Acts 16 - Yak'usda Ooghuni

Timothy ꞌen Paul Silas bulh bubúlh tizꞌaz

¹ ꞋEt Paul ꞌen keyoh Derbe ꞌinkꞌez Lystra tsꞌe oozya. Whuz ꞌilhoghun dune ooba ꞌalha ꞌuhoontꞌoh-un Timothy huyúlhni, ꞌen la ꞌoh whutꞌen. Ooloo cha ooba ꞌalha ꞌuhoontꞌoh-un, ꞌen Lizwif ꞌuntꞌoh, ꞌet oobá, ꞌen Greek ꞌuntꞌoh.

² Keyoh Lystra ꞌinkꞌez Iconium whutꞌenne, ooba ꞌalha ꞌuhoontꞌohne, ꞌenne Timothy soo za highu yalhduk.

³ ꞋEt Paul ꞌen Timothy dulh tínꞌus hukwaꞌ ninzun ꞌinka yuka dune unli-i kꞌut huyúztꞌus. ꞋEt nduhúyinla whe Lizwifne ꞌoh whutꞌenne, ꞌenne Timothy oobá Greek unli tꞌehinínzun ꞌet huwa.

⁴ ꞋEt keyoh whutuhidulh whe ooba ꞌalha ꞌuhoontꞌohne ndai la whelꞌaꞌne ꞌinkꞌez dune tso whudilhdzulhne Jerusalem ꞌet highu nahizya-i, ꞌi za kꞌúneꞌ hootꞌen hubuhútni.

⁵ ꞋEt Jesus Christ gha ꞌilhozdilne whe be ꞌalha ꞌuhoontꞌoh-i, ꞌi be ꞌon nus hilhtus huzdliꞌ, ꞌinkꞌez ꞌet huwa dzin totsuk nus lheꞌhuniltsuk lholelh.

Paul Ndoni gha be nghun néwhultsꞌut Macedonia tsꞌe tóoyaꞌ ha

⁶ ꞋEt Phrygia ꞌinkꞌez Galatia yun kꞌut ꞌoh whuya lhuhúzdil whe Asia yun kꞌut ꞌet Yakꞌusda ooghuni be yáhutilhduk Ndoni whuchꞌa bunízyoot ꞌet huwa.

⁷ ꞋEt ꞌawet Mysia yun kꞌut whan ꞌaz nehúnindil, Bithynia yun kꞌut tsꞌe hútoodilh hukwa hitꞌen, ꞌet hoontsꞌi Ndoni ꞌaw bugha lhúhooꞌal.

⁸ ꞋInka Mysia yun kꞌut ꞌoh whuya lhuhúzdil whe keyoh Troas tsꞌe hoozdil.

⁹ ꞋEt ꞌulhdzis Paul hoonli oonalhtsꞌet ha hóoltsꞌut whe dune Macedonia yun kꞌut whutꞌen-un yunilhꞌen ꞌet usyin ꞌinkꞌez yughu tédudlih, “Macedonia yun kꞌut tsꞌe netsꞌínyalh ꞌinkꞌez nela ꞌineh!” yúlhni.

¹⁰ Soo njan oonalhtsꞌet núwhulhtsꞌut ibulh lhazduja Macedonia yun kꞌuz tsꞌe uztikelh ꞌinkꞌez ndunne ꞌet whutꞌenne khuni unzoo-i be bubulh yatsꞌoolhduk ha. NeMoodihti nekaꞌ daniꞌ tꞌetsꞌonínzun ꞌinka whuz unꞌa ꞌutsꞌuja.

Lydia ooba ꞌalha ꞌuhoontꞌoh suliꞌ

¹¹ ꞋEt Troas ꞌet la tsꞌi cho be nus tsꞌuzki ꞌet soo tsꞌihyan whuz Samathrace tsꞌe yatsꞌúzki, ꞌinkꞌez ꞌom bun dzin ꞌet Neapolis tsꞌe tsꞌoozki.

¹² ꞋEt whez dindil whe keyoh Philippi tsꞌe tsꞌozdil. ꞋI yun ꞌudechoo tadítꞌaz ꞌet whuzꞌai. ꞋEt Roman keyoh whuchꞌeꞌ hoonli wheꞌ hoontꞌoh. ꞋEt keyoh Philippi lhat dzin ꞌet naꞌtsꞌalhꞌai.

¹³ ꞋEt Lizwif natsꞌulyis dzin whe keyoh whuchꞌa tsꞌuzdil ꞌinkꞌez ꞌukoh whuba tsꞌe tsꞌoozdil. ꞋEt Lizwifne tenahududli-un hoonli ꞌuzninzun ꞌet huwa ꞌet nátlꞌazdiltsꞌi ꞌinkꞌez tsꞌekoo ꞌilhozdilne bubulh yátsꞌulhduk.

