2 Peter 3 - Yak'usda Ooghuni

Yakꞌusda dune ye tsꞌu nahizya-i kꞌoh nálheꞌusne

¹ Ookꞌesiꞌne, ndi bulh nanki ꞌudustlꞌus nohtsꞌo kꞌesges. ꞋI be noheni unzoo nohba whunaznih.

² ꞋEt ndunne nus hooꞌenne Yakꞌusda oochꞌeꞌ unline, ꞌenne ꞌoh daꞌ daja hudaniꞌ. ꞋInkