Acts 11 - Yak'usda Ooghuni

Jerusalem ooba ꞌalha ꞌuhoontꞌohne Peter bubulh yátilhduk

¹ ꞋEt whelꞌaꞌne ꞌinkꞌez ooba ꞌalha ꞌuhoontꞌohne te Judea dilhtsꞌine, ꞌudun yun kꞌut whutꞌenne cha Yakꞌusda ooghuni huyílhchoot ꞌinkꞌez hitsꞌu nálhya ꞌet whulh ꞌúhudantsꞌo.

² ꞋEt Peter Jerusalem tsꞌe oozya, whulohne Lizwifne Peter hidulhyoh ꞌutni,

³ “ꞋUdun yun kꞌut whutꞌenne, Lizwif lhilohne, ꞌenne buzih hoontꞌi ꞌinkꞌez bula ꞌanꞌal cha ꞌinja inleꞌ,” huyúlhni.

⁴ ꞋInka Peter ndulcho whe ꞌudechoo whutsꞌun bulh dahooja-un huwun tsꞌiyawh bubulh náhoolnuk.

⁵ “Keyoh Joppa ꞌet tenadusdli whe senghun néwhultsꞌut tsꞌut cho didun whedintꞌi, ꞌi ndus de haímbal ꞌinkꞌez szih nenimbal.

⁶ Soo cho nisꞌen whe khuna-i didowh whe tlꞌughus, ꞌinkꞌez yinka dutꞌai cha ꞌi yukꞌudilhtsꞌi nusꞌen.

⁷ ꞋInkꞌez sulhyá ꞌeꞌ dutilhduk, ‘Peter dudinyaih, ꞌinghan, ꞌinkꞌez ꞌinꞌalh,’ whutni.

⁸ ꞋEt hoontsꞌi, ‘SMoodihti ꞌawundooh, ndi khuna-i me tsꞌútni, oochꞌaz nijoot wheꞌ hoontꞌoh, ꞌet huwa ꞌaw oosꞌalh ꞌaítꞌoh,’ dusni.

⁹ ꞋEt doo cha za ndus de ꞌúwhutni, ‘Ndai la Yakꞌusda ootꞌalh ni-i, ꞌaw laitꞌi ꞌuntꞌoh dini iloh!’

¹⁰ Soo tat whucho ꞌet njan be nghun nenáwhultsꞌut ꞌinkꞌez ndi naímbal inleꞌ-i ndo whenáltsꞌut.

¹¹ ꞋEt ꞌoh whuya hoozulh whuza tane dune Caesarea whutsꞌun stsꞌú botilhꞌaꞌne ꞌawet yoh susda ꞌet hoozdil.

¹² ꞋEt Ndoni ꞌusúlhni, ‘ꞋAw buchꞌa tsélhdini whe bubulh ínꞌus.’ ꞋInkꞌez ndunne lhkꞌutáne ooba ꞌalha ꞌuhoontꞌohne, ꞌenne cha Caesarea tsꞌe sulh hútizdil ꞌinkꞌez tsꞌiyawh Cornelius ooyoh ꞌet dáznindil.

¹³ ꞋInkꞌez nedániꞌ ndun lizas duyoh usyin whe yunilhꞌen ꞌinkꞌez uyúlhni, ‘Joppa tsꞌe ndun Simon Peter huyúlhni, ꞌen ookunáhoolhꞌaꞌ.

¹⁴ ꞋEn la nohdutánelh datíhnelh ꞌet whe la nyun ꞌinkꞌez nkꞌekoone cha dutihjih.’

¹⁵ ꞋEt ꞌawet yawhénusduk whe ꞌudechoo whe wheni lheꞌtsꞌuja whuz unꞌa ꞌenne cha Ndoni buyudíltsꞌut.

¹⁶ ꞋEt whunazni neMoodihti ꞌet ndutni inleꞌ, ‘John dune too be ꞌulhꞌen-un, ꞌen too be too beꞌ nohulhꞌen inleꞌ, ꞌet hoontsꞌi whusawhútiltsꞌulh, sBá ꞌen Ndoni nohtsꞌó tlꞌaidutiꞌalh ꞌinkꞌez nohyudútiltsꞌulh ꞌet whuz unꞌa too beꞌ nohtilelh.’

¹⁷ ꞋEt ꞌalha ꞌuhoontꞌoh wheni danéinla inleꞌ Jesus Christ neba ꞌalhaꞌ ꞌuntꞌoh suliꞌ whe Yakꞌusda hoonzoo negha óoninꞌai, ndunne ꞌudun yun kꞌut whutꞌenne, ꞌenne cha whuz unꞌa ꞌubínla. Mbe usdli ha suba Yakꞌusda oochꞌáz dosni?”

