Acts 20 - Yak'usda Ooghuni

Paul, Macedonia ꞌinkꞌez Greece whulh doo cha za whuz nanátidalh

¹ ꞋEt ꞌawet ꞌetsul ꞌuhudíja whe, Paul, nyoonne Jesus Christ yugha hodulꞌehne, “ꞋAnih,” hubudániꞌ. Khuni budzi be óolhtus-i be bubulh yaílhduk ꞌinkꞌez, “ꞋAwet natisdalh,” ubúlhni. ꞋEt bughu whenája whe Macedonia tsꞌe whénya.

² ꞋEt lhat-un keyoh la whutoyalh whe dune ꞌoh whutꞌenne budzi oolhtus ha bubulh yálhduk hukwꞌelhꞌaz Greece tsꞌe oozya.

³ ꞋInkꞌez ta sanun ꞌet indaꞌ. ꞋEt whutsꞌun la Syria yun kꞌut tsꞌe tikelh huba lhadútneh whe Lizwifne hituzilhghelh huwu yahulhduk whulh ꞌúdantsꞌo, ꞌinka no Macedonia tsꞌe ꞌoh whéya lhunátidalh ninzun.

⁴ ꞋEt Sopater huyúlhni, ꞌen Pyrrhus ooyeꞌ, Berea whutꞌen-un, ꞌen la yulh nátistꞌaz, ꞌet Thessalonica whutꞌenne Aristarchus ꞌinkꞌez Secundus bulh cha ꞌet Derbe whutꞌen-un Gaius huyúlhni, ꞌinkꞌez Timothy cha ꞌet Asia whutꞌenne Tychicus ꞌinkꞌez Trophimus, ꞌenne cha.

⁵ ꞋEnne tsꞌiyawh nus netso whe hándil ꞌinkꞌez Troas ꞌet neba halhꞌeꞌ.

⁶ ꞋEt lhes lhuntíldoh-i ꞌutꞌalh-un, hukwꞌelhꞌaz ꞌet Philippi ꞌet nus natsꞌuski ꞌinkꞌez kwulat dzin inleꞌ ꞌet Troas ꞌet bughu natsꞌundil ꞌinkꞌez ꞌilhu lisman ꞌet ꞌuzdáltsꞌiꞌ.

Paul ꞌawet ꞌudekꞌez Troas whutꞌenne butsꞌun nunasja

⁷ ꞋEt lisman ꞌudechoo dzin ꞌet Jesus yugha hodulꞌehne lhunahosdil lhes tahídanyuz naꞌhititꞌulh huba. ꞋInkꞌez tuzniz whutsꞌun Paul dune hubulh yaílhduk ꞌom bun dzin bughu natidalh ꞌinka.

⁸ Dohyo tsꞌe ꞌilhutsꞌodulh-un lhai be hóotꞌen-i dizkꞌun.

⁹ ꞋInkꞌez ꞌilhoghun chilh, Eutychus huyúlhni-un, ꞌen la dadintꞌaz kꞌet ꞌet la hukwꞌusda. ꞋInkꞌez Paul yalhduk za ꞌutni ndun chilh Eutychus ꞌen dughu nantutih za ꞌutꞌen. ꞋUdekꞌez ꞌawet dughu nantisti whe tat lhando whuzꞌai tsꞌe dohyo ndus de whutsꞌun nadílduz. ꞋInkꞌez dazsai whe dunahidilhti.

¹⁰ ꞋEt Paul nyo whenya ꞌinkꞌez dushih béꞌ yilchoot, “Ooghuni uhli íloh ꞌawhuz khuna,” ubúlhni.

¹¹ ꞋEt ꞌinkꞌez ndo dohyo tsꞌe whe naja. Lhes tadányuz ꞌinkꞌez ꞌuhanꞌal. ꞋEt sa ha tíꞌalh whutsꞌun bubulh yaílhduk ꞌinkꞌez whenája.

¹² ꞋEt nyoon chilh khuna whe ooyoh tsꞌe whuz bubulh naóosja ꞌinkꞌez ꞌet huwa tube huhóontꞌiꞌ.

