Acts 12 - Yak'usda Ooghuni

Lerwe Herod ooba ꞌalha ꞌuhoontꞌohne bube zúla

¹ ꞋEt ꞌoh daꞌ atꞌen Lerwe Herod ooba ꞌalha ꞌuhoontꞌohne bube zúla suliꞌ.

² ꞋEt James, John bulhutsin huwá balhꞌaꞌ whe saluzti be hizilhghi.

³ ꞋEt Herod tꞌeoonanzin Lizwif huhóontꞌiꞌ whe honilhꞌen ꞌinka Peter ꞌen cha ꞌayanꞌai, lhes lhuntildoh-i ꞌutꞌalh-un whe whúnahulnih ꞌet ꞌuhooja inleꞌ.

⁴ ꞋEt Peter huyílhchoot hukwꞌélhꞌaz, ꞌuhayanꞌai whe huwunline dine whe lhuganne lhkꞌenáhudidulh, ꞌenne higholeꞌ ha butlꞌa háyalhti. Njan Butus Lhusuya-un hukwꞌelhꞌaz tsꞌiyanne nalh huyootálhzih ꞌet wheni.

Peter ꞌadinꞌai-un lizas tenínilhti

⁵ ꞋInka Peter ꞌuhidilhꞌai ꞌet hoontsꞌi ooba ꞌalha ꞌuhoontꞌohne soo ndet ꞌúhintꞌoh-un, ꞌet hiba tenadudli.

⁶ ꞋEt Peter dune tsꞌiyanne but nehítalhtelh whutso ꞌulhdzis, ꞌet la Peter lhuztih tlꞌool be ulhughel nane huwunlíne bube guz nanisti, sih nanistlꞌoo-un whenkuti ꞌet cha nane lhuganne huwunli.

⁷ Khuntsul neMoodihti oolizas be nghun be hóodiltsai, yoh cha hootꞌen suliꞌ. ꞋEt lizas Peter ꞌún be yúlhni whe tsꞌe nainílhzut ꞌinkꞌez, “Soo ꞌah dudinyaih!” yúlhni. ꞋEt ꞌaho nyoo lhuztih tlꞌool be yulhghel-i oola ootsꞌu ha yánkat.

⁸ ꞋEt lizas, “Tsunadilꞌooh ꞌinkꞌez kenadilꞌooh cha ꞌineh,” yúlhni. ꞋEt Peter ndúja ꞌet lizas, “Nluglok cha tꞌunásilchoos, ꞌinkꞌez sunanyalh,” yúlhni.

⁹ ꞋEt Peter ꞌadinꞌai-un yuténinya ꞌaw tꞌéoonúszun datꞌen-un ndun lizas ꞌalhaꞌ tilah ꞌuntꞌoh kꞌus ꞌantsꞌi be nghun néwhultsꞌut ninzun.

¹⁰ ꞋUdechoo huwunline zih lhunáhustꞌaz, ꞌet whulh nat-un cha. ꞋEt lhuztih dádintan-i cho keyoh datí-un hugho ninꞌaz whe dichꞌoh ndi dati buba dáhaꞌ dankez. ꞋEt tenáhantꞌaz ꞌinkꞌez ti hutizꞌaz ibulh lizas hooloh suliꞌ.

¹¹ ꞋEt Peter beni naóodisdliꞌ ꞌinkꞌez ꞌuninzun, “ꞋAwet tꞌeooniszin ꞌalha ꞌuhoontꞌoh, neMoodihti dulizas whusayálhꞌaꞌ ꞌinkꞌez Herod Lizwifne tubulh dzoh nusotilhzut-un, ꞌet whuchꞌa súlhyih.”

¹² ꞋEt njan howu nuní nizut whe Mary ooyoh ꞌet howu ninya, ꞌen John Mark ooloo. ꞋEt lhane dune ꞌilhúhozdil ꞌinkꞌez tenahududli.

¹³ ꞋEt Peter yoo ꞌaz tsꞌe dati dunulkwꞌuz whe tsꞌekeyaz, ꞌet ꞌutꞌen-un Rhoda ꞌet huyúlhni-un, ꞌen la dati nenínya whe yudántsꞌo.

