Acts 15 - Yak'usda Ooghuni

Paul, Barnabas bulh Jerusalem tsꞌe whelꞌaꞌne ꞌinkꞌez dune tso whúdilhdzulhne bubulh ꞌilhuhozdil

¹ ꞋEt whulohne dune Judea whédindilne keyoh Antioch tsꞌe hoozdil ꞌinkꞌez ndunne ooba ꞌalha ꞌuhoontꞌohne Moses ooghuni ꞌukꞌu nusguz-i ghun ooka dune ꞌahli-i kꞌut nohahúztꞌus de, ꞌaw ꞌet de za dutihjih, ꞌubuhútni.

² Paul Barnabas bulh tube cho Moses ooghuni ꞌukꞌu nusguz-i ghun dája hutni ꞌet huwun lhdulhyo nehúwhuntꞌai, Judea tsꞌe haíndilne tubulh. ꞋInka huwu lhgha ꞌúhudija whe Paul, Barnabas, ꞌinkꞌez ꞌuyoonne Antioch whutꞌenne tubulh, Jerusalem tsꞌo toodilh ꞌinkꞌez whelꞌaꞌne ndunne dune tso whudilhdzulhne bulh huwu yahoolhduk ꞌubuhútni.

³ ꞋEt ꞌawet Jesus Christ gha ꞌilhozdílne, whelꞌaꞌne whe bahalhꞌaꞌ. ꞋEt Phoenicia ꞌinkꞌez Samaria whutulhuhúzꞌaz whe ꞌudun yun kꞌut whutꞌenne dahúja Yakꞌusda tsꞌu náhulhya ꞌubuhútni whe tube cho ndunne Jesus Christ kꞌúneꞌ ꞌutꞌenne huhóontꞌiꞌ suliꞌ.

⁴ ꞋEt Jerusalem tsꞌe hoozꞌaz whe Jesus Christ gha ꞌilhozdílne tube cho ubúnahunílhni. Ndunne whelꞌaꞌne ꞌinkꞌez dune tso whudilhdzulhne, ꞌenne bubulh náhuwhulnuk Yakꞌusda gha ntsꞌoh te la neꞌhustꞌen ꞌet huwun.

⁵ ꞋEt whulohne ooba ꞌalha ꞌuhoontꞌohne Pharisee tsꞌú ditnine dodindil ꞌinkꞌez ꞌuhutni, “ꞋUdun yun kꞌut whutꞌenne hika dune unli-i kꞌut ubuhotꞌas ꞌinkꞌez ndi Moses ooghuni ꞌukꞌu nusguz-i kꞌúneꞌ hootꞌen ubuhudóniꞌ hubaꞌ hoontꞌoh.”

⁶ ꞋEt whelꞌaꞌne ꞌinkꞌez dune tso whudilhdzulhne tsꞌiyawh ꞌilhuhozdil ꞌinkꞌez njan ꞌuhutni-un hukwꞌu nuhúhulhyeꞌ.

⁷ Saꞌ hukwꞌu nuhúhulhya whe Peter dudinya ꞌinkꞌez ubúlhni, “Sulhutsinke tꞌeoonáhzun ꞌudaꞌ whe Yakꞌusda nohtáhasálhti Yakꞌusda ooghuni unzoo-i ghun ꞌudun yun kꞌut whutꞌenne bubulh yaóosduk ha, khun si sodótsꞌo ꞌinkꞌez buba ꞌalhaꞌ hotꞌeꞌ ha.

⁸ ꞋInkꞌez Yakꞌusda dune dahíntꞌoh la tꞌebunínzun, ꞌet huwa ꞌudun yun kꞌut whutꞌenne, ꞌenne cha bukꞌentsiꞌ whe wheni danéinla daꞌ whuz unꞌa ndunne cha Ndoni buyudíltsꞌut wheꞌ hoontꞌoh.

