Acts 17 - Yak'usda Ooghuni

Paul ꞌinkꞌez yúlh nudilhne keyoh Thessalonica ꞌet dzoh nubotilhdzut

¹ ꞋEt hidulh whuza keyoh Amphipolis ꞌinkꞌez Apolonia whutoh lhuhúzꞌaz, ꞌet keyoh Thessalonica tsꞌe hoozꞌaz. ꞋEt Lizwif bulugliz whuzꞌai.

² ꞋEt whutsodaꞌ neꞌútꞌen huwa Paul njan Lizwif bulugliz tsꞌe oozya. ꞋEt tat natsꞌulyis dzin whutoh ꞌet Yakꞌusda ooghuni ꞌukꞌu nusguz-i ghun whúbunoolhtun hukwa ꞌutni.

³ ꞋEt buba hukwꞌú nuhúlhyeꞌ Christ ꞌen ꞌutinelh dzoh nutizut, datítsah, ꞌinkꞌez nakhitátnalh. ꞋEt tsꞌihꞌun ꞌuhoontꞌoh buba hoolhꞌih, “Ndun Jesus ꞌandit ooghun nohbulh yásduk-un, ꞌen Christ ꞌuntꞌoh,” Paul ubúlhni.

⁴ ꞋEt whulohne buba ꞌalhaꞌ hooja whe Paul Silas bulh butsꞌú nehudindil whe lhane Greekne Yakꞌusda buba ꞌalhaꞌ ꞌuntꞌohne cha ꞌinkꞌez tsꞌekoo ꞌuntꞌohne lhane tsꞌiyawh butsꞌú nehudindil.

⁵ ꞋEt hoontsꞌi Lizwifne huweꞌ hoolnih ꞌinka ntsꞌiꞌne ti núdilhne, ꞌenne nabahálhdzoo ꞌinkꞌez lhtsꞌun nébodinla keyoh ndulcho whe whudutni buchꞌaz yáhalhduk-i be ꞌilhoghun dune, Jason huyúlhni, ꞌen cha ooyoh nintaꞌhonílhꞌen Paul Silas bulh nabuhólhtelh hukwaꞌ hutꞌen ꞌinkꞌez ꞌaz dune tsꞌun tébotalhtelh ꞌet wheni.

⁶ ꞋEt ꞌaw nalhubuhílhtel whe Jason ꞌinkꞌez whulohne ooba ꞌalha ꞌuhoontꞌohne te ꞌenne la huske bulh keyoh whumoodihne tsꞌú buhoolhtsus ꞌinkꞌez hudultul whe njan duhútni, “Ndunne dune yun kꞌut ndulcho whe nintaꞌhuwhulhꞌih ꞌinkꞌez ꞌawet njan nekeyoh cha ꞌet ndó titꞌelh wheni whusahándil,

⁷ ꞌinkꞌez Jason ꞌen duyoh ubuzdla. Tsꞌiyawh nelerwe ꞌukꞌénus diztiꞌ-un yugha néꞌulhꞌa-i kꞌuhunyis wheꞌ hutꞌen ꞌinkꞌez ꞌuyoon lerwe unli, ‘ꞋEn Jesus tsꞌutni,’ nehútni.”

⁸ ꞋEt ndi khuni ꞌi be tsꞌiyawh ꞌilhozdilne ꞌinkꞌez keyoh whumoodihne tubulh ndulcho ꞌantsꞌi whutsꞌodutni whe huwu yahalhduk.

⁹ ꞋEt keyoh whumoodihne, Jason ꞌinkꞌez ꞌonghohne cha tenáhutidulh wheni sooniya kꞌenáhudidzai ꞌet la bula nahuditni.

Paul, Silas bulh Berea tsꞌe whe bahalhꞌaꞌ

¹⁰ ꞋEt soo nadálhghel ibulh ooba ꞌalha ꞌuhoontꞌohne Paul Silas bulh keyoh Berea tsꞌe whe bahalhꞌaꞌ. ꞋEt whuz hoozꞌaz whe, ꞌet la Lizwif bulugliz tsꞌe daháninꞌaz.

¹¹ Nyoonne ꞌet whutꞌenne, ꞌenne Thessalonica whutꞌenne buba nus hinzoo. Ndi khuni butsꞌo tlꞌa idiltsꞌut-i soo hikaꞌ ninzun whe Paul huyoozílhtsꞌai, ꞌinkꞌez dzin totsuk Yakꞌusda ooghuni ꞌukꞌu nusgúz-i hikꞌu yalhduk hiyodoolꞌeh ha, ndi khuni Paul ye yálhduk-i ꞌalhaꞌ tilah ꞌuntꞌoh tꞌehontizeh hukwaꞌ huninzun ꞌet huwa.