¹⁸ ꞋEt Jerusalem ooba ꞌalha ꞌuhoontꞌohne hodántsꞌo whe Peter hichꞌaz yálhduk ꞌetsul ꞌuhudíja ꞌinkꞌez ꞌenne cha Yakꞌusda hudílhtiꞌ. ꞋInkꞌez njan duhútni, “ꞋUdun yun kꞌut whutꞌenne, ꞌenne cha lhtꞌanahunoodilh ꞌinkꞌez ꞌilhiz hukhoonaꞌ. ꞋEt whuz unꞌa Yakꞌusda bughá whuninꞌai,” hutni.

Antioch whutꞌenne Yakꞌusda ooghuni hidutátsꞌo

¹⁹ Stephen hizilhghi hukwꞌelhꞌaz ndunne Yakꞌusda kꞌuneꞌ ꞌutꞌenne bube húzula, ꞌet ꞌoh daꞌ Yakꞌusda kꞌuneꞌ ꞌutꞌenne tsꞌiyawh yahándil. ꞋInka whulohne nilhzaꞌ Phonecia tsꞌe, Cyprus ꞌinkꞌez Antioch tsꞌe cha whe hándil. Khuni Unzoo-i Lizwifne za be bubulh yáhulhduk.

²⁰ ꞋEt hoontsꞌi whulohne ooba ꞌalha ꞌuhoontꞌohne dune Cyprus ꞌinkꞌez Cyrene tsꞌe haíndilne, ꞌenne Antioch tsꞌe whe hándil ꞌinkꞌez ꞌet ꞌudun yun kꞌut whutꞌenne bunalh húdaniꞌ khuni unzoo-i Jesus neMoodihti ꞌen ghun ubulh yáhulhduk.

²¹ ꞋInkꞌez NeMoodihti hiyé ulhtus-i bugha íninꞌai ꞌet whe la lhane dune Yakꞌusda ooghuni hílhchoot ꞌinkꞌez hitsꞌu nálhya.

²² ꞋEt Jerusalem ooba ꞌalha ꞌuhoontꞌohne whulh ꞌúhudantsꞌo, ꞌinka Barnabas ꞌen Antioch tsꞌe whehúyalhꞌaꞌ.

²³ ꞋEt whuz oozya whe whunilhꞌen daja whe Yakꞌusda ndunne dune ye unzoo-i be butsꞌun unzoo. ꞋEt hóostꞌet ꞌinkꞌez buba nus whúnilhtꞌi, “Ntsꞌoh dáhoontꞌoh ꞌet hoontsꞌi neMoodihti soo bulh za oohtꞌeꞌ,” ubúlhni.

²⁴ Barnabas ꞌen soo Ndoni yudínda ꞌinkꞌez tube dune ooba ꞌálhaꞌ hoontꞌoh. ꞋInkꞌez lhane dune neMoodihti hitsꞌu nálhya.

²⁵ ꞋEt whe Barnabas keyoh Tarsus tsꞌe whenya Saul ꞌen kunúta.

²⁶ ꞋEt nayilhti ꞌinkꞌez Antioch tsꞌe nayoolhti. ꞋEt ꞌilhoh náwhudizut whe nahúltꞌoh dune Jesus Christ yugha hodulꞌehne butoh dune hubuhodalhꞌeꞌ. ꞋInkꞌez Antioch ꞌet Jesus Christ yugha hodulꞌehne, ꞌenne ꞌudechoo Jesus Christ ooduneꞌne ubuwhútni.

²⁷ ꞋEt ꞌoh daꞌ Yakꞌusda be nus hóoꞌenne Jerusalem whehúdindil whe Antioch tsꞌe hoozdil.

²⁸ ꞋEt butoh ꞌilhoghun Agabus huyúlhni-un, ꞌen la dudinya ꞌinkꞌez Ndoni gha, “ꞋAwet nilhdukw yun kꞌut ndulcho whe dai whútale,” hubúlhni la. ꞋEt Claudius lerwe ꞌukꞌenus díztiꞌ-un unli whe ꞌet la ndúhooja.

²⁹ ꞋInka Jesus Christ yugha hodulꞌehne lhgha ꞌúhudija whe ꞌilhoghun hinli whe bubulh ooba ꞌalha ꞌuhoontꞌohne, Judea dilhtsꞌine, ndet ꞌúhintꞌoh whe bulaꞌ hutitꞌelh hutni.

³⁰ ꞋEt nduhúja whe la Barnabas ꞌinkꞌez Saul bulh sooniya butlꞌa háyudzih whe ꞌubuhútni, “Ndi sooniya nebulh ooba ꞌalha ꞌuhoontꞌohne be búlaꞌ tihtꞌen, dune tso whudilhdzulhne butlꞌa yóohdzaih.”