Paul Troas whutsꞌun Miletus tsꞌe oozki

¹³ ꞋEt nus butso tsꞌe tsꞌi tsꞌu nátsꞌoosdil ꞌinkꞌez Assos tsꞌe uztizki. ꞋEt Paul denáztilhtelh wheni, ꞌet ndutsꞌooneh neúlhni ꞌinkꞌez didut yun kꞌut lhutíyalh ni.

¹⁴ ꞋEt keyoh Assos ꞌet neghu nanja whe denátsꞌalhti ꞌinkꞌez keyoh Mitylene tsꞌe tsꞌoozki.

¹⁵ ꞋEt nus natsꞌuski ꞌinkꞌez ꞌom bun Chios whanchꞌaz ꞌet yatsꞌuzki. ꞋEt ꞌom bun ꞌet Samos no nutsꞌuzki ꞌinkꞌez Trogylium yatsꞌuzki. ꞋInkꞌez ꞌom bun ꞌet ꞌawet Miletus tsꞌe tsꞌoozki.

¹⁶ ꞋEt Paul ꞌen keyoh Ephesus ꞌoh whuya lhutíkelh hukwaꞌ ninzun tube ꞌa óodulni ꞌet huwa. ꞋAw Asia yun kꞌut oodaꞌ hukwa lheꞌnízun. Soo ꞌa cho Jerusalem tsꞌe ootáyalh hukwa ꞌutꞌen soo tilah Pentecost dzin, ꞌet neóoyaꞌ hukwaꞌ ninzun.

Ephesus ꞌet butso whudilhdzulhne Paul ꞌawet ꞌudekꞌez whe bubulh yaílhduk, ꞌinkꞌez bughu whenája

¹⁷ ꞋEt Miletus usda whutsꞌun Ephesus tsꞌe Jesus gha ꞌilhozdílne butso whúdilhdzulhne dudodódilh ꞌubulhni whe butsꞌo tlꞌa khuni inꞌai.

¹⁸ ꞋEt highu nindil whe ubúlhni, “Tꞌéoonáhzun dastꞌen whe nohtoh susda, ꞌudechoo dzin Asia yun kꞌut nenúsya whutsꞌun.

¹⁹ Soo yo ꞌúduduzdzun ꞌinkꞌez natsul tooꞌ hoonli whe neMoodihti be ꞌutꞌen kꞌoh ꞌuhoosꞌen, dzoh nuszut-un, ꞌet whutoh sghá whultsꞌut ndunne Lizwif sotuzilhghelh huwu yahulhduk ꞌet huwa.

²⁰ Nohnichꞌoh tꞌéoonáhzun whe nohla ꞌoostꞌen-un nohchꞌa hóostun hooloh whe nohbulh yásduk, dune bez cha ꞌinkꞌez nohyoh cha whunohodusꞌeh.

²¹ Lizwifne ꞌinkꞌez ꞌudun yun kꞌut whutꞌenne ꞌalhgoh tube cho bugha dísniꞌ Yakꞌusda tsꞌun dudeni nahondunooleh, ꞌinkꞌez Jesus Christ neMoodihti ꞌen buba ꞌalhaꞌ yotꞌeꞌ.

²² ꞋInkꞌez ꞌandit tube cho whutsꞌu lhéꞌdustsꞌil whe Jerusalem tsꞌe tisyalh. ꞋEt datísnelh-un ꞌaw tꞌéoonuzúszun.

²³ ꞋEt za tꞌéoonúszun, keyoh totsuk Ndoni sgha khuni ꞌaꞌaih, ‘Dzoh nutánzut ꞌinkꞌez ꞌataltsꞌulh ꞌet mba whuzꞌai,’ súlhni.

²⁴ ꞋEt hoontsꞌi ꞌet ꞌantsꞌiꞌ ꞌuhoontꞌoh, ꞌinkꞌez si be khúsna-i cha sba ꞌantsꞌi unli, khun si ndi ꞌutꞌen sghaltsꞌút-i ꞌinkꞌez Jesus Christ neMoodihti ꞌutꞌen kꞌoh stlꞌa hónꞌai-un cha, hoonústꞌiꞌ whe lhaóodoosdleh khuni unzoo-i be Yakꞌusda ye únzoo-i ghun whúbunoostun ha.

