Acts 19 - Yak'usda Ooghuni

Paul Ephesus ꞌet Yakꞌusda ooghuni be yalhduk

¹ ꞋEt Apolos ꞌen Corinth tsꞌe ꞌutꞌen whe, Paul ꞌen yun kꞌut nukéduzut whe Ephesus tsꞌe oozya. ꞋEt whulohne Jesus yugha hodulꞌehne bughu ninya,

² ꞌinkꞌez ꞌubulhni, “Nohba ꞌalha ꞌuhoontꞌoh suliꞌ whe Ndoni nohyudíltsꞌut inleꞌ eh?” “ꞋAw Ndoni hoonli tilah, ꞌaw whulhéꞌuzdustsꞌo!” huyúlhni.

³ ꞋInkꞌez, “Ndai be too beꞌ tsꞌulꞌih úlhchoot?” ubúlhni. “Be too beꞌ tsꞌulꞌih John dune too be ꞌulhꞌen-un yughu yalhduk-i” hutni.

⁴ ꞋEt Paul ꞌutni, “Be too beꞌ tsꞌulꞌih John dune too be ꞌulhꞌen-un yughu yailhduk-i, mbene la dulubeshi yuchꞌaz nálhꞌane, ꞌenne bubaꞌ yintꞌoh. ꞋInkꞌez Israel ootsꞌu hainzutne cha ubúlhni inleꞌ, ‘Mbe la skꞌelhꞌaz whusatíyalh-un, ꞌen nohba ꞌalha ꞌootꞌeꞌ,’ Christ ꞌen Jesus ꞌuntꞌoh.”

⁵ ꞋEt njan hodántsꞌo whe, Jesus neMoodihti booziꞌ be too beꞌ hulya.

⁶ Paul bukꞌudílhni whe ꞌet Ndoni buyudíltsꞌut. ꞋInkꞌez lhelhtsꞌun unꞌa khuni be yahalhduk, ꞌinkꞌez Yakꞌusda gha nus húhonꞌen.

⁷ Whunizyai ꞌon ꞌat nane dune atꞌenne ꞌuhintꞌoh.

⁸ ꞋEt tat sanun, dzin totsuk Paul Lizwif bulugliz tsꞌe kꞌunádaih ꞌinkꞌez lhníljut whe Yakꞌusda dune kꞌúneꞌ bulꞌen-un huwun whubunulhtun ꞌinkꞌez soo cho buba hukwꞌu nuhúlhyeꞌ.

⁹ ꞋEt hoontsꞌi whulohne bubeni dútsꞌo whe ꞌaw buba ꞌalhaꞌ lheꞌhóotꞌoh ꞌinkꞌez neMoodihti be ꞌutꞌen kꞌoh ꞌet ꞌilhozdílne toh whuchꞌaz yáhulhduk. ꞋEt ꞌinka Paul mbene la Jesus Christ yugha hodulꞌehne ubílhchoot ꞌinkꞌez bugho whenája. ꞋInkꞌez Tyrannus dune hodulhꞌeh bayoh whuzꞌai ꞌet dzin totsuk Yakꞌusda ghun whubunulhtun.

¹⁰ Nat naoodizut ꞌet la ꞌet za nduhútꞌen. ꞋEt huwa Asia yun kꞌut whuduneꞌne, tsꞌiyawh Lizwifne ꞌinkꞌez Greekne cha, Jesus neMoodihti ooghuni bulh ꞌuhúdantsꞌo.

Sceva ooyeꞌke ntsiꞌ-i nududeh-i hiyáhanahinooyoot hukwaꞌ hutꞌen

¹¹ ꞋEt Paul ꞌen be Yakꞌusda lheꞌwhustꞌen kꞌunꞌa huwa ꞌantꞌen teneꞌútꞌen.

¹² Dzezoh ꞌi hoontsꞌi but katsꞌulhbal te Paul ye ꞌítꞌeꞌ-i, ndudáne tsꞌu há yoolhchus te, ꞌaho ndudáne soo naꞌhutꞌih ꞌinkꞌez ntsiꞌ-i nudúdeh utꞌíne bughu whenahonuyukw.

¹³ Whulohne Lizwifne ꞌahoolhyiz nukéhududeh, ꞌinkꞌez ntsiꞌ-i nudúdeh ꞌutꞌine bughu whenáhonuyukw. ꞋInkꞌez neMoodihti booziꞌ gha cha ꞌuhootꞌen hukwaꞌ hutꞌen. ꞋEt ntsiꞌ-i nudúdeh ꞌuhuyúlhni, “Wheni ntsꞌuyútni, Paul yughu yalhduk-un Jesus Christ booziꞌ gha ooyáhanaindaih!” hutni.

¹⁴ Lhtakꞌantꞌine hinli ꞌilhoghun Lizwif lubret ꞌukꞌenus diztiꞌ-un, Sceva huyúlhni, ꞌen ooyeꞌke ꞌenne ꞌuhutꞌen.

