Acts 2 - Yak'usda Ooghuni

Ndoni ooba ꞌálhaꞌ hoontꞌohne, buyudíltsꞌut

¹ ꞋEt Lizwif budzenis whuti, Pentecost huwhútni-un, whusahóoltsꞌut whe tsꞌiyanne Jesus ooba ꞌalha ꞌuhoontꞌohne ꞌilhoghun yoh hudilhtsꞌi.

² Khuntsul ndo yatꞌah tsꞌe ꞌuhuduztsꞌai ꞌantsꞌi nilhtsꞌi cho diltsꞌulh leꞌ whutni. ꞋInkꞌez nyo yoh hudilhtsꞌí-un ndulcho whudutni.

³ ꞋInkꞌez la ꞌantsꞌi kwun ndultꞌoh-i hitilhꞌen ꞌinkꞌez lhawh tizkat whe yoh dilhtsꞌíne ꞌilhoghun hinli whe bukꞌé dinkat.

⁴ ꞋEt dilhtsꞌíne tsꞌiyawh Ndoni buyudíltsꞌut ꞌinkꞌez khuni whutsodaꞌ tꞌehinúszun-i be yawhehúnilhduk, ꞌet Ndoni bugha óoninꞌai ndo dooniꞌ ha.

⁵ ꞋEt ꞌawet lhane Lizwifne, Yakꞌusda yunidúlhne hinli Jerusalem húdilhtsꞌi lheldoh keyoh tsꞌe ha hándilne.

⁶ ꞋEt keyoh whutꞌenne ꞌantsꞌi whudutni ꞌet huwhudántsꞌo ha, ꞌilhuhozdil lhelhtsꞌun keyoh whutꞌenne bughuni be bubulh yáwhehunilhduk tube whe bughá ꞌunjaz.

^7-8 Buba hooncha ꞌinkꞌez ꞌuhudutni, “Ntsꞌenꞌa ꞌuwhutátꞌelh? Ndunne Galilee whutꞌenne lheꞌhutni nekꞌuyáhulhduk wheni nekꞌunꞌa ubuzditsꞌo,” hutni.

⁹ “Wheni Parthia, Media, ꞌinkꞌez Elam whutꞌenne tsinli. Mesopotamia whutsꞌun, Judea ꞌinkꞌez Cappadocia whutꞌenne cha tsinli. Pontus whutsꞌun, ꞌinkꞌez Asia tsꞌu haíndilne cha tsinli.

¹⁰ Phrygia whutsꞌun, ꞌinkꞌez Pamphylia whutꞌenne cha tsinli. ꞋEt Egypt whutsꞌun, ꞌinkꞌez Lybia whunat Cyrene whuzih whutꞌenne cha, whulohne cha Rome tsꞌe ha tsꞌándil.

¹¹ ꞋAlhgoh Lizwifne ꞌinkꞌez ꞌudun yun kꞌut whutꞌenne, mbe la Lizwif tsꞌu nálhyane, netoh whulohne cha Crete ꞌinkꞌez Arabia tsꞌu haíndilne tsinli. ꞋEt hoontsꞌi dáhoolcho ꞌi be Yakꞌusda neꞌústꞌen-un, ꞌet ndúhoolcho whe whenichꞌoh neghuni kꞌunꞌa, whuz unꞌa ubuzditsꞌo,” hutni.

¹² Bughá neꞌusjaz ꞌinkꞌez ꞌuhootꞌeꞌ tsꞌe hooloh whe tsꞌiyawh lhuhoodulkut, “Dawhútanelh whe suba ꞌuwhutni?” lhodutni.

¹³ ꞋEt ꞌuyoonne, ꞌenne la Jesus ooba ꞌalhaꞌ ꞌuntꞌohne ghu hidloh, “Ndunne dune yatahinátnaiꞌ,” wheꞌ hutni hubuhútni.

Peter Lizwifne bubulh yálhduk

¹⁴ ꞋEt Peter whelꞌaꞌne butoh dudinya ꞌinkꞌez ꞌilhozdilne bubulh whe nduniltul, “Judea dunene ꞌinkꞌez nohni Jerusalem whutꞌenne cha tsꞌiyawh soo zúlhtsꞌai, ꞌet la nohdósniꞌ dáhooja njan ꞌet huwun.

¹⁵ Ndunne dune ꞌaw talhahunítnaiꞌ nohni ndunáhzun hoontsꞌi, tsꞌantꞌez ꞌandit tsꞌiya dzetniz whutso 9:00 ꞌuhoontꞌoh.

¹⁶ ꞋEt hoontsꞌi njan dawhútꞌen-un, ꞌet la Yakꞌusda be nus hónꞌen-un, Joel, huwu yailhduk whe ndutni,

¹⁷ ‘ꞋUdekꞌez dzin whusahónzut de, ni Yakꞌusda, ꞌet de syughi si sgha ꞌen tsꞌiyanne dune yududútiltsꞌulh. Nohuzkehke nus daóotanelh-un ꞌet huwu yahutilhduk. Nohchilke cha bube nghun newhúltsꞌuk-un tꞌehontázin. Nohduneti ꞌenne cha nótitus whe tꞌehóntizeh.

