2 Thessalonians 3 - Yak'usda Ooghuni

Neulhutsinke neba tenadoohdli

¹ Sulhutsinke ꞌudekꞌez nohdusni, neba tenadoohdli. NeMoodihti ooghuni ꞌa cho nohtadókat ꞌinkꞌez nohba dótiꞌ nohni dáhja la, whuz unꞌa.

² Mbene la tankꞌus neꞌútꞌenne ꞌinkꞌez dune ntsiꞌne, buchꞌa naneólelh. ꞋAw tsꞌiyawh iloh buba ꞌalha ꞌuhoontꞌoh ꞌet huwa.

³ ꞋEt hoontsꞌi neMoodihti ootꞌa níuznootan hubaꞌ hoontꞌoh. ꞋEn ulhtus-i be núdulhya nohulhtsi. ꞋInkꞌez ndun ntsiꞌ-un, ꞌen chꞌa nohghunli.

⁴ ꞋInkꞌez nohni nohghun neMoodihti ootꞌa níuznintan nohba nutsꞌúhizyeꞌ-un, ꞌet ndahtꞌen ꞌinkꞌez ꞌet za ndóhtꞌen.

⁵ Yakꞌusda ye nékꞌensiꞌ-i ꞌinkꞌez Christ hoolhtus whe usyin-un, ꞌet whuz unꞌa nducha neMoodihti nohdzi wheínulhtun.

Tsedoohtni junih

⁶ ꞋEt ꞌawet neulhutsinke, neMoodihti Jesus Christ booziꞌ gha njan dunohtsꞌutni, ndunne ooba ꞌalha ꞌuhoontꞌohne neulhutsinke hinli, tsedutni ꞌinkꞌez ꞌantsꞌi oogháꞌ tikulh za huba sulhꞌi de, ꞌet nduntꞌohne, ꞌenne tsꞌiyawh buchꞌa nasahdilh, ꞌinkꞌez buyit ꞌahtꞌoh. Ndi Yakꞌusda ooghuni whubutsꞌodalhꞌeꞌ-un, ꞌaw lhuhuhóotun ꞌet huwaꞌ hintꞌoh.

⁷ ꞋEt wheni nohbulh ꞌutsꞌutꞌen whe ꞌaw tselhtsꞌudítni. ꞋEt tꞌeoonihzin wheni nekꞌunꞌa oohtꞌeꞌ hubaꞌ hoontꞌoh.

⁸ Ahtꞌi-i, ꞌaw ꞌantsꞌet lhtsꞌiꞌulh. Neba howa whulnaꞌ whe ꞌulhdzis ꞌinkꞌez dzenis ꞌi bulh ꞌutsꞌutꞌen. ꞋEt nohtꞌa nílhtsꞌunoostan.

⁹ Tsꞌiyai be nela oohtꞌen hubaꞌ hoontꞌoh ꞌet hoontsꞌi ꞌaw ndúlhtsꞌustꞌen. Nekꞌunꞌa oohtꞌeꞌ ha whuz unꞌa ꞌutsꞌintꞌoh ꞌet huwa.

¹⁰ ꞋEt ꞌoh daꞌ nohbulh ꞌutsꞌintꞌoh whe nohba nutsꞌúhizyeꞌ, ꞌet whulohne ꞌaw ꞌuhutitꞌelh hukwa lheꞌhunízun de, ꞌaw ꞌuhooꞌalh huba lheꞌhóotꞌoh.

¹¹ ꞋEt nohni nohtoh whulh ꞌúzditsꞌo, tsedutnine cha hoonli ꞌinkꞌez ꞌaw lheꞌhustꞌen. ꞋEt hoontsꞌi ꞌuyoonne eꞌutꞌen kꞌoh huwu hinli.

¹² ꞋEt nduntꞌohne neMoodihti Jesus Christ booziꞌ gha khuni ulhtus-i be ndunóhtsꞌutni, nánilhtsulyaz ꞌuhootꞌen whe didutchꞌoh huyaꞌalh-i nahólelh.

¹³ ꞋEt nohni neulhutsinke, ꞌutꞌen unzoo-i ꞌulhꞌen, khun ꞌetsul oohneh junih.

¹⁴ ꞋInkꞌez neꞌeꞌdustlꞌus be, neghuni yukꞌunulheꞌustꞌen-un, ꞌen tꞌenoohzeh ꞌinkꞌez bulh lheꞌzoohtꞌen. ꞋEt de si yooya ooleꞌ.

¹⁵ Khun nohulhutsinke ꞌutsꞌun unꞌa neꞌhutꞌen de, ꞌaw nohchꞌaz ditni-un nóohzin junih. Nohulhutsin kꞌunꞌa oogha dóohniꞌ.

Yakꞌusda ye unzoo-i nohbulh óotꞌeꞌ

¹⁶ Nedzi whúdizghel-un whuMoodihti, ꞌen dichꞌoh ꞌahoolhyiz ꞌinkꞌez tsꞌiyantsuk nohdzi whúdoghel nohghá holelh. ꞋEt nohni tsꞌiyawh neMoodihti nohbulh óotꞌeꞌ.

¹⁷ Si, Paul, sichꞌoh sla be ꞌukꞌu nusúsguz-i, ꞌi be hadih nohdúsni. Nohtsꞌo kꞌeꞌusgus totsuk ꞌet ndunóhdusni.

¹⁸ NeMoodihti Jesus Christ ye unzoo-i, ꞌi nohni tsꞌiyawh nohbulh óotꞌeꞌ. ꞋEt ndo honeh.