¹⁴ ꞋIlhoghun tsꞌeke, Thyatira whutꞌen-un Lydia huyúlhni, ꞌen cha nedántsꞌo. ꞋEn naih dulkꞌun diztiꞌ be ꞌóoket-un unli, ꞌinkꞌez ꞌahoolhyiz Yakꞌusda tsꞌun teniꞌ nilhdzun. ꞋEt huwa neMoodihti Paul Yakꞌusda ooghuni ye yálhduk-i soo cho yoozólhtsꞌai ꞌinkꞌez beni taóodoltsꞌit yulhtsi.

¹⁵ ꞋEt didut ꞌinkꞌez hiyoh dilhtsꞌíne ookꞌekoone tsꞌiyawh too beꞌ hulya. ꞋEt hukwꞌelhꞌaz neghu nusuya, “NeMoodihti soo cho ootꞌa nunistan-un nohba ꞌalha ꞌuhoontꞌoh de, ꞌanih syoh tsꞌe szih dulhtsꞌi,” neyúlhni ꞌinkꞌez ꞌilhiz netsꞌulhéꞌditsꞌil ꞌinka bulh úztizdil.

Paul Silas bulh Philippi ꞌet ꞌabahanꞌai

¹⁶ ꞋEt ꞌilhudzin tenazdudli-un tsꞌe tsꞌídulh whe ꞌilhoghun ꞌulhna-un, ꞌen tsꞌeke nedudizya. ꞋEn la ntsiꞌ-i nudúdeh-i ooyudínda ꞌi be nus hooꞌen ꞌinkꞌez nus daóotanelh-un tsꞌiyawh ubúlhni. ꞋEt whe ndunne yughunline lhai sooniya huye ꞌúlhꞌen.

¹⁷ ꞋEt ꞌutꞌen Paul ꞌinkꞌez wheni te neununúya ꞌinkꞌez ꞌaldzul whe ꞌutni, “Ndunne dune ꞌukꞌenus ndo Yakꞌusda ooduneꞌ hinli. Ntsꞌenꞌa la dutihjih ꞌoh te nohba nuhúhuyeꞌ!”

¹⁸ Lhat dzin ndutꞌen, ꞌudekꞌez Paul tube taídizni, yutsꞌu nálhꞌa ꞌinkꞌez ntsiꞌ-i nududeh-i ndí yulhni, “Jesus Christ booziꞌ gha ooyáhanadindaih!” ꞋEt ꞌaho ntsiꞌ-i nududeh-i yuyáhanadide.

¹⁹ ꞋInkꞌez ndunne tsꞌeke oomoodihne tꞌehonanzin ndet whe la sooniya ꞌuhulhꞌen-un, ꞌetsul ꞌuhooja, ꞌinka Paul Silas bulh hubuhúzgooh ꞌinkꞌez hubaꞌ hoontꞌoh-un, ꞌet keyoh moodihne bubut nébahunilhti.

²⁰ ꞋEt lhuganne moodih but nebonilhti ꞌinkꞌez ꞌubuhutni, “Ndunne Lizwifne ꞌuhintꞌoh. Netoh ꞌahoolhyiz dune tehuduleh.

²¹ ꞋInkꞌez ndet wheni huwun neba nahisda-un tsꞌiyawh whuchꞌaz unꞌa whubuhodulhꞌeh. Wheni Romanne ꞌutsꞌintꞌoh ꞌet huwa ꞌaw bukꞌoh tsꞌe ꞌutsꞌooneh ꞌaitꞌoh ꞌinkꞌez ꞌoh te néꞌtsꞌootꞌen ꞌaítꞌoh.”

²² ꞋEt ꞌilhozdílne tsꞌiyawh buchꞌaz nehúdindil, lhuganne moodih Paul Silas bulh bunaih bukꞌuhidutilhchꞌul ꞌinkꞌez ubuholhtꞌah ꞌubuhútni.

²³ ꞋEt soo tube ubuholhtꞌo whe ꞌadinꞌai-un ꞌet ꞌabahanꞌai ꞌinkꞌez huwunli-un, “Buchꞌaz danaꞌ doꞌalh,” huyúlhni.

²⁴ ꞋEt ꞌadinlane ghunli-un huyúlhni whe ꞌaho soo ꞌudebez ꞌadinꞌai-un, ꞌet ꞌabahanꞌai ꞌinkꞌez duchun dindaz hubaꞌ ꞌuntꞌoh-i bukechun ghu néhininla ꞌinkꞌez hidunaꞌdanla.

²⁵ ꞋEt tuzniz atꞌen Paul Silas bulh Yakꞌusda tsꞌun tenahududli ꞌinkꞌez hujun. ꞋEt nyoonne ꞌadinlane huboohoozilhtsꞌai.

