2 Timothy 2 - Yak'usda Ooghuni

Ndi Jesus Christ ye unzoo-i, ꞌi be soo ilhtus ónleꞌ

¹ ꞋEt huwa syeꞌ nyun Jesus Christ ye unzoo-i, ꞌi be soo ilhtus ónleꞌ.

² ꞋInkꞌez lhane nalh daja nyudásniꞌ-un, ndi khuni Jesus Christ tsꞌu ditnine tlꞌa dínle, ꞌon ꞌun ꞌuyoonne huye hódoolhꞌeh ha.

³ ꞋEt huwa Jesus Christ oosalda unzoo-un kꞌunꞌa, howu whúlnaꞌ-un hoontsꞌi whulh ónyin.

⁴ Dune salda unli-un, ꞌen dumoodih ba za ꞌutꞌen. ꞋAw ꞌudun ꞌutꞌen-i gha lhasnoh.

⁵ ꞋInkꞌez cha, mbe la noye toh whuchꞌaꞌ ꞌulhdeh-un, tsꞌihꞌun unꞌa whuchꞌaꞌ nilhde de, ꞌet de za hiba kꞌelha whulhtsih.

⁶ Mbe la tube ꞌutꞌen-un haꞌ nulhyeh-un, ꞌen haínalhyai-i, ꞌen cho yuloh yolhchoot hubaꞌ hoontꞌoh.

⁷ Ndet la nyudúsni-un howu nuní ninzut. ꞋInkꞌez neMoodihti, ꞌen nla ꞌutꞌen whe tsꞌiyantsuk tꞌeoononzeh ngha hoꞌalh.

⁸ Whunailnih, Jesus Christ yaidlane butoh dunadija. David ootsꞌu haínzut-un cha ꞌuntꞌoh. ꞋEt ndi sghuni unzoo-i ꞌuntꞌoh whe nyudásniꞌ.

⁹ ꞋEt huwa dune unsiꞌ-un kꞌunꞌa ꞌadusꞌai whe dzoh nuszut. ꞋEt hoontsꞌi Yakꞌusda ooghuni ꞌi ꞌaw lhilghel whe ꞌuntꞌoh.

¹⁰ ꞋEt huwa ꞌutahalyane, ꞌenne buba whulh susyin. ꞋEt de la ꞌutꞌahályane, ꞌenne cha Christ Jesus ꞌen ye néulhyis-i, ꞌi huyólhchoot ꞌinkꞌez ꞌilhiz huhótꞌeꞌ.

¹¹ Ndi khuni ꞌi soo cho ootꞌa niuznootan ꞌet ndutni, “ꞋEn bulh datsꞌuzsai de, ꞌet de ꞌilhiz wheni bulh ꞌúztitꞌelh cha ꞌuztitꞌelh.

¹² Ntsꞌoh dawhutꞌen hoontsꞌi whulh tsꞌúzyin de, ꞌet de ꞌen bulh lerwe ꞌuztileh. Oochꞌaz natsꞌulhꞌa de, didut cha nechꞌaz nátilꞌa.

¹³ Oolazditni de, ꞌet hoontsꞌi ꞌaw didut nela dootnih ꞌaitꞌoh, ꞌinkꞌez ꞌaw ꞌatsꞌun unꞌa naꞌootneh ꞌaitꞌoh ꞌet huwa.”

Jesus Christ ba neꞌutꞌenne, ꞌenne whulohne hinzoo ꞌinkꞌez whulohne cha hintsiꞌ

¹⁴ ꞋEt ndi khuni ꞌi buba oonailnih. NeMoodihti nalh budutánelh, ꞌet khun ꞌi khuni gha hukwa lhdulhyoh ꞌuhudootniꞌ junih. Tsꞌiyawh buba lheꞌyízooꞌ. Mbe yudántsꞌone tsꞌiyawh nintaꞌbutálhꞌelh.

¹⁵ ꞋEt Yakꞌusda ba dune unzoo-un ꞌonleꞌ, whuz unꞌa hukwa ꞌintꞌen. Nye ꞌutꞌen ꞌaw la hukwa yálhuzonleꞌ. Ndi khuni ꞌalhaꞌ ꞌuntꞌoh-i tsꞌihꞌun unꞌa dune hubodilhꞌeh.

¹⁶ ꞋEt hoontsꞌi ꞌantsꞌi ꞌoh nuyálhdukne ꞌinkꞌez Yakꞌusda ghudlóhne, ꞌenne buzih nónyaꞌ junih. Nduntꞌohne, ꞌenne ꞌuyoonne ꞌon nus Yakꞌusda chꞌaz yalhdukne ubuhutilhtselh.

