌinkꞌez whe hunuljut ꞌet hoontsꞌi ndun sulh yatilhduk-un ꞌaw lhuhidítsꞌil.

¹⁰ ꞋEt ꞌudusni, ‘SMoodihti datísnelh?’ ꞋInkꞌez neMoodihti ꞌusúlhni, ‘Dunadindaih, ꞌinkꞌez Damascus tsꞌe inyalh ꞌinkꞌez ꞌet tsꞌiyawh nyodóniꞌ ndet Yakꞌusda ba datántꞌelh-un.’

¹¹ ꞋEt ꞌusja ndi kwun tube snat diznukw kꞌet whuzisꞌen susdliꞌ, ꞌinka ndunne sulh nudilhne sla hilhchoot ꞌinkꞌez Damascus tsꞌe suhoolhya.

¹² ꞋEt ꞌilhoghun dune Ananias huyúlhni-un, ꞌen Moses ooghuni ꞌukꞌu nusguz-i yukꞌúneꞌ ꞌutꞌen ꞌinkꞌez Lizwif Damascus whutꞌenne tsꞌiyawh hidílhtiꞌ.

¹³ ꞋEt sghu ninya whe szih usyin ꞌinkꞌez ꞌusúlhni, ‘Saul sulhutsin hoonꞌen naoodleꞌ!’ ꞋEt ndudija ibulh ꞌaho yutásꞌen ꞌinkꞌez tísꞌen.

¹⁴ ꞋInkꞌez ndutni, ‘Netsodaꞌne buYakꞌusda ꞌen ꞌutahányalhti Yakꞌusda be ꞌutꞌen kꞌoh tꞌéoononzeh ꞌinkꞌez Jesus Christ ꞌen tsꞌihꞌun unꞌa yuba ꞌutꞌen-un cha onꞌen ꞌinkꞌez dichꞌoh cha nyulh yaóolhduk ha.

¹⁵ ꞋEt nyun tsꞌihꞌun ndun Jesus ghun ubudutánelh ndet la honꞌen ꞌinkꞌez whudántsꞌo-un huwun.

¹⁶ ꞋInkꞌez di ha ꞌon ꞌun huba silhꞌi? Dudinyaih ꞌinkꞌez too beꞌ ilneh ꞌinkꞌez ꞌen yé ulhtus-i gha nlubeshi nyunaoodeh neMoodihti booziꞌ gha!’”

Paul, Yakꞌusda ꞌudun yun kꞌut tsꞌe tilhꞌaꞌ

¹⁷ ꞋEt Paul ꞌon ꞌun ubúlhni, “ꞋEt Jerusalem tsꞌe whenásja ꞌinkꞌez nohlugliz whucho tenadusdli whutoh ꞌet njan senghun néwhultsꞌut,

¹⁸ whe neMoodihti ꞌen nusꞌen ꞌinkꞌez ꞌusúlhni, ‘Soo ꞌa njan Jerusalem whuchꞌa nasindaih. Si sghun yailhdúk-un ꞌaw nyuhoozólhtsꞌaiꞌ ꞌaitꞌoh ꞌet huwa.’

¹⁹ ꞋInkꞌez ꞌudusni, ‘NeMoodihti, soo cho tꞌehonínzun lugliz totsuk whe mbe la nyun ooba ꞌalhaꞌ ꞌuntꞌohne tsꞌiyawh ubuschuk ꞌinkꞌez dzoh nubusdzut inleꞌ.

²⁰ ꞋInkꞌez Stephen nyun nghun dune bubulh yálhduk ꞌet hukwa hizilhghi whe ꞌoh daꞌ si cha ꞌet susyin inleꞌ, sba tsꞌihꞌun ꞌuhutꞌen. Mbene la yuzilhghine buluglok nahuyitsꞌuz-i buba ooghusdli.’

²¹ ꞋInkꞌez neMoodihti ꞌusúlhni, ‘Inyalh, nilhdzaꞌ ꞌudun yun kꞌut whutꞌenne butúz nyutisꞌalh!’”

²² ꞋEt dune ꞌilhozdílne Paul huyoozílhtsꞌai ꞌet hoontsꞌi ꞌet ndúdija whe soo duyiz tꞌahúzulh whe ꞌuhutni, “Nalhtelh, sulhghe, ꞌaw hoonaꞌ huba lheꞌítꞌoh!”

²³ Soo ꞌuhultús-un whe dunaih kꞌuhídutulchꞌoolh ꞌinkꞌez huske kꞌet lhez cha do hútutsuk.

²⁴ ꞋEt Roman lhuganne moodih Paul lhuganne dilhtsꞌi tsꞌe nahitoolhteꞌ ꞌinkꞌez huyoolhtsas whe huyoodolhkut ndet huwa ndunne Lizwifne huyúlh ꞌaldzul ubúlhni.

²⁵ ꞋEt hoontsꞌi ꞌawet huyootalhtsus wheni huyulhghel whe ndun Paul huwunli-un, ꞌet usyin ꞌen ꞌulhni, “ꞋEt nghá whuntꞌai whe ꞌintꞌen, Roman yun kꞌut whutꞌen-un ꞌaw nintaꞌuntꞌen hukwa ooba nalhuhídel ꞌet hoontsꞌi ootalhtsus hukwaꞌ ninzun?”

²⁶ ꞋEt ndun huwunlí-un whudántsꞌo whe lhuganne moodih yughu ninya ꞌinkꞌez yoodulhkut, “Daintꞌen whe ꞌintꞌen? Ndun dune Rome yun kꞌut whutꞌen-un ꞌúntꞌoh!” yúlhni.

²⁷ ꞋInka dichꞌoh lhuganne moodih Paul yughu ninya ꞌinkꞌez yoodalhkut, “Rome whutꞌen inli eh?” “A,” ni Paul.

²⁸ ꞋEt lhuganne moodih ꞌutni, “Si lhai whe sooniya hukwꞌelha susi whe Rome whutꞌen-un susdliꞌ whe ꞌustꞌoh.” ꞋInkꞌez Paul ꞌutni, “Si ꞌet whuzúsdli ꞌet huwa whuduneꞌ usdli.”

²⁹ ꞋEt ndunne dune mbene la Paul oodutalhkutne ꞌaho hichꞌa nasdil ꞌinkꞌez ndun lhuganne moodih tꞌéoonanzin Paul Rome yun kꞌut whutꞌen-un ꞌúntꞌoh ꞌinkꞌez lheꞌyínla yulhghel cha ꞌuyinla ꞌet huwa whénilhjoot.

³⁰ Ndun lhuganne moodih soo nahootáꞌalh hukwaꞌ ninzun ndet huwa Paul huyulh huske, ꞌinka ꞌom bun ꞌet Paul lhuztih tlꞌool hitsꞌa hanahayanla ꞌinkꞌez lubret díztiꞌne, nahíyilhne cha tsꞌiyawh ꞌilhuhódilh ubúlhni ꞌinkꞌez Paul bubut nénilhti.