¹⁵ ꞋEt nduhútni whe ntsiꞌ-i nududeh-i bubulh yátilhduk ꞌinkꞌez ꞌubulhni, “Jesus ꞌen tꞌenuszun, ꞌinkꞌez Paul cha ooghun tꞌéoonúszun, ꞌet hoontsꞌi nohni, mbe ꞌahli wheꞌ ꞌuhtꞌoh?”

¹⁶ Nyoon dune ntsiꞌ-i nudúdeh ooyudinda-un soo hoolhtus whe bube nínya. ꞋAw hichꞌaꞌ oolhdeh ꞌaítꞌoh. Tebudínla, ka ꞌubulhtsi ꞌinkꞌez bukꞌeꞌdutilhchꞌul ꞌinka yoh tenátsehuldil.

¹⁷ Tsꞌiyawh Lizwifne ꞌinkꞌez Greekne Ephesus dilhtsꞌíne whulh ꞌúhudantsꞌo whe tsꞌiyawh whé hunilhjoot ꞌinkꞌez Jesus neMoodihti booziꞌ ꞌon nus buba idíztiꞌ suliꞌ.

¹⁸ ꞋInkꞌez mbene la dune dedúle unlíne, lhane butoh ooba ꞌalha ꞌuhoontꞌoh suliꞌ. ꞋEt whusahándil ꞌinkꞌez tsꞌiyanne nalh khuna hahoolnuk.

¹⁹ Lhane mbene la dune dedúle huhóolhdzihne tsꞌiyawh ndi ꞌudustlꞌus higha ꞌutꞌen-i ꞌilhunahayozdla. ꞋEt ndi ꞌudustlꞌus oozooneya huyolhto whe $50,000 atꞌen suliꞌ. ꞋInkꞌez tsꞌiyanne nalh hidálhkꞌun.

²⁰ ꞋOn nus lhane Yakꞌusda ooghuni hidántsꞌo whe ꞌet Yakꞌusda ooghuni hoolhtus whe lhanne dune lhba hoditꞌai whe la Jesus hikꞌúneꞌ titꞌen.

Ephesus ꞌet lhtahuwhuntꞌai

²¹ ꞋEt ꞌoh te neꞌwhustꞌen hukwꞌelhꞌaz, Paul Ndoni nuyúlhꞌaꞌ whe Macedonia ꞌinkꞌez Greece buyun kꞌut ꞌoh whuya lhutíyalh ꞌinkꞌez Jerusalem tsꞌe ootáyalh, whuz unꞌa dudeni lhaidinla. “ꞋEt whuz oozúsya de, ꞌet Rome tsꞌe cha nutísyalh,” ni Paul.

²² ꞋEt ꞌinka nane yula ꞌutꞌenne, Timothy ꞌinkꞌez Erastus, ꞌenne dutso whébilꞌaꞌ Macedonia tsꞌe ꞌinkꞌez didut ꞌawhuz Asia yun kꞌut ꞌet ꞌatsul indaꞌ.

²³ ꞋEt ꞌoh daꞌ atꞌen Ephesus njan ntsꞌenꞌa la neMoodihti be ꞌutꞌen kꞌoh ꞌet huwun tube lhdulhyoh ꞌuhudutni suliꞌ.

²⁴ Ephesus ꞌet lugliz whuzꞌai. Ndi tsꞌeke kꞌeltsi, Artemis huyúlhni, hitsꞌu ténadudlih. ꞋIlhoghun dune, Demetrius huyúlhni, silver ulhꞌuz-un. Ndi tsꞌeke kꞌeltsi hitsꞌu ténadudli-un, ꞌen silver, ꞌi be yukꞌé neulhtsiꞌ. ꞋI la ꞌantsꞌi ꞌoh dunene díztiꞌ whe hiye butsꞌeꞌ hooket. Whuz unꞌa la sooniya lhai ꞌuhulhꞌen.

²⁵ ꞋEt huwa Demetrius yuba ꞌutꞌenne tsꞌiyawh, “ꞋAnih,” ubudániꞌ. ꞋUyoonne dukꞌunꞌa ꞌutꞌenne, ꞌenne cha ꞌinkꞌez ubúlhni, “Sulh dunene tꞌéoonáhzun ndi ꞌutꞌen ꞌi gha hoonzooꞌ tsꞌintꞌoh.

²⁶ Nohnichꞌoh whunulhꞌen ꞌinkꞌez whuduhtsꞌo ndun dune Paul daneh whe ꞌutꞌen, ‘Ndi neyakꞌusda dune ꞌayalhꞌen ꞌaw yakꞌusda lheꞌítꞌoh,’ neyúlhni. Lhane whe buba ꞌalha ꞌuhoontꞌoh ꞌubulhtsi, njan Ephesus ꞌinkꞌez Asia yun kꞌut ndulcho whe cha atꞌen buba ꞌalhaꞌ ꞌutni.

²⁷ ꞋInkꞌez neba húwa ꞌóodli suliꞌ. Njan sooniya wheꞌ tsꞌulhꞌen-un nintaꞌhotꞌen la. ꞋEt za iloh, njan neyakꞌusda Artemis oolugliz whucho hukwa lheꞌhunízun ooleꞌ la, ꞌinkꞌez dichꞌoh ye díztiꞌ-i cha la hoonli lhiloh ooleꞌ la. ꞋEn Asia ꞌinkꞌez yun kꞌut ndulcho ndun tsꞌeke neyakꞌusda hitsꞌun tenadudli.”