¹⁸ ꞋInkꞌez ꞌoh de sba ꞌutꞌenne, ꞌenne hoontsꞌi dune cha tsꞌekoo cha tsꞌiyawh syughi si sgha ꞌenne buye ídutiltsꞌulh ꞌet huwa ꞌenne cha nus daóotanelh-un huwu yahutilhduk.

¹⁹ Ndo yat ꞌet cha ꞌinkꞌez ndi yun kꞌut cha huwa ꞌítꞌen te néꞌwhutisꞌen. ꞋEt ꞌuskaiꞌ cha, kwun cha, ꞌinkꞌez lhut lhai cha whutáleh.

²⁰ Sa cha tsálhgus yudútiltsꞌulh ꞌinkꞌez ꞌulhdzis oozaꞌ cha ꞌuskaiꞌ kꞌunꞌa dulkꞌun tileh, ndet la whéwhunujut ꞌinkꞌez whudíztiꞌ dzin neMoodihti whusatíyalh ꞌet whutso ꞌuwhutánelh.

²¹ ꞋEt ndet la whusahónzut-un, ꞌet whusaóotiltsꞌulh mbene la neMoodihti hudutijih hitsꞌu hukwa ꞌutnine, ꞌenne hudutijih.’”

²² Peter ꞌet cha ndutni, “Israel ootsꞌu hainzutne sghuni soo cho oozúlhtsꞌai, Jesus Nazareth whutꞌen-un, Yakꞌusda nohtsꞌítilhꞌaꞌ-un, ꞌen Yakꞌusda gha huwa ꞌítꞌen teneꞌútꞌen, ꞌet whe whunóhnilhtun njan nohtoh ꞌuhootꞌen ꞌet huwa tꞌewhunáhzun.

²³ Yakꞌusda nanínízut ꞌinkꞌez ꞌudaꞌ tꞌeooninzun-un, ꞌi be ꞌudaꞌ Jesus nohtlꞌa tíltelh néwhuninꞌai. Nohni nohgha lubeshi ꞌulhꞌenne Jesus tulalhgus ꞌuhídunilhtꞌo ꞌet whe súlhghi.

²⁴ ꞋEn Yakꞌusda nahuyílhnaꞌ. Be datsꞌútsaih-i yuchꞌa nilde, ꞌaw ꞌilhiz daootsah huba lheꞌhóotꞌoh ꞌet huwa.

²⁵ ꞋEt ꞌudaꞌ David yughu yailhduk ínleꞌ whe ndutni, ‘ꞋAhoolhyiz neMoodihti szih nusꞌen. Nailhni tsꞌunkꞌus szih usyin dzoh noszut whuchꞌa.

²⁶ ꞋEt huwa ꞌahoolhyiz sdzi hóontꞌiꞌ, ꞌinkꞌez whuníni bulh cha yasduk, ꞌinkꞌez si ꞌatsul yinka susda. Datíssah de ꞌaw whénoozjut ꞌaítꞌoh.

²⁷ ꞋEt whe natnilh keyoh si szul ꞌaw ꞌet neóolhtelh ꞌaítꞌoh ꞌinkꞌez Ndun tsꞌihꞌun ꞌúntꞌoh-un ꞌaw ooyustꞌe oolhjut ꞌaítꞌoh.

²⁸ ꞋIlhiz khutisnalh-un, ꞌet whusúnilhtan. Sulh ꞌíntꞌoh ꞌet huwa hoonústꞌiꞌ sutalhtselh.’”

²⁹ Peter ꞌon ꞌun cha ndutni, “Sulh dunene ꞌinkꞌez sulh ꞌuntꞌohne David netsodaꞌ-un keyoh whuduchun unlí-un, ꞌen ghun tsꞌihꞌun unꞌa whunóhnoostun hukwaꞌ nuszun. David dazsai ꞌinkꞌez ꞌuháyálhti ꞌinkꞌez ootsꞌun kꞌut ꞌawhuz nezih whuzꞌai.

³⁰ ꞋEn Yakꞌusda be nus hóoꞌen-un ꞌuntꞌoh ꞌinkꞌez Yakꞌusda ye yútsꞌu nahizya tꞌeinínzun. ꞋInkꞌez Yakꞌusda yuba néwhuninꞌai whe yúlhni, ‘David ootsꞌu haínzut-un, ꞌen ꞌilhudzin David kꞌunꞌa ookwꞌutsꞌuzda cho diztiꞌ-i kꞌutidalh,’ ꞌen Christ ꞌuntꞌoh.

³¹ David nus hónꞌen whe Christ dunádutádalh ꞌet huwu yailhduk whe ndutni, ‘Yaidlane toh ꞌaw néyolhtelh ꞌaítꞌoh, ooyustꞌe cha ꞌaw oolhjut ꞌaítꞌoh.’

³² ꞋEt ndun Jesus ꞌen dazsai whe Yakꞌusda nahuyílhnaꞌ inleꞌ ꞌinkꞌez wheni oogha hodulꞌehne tsꞌiyawh khuna whe tsꞌanꞌen ꞌet huwa. ꞋAlhaꞌ nahítnaꞌ tꞌetsꞌonínzun.