²⁵ Soo tsꞌiyawh nohtoh nusúsya Yakꞌusda dune kꞌúneꞌ bulꞌen-un huwun nohbulh yásduk. ꞋEt ꞌawet tꞌéoonúszun ꞌaw doo cha za nasoohtꞌen ꞌaítꞌoh.

^26-27 ꞋAw Yakꞌusda ghun nohdutásnelh-un nohchꞌa hóostun iloh whe nohtoh usdaꞌ. ꞋEt huwa ꞌandit dzin soo cho nohdúsni, ꞌilhoghun hoontsꞌi kwuncho yo tsꞌe whénya de, ꞌaw si sgha iloh ꞌutinelh.

²⁸ ꞋEt huwa nohni cha soo cho khohdleꞌ ꞌinkꞌez ndai la Yakꞌusda be ꞌusbai Ndoni ooghohleꞌ ha nohtlꞌábanla njan Yakꞌusda gha ꞌilhozdílne, ꞌenne ꞌusbai ghunline bubahli, duzkaiꞌ be duchꞌeꞌ ꞌubulhtsi inleꞌ ꞌet huwa.

²⁹ Tꞌéoonúszun whenásja de, dune untsiꞌne, yus huske-i kꞌunꞌa ꞌuntꞌohne, ꞌenne nohtoh nehútidulh, ꞌinkꞌez nohóduntálhdah, ꞌinkꞌez ꞌaw nohghaꞌ holeꞌ ꞌaitꞌoh.

³⁰ ꞋInkꞌez ꞌilhudzin whusaóotiltsꞌulh nohtuhaíndilne dune, ꞌenne buba hodulꞌehne ubahanooꞌah whe la nohchꞌaz nahoolꞌah ꞌinkꞌez tsꞌu nebodolyelh.

³¹ ꞋEt ꞌinka nohdúsni, huwahli ꞌinkꞌez whunaoolhnih, lhat snatsúl tooꞌ hoonli whe dzin ꞌinkꞌez ꞌulhdzis ꞌi bulh ꞌilhone ꞌahli whe tat yus kꞌut ꞌet whunohodisꞌeꞌ.

³² ꞋInkꞌez, sulhutsinke, ꞌandit ꞌet Yakꞌusda ꞌinkꞌez ooghuni kꞌúneꞌ oohtꞌen-un cha ootlꞌánóhisdla. ꞋEt whe nohdzi ꞌon nus úlhtus nohtilhtselh, ꞌinkꞌez Yakꞌusda ba ꞌudun nelyane butoh, ndet Yakꞌusda ꞌudun nohba neooninꞌa-un, ꞌet nohgha whútaltsꞌulh.

³³ ꞋAw ꞌuyoonne buzooneya, silver kꞌus gold cha, kꞌus bunaih te butsꞌu dalheiduzni.

³⁴ Nohnichꞌoh tꞌéoonáhzun ndi sichꞌoh sla be ꞌustꞌen. ꞋInkꞌez súlh nudilhne hikꞌu huna-i huye ndunidzit-i tsꞌiyawh bubaꞌ yusꞌen.

³⁵ ꞋInkꞌez tsꞌiyantsuk whunóhnistan whe ndutsꞌútꞌen ꞌi be mbene la ꞌaw ootꞌen ꞌaitꞌohne, ꞌenne bulaꞌ tsꞌootꞌen. Jesus neMoodihti daja ni ꞌet whunatsꞌoolnih, ꞌet njan ndutni, ‘Huwaꞌ tsꞌaꞌaih te negha ꞌúltsuk-un whanus hoonzoo wheꞌ hoontꞌoh.’”

³⁶ ꞋEt Paul ndudaniꞌ whe, tsꞌiyawh bubulh dugwutsi be nenínya ꞌinkꞌez hubulh tenadidli.

³⁷ ꞋEt tsꞌiyawh hutso ꞌinkꞌez dushih beꞌ huyoltun whe, “Soo cho khondleꞌ,” huyúlhni.

³⁸ “ꞋAw ꞌon ꞌat nasulhtuzihtꞌel,” ꞌubulhni whe bubulh yaílhduk ꞌet huwa tube cho budzi únduda ꞌinkꞌez tsꞌi ustan whutsꞌun huyúlh nunahusdil ꞌinkꞌez kꞌenahidilꞌen.