2 Timothy 4 - Yak'usda Ooghuni

Yakꞌusda ooghuni bé bubulh yaílhduk

¹ ꞋEt huwa Yakꞌusda ꞌinkꞌez neMoodihti Jesus Christ ꞌen oobut nyudusni, ꞌen ꞌutinelh tsꞌiyanne nalh be hóodutaltsilh, ndai kꞌúneꞌ yulꞌen-i, ꞌi bulh. ꞋOh de khunane ꞌinkꞌez yaidlane cha, ꞌenne buba nahutiyeh.

² ꞋAhoolhyiz lhadíntꞌoh Yakꞌusda ooghuni bé bubulh yaílhduk. Whúbunilhtun ndet whe nintaꞌhutꞌih-un, ꞌinkꞌez tankꞌus ꞌuhutꞌen-un hukwa budíni, ꞌinkꞌez budzi do náꞌinleh. Howa whúlnaꞌ-un whulh sinyin, ꞌinkꞌez dune hodilhꞌeh.

³ Whuz de whúdizulh, ndi khuni tsꞌihꞌun unꞌa ꞌuntꞌoh-i, ꞌi ꞌaw huyodoolꞌeh hukwa lheꞌhuntiszin. Kꞌus dichꞌoh hukwaꞌ huninzun kꞌunꞌa, ꞌet za hodutatsꞌo hukwaꞌ huninzun. Mbene la didutchꞌoh hukwaꞌ huninzun te za dune hodulhꞌehne, ꞌenne za uboohootuzálhtsꞌilh hukwaꞌ huntizilh.

⁴ ꞋInkꞌez khuni ꞌalhaꞌ ꞌuntꞌoh-i, ꞌi ꞌaw hidótsꞌo hukwa lheꞌhuntiszil. ꞋEt kꞌus khuni ꞌantsꞌi unli-i, ꞌohwhi za hika ꞌuntizilh.

⁵ ꞋEt hoontsꞌi nyun tsꞌiyantsuk whunih-i be whuchꞌa soo cho khindli. Yakꞌusda be ꞌutꞌen kꞌoh whulukhun mba howa whulnaꞌ ꞌet hoontsꞌi nilhtꞌi za ꞌilhdzun. ꞋInkꞌez Yakꞌusda ooghuni be yailhduk whe dune ilhyís-un, ꞌet za ndóntꞌen. ꞋInkꞌez Yakꞌusda be ooba ꞌintꞌen-i, ꞌi tsꞌiyawh lhadónleh.

Paul datítsah-un howu yalhduk

⁶ Si ꞌawet be khusna-i Yakꞌusda ba huwa tꞌaih kꞌunꞌa nadusjulh leꞌ ꞌusneh. ꞋInkꞌez ndo tisyalh-un ꞌawet nilhdukw suliꞌ.

⁷ Hoonzoo whe tsꞌihꞌun unꞌa lhisgan. ꞋAwet Yakꞌusda be ꞌutꞌen kꞌoh ꞌuwhusꞌen-un tsꞌiyantsuk lhaoodusla. Tsꞌihꞌun unꞌa be ꞌalha ꞌuhoontꞌoh-i hostun.

⁸ ꞋUdekꞌez khuni beꞌ dusni, ndet tsꞌihꞌun unꞌa hoontꞌoh whe whuchꞌa oonusde-un, ꞌet sba ꞌusꞌai. NeMoodihti tsꞌihꞌun nahiyilh-un, ꞌen yutilhtselh-i, ꞌet dzin sgha ítaꞌalh. ꞋInkꞌez ꞌaw si za iloh. Mbene la dudzi ndulcho-i be bunalh be hóodutalhtsilh ꞌinkꞌez yutiꞌelh hukwaꞌ ninzunne, ꞌenne ꞌilhoghun hinli whe tsꞌiyawh si skꞌunꞌa za ꞌúbutilelh.

Tsꞌiyanne sla ditni

⁹ ꞋA cho stsꞌu tónyaꞌ.

¹⁰ Demas ꞌen sla ditni. Ndi yun kꞌut núkat-i ꞌon nus yukaꞌ ninzun. ꞋEt huwa keyoh Thessalonica whuz whinya. Crescens ꞌen Galatia tsꞌe whinya ꞌinkꞌez Titus ꞌen cha yun kꞌut Dalmatia tsꞌe whinya.

