3 John 1 - Yak'usda Ooghuni

John, Gaius tsꞌiyanne yukꞌentsiꞌ-un, ꞌen yutsꞌó kꞌeꞌanguz

¹ Si John ꞌutso whudilhdzulh-un Gaius tsꞌiyanne yukꞌensiꞌ-un, ꞌen soo ꞌalhaꞌ ookꞌesiꞌ-un, ꞌen ootsꞌó kꞌeꞌusges.

² Ookꞌesiꞌ-un nzul dáldzooꞌ la whuz unꞌa tsꞌiyaitsuk be hoonzoo ꞌoneh ꞌinkꞌez soo ꞌóntꞌeꞌ, ꞌet whuz unꞌa mba tenadusdli.

³ Daintꞌen la tsꞌihꞌun unꞌa inyalh-un, neyulhutsinke whusahándil ꞌinkꞌez ndi khuni ꞌalhaꞌ ꞌuntꞌoh-i bulh ꞌintꞌoh-i, ꞌet hukwꞌún nahuwhulnuk. ꞋEt huwa tube cho hoonústꞌiꞌ.

⁴ Suzkehke unline, ꞌenne khuni ꞌalhaꞌ ꞌuntꞌoh-i be tsꞌihꞌun unꞌa hidulh-un whulh ꞌúdustsꞌo te, ꞌet dáhoolcho-i be hoonústꞌiꞌ wheꞌ hoontꞌoh.

Gaius ꞌahoolhiz tsꞌiyanne bula ꞌutꞌen

⁵ Ookꞌesiꞌ-un neyulhutsinke ꞌinkꞌez ꞌutsꞌun whutꞌenne ꞌahoolhyiz bula ꞌintꞌen.

⁶ ꞋEnne ꞌuhintꞌoh ntsꞌenꞌa bukꞌensiꞌ, Yakꞌusda ba ꞌilhunaoodulhne, ꞌenne butsꞌun nkꞌunahuwhulnuk. Yakꞌusda hootátꞌeꞌ hukwꞌunꞌa hutidulh tsꞌe whébilhꞌaih de, ꞌet tube soo ꞌintꞌen whe ꞌintꞌen.

⁷ Yakꞌusda booziꞌ gha whe hándil ꞌinkꞌez ꞌudun yun kꞌut whutꞌenne bula kꞌez lheꞌhílhchulh ꞌet huwa.

⁸ Wheni cha nduntꞌohne neyoh dábutsꞌoolelh hubaꞌ hoontꞌoh. ꞋEt de khuni ꞌalhaꞌ ꞌuntꞌoh-i ba ꞌilhoh ꞌutsꞌutꞌen tsꞌooleꞌ.

ꞋIlhoghun dune, ꞌen hoontꞌiꞌ whe Yakꞌusda ba ꞌilhunaoodúlhne butoh dune ꞌuntꞌoh-un naꞌdudilꞌi, ꞌinkꞌez ꞌilhoghun dune, ꞌen tsꞌiyanne soo híghu yalhduk

⁹ ꞋEt Yakꞌusda ba ꞌilhunaoodúlhne butsꞌó kꞌeꞌisguz. ꞋEt hoontsꞌi ꞌilhoghun butoh usda-un, Diotrephes huyulhni, ꞌen hoontꞌiꞌ whe buba nus diztiꞌ naꞌdudilꞌi hukwaꞌ ninzun. ꞋEn ꞌaw nekalheꞌnízun.

¹⁰ ꞋEn khuni ookꞌewhúnduda ꞌi be ꞌantsꞌi ulgih leꞌ ꞌutni nechꞌaz yálhduk. ꞋEt huwa nohtsꞌu tísyalh de, ntsꞌoh te neꞌutꞌen-un nohnalh howu yatisduk. ꞋAw ꞌet za iloh ndutꞌen, neulhutsinke ꞌaw buka lheꞌnízun. ꞋInkꞌez mbene bukaꞌ ninzunne, ꞌenne tenazdudli bayoh ꞌet tenábulhꞌaih.

¹¹ Ookꞌesiꞌ-un ndai la ntsiꞌ-i bunéꞌontꞌen junih. Unzoo-i za bunéꞌontꞌen. Mbe ꞌutꞌen unzoo-i ꞌulhꞌen-un, ꞌen Yakꞌusda bulh ꞌuntꞌoh. ꞋEt hoontsꞌi mbe tankꞌus ꞌutꞌen-un, ꞌen ꞌaw Yakꞌusda lhíꞌel whe ꞌuntꞌoh.

¹² Tsꞌiyanne Demetrius soo híghu yalhduk. ꞋInkꞌez khuni ꞌalhaꞌ ꞌuntꞌoh-i, ꞌi gha whunénulhtun dantꞌoh unli. ꞋInkꞌez wheni cha soo óoghu yatsꞌulhduk. ꞋInkꞌez ꞌalhaꞌ tsꞌutni tꞌeoonáhzun.

Tsꞌiyanne budzi whudoghel-un, ꞌet butsꞌu hukwaꞌ ninzun

¹³ Lhat-un huwun ꞌukꞌunéꞌ tisguz inleꞌ. ꞋEt hoontsꞌi ꞌaw ꞌudustlꞌus kꞌut ꞌinkꞌez ꞌudustlꞌus tooꞌ be iloh,

¹⁴ ꞌet hoontsꞌi ꞌa cho, nyutiselh hukwa tse hóosdli. ꞋInkꞌez soo lhunílꞌen whe yatálduk. Tsꞌihꞌun unꞌa lhtsꞌun óohtꞌeꞌ. Nekꞌekene nezih dilhtsꞌine, ꞌenne hadih nyuhútni. Nekꞌekene nzih dilhtsꞌine, ꞌenne ꞌilhoghun hinli hadih ubudíni.