²⁸ ꞋInkꞌez ndunne dune ndi khuni hidántsꞌo whe tube ha hunílchꞌe whe ꞌultus-un ꞌuhúldzul ꞌinkꞌez ꞌuhutni, “Ephesus tsꞌuwhutꞌen neyakꞌusda Artemis ꞌen za neba díztiꞌ wheꞌ ꞌuntꞌoh!”

²⁹ ꞋEt keyoh ndulcho whe huwa lhtahawhuntꞌai. ꞋEnne ꞌilhoh nudilhne, ꞌenne la Macedonia whutꞌenne, nane Gaius ꞌinkꞌez Aristarchus hubuhútni, Paul bulh naꞌásne, ubuhúzgooh ꞌinkꞌez dune nuwhúlyeh huba whuzꞌai-un tsꞌe ubuhinoh whe whuz ubuhoolhti.

³⁰ ꞋEt Paul didutchꞌoh cha nus ꞌilhozdilne bubut netíyalh hukwaꞌ ninzun, ꞌet hoontsꞌi Jesus Christ yugha hodulꞌehne, “Dah!” huyúlhni.

³¹ Whulohne Asia yun moodihne, Ephesus dilhtsꞌine, ꞌenne la Paul ooyadánke hinli, ꞌenne cha hitsꞌo tlꞌa khuni inꞌai highu tedudlih whe dune nuwhúlyeh huba whuzꞌai tsꞌe tóoyaꞌ junih.

³² ꞋEt za ꞌilhozdílne ꞌawhuz lhtahuwhuntꞌai whe whulohne ꞌilhoghun za huwa ꞌuhúldzul ꞌinkꞌez oolohne cha ꞌudun huweꞌ hutni. ꞋEt kꞌus lhane ꞌaw tꞌehonúszun ndet huwa ꞌilhuhozdil.

³³ ꞋEt ꞌilhozdílne butoh, ꞌilhoghun dune Alexander huyúlhni-un, ꞌen Lizwifne nus bubut néhinilhti buba yaoolhduk wheni. ꞋEt dula be tꞌehudoosni hubulhni.

³⁴ ꞋEt hoontsꞌi ꞌilhozdílne ndun Lizwif ꞌuntꞌoh tꞌehinanzin whe, nat sadzi hukwꞌu hoonistꞌo-un whutoh ꞌon nus ꞌahúlzul wheꞌ hutni, “Ndun Ephesus ꞌet neyakꞌusda Artemis ꞌen za neba díztiꞌ wheꞌ ꞌuntꞌoh!”

³⁵ ꞋEt nyoon keyoh huba ꞌukꞌuneꞌ ꞌúguz-un ꞌilhozdílne ꞌetsul ꞌuhudija ꞌubulhtsi ꞌinkꞌez ꞌubulhni, “Ephesus whutꞌenne soo zúlhtsꞌai, tsꞌiyawh ndulcho whe tꞌehonínzun nekeyoh Ephesus ꞌet ndun neyakꞌusda Artemis oolugliz whucho ꞌet huwu tsinli wheꞌ hoontꞌoh, ꞌinkꞌez ndi tse díztiꞌ tsꞌeke kꞌeltsi unli whe ndus de yakꞌuz tsꞌe háltsꞌut ꞌi cha.

³⁶ ꞋAw dune whutsꞌoododlaiꞌne hooloh, ꞌet huwa tꞌeduzahni ꞌinkꞌez iloh te neꞌóohtꞌen junih!

³⁷ Ndunne dune ꞌaw lugliz whucho huweꞌ hutizdla iloh, ꞌinkꞌez neyakꞌusda cha chꞌaz yalhúhulhduk, ꞌet hoontsꞌi njan whusábilhla.

³⁸ Demetrius ꞌinkꞌez yuba ꞌutꞌenne ꞌuyoonne hoonli huwun bukꞌehúhootaꞌalh de, dzin dune ba nahudeh-un whuzꞌai, ꞌinkꞌez nahíyilhne cha ꞌet dilhtsꞌi. ꞋEnne bubut ꞌuhudooniꞌ da!

³⁹ ꞋEt hoontsꞌi, ꞌon ꞌun cha hoonli hukwaꞌ nahzun de, keyoh whutꞌenne ꞌilhodulh te, ꞌet la tsꞌihꞌun nohba nehóhꞌalh.

⁴⁰ Tube neba huwa ꞌóodli wheꞌ hoontꞌoh, ꞌandit dzin ꞌuhóoja-un lhtahuwhuntꞌai-un. Roman bumoodih wheni la nekꞌéhoꞌalh. ꞋAw ꞌet ndúhoneh huba lheꞌhóotꞌoh. ꞋAw di ha ꞌutsꞌuja ꞌuzdooniꞌ ꞌaítꞌoh.”

⁴¹ ꞋEt ndúdija hukwꞌelhꞌaz tsꞌiyawh yanahódilh ubúlhni, ꞌet whenáhidil.