Acts 21 - Yak'usda Ooghuni

Paul Jerusalem tsꞌe nunátidalh

¹ ꞋEt ꞌawet bughu nus natsꞌuski. ꞋEt tsꞌihyan lhunatsꞌuski ꞌinkꞌez Cos tsꞌe tsꞌoozki. ꞋEt ꞌom bun Rhodes nezninki, ꞌinkꞌez ꞌet whutsꞌun Patara tsꞌe tsꞌoozki.

² ꞋEt Phoenicia tsꞌe tsꞌutizkez-i, ꞌi be tsꞌandil ꞌinkꞌez uztizki.

³ Soo noo kꞌut Cyprus tsꞌonilhꞌen-un ꞌoh whuya ꞌintlꞌus tsꞌe nyoo ooghu lhutsꞌúzki, ꞌinkꞌez Syria yun kꞌut tsꞌe tsꞌoozki. ꞋEt keyoh Tyre ꞌet tsꞌi be haꞌ hutilelh whutoh ꞌet no ꞌuzdáltsꞌiꞌ.

⁴ ꞋEt Jesus Christ yugha hodulꞌehne bukaꞌ tsꞌoodulhkut whe nabutsꞌinla ꞌinkꞌez ꞌilhu lisman ꞌet buzih ꞌuzdáltsꞌiꞌ, Ndoni be Paul Jerusalem tsꞌe tóoyaꞌ junih huyúlhni.

⁵ ꞋAwet buzih lházduja, bugho whenátsꞌidil ꞌinkꞌez naztisdil whe tsꞌiyawh duꞌatkoo te ꞌinkꞌez duzkeh te nebulh lhunahusdil whe keyoh whuchꞌa natsꞌusdil. Taba ꞌet negwutsi be néznindil ꞌinkꞌez tenazdidli.

⁶ ꞋEt ꞌawet tsꞌiyawh lhkꞌenalhtsꞌudilꞌen ꞌinkꞌez tsꞌi be nátsꞌidil whe didut cha duyoh tsꞌe whenáhidil.

⁷ ꞋEt tsꞌikelh zaꞌ tsꞌutꞌen Tyre nus natsꞌuski whe Ptolemais tsꞌe tsꞌoozki. ꞋEt ꞌilhudzin ooba ꞌalha ꞌuhoontꞌohne buzih ꞌuzdáltsꞌiꞌ.

⁸ ꞋEt ꞌom bun dzin uztizdil whe Caesarea tsꞌe tsꞌoozdil. Khuni unzoo-i be yálhduk-un, Philip huyúlhni, ꞌen ootsꞌú tsꞌoozdil ꞌet oozih uzdutáltsꞌilh. ꞋEn la Jerusalem lhtakꞌantꞌine ꞌutꞌahályane, ꞌenne butoh ꞌilhoghun ꞌuntꞌoh.

⁹ ꞋInkꞌez Philip ꞌen la dine ootseꞌke, ꞌaw dune tꞌenuszun unline, ꞌenne la Yakꞌusda be nus hooꞌenne hinli.

¹⁰ Lhat dzin ꞌet ꞌuzdáltsꞌiꞌ whe ꞌilhoghun Yakꞌusda be nus hooꞌen-un, Agabus huyúlhni, ꞌen Judea yun kꞌut tsꞌe haínya.

¹¹ Neghu ninya whe Paul se yetsꞌú dilhꞌoo, ꞌi yutsꞌu ha yánla ꞌinkꞌez ꞌi be duke ꞌinkꞌez dula cha lhuyulhtlꞌoo ꞌinkꞌez ꞌutni, “ꞋEt Ndoni ndutni, ‘Jerusalem tsꞌe ndunne Lizwifne ndi se oochꞌeꞌ yinli-un whuz unꞌa huye hítilhghel, ꞌinkꞌez ꞌudun yun kꞌut whutꞌenne butlꞌa hítilhtelh.’”

¹² ꞋEt whulh ꞌúzduztsꞌai whe wheni cha ꞌinkꞌez ꞌuyoonne cha ꞌet dilhtsꞌíne Paul ooghu tezdudlih Jerusalem tsꞌe tooyaꞌ whuchꞌa.

¹³ ꞋEt ꞌuneúlhni, “ꞋEt di dahni wheꞌ dahni, ꞌahtso ꞌinkꞌez sdzi tsꞌodi ulhꞌi? Jerusalem sotilhghel ꞌet huba lhadústꞌoh, ꞌet hoontsꞌi ꞌon ꞌun Jesus Christ neMoodihti ꞌen ooba ꞌet datísah huba lhadústꞌoh wheꞌ ꞌustꞌoh.”

¹⁴ ꞋEt hoontsꞌi ꞌaw nekꞌoh tsꞌe lhéꞌinel ꞌinka, “Tꞌezdínel, ntsꞌenꞌa la neMoodihti hukwaꞌ ninzun kꞌunꞌa la ꞌahóneh,” tsꞌutni.