¹⁷ Bughuni, dada kꞌunꞌa la butaidózit. Nyoonne Hymenaeus ꞌinkꞌez Philetus cha, nduntꞌohne hinli.

¹⁸ ꞋEt nduntꞌohne dune ndi khuni ꞌalhaꞌ ꞌuntꞌoh-i tankꞌus ꞌuhintꞌoh huwa hichꞌa súdil. ꞋEnne ꞌuhutni, ndi dunahudutádulh-un, ꞌudaꞌ ꞌuhooja hutni. ꞋEt whula gha tsꞌe whulohne be ꞌalha ꞌuhoontꞌoh-i, tsꞌiyawh buba musai suliꞌ.

¹⁹ ꞋEt hoontsꞌi Yakꞌusda ooyoh ookꞌu whuzꞌai-i whudutsꞌo. ꞋAw gak hóleꞌ ꞌaitꞌoh. ꞋI kꞌut khuni ꞌukꞌeyánguz-i ndutni, “Mbene la neMoodihti oochꞌeꞌ unline, ꞌenne tsꞌiyawh tꞌebunínzun.” ꞋInkꞌez cha, “Mbene la ꞌuhutni, Christ ooduneꞌne tsinli de, ꞌenne ꞌutꞌen ꞌutsiꞌ-i tsꞌu níntꞌine, ꞌet ndoohoontꞌoh-un, ꞌet tsꞌiyawh whuchꞌaz náhoolyeh.”

²⁰ Ntsꞌe yoh whucho whambez tsꞌe tsꞌiyaitsuk ꞌet ꞌusdla. Beꞌ tsꞌutnai-i ꞌinkꞌez bé uzutꞌalh-i, whulohkhi gold, ꞌinkꞌez silver cha, ꞌi be ꞌulya. Whulohkhi duchun ꞌinkꞌez whutlꞌus be ꞌulya, ꞌi cha ꞌet ꞌusdla. Whulohkhi unzoo ꞌinkꞌez whulohki ꞌaw lhízooꞌ.

²¹ ꞋEt huwa mbe dichꞌoh lubeshi ꞌuchꞌaz nálhꞌa de, ꞌet de duMoodihti ba ꞌuduneꞌududulti ꞌinkꞌez ooMoodihti yeꞌ titꞌelh, ꞌutꞌen unzoo-i tsꞌiyawh yeni lhadíntꞌoh whe ꞌuntꞌoh.

²² ꞋInkꞌez ntsꞌenꞌa chilke ntsiꞌ-i buyustꞌe ootsꞌi nintꞌi-i, ꞌi oochꞌa tilgaih. Kꞌus tsꞌihꞌun ꞌuhoontꞌoh-un, be ꞌalha ꞌuhoontꞌoh-i, be lhkꞌetsꞌusiꞌ-i be nedzi soo óotꞌeꞌ-i cha, tsꞌiyawh bunanyalh. ꞋInkꞌez ndunne budzi yo lubeshi ooghu hooloh whe neMoodihti tsꞌu dedudline, ꞌenne bubulh ínꞌus.

²³ ꞋEt hoontsꞌi whusni ghuni ꞌinkꞌez khuni tꞌenusdzun-i, ꞌi hoontsꞌi be yáhalhduk, ꞌi tsꞌiyawh oochꞌoh ꞌonleꞌ. Tꞌeoonínzun ndi khuni nduntꞌoh-i, ꞌi dune huyé lhdulhyoh ꞌutni-i, ꞌi ꞌuntꞌoh.

²⁴ ꞋEt neMoodihti be ꞌulhna-un, ꞌen ꞌaw dune élhdoosyaih. Kꞌus tsꞌiyanne dune dachꞌe núlheꞌustꞌen ꞌinkꞌez soo dune hodulhꞌeh-un ꞌonleh. Tsꞌiyanne nanilhtsulyaz neꞌboolhꞌen.

²⁵ Yo ꞌúdudildzun ꞌinkꞌez buchꞌaz ditnine tsꞌihꞌun bubulh nenáhohoꞌalh. ꞋEt tilah Yakꞌusda dudeni nahundunizdla uboolhtselh. ꞋEt de sih khuni ꞌalhaꞌ ꞌuntꞌoh-i tꞌehinoozeh.

²⁶ ꞋInkꞌez ꞌet la bubeni bugha nádoltsꞌit, ꞌinkꞌez netsudule hubilhchoot inleꞌ hikꞌuneꞌ ootꞌen ha, ꞌet la ntsꞌoh whe tankꞌus hunintꞌi-un whuchꞌa nahoojaꞌ. ꞋEt ꞌudekꞌez dzin whenghoh de, tube howa whútilnaꞌ.