¹² ꞋEt lhane whe ooba ꞌalha ꞌuhoontꞌoh suliꞌ. Greek tsꞌekoo ꞌuntꞌohne ꞌinkꞌez dunene cha.

¹³ ꞋEt hoontsꞌi Lizwif Thessalonica whutꞌenne whulh ꞌúhudantsꞌo keyoh Berea huwhútni ꞌet cha Paul Yakꞌusda ooghuni be bubulh yálhduk whe whuz huyoonizdil ꞌinkꞌez buchꞌa níntaꞌ huholhꞌen hukwaꞌ hutꞌen.

¹⁴ ꞋEt ꞌahoh ooba ꞌalha ꞌuhoontꞌohne Paul yatooꞌ ba tsꞌe whe náhuyalhꞌaꞌ ꞌet hoontsꞌi nahúltꞌo Silas Timothy bulh Berea ꞌawet hankeꞌ.

¹⁵ Ndunne dune Paul bulh ꞌujane keyoh Athens whutsꞌun huyúlhusúdil, ꞌet Berea tsꞌe lhtꞌanahunisdil. ꞋEt Silas Timothy bulh soo ꞌa cho dutsꞌun hutooꞌas ubúlhni whe butsꞌo tlꞌa khuni inꞌai, ꞌinka ꞌahoh hitsꞌu whinꞌaz.

Paul Athens ꞌet yalhduk

¹⁶ ꞋEt Paul keyoh Athens ꞌet Silas Timothy bulh buba sulhꞌi ꞌinkꞌez bukeyoh ndulcho whe buyakꞌusda kꞌeltsi za hoonli ꞌet whe Paul tube huwun oodzi unduda.

¹⁷ ꞋInka Lizwifne bulugliz tsꞌe, ꞌinkꞌez Greek tenadudline cha, ꞌinkꞌez whulohne dune ꞌantsꞌi ꞌaz ꞌoh nudilhne dune ꞌilhodulh-un cha, tsꞌiyawh dzin totsuk Paul nyoo buyakꞌusda kꞌeltsi ghun hubunoolhtun hukwa ꞌutni.

¹⁸ ꞋEt Epicureanne ꞌinkꞌez Stoicne dune hodulhꞌehne huwun huyulh yálhduk. Whulohne howu yahalhduk, “Ndun iloh te neꞌduniꞌ-un, daja dutinelh hukwaꞌ ninzun whe ꞌutni,” hutni. ꞋEt ꞌuyoonne cha hutni, “Ndun ꞌuyoonne buyakꞌusdane, ꞌenne bughu yalhduk dududli whe ꞌutni,” hutni. Paul, Jesus ꞌinkꞌez dunadija-un huwun bubulh yálhdak ꞌet huwa hutni.

¹⁹ ꞋInka Paul shusyaz, Mars huyúlhni, yo whudo huyúlh nenindil ꞌinkꞌez ꞌuhuyúlhni, “Ndi ꞌandit buneodilhꞌeh-i ooghu yailhduk soo cho tꞌetsꞌuntizeh hukwa ꞌuzninzun.

²⁰ Ndi ooghu yailhduk-i whulukhi uzditsꞌo hoontsꞌi ꞌaw tꞌeznuszun, ꞌet huwa soo cho tꞌetsꞌonoozeh hukwa ꞌuzninzun.”

²¹ ꞋEt keyoh Athens whutꞌenne ꞌinkꞌez ꞌutsꞌun keyoh whutꞌenne cha ꞌet whutꞌine, ꞌenne tsꞌiyawh ꞌandit ooghu yaduk-i huhoontꞌiꞌ whe ꞌahoolhyiz wheni huwu yahulhduk. ꞋEnne hoonínꞌenne hinli, ꞌinkꞌez ꞌantsꞌi tsꞌiyantsuk tꞌehontizeh hukwaꞌ huninzun.

²² ꞋEt Paul dune dilhtsꞌi-un shusyaz kꞌut, ꞌet ꞌilhozdilne buniz usyin ꞌinkꞌez ꞌubulhni, “Athens whutꞌenne nohnusꞌen tsꞌiyawh ꞌahoolhyiz nohyakꞌusda tsꞌun tenadahdli.