²⁶ Khuntsul tube cho yun náhisnai whe yoh ꞌahudinla-un, ꞌet cha ndulcho nahúwhutnah. ꞋEt hooja dati tsꞌiyawh dáhadankat ꞌinkꞌez ibulh lhuztih tlꞌool huyélhghel-i butsꞌu ha yánkat.

²⁷ ꞋEt ꞌadinlane ghunli-un tsꞌe nandzut whe dati tsꞌiyawh ꞌudun dizdla whutilhꞌen whe tsꞌiyawh ꞌadinlane ninta nahulghaz ninzun, ꞌinka dusaluzti ha yálhtsus ꞌinkꞌez ꞌawet naꞌdutuzilghelh.

²⁸ Paul soo ꞌultus-un ꞌuidílya, “Dah! ꞋUdun dóldah junih, tsꞌiyawh ꞌawet uzdilhtsꞌi!” yúlhni.

²⁹ ꞋEt ꞌadinlane ghunli-un kwun nultꞌai ha ꞌutni whe yoh dálgai ꞌinkꞌez soo dutlut whe Paul Silas bulh bubut nachániti.

³⁰ ꞋEt tenábunilhti ꞌinkꞌez uboodulhkut, “Soo sudutáhnelh datísnelh whe dutisjih?” ubúlhni.

³¹ “Jesus Christ neMoodihti ꞌen mba ꞌalha ꞌootꞌeꞌ, ꞌinkꞌez dutanjih, nyun ꞌinkꞌez nyoh dilhtsꞌine cha,” huyúlhni.

³² ꞋEt neMoodihti ooghuni ghun huyulh yálhduk ꞌinkꞌez tsꞌiyawh mbene la ꞌet yoh dilhtsꞌine cha.

³³ ꞋEt ꞌulhdzis soo ꞌoh whúya hoozulh whe ꞌadinlane ghunli-un dábunilhti ꞌinkꞌez buka kꞌet tunáwhuzguz. ꞋEt didut ꞌinkꞌez duyoh dilhtsꞌine te tsꞌiyawh ꞌaho too beꞌ hulya.

³⁴ ꞋEt Paul Silas bulh duyoh tsꞌe náboolhti ꞌinkꞌez bughu naꞌuntꞌai, ꞌinkꞌez tube cho whunílhni didut ꞌinkꞌez duyoh dilhtsꞌine te tsꞌiyawh Yakꞌusda buba ꞌalhaꞌ ꞌuntꞌoh suliꞌ ꞌet huwa.

³⁵ ꞋEt ꞌom bun bundadaꞌ lhugan moodihne neilhchukne butsꞌú whebuhalhꞌaꞌ, “Nyoonne dune bula naduhnih!” bubuhútni.

³⁶ ꞋInka ꞌadinlane ghunli-un Paul ꞌen yudániꞌ, “Lhugan moodihne butsꞌa ha khuni ultsꞌut, ‘Nyun ꞌinkꞌez Silas bulh nohlanazdootni,’ hutni ꞌet huwa nanilhtsulyaz natoohtꞌas,” ubúlhni.

³⁷ ꞋEt hoontsꞌi Paul neilhchúkne ubúlhni, “Hukwa ꞌa nehooꞌalh-un hooloh ꞌet hoontsꞌi dune bez neholhtsus, wheni Romanne keyoh tsꞌuwhutꞌen wheꞌ tsꞌintꞌoh, ꞌet hoontsꞌi ꞌanehanꞌai ꞌinkꞌez ꞌandit whuꞌiz ꞌet nanehutoolhꞌaꞌ hukwaꞌ hutꞌen. ꞋAwundooh, ꞌaw ndulhúhootꞌoh wheꞌ hoontꞌoh! Lhugan moodihne dichꞌoh whusahóodil ꞌinkꞌez nelanahudootni hubaꞌ hoontꞌoh.”

³⁸ ꞋEt neilhchukne ndi khuni ghun lhugan moodihne hudániꞌ, ꞌet Paul Silas bulh Romanne keyoh whutꞌenne ꞌuhintꞌoh whulh ꞌúhudantsꞌo whe tube whe hunilhjoot.

³⁹ ꞋEt huwa butsꞌun kꞌeke nahuditniꞌ whe ꞌahudinla-un whuchꞌa nabuhulhti ꞌinkꞌez keyoh whuchꞌa nahoodilh bubuhútni.

⁴⁰ Paul Silas bulh ꞌahudinꞌai-un tenáhuntꞌaz ꞌinkꞌez Lydia ooyoh tsꞌe hoozꞌaz. ꞋEt ooba ꞌalha ꞌuhoontꞌohne, ꞌenne cha ꞌet hudilhtsꞌi. Khuni be tsꞌílhtus-i be bubulh yáhalhduk ꞌinkꞌez whenáhitꞌaz.