⁹ Wheni Lizwifne tsinli ꞌinkꞌez ꞌenne ꞌudun yun kꞌut whutꞌenne hinli ꞌet hoontsꞌi ꞌaw lhelhtsꞌun unꞌa lheneꞌílhdzun. ꞋEt whe ndunne Jesus Christ buba ꞌalha ꞌuhoontꞌoh suliꞌ ꞌet huwa bulubeshi bubunayalhde.

¹⁰ Ndi Moses ooghuni ꞌukꞌu nusguz-i wheni ꞌinkꞌez netsodaꞌne, ꞌenne hoontsꞌi ꞌaw tsꞌihꞌun unꞌa hukwꞌú nulheꞌhitꞌel inleꞌ. ꞋInkꞌez ꞌandit di ha Yakꞌusda ꞌen óolhdzih wheꞌ dahni? Ndunne yugha hodulꞌehne ꞌuhótꞌeꞌ ꞌaítꞌoh te buba néꞌdahni.

¹¹ ꞋEt hoontsꞌi neba ꞌalha ꞌuhoontꞌoh ꞌinkꞌez ntsꞌenꞌa ꞌuhintꞌoh, whuz unꞌa wheni cha Jesus Christ neMoodihti ye únzoo-i be uzdoojih ha neghá whuntꞌai.”

¹² ꞋEt soo dilhtsꞌine tsꞌiyawh tꞌehudusni whe Barnabas Paul bulh hubuhoodilhtsꞌai ꞌudun yun kꞌut whutꞌenne butoh ntsꞌenꞌa Yakꞌusda gha hooncha ꞌinkꞌez huwa ꞌítꞌen te néꞌhustꞌen ꞌet huwun.

¹³ ꞋEt yahulhduk ꞌetsul ꞌuhudija whe James dudinya ꞌinkꞌez ꞌutni, “Sulhutsinke soo zúlhtsꞌai!

¹⁴ Simon ꞌandit nohdániꞌ, ntsꞌenꞌa Yakꞌusda ꞌudechoo ndunne ꞌudun yun kꞌut whutꞌenne dunabunilhtan whe dune butoh ꞌutahábanla. ꞋEnne ꞌuhuja Yakꞌusda booziꞌ díztiꞌ huyulhtsi.”

¹⁵ ꞋEt James ꞌon ꞌun ndutni, “ꞋEt Yakꞌusda be nus hooꞌenne bughuni ꞌukꞌu nusguz-i tsꞌiyawh lhgha ꞌuhudija whe ndutni,

¹⁶ ‘ꞋEt hukwꞌelhꞌaz whusanátisdalh,’ ni neMoodihti, ‘ꞋInkꞌez David ooyoh naoonankat-un dunaoodutásꞌalh ꞌinkꞌez yahónkat-un cha soo náꞌwhutisdlelh, ꞌinkꞌez lhunaoodutisleh.

¹⁷ ꞋEt whuz unꞌa dune ꞌet nenínkatne cha ska húnootaꞌ ꞌinkꞌez ꞌudun yun kꞌut whutꞌenne, mbene sichꞌoh sba ꞌudunébunusdlane, ꞌenne cha ska húnootaꞌ, neMoodihti ꞌutni. ꞋEn ꞌuntꞌoh ndi tsꞌiyawh ꞌuhóonla.

¹⁸ Yakꞌusda ndi yun itilelh ꞌet whutsodaꞌ tsꞌiyantsuk tꞌewhunínzun.’”

¹⁹ ꞋEt James ꞌon ꞌun ubúlhni, “ꞋEt huwa si ꞌet ndunúszun ndunne ꞌudun yun kꞌut whutꞌenne, ndunne Yakꞌusda tsꞌu nálhyane, ꞌaw buba hoontsiꞌ tsꞌu holhꞌeꞌ huba lheꞌhóotꞌoh.

²⁰ ꞋEt hoontsꞌi butsꞌó kꞌeꞌ tsꞌooges ꞌinkꞌez ubuzdóniꞌ, ‘Ndai tꞌalh-i buyakꞌusda ꞌukꞌeltsi-i tsꞌu hítulhdilh ꞌet whe oochꞌaz nijoot whe ꞌuntꞌoh, khun te oohꞌalh junih. Tsꞌekoo kꞌus dune bulh nintaꞌoohtꞌen junih. Khuna oozeꞌ ꞌúsguz-i ꞌinkꞌez ꞌuskaiꞌ bulhitsus-i oohꞌalh junih, ꞌinkꞌez ꞌuskaiꞌ cha oohꞌalh junih.’