³³ Ndo yakꞌuz ꞌukꞌenus whudíztiꞌ-un, ꞌet Yakꞌusda oonailhni tsꞌe natlꞌa idalhdaꞌ ꞌinkꞌez netsꞌú yoozi-i, ꞌi gha Yakꞌusda duYeꞌ yutlꞌa hónꞌai. ꞋInka ꞌen Ndoni netsꞌítilhꞌaꞌ ꞌinkꞌez neyudíltsꞌut. ꞋInkꞌez ꞌalhaꞌ ꞌuntꞌoh ꞌandit dzin ndi ꞌi oozúlhtsꞌai ꞌinkꞌez nulhꞌen.

³⁴ ꞋAw David yakꞌuz nulhiyal, ꞌet hoontsꞌi njan ndutni, ‘Moodihti ꞌen sMoodihti ꞌet ndúyulhni, “Njan nailhni tsꞌe sghu sinda,

³⁵ Ndet la nchꞌaz ditnine buchꞌaꞌ nus de hukwꞌélhꞌaz ꞌet la ꞌilhiz bumoodih ꞌonleꞌ.”’

³⁶ ꞋEt huwa Israel ootsꞌu hainzutne tsꞌiyawh tꞌehonozin, ꞌalhaꞌ ndun Jesus tulalhgus undunulhtꞌó-un, ꞌen Yakꞌusda Moodihti ꞌinkꞌez Christ yulhtsi.”

³⁷ ꞋEt Peter hidántsꞌo whe soo tsꞌihꞌun budzi tꞌaíznai. ꞋInkꞌez Peter ꞌinkꞌez ꞌuyoonne whelꞌaꞌne bulh hubuhoodulhkut, “Neulhutsinke, Peter nedaniꞌ-un huwun dáztinelh?”

³⁸ ꞋEt Peter ꞌubulhni, “ꞋIlhone ꞌahli whe lhtꞌananahdilh ꞌinkꞌez Jesus Christ booziꞌ gha too be ꞌúlhneh. ꞋEt nohlubeshi nohunaoodeh ꞌinkꞌez la Ndoni nohyudóoltsꞌit.

³⁹ Mbene la Yakꞌusda neMoodihti bukaꞌ dutinelhne, ꞌilhone ꞌahli whe Ndoni nohtsꞌú yoozi inleꞌ, nohuzkeh cha ꞌinkꞌez nilhzaꞌ yun kꞌut whutꞌenne, ꞌenne hoontsꞌi.”

⁴⁰ ꞋEt Peter saꞌ whe bubulh yálhduk ꞌinkꞌez buba nus whúnilhtꞌi ꞌinkꞌez ubúlhni, “ꞋUdudúlhyis! Ndunne ntsiꞌne buchꞌaz nálhꞌah, ꞌinkꞌez bubulh ꞌahtꞌen iloh, Yakꞌusda dzoh nubutilhdeh wheꞌ hoontꞌoh.”

⁴¹ Lhane huhóontꞌiꞌ whe highuni huyílhchoot ꞌinkꞌez too beꞌ hulya. 3,000ne atꞌenne, ꞌenne butsꞌúnne hudindil.

⁴² ꞋAhoolhyiz ꞌilhuhodulh, ꞌinkꞌez whelꞌaꞌne whubuhodulhꞌeh. Tsꞌiyawh ꞌalhgoh lhulh ꞌuhutꞌen. ꞋInkꞌez ꞌudekꞌelhaz hulhgha naꞌhitꞌal-un whe whunahulnih ha lhlaꞌ hutꞌalh ꞌinkꞌez ꞌalhgoh tenahududli.

Ntsꞌenꞌa la ooba ꞌalha ꞌuhoontꞌohne yinka hudilhtsꞌi

⁴³ ꞋEt whelꞌaꞌne huwa ꞌítꞌen te neꞌhustꞌen ꞌinkꞌez tsꞌiyanne nujut buyudankut.

⁴⁴ Ooba ꞌalha ꞌuhoontꞌohne tsꞌiyawh ꞌilhoh nuhúdilh ꞌinkꞌez huyutꞌí-i tsꞌiyawh huyé lhla ꞌutꞌen.

⁴⁵ ꞋIlhoghun yutꞌi-i be ꞌóokuk te ꞌi la tsꞌiyanne mbene la ꞌen dunidzítne, ꞌenne sooniya butahuyudzih.

⁴⁶ Lizwif bulugliz whucho ꞌet dzin totsuk ꞌilhuhodulh. Duyoh ꞌet ꞌalhgoh budzi únzoo ꞌinkꞌez huhóontꞌiꞌ whe lhla naꞌhutꞌulh.

⁴⁷ ꞋEt mbene la ooba ꞌalha ꞌuhoontꞌohne Yakꞌusda ba hodílhtiꞌ, ꞌinkꞌez Jerusalem whutꞌenne, ꞌenne cha butsꞌun hínzoo. Mbene la dijízne, ꞌenne neMoodihti dzin totsuk ꞌon nus ꞌuhuniltsuk bubulh tsíh.