²³ ꞋEt ꞌowhuya usyalh whe nohloodel lheꞌultsuk nusꞌen. ꞋIlho loodel kꞌut ookꞌu neꞌúsguz ndutni, ‘Yakꞌusda tꞌenusdzun-un, ꞌen ba ꞌuntꞌoh.’ ꞋEn tꞌenuzuhzun whe ootsꞌun tenadahdli, ꞌen ꞌandit ooghun nohbulh yátisduk.

²⁴ Ndun Yakꞌusda tꞌénuzuhzun-un, ꞌen ꞌuntꞌoh, ndi yun kꞌut ꞌinkꞌez ndai ookꞌut ꞌuyintꞌoh-i tsꞌiyawh ꞌuyínla. Ndo yakꞌuz ꞌinkꞌez ndi yun kꞌut tsꞌiyawh whuMoodih unli, ꞌet huwa lugliz whucho dune ꞌuhoonla-un ꞌet lhídoh wheꞌ hoontꞌoh.

²⁵ ꞋEt ꞌinkꞌez dune buyiz huye khúna-i ꞌinkꞌez tsꞌiyaitsuk cha soo dichꞌoh za huwá yunle whe ꞌuntꞌoh. ꞋEt huwa ꞌaw dune ꞌuyinla-i yukalheꞌnizun.

²⁶ ꞋInkꞌez ꞌilhoghun dune ꞌen la toh tsꞌe za yun kꞌut didowhne tsꞌiyanne ꞌulya inleꞌ. Yakꞌusda nkede ndi yun dune ꞌutilelh ꞌinkꞌez ntsꞌe huwhutitꞌelh-un, ꞌet whutso tꞌewhunínzun. ꞋEt whe ndi yun kꞌut ndulcho whe huwhutꞌi suliꞌ.

²⁷ ꞋEt whuz unꞌa ꞌuja didut hika itóꞌen ꞌinka ꞌet dune hoos̱ꞌenne kꞌunꞌa ꞌoh hikudúlni de nahuyólhtelh tilah. ꞋEt hoontsꞌi Yakꞌusda ꞌaw nilhdzaꞌ neghulheꞌítꞌoh whe ꞌuntꞌoh.

²⁸ ꞋEt ‘ꞋEn gha dune tsinli ꞌinkꞌez tsꞌukhuna.’ ꞋInkꞌez whulohne nohtoh ꞌukꞌuneꞌ ꞌúguzne ꞌuhutni, ‘Wheni cha buzkeh ꞌutsꞌintꞌoh.’

²⁹ ꞋEt huwa wheni Yakꞌusda buzkeh tsinli de, ꞌaw ꞌukꞌeltsi kꞌunꞌa gold kꞌus silver kꞌus tse be ꞌúlya-i, ꞌi Yakꞌusda uznózen ꞌaitꞌoh. ꞋI tsꞌiyawh dune yuhoolhꞌai-i ꞌuntꞌoh.

³⁰ ꞋEt ꞌoh daꞌ dune tꞌehonúszun huwa Yakꞌusda dzoh nulhúbilhdzulh, ꞌet hoontsꞌi ꞌawet ꞌandit Yakꞌusda tsꞌiyanne dune ndulcho dudeni nahondunooleh ꞌubulhni.

³¹ ꞋEt ꞌilhudzin ꞌutahahónꞌai ndet ndi yun kꞌut ndulcho whe ye tsꞌihꞌun unꞌa ꞌuntꞌoh-i, ꞌi be dune ba nahutiyeh ha. Ndun ꞌilhoghun dune ꞌen dune ba nahutiyeh ha ꞌutahayálhti. ꞋEn dunaidilhti ꞌet huwa ꞌalhaꞌ ꞌet ndó tanelh.”

³² ꞋEt Paul hidántsꞌo ndun dune dunadija yughu yalhduk whe whulohne highudloh, ꞌinkꞌez whulohne ꞌuhutni, “Doo cha za njan huwun nebulh yaóolhduk hukwa ꞌuzninzun,” huyúlhni.

³³ ꞋInka Paul ꞌawet ꞌilhozdilne butaha nája.

³⁴ ꞋEt hoontsꞌi whulohne dune hitsꞌú nedindil ꞌinkꞌez buba ꞌalhaꞌ ꞌuhooja. Butoh ꞌilhoghun, ꞌen Dionysius huyúlhni, ꞌen nahíyilh-un ꞌilhoghun ꞌuntꞌoh. ꞋIlhoghun tsꞌeke cha, Damaris huyúlhni, ꞌinkꞌez ꞌuyoonne cha, ꞌenne buba ꞌalha ꞌuhoontꞌoh suliꞌ.