¹¹ Luke ꞌen za szih usda. Mark ꞌen ookunainda ꞌinkꞌez ndiz nyulh tóoꞌas, ꞌen sba ꞌutꞌen huba unzoo ꞌet huwa.

¹² ꞋInkꞌez Tychicus ꞌen keyoh Ephesus tsꞌe whesꞌaꞌ.

¹³ Ndiz tanyalh de, sdzoot sba tolhchoos. ꞋI Carpus keyoh Troas tsꞌe ꞌen daꞌ oozih neínuschooz. Nyoo khuni úkꞌéguz-i, ꞌi cha tonꞌaꞌ, ꞌinkꞌez khuna-i zuz ookꞌu neꞌúsguz-i, ꞌi oonaoodolnoh junih. ꞋI soo ookaꞌ nuszun.

¹⁴ Nyoon lhuztih ꞌultlꞌuz ꞌutꞌen-un, Alexander huyulhni, ꞌen tube lhat-un whe sundílhdaꞌ. Be ꞌutꞌen kꞌoh huwa uncha neMoodihti yuba ꞌukꞌelha whulhtsi.

¹⁵ Nyun cha ookwa huwonleꞌ. ꞋEn dune ulhtus-i be neghuni dulhyoh ꞌitꞌelh-un ꞌuntꞌoh ꞌet huwa.

NeMoodihti ꞌaw nela dootnih ꞌaitꞌoh

¹⁶ ꞋEt ꞌudechoo ooduzkut daꞌ, ꞌaw ꞌilhoghun hoontsꞌi stꞌa nélhiyal. Kꞌus tsꞌiyanne sla huditni, ꞌet hoontsꞌi ꞌaw bukꞌeholtsꞌit hukwa lheꞌnúszun.

¹⁷ ꞋEt hoontsꞌi neMoodihti szih inyin ꞌinkꞌez ꞌen ye ulhtus-i, ꞌi gha ꞌustus inleꞌ. ꞋEt ndi ulhtus-i, ꞌi be si sgha la ndi Yakꞌusda be ba yaduk-i, ꞌi tsꞌiyawh tsꞌihꞌun unꞌa huyoozálhtsꞌaiꞌ. ꞋEt de la ꞌuyoonne ꞌudun yun kꞌut whutꞌenne cha tsꞌiyawh huyoozólhtsꞌaiꞌ. ꞋInkꞌez cha neMoodihti ꞌen khuna-iti sutuzilhghelh-i yuchꞌá sulhyih.

¹⁸ ꞋInkꞌez yakꞌuz neMoodihti ꞌen lerwe unli, ꞌet wheni sghunli, ꞌinkꞌez oozih tisdalh whutsꞌun, ꞌutꞌen untsiꞌ-i tsꞌiyawh yuchꞌa sutálhtelh. ꞋEt huwa ꞌen ꞌilhiz wheni ꞌinkꞌez ꞌon ꞌun cha uzdólhtiꞌ. ꞋEt ndo honeh.

Khit whutso whusaóonyaꞌ

¹⁹ Ndunne Prisca ꞌinkꞌez Aquila, ꞌinkꞌez cha Onesiphorus ooyoh dilhtsꞌine, tsꞌiyawh hadih sba budóniꞌ.

²⁰ Erastus ꞌen keyoh Corinth ꞌet usda. Trophimus ꞌen nduda ꞌinka keyoh Miletus tsꞌuwhútni, ꞌet nenústi.

²¹ ꞋEt khit tileh whutsꞌo, ꞌet soo ꞌintꞌoh whe stsꞌun tonyaꞌ. Eubulus, ꞌen cha hadih nyulhni, ꞌinkꞌez Pudens, Linus, Claudia, ꞌinkꞌez tsꞌiyawh lhulhutsinke, ꞌenne cha hadih nyuhútni.

Ye unzoo-i nyulh óotꞌeꞌ

²² NeMoodihti Jesus Christ ꞌen ndzi yo oodaꞌ ꞌinkꞌez ꞌi nyulh óotꞌeꞌ. ꞋEt Yakꞌusda ye unzoo, ꞌi nuhwheni tsꞌiyawh nohwhulh ꞌóotꞌe. ꞋEt ndoh honeh.