2 Timothy 1 - Yak'usda Ooghuni

Paul, Timothy hadih yulhni

¹ Si Paul, Jesus Christ ba whélꞌaꞌ-un usdli. ꞋIlhiz be tsꞌúkhuna-i, ꞌi Christ Jesus ꞌen yutꞌi ꞌinkꞌez ꞌilhiz wheni ꞌuntꞌoh. ꞋI gha Yakꞌusda ndet stsꞌu hukwaꞌ ninzun ꞌet huwa whélꞌaꞌ-un susdliꞌ.

² Timothy syeꞌ ookꞌesiꞌ-un inli ndi ꞌudustlꞌus ntsꞌo tlꞌa sꞌaih-i. Yakꞌusda neBá ꞌinkꞌez Christ Jesus ꞌen neMoodihti, ꞌen gha ye unzoo-i cha, be úgha teꞌ nudzun-i ꞌinkꞌez be nedzi dizghel-i cha, ꞌi ꞌontꞌeꞌ hukwaꞌ nuszun.

Paul, Timothy yuba whunalni Jesus Christ tsꞌu nalhꞌa-un

³ ꞋEt Yakꞌusda tsꞌun musi dusni. Stsodaꞌne kꞌunꞌa, syo tsꞌe sgha tꞌetsꞌoninzun-i, lubeshi ooghu hooloh whe Yakꞌusda oobaꞌ neꞌustꞌen. Dzin ꞌinkꞌez ꞌulhdzis ibulh, tenadusdli totsuk nghu ni zástan.

⁴ Nyunatsꞌultooꞌ nusꞌen ꞌet whunaznih ꞌinkꞌez tube nyutiselh hukwaꞌ nuszun, ꞌet la hóstꞌeꞌ.

⁵ Ndi soo be ꞌalha ꞌuhoontꞌoh-i, ꞌi nyulh ꞌuntꞌoh, ꞌi oonaznih. Ntsoo Lois, ꞌen ꞌudechoo be ꞌalha ꞌuhoontꞌoh-i yulh ꞌuntꞌoh inleꞌ, ꞌinkꞌez nloo, Eunice ꞌen cha. ꞋInkꞌez nyun cha ꞌet whuz unꞌa za ꞌintꞌoh, ꞌet sba ꞌalha ꞌuhoontꞌoh.

⁶ ꞋEt huwa mba whunazni ndet daꞌ ntsi kꞌet duznih whe Yakꞌusda huwa yaꞌaih-i, ꞌi ntlꞌa ídanꞌai. ꞋI ꞌantsꞌi bulh neꞌhilhnah leꞌ ꞌilhꞌen.

⁷ Yakꞌusda Ndoni neyídanꞌai whe ꞌaw lhtsꞌuníljut. ꞋEt huwa be tsꞌílhtus be lhkꞌetsꞌusiꞌ-i, ꞌinkꞌez ne-eni be whunih tsinli.

Khuni unzoo-i khun hukwaya ꞌonleꞌ junih

⁸ ꞋEt huwa ꞌuyoonne neMoodihti ghun bubulh yailhduk de, khun hukwaya ꞌonleꞌ junih. ꞋInkꞌez si cha ꞌadusꞌai-un, ꞌet cha khun hukwaya ꞌonleꞌ junih. Kꞌus ꞌuyoonne khuni unzoo-i be bubulh yaílhduk whe dzoh ninzut de, ꞌet de Yakꞌusda ye ulhtus-i, ꞌi gha ꞌíntꞌen.

⁹ ꞋEn ꞌuja neulhyih. Nedzi lubeshi ooghu hootáloh ꞌet whuz unꞌa nekaꞌ ninzun. ꞋAw neye ꞌutꞌen kꞌoh gha iloh nekaꞌ daniꞌ. Dichꞌoh ye unzoo-i, ꞌi gha ꞌuzdutijih ha nekaꞌ daniꞌ, ꞌet whuz unꞌa hukwaꞌ ninzun. ꞋInkꞌez ye unzoo-i, ꞌi Christ Jesus ꞌen ootsꞌu ha yíltsꞌut whe neghaltsꞌut. ꞋEt ꞌudechoo wheꞌ whudutátꞌelh, ꞌet whutsodaꞌ ꞌuhoonla.

¹⁰ ꞋEt ꞌawet Jesus Christ netaninya. ꞋEt Yakꞌusda dichꞌoh hukwaꞌ ninzun-un ꞌinkꞌez ye unzoo-i cha, ꞌi yunénilhtan. Wheni bé dáztitsah-i, ꞌi Jesus Christ neba gak yulhtsi ꞌinkꞌez khuni unzoo-i, ꞌi be ꞌilhiz be tsꞌúkhuna-i negha íninꞌai. Ndi ꞌaw dálhtsꞌutisa-un, ꞌet neba whusahónꞌai, ꞌet whe whunénilhtan.

¹¹ ꞋEt wheni si ꞌudun yun kꞌut whutꞌenne, ꞌenne butsꞌu tisyalh. ꞋEnne bubulh yásduk, ꞌinkꞌez whubodusꞌeh, ꞌet whuba butsꞌu whelꞌaꞌ-un susdliꞌ.

¹² ꞋEt huwa si cha dzoh nuszut, ꞌet hoontsꞌi ꞌaw hukwaya lhusdloh. Mbe sba ꞌalhaꞌ ꞌuntꞌoh-un tꞌenuszun ꞌet huwa. ꞋInkꞌez ndet ootlꞌa hoosꞌai-un, ꞌudekꞌez dzin whutsꞌun soo ꞌultus whe sba hootatun, ꞌet sba ꞌalha ꞌuhoontꞌoh.

Ndi khuni unzoo-i soo cho oontun

¹³ Ndi khuni ulhtus-i oogha ꞌutsꞌutꞌen-i, si stsꞌun dantsꞌo, ꞌi dutsꞌo cho oontun. Ndi be ꞌalha ꞌuhoontꞌoh-i ꞌinkꞌez be lhkꞌetsꞌusiꞌ-i, ꞌi Christ Jesus ꞌen yulh ꞌuntꞌoh.

¹⁴ Ndai unzoo-i ntlꞌálya-i, ꞌi tsꞌiyawh Ndoni be ulhtus-i, ꞌi be soo cho hoontun. ꞋEn ꞌuntꞌoh neyudínda.

¹⁵ Njan tꞌeooninzun tsꞌiyanne Asia whutꞌenne schꞌaz nahulhya. Phygellus ꞌinkꞌez Hermogenes cha.

¹⁶ Onesiphorus ꞌen lhat sdzi donaꞌ yulhꞌih. ꞋInkꞌez ndi lhuztih tlꞌool be whe dustꞌi-i, ꞌaw yukaya lhiloh whe sunalhꞌen. ꞋEt huwa ꞌen ooyoh dilhtsꞌine neMoodihti bugha teꞌnozeh.

¹⁷ ꞋEt keyoh Rome ninya whe soo cho skunúta whe nasilhti.

¹⁸ ꞋEt dzin neMoodihti yugha teꞌnozeh. ꞋInkꞌez keyoh Ephesus tsꞌe lhat whe sla ꞌuja ínleꞌ, ꞌet cha soo tꞌeooninzun.