²¹ ꞋEt ꞌalha ꞌuhoontꞌoh Lizwif lugliz ꞌet natsꞌulyis dzin totsuk saꞌ whutsꞌun Moses ooghuni ꞌukꞌu nusguz-i ookꞌu yaduk ꞌinkꞌez keyoh totsuk cha ooghuni huye búbulh yalhduk,” ni, James.

Whelꞌaꞌne ꞌinkꞌez dune tso whudilhdzulhne ꞌudun yun kꞌut whutꞌenne butsꞌó kꞌeꞌ hanguz

²² ꞋEt whelꞌaꞌne cha, dune tso whudilhdzulhne, ꞌinkꞌez Jesus Christ gha ꞌilhozdilne tubulh lhgha ꞌúhudija whe Paul Barnabas bulh Antioch tsꞌe bubulh tiꞌusne ꞌutahábotilhtelh. ꞋInka Judas, ꞌen Barsabas huyúlhni, ꞌen Silas bulh ꞌutahábahalhti. ꞋEt ooba ꞌalha ꞌuhoontꞌohne butoh ndunne nane, ꞌenne soo whuníhne hinli.

²³ ꞋEnne ndi ookꞌu neꞌúsguz-i butlꞌa há yanꞌai ꞌi ndutni: “Wheni whelꞌaꞌne, dune tso whudilhdzulhne, ꞌinkꞌez ooba ꞌalha ꞌuhoontꞌohne cha Jerusalem uzdilhtsꞌi wheni tsꞌiyawh nohtsꞌo kꞌeꞌtsꞌuges, neulhutsinke, ꞌudun yun kꞌut whuzdline, keyoh Antioch, Syria ꞌinkꞌez Cilicia yun kꞌut dúlhtsꞌine, Hadih nohtsꞌutni.

²⁴ Whulh ꞌúzditsꞌo whulohne dune netahaíndilne nohtsꞌú hoozdil ꞌinkꞌez tankꞌus unꞌa ꞌunohuhútni. ‘Moses ooghuni ꞌukꞌu nusguz-i ookꞌuneꞌ oohtꞌen ꞌinkꞌez ooka dune ꞌahli-i kꞌut nohohootꞌus.’ ꞋI be nohchꞌa níntahoninya, ꞌaw wheni ꞌubutsꞌútni iloh wheꞌ hutni.

²⁵ ꞋEt ꞌinka ꞌilhutsꞌozdil ꞌinkꞌez tsꞌiyawh lhgha ꞌúzdija whe dune whunihne nohtsꞌu uztilhꞌalhne ꞌutahábatsꞌalhti ꞌinkꞌez soo nekꞌekene Barnabas Paul bulh hubulh hútooꞌas ꞌet wheni.

²⁶ ꞋEnne ꞌuhuja hukwꞌé dahootsah tilah tꞌehonínzun ꞌet hoontsꞌi Jesus Christ, neMoodihti, ooghuni be yáhalhduk.

²⁷ ꞋEt huwa Judas ꞌinkꞌez Silas nohtsꞌú buztilhꞌalh ꞌenne daja tsꞌutni whe nohtsꞌo kꞌetsꞌangus, ꞌet tsꞌiyawh nohodóniꞌ.

²⁸ ꞋEt Ndoni ꞌen bulh lhgha ꞌúzdija ꞌaw ꞌon ꞌun cha howu whúlnaꞌ nohba tsꞌuhólhꞌeꞌ hukwa lheꞌuznízun. Ndet ꞌandit nohghá whuntꞌai whuz unꞌa za oohtꞌeꞌ hukwa ꞌuzninzun.