¹⁵ ꞋEt hukwꞌelhꞌaz ꞌatsulyaz ꞌet nazdáltsꞌiꞌ ꞌinkꞌez ndai la beꞌ tsꞌintꞌoh-i lhanázdinla ꞌinkꞌez Jerusalem tsꞌe naztisdil.

¹⁶ ꞋEt whulohne Jesus Christ yugha hodulꞌehne Caesarea whutꞌenne, ꞌenne cha nebulh hútizdil. ꞋEnne ndun dune oozih uzdutáltsꞌilh-un hitsꞌu néoozdla, Cyprus whutꞌen-un, Mnason huyúlhni, ꞌen ꞌudaꞌ whutsꞌun ooba ꞌalha ꞌuhoontꞌoh-un ꞌúntꞌoh.

Paul James tsꞌun nuséya

¹⁷ Jerusalem tsꞌe tsꞌoozdil whe, ooba ꞌalha ꞌuhoontꞌohne neunahunilhnih.

¹⁸ ꞋEt ꞌom bun dzin Paul nebúlhtizꞌaz James uztiꞌelh wheni, ꞌinkꞌez la tsꞌiyawh butso whudilhdzulhne, ꞌenne cha ꞌet hudilhtsꞌi.

¹⁹ ꞋEt Paul, “Hadih,” ubúlhni. ꞋInkꞌez tsꞌiyawh ntsꞌoh la ꞌudun yun kꞌut whutꞌenne butoh be ꞌutꞌen be Yakꞌusda neꞌustꞌen-un, ꞌet huwun ubulh náwhulnuk.

²⁰ ꞋEt hidántsꞌo whe tsꞌiyawh Yakꞌusda ba hodálhtiꞌ ꞌinkꞌez Paul ꞌuhuyúlhni, “Neulhutsin whunilhꞌen dáhoontꞌoh tube lhane Lizwifne ooba ꞌalha ꞌuhoontꞌoh suliꞌne hoonli ꞌinkꞌez tsꞌiyawh Moses ooghuni ꞌukꞌu nusguz-i soo cho hikꞌúneꞌ ꞌutꞌen.

²¹ ꞋEnne nyulh ꞌúhudantsꞌo ntsꞌenꞌa la Lizwifne ꞌudun yun kꞌut hudilhtsꞌi, ꞌenne whubodilhꞌeh. Moses ooghuni ꞌukꞌu nusguz-i hila dootnih, ꞌinkꞌez duzkeh hika dune unli-i, ꞌi kꞌut hubuhítꞌus-un, ꞌinkꞌez Lizwif kꞌunꞌa dune hinli-un cha ꞌetsul ꞌuhooneh whuz unꞌa hubodilhꞌeh hutni.

²² ꞋEt huwa njan whusainya huwun tꞌewhuntidzeh wheꞌ hoontꞌoh ꞌinkꞌez datsꞌóoneh suba?

²³ ꞋEt huwa neꞌúzduniꞌ te neꞌóntꞌen. Dine dune Yakꞌusda tsꞌun nahizyanne, ꞌenne njan nezih hudilhtsꞌi wheꞌ hintꞌoh.

²⁴ ꞋEnne bubulh ꞌíntꞌen ꞌinkꞌez butsꞌú nedindaih ꞌinkꞌez ntsꞌenꞌa la dunaꞌhuldoh nyun buba ꞌukꞌelháhoolhtsi, ꞌet la soo dutsi náhunoozo. ꞋEt ndínja de, ꞌet whuz unꞌa nyunchꞌoh Moses ooghuni ꞌukꞌu nusguz-i ookꞌúneꞌ ꞌintꞌen hunoozin la. ꞋInkꞌez daja nyuhútni-un buba ꞌalhaꞌ lheꞌwhudoosnih.

²⁵ ꞋEt hoontsꞌi ndunne ꞌudun yun kꞌut whutꞌenne ooba ꞌalha ꞌuhoontꞌoh suliꞌne butsꞌó kꞌeꞌtsꞌanguz ꞌinkꞌez ntsꞌenꞌa la ꞌuzdíja-un, ꞌet ubuzdániꞌ ndai la tꞌalh-i buyakꞌusda kꞌeltsi tsꞌu hítulhdilh oohꞌalh junih. Tsꞌekoo kꞌus dune bulh nintaꞌoohtꞌen junih. Khuna oozeꞌ ꞌúsguz-i ꞌinkꞌez ꞌuskaiꞌ bulhítsus-i oohꞌalh junih, ꞌinkꞌez ꞌuskaiꞌ cha oohꞌalh junih,” Paul hudániꞌ.

Paul lugliz whucho ꞌet huyílhchoot

²⁶ ꞋEt ꞌinka Paul nyoonne dine dune hubílhchoot ꞌinkꞌez ꞌom bun dzin ꞌet dunaꞌhuldoh ꞌet bubulh dunaꞌilde. ꞋEt ꞌawet bulugliz whucho danánja, ꞌet whe la ꞌawet Lizwifne kꞌunꞌa bunaꞌide. ꞋInkꞌez Lizwif lubretne ubudániꞌ dáwhuldzoh dzin ꞌet ꞌuhutitꞌelh njan ꞌet lhahódutileh whutsꞌun loodel kꞌut ꞌilhoghun hinli whe cha buba ꞌuhudutálhkꞌun.