¹⁴ ꞋEt ꞌaho Peter ꞌutni natséyoodílhtsꞌit whe hóontꞌi kꞌet, ꞌaw dáhalheꞌditel ꞌinkꞌez ꞌantsꞌi yoh danálgai ꞌinkꞌez, “Peter dati usyin!” ubúlhni.

¹⁵ “Nyeni hoolel whe ꞌudini,” huyúlhni. ꞋEt hoontsꞌi, “ꞋAlhaꞌ dusni,” ni za ꞌutni whe, “ꞋAwundooh, oolizas la ꞌutꞌen,” hutni.

¹⁶ ꞋEt whutoh Peter dati dunulkwꞌuz za ꞌutni. ꞋUdekꞌez te hiba dahaꞌ dantan, tube buba hooncha hitilhꞌen whe.

¹⁷ ꞋEt buba núlhni whe tꞌehudoosni ꞌubulhni ꞌinkꞌez buba hukwꞌu nuhúlhyeꞌ daja whe neMoodihti ꞌadinꞌai whe tenaínilhti. “James ꞌinkꞌez ꞌon ꞌunne ooba ꞌalha ꞌuhoontꞌohne tsꞌiyawh ꞌubudóhniꞌ,” ubúlhni. ꞋEt ꞌawet ꞌutsꞌun bughu whenája.

¹⁸ ꞋEt bundadaꞌ lhuganne huwunlíne Peter hikꞌé nintai whe whe whunujut whe lhtahúwhuntꞌai, “Peter ꞌen dája,” lhodútni.

¹⁹ ꞋEt Herod, “Peter hikunootaꞌ,” ubúlhni. ꞋAw nahayólhtelh ꞌaitꞌoh ꞌinka mbene yughinleꞌne ubuhoodalhkut ꞌinkꞌez, “Uboohooghan,” ubúlhni. ꞋEt hukwꞌelhꞌaz Herod Judea tsꞌe whenya ꞌet whutsꞌun la Caesarea tsꞌe cha ꞌítꞌen.

Herod whe whunujut whe dazsai

²⁰ ꞋEt ndunne nat-un keyoh Tyre ꞌinkꞌez Sidon whutꞌenne, ꞌenne Herod tube cho bubulh húnilchꞌe ꞌinka lhane hinli whe Herod highu nindil. Blastus ꞌen la lerwe yoh yuba huwunli, ꞌen tsꞌú nehidilti. ꞋEt ꞌantsꞌiya Herod highu nindil ꞌinkꞌez buba sooꞌ hooleh-un hitsꞌu húkwaꞌ ꞌutni lerwe ookeyoh tsꞌe whuz de huyaꞌalh-i whuz hakat ꞌet huwa.

²¹ ꞋEt dzin buba hoozi-un Herod ꞌet dulerwe naih yé naja ꞌinkꞌez kwꞌutsꞌuzda oobaꞌ yintꞌoh-i yukꞌetlꞌa didaꞌ. ꞋEt whutsꞌun dune bubulh yálhduk.

²² ꞋEt ꞌahúldzul whe huhuyih, “ꞋAw dune iloh ꞌutni, yalhduk, Yakꞌusda unli-un ꞌutni!” huyúlhni.

²³ ꞋEt ꞌon nus óostꞌet, ꞌet ꞌaho Yakꞌusda oolizas Herod nduda yulhtsi ꞌinkꞌez ꞌusgo yúlh ha nildo ꞌet hukwꞌe dazsai.

²⁴ Yakꞌusda ooghuni lhane dune buba ꞌalhaꞌ yintꞌoh ꞌinkꞌez ndulcho whe tꞌenudzun suliꞌ.

Barnabas Saul bulh Ndoni ꞌatahábalhti ꞌinkꞌez whe balhꞌaꞌ

²⁵ Barnabas Saul bulh huwhuhana-un lhahódinla whe Jerusalem tsꞌe ha náhidil John Mark ꞌen dulh ꞌúhuyulꞌen.