²⁹ Tꞌalh-i buyakꞌusda kꞌeltsi tsꞌu túlhdilh-i oohꞌalh junih! ꞋUskaiꞌ, khuna oozeꞌ ꞌúsguz-i buzkaiꞌ búlhitsus-i cha oohꞌalh junih! ꞋInkꞌez tsꞌekoo kꞌus dune bulh nintaꞌoohtꞌen junih! ꞋEt whuchꞌa khahdli de, ꞌet de la soo óohtꞌeꞌ. ꞋEt ꞌawet za.”

³⁰ ꞋEt khuni naꞌane whébahalhꞌaꞌ whe Antioch tsꞌe hoozꞌaz. ꞋEt tsꞌiyawh ooba ꞌalha ꞌuhoontꞌohne ꞌilhubuhozdla ꞌinkꞌez ꞌudustlꞌus butlꞌa há yanꞌai.

³¹ ꞋEt whutꞌenne ndi butsꞌo kꞌehuyanguz-i hikꞌeyailhduk whe ookꞌu núyusguz-i, ꞌi gha budzi ulhtus nasdliꞌ ꞌinkꞌez tube huhóontꞌiꞌ.

³² ꞋEt Judas Silas bulh dichꞌoh Yakꞌusda ba yalhdukne hinli cha, ꞌinkꞌez ooba ꞌalha ꞌuhoontꞌohne saꞌ whe Yakꞌusda ooghuni be bubulh yahalhduk ꞌet whe la soo budzi unzoo ꞌinkꞌez hilhtus cha hubuhulhtsi.

³³ ꞋEt hukwꞌelhꞌaz dzoh saꞌ buzih hankeꞌ. ꞋEt ooba ꞌalha ꞌuhoontꞌohne ndunne khuni naꞌane ntsꞌez de daꞌ ha hánꞌaz tsꞌe whuz khuni unzooꞌ-i bulh whe whelꞌaꞌne butsꞌu whenábahalhꞌaꞌ.

³⁴ ꞋEt hoontsꞌi Silas ooba hoonzoo ꞌet tidalh hukwaꞌ ninzun.

³⁵ ꞋEt Paul Barnabas bulh Antioch ꞌet cha ꞌet hankeꞌ, ꞌuyoonne cha bulh khuni unzoo-i be bubulh yáhulhduk ꞌinkꞌez neMoodihti ooghuni ghun whubuhodulhꞌeh.

Paul Barnabas bulh lhchꞌa hustꞌaz

³⁶ ꞋEt hukwꞌelhꞌaz dzin Paul Barnabas uyúlhni, “Keyoh totsuk neMoodihti ooghuni be bubulh yalhdukne neulhutsinke butsꞌú nunaootꞌas ꞌinkꞌez nahótꞌalh dahíntꞌoh suba.”

³⁷ ꞋEt Barnabas John Mark dudulhtóoꞌas hukwaꞌ ninzun,

³⁸ ꞌet hoontsꞌi Paul ꞌaw tsꞌihꞌun ooba lheꞌhóotꞌoh. ꞋOh daꞌ daꞌ Pamphylia bughu whenája ꞌinkꞌez ꞌutꞌen bubulh lhalhídilel, ꞌet huwa bubulh ꞌútinelh-un, ꞌaw Paul hukwa lheꞌnízun.

³⁹ ꞋEt tube lhdulhyoh ꞌuhuditniꞌ kꞌet, lhchꞌa nahustꞌaz. Barnabas Mark dulh ꞌiyilya ꞌinkꞌez Cyprus tsꞌe whehánki.

⁴⁰ ꞋEt Paul Silas butahaílhti ꞌinkꞌez ooba ꞌalha ꞌuhoontꞌohne Yakꞌusda tlꞌábahanla ye únzoo-i, ꞌi be bughodleꞌ haꞌ, ꞌet hukwꞌelhꞌaz whenáhitꞌaz.

⁴¹ ꞋEt Syria ꞌinkꞌez Cilicia whuyun kꞌut whutulhhúzꞌaz ꞌinkꞌez Jesus Christ gha ꞌilhozdílne ꞌon nus budzi ulhtus ubuhulhtsi.