²⁷ ꞋEt ꞌawet lhtakꞌantꞌit dzin ꞌetsul ꞌuwhutánelh whe, whulohne Lizwifne, Asia yun kꞌut tsꞌu haíndilne, Paul lugliz whucho ꞌet huyanꞌen. Whulohne ꞌilhozdilne tubulh lhba hoditꞌai whe Paul huyílhchoot.

²⁸ “Israel tsꞌu haindene, nela ꞌuhneh!” hutni whe huhuyih, “Ndun dune ꞌen ꞌuntꞌoh, whunílhcho nuya ꞌinkꞌez Israel ootsꞌu hainzutne Moses ooghuni ꞌukꞌu nusguz-i cha ꞌinkꞌez nelugliz whucho cha tsꞌiyawh whuchꞌaz yálhduk. ꞋInkꞌez ꞌandit ꞌudun yun kꞌut whutꞌenne cha nelugliz whucho dábuninla ꞌet whe neba me whulhtsi!” hutni.

²⁹ ꞋEt ndun dune Trophimus, Ephesus whutꞌen-un, Jerusalem ꞌet la Paul bulh naꞌas whe hinilhꞌen inleꞌ. ꞋEt Paul bulugliz whucho daínilhti huninzun ꞌinkaꞌ hutni.

³⁰ Jerusalem ndulcho whe dune buba ꞌuhótꞌeꞌ hooyal. Tsꞌiyawh ꞌalhgoh ꞌilhuhólhghaz, Paul huyílhchoot, ꞌinkꞌez bulugliz whucho ꞌet tenáhininguz. ꞋEt ꞌaho bulugliz whucho dánaꞌ dinkez.

³¹ Ndunne lhulh nudilhne Paul hizoolhghelh hukwaꞌ hutꞌen whe la lhuganne moodih hudániꞌ. “Jerusalem whutꞌenne tsꞌiyawh lhtahawhuntꞌai!” hiyulhni.

³² ꞋEt ꞌaho lhuganne moodih ꞌuyoonne moodih ꞌinkꞌez lhuganne cha hilhchoot ꞌinkꞌez ꞌilhozdílne butsꞌu whe hilghaz. ꞋEt ndunne dune lhuganne bulh ubotilhꞌen whe ꞌet Paul njan hiyedúlh-un ꞌetsul ꞌuhuyínla.

³³ ꞋEt lhuganne moodih Paul yutsꞌoozya, yílhchoot, ꞌinkꞌez nanki lhuztih tlꞌool be huyoolhghel hubulhni. ꞋInkꞌez uboodulhkut, “Ndun dune mbe whe ꞌuntꞌoh, ꞌinkꞌez daja whe nintaꞌuntꞌen?”

³⁴ ꞋInkꞌez ꞌilhozdílne tsꞌiyawh lhelhtsꞌun unꞌa ꞌuhutni whe huhuyih, ꞌon nus huyanꞌun haꞌ daniꞌ kꞌet lhuganne moodih dáhooja-un ꞌaw tꞌélhonízil. ꞋEt ꞌinka duduneꞌne Paul lhuganne dilhtsꞌi tsꞌe hitoolhteꞌ ubúlhni.

³⁵ Soo ookꞌut dughaíti tsꞌe huyoolhti ꞌet dune budádindil. ꞋEt ꞌon nus hiyulh húnilchꞌe, ꞌet huwa lhuganne hitilhti.

³⁶ Tsꞌiyawh huyunilwus ꞌinkꞌez ꞌuhúldzul whe, “Sulhghe!” hutni.

Paul duba yanalduk

³⁷ ꞋEt ꞌawet Paul lhuganne dilhtsꞌi tsꞌe hitilhti whe la lhuganne moodih bulh yátilhduk, “Nyulh yatisduk hukwaꞌ nuszun.” ꞋEt lhuganne moodih yúlhni, “Greek kꞌunꞌa yailhduk eh?”

³⁸ “ꞋEt de Egypt tsꞌe haínya-un dune ꞌen iloh lakw ꞌintꞌoh? Nyun tilah ꞌinja, ndunne 4,000ne lhuganne dudulh dune dzoh nuhulhdeh ubuzílhtsi? ꞋInkꞌez dune lhuhóotꞌih tsꞌe whuz buba whénya, nyun tilah ꞌintꞌoh?” yúlhni.

³⁹ ꞋEt Paul ꞌutni, “Si Lizwif ꞌustꞌoh. Tarsus, Cilicia yun kꞌut whuzꞌai, ꞌet keyoh whudíztiꞌ, ꞌet whustꞌen. Ndunne dune bubulh yatisduk-un, ꞌet sgha ooninꞌaih.”

⁴⁰ ꞋEt lhuganne moodih yugha óoninꞌai ꞌinka Paul dughaíti usyin ꞌinkꞌez dune buba núlhnih whe tꞌehudínel ꞌinkꞌez Paul Hebrew kꞌunꞌa bubulh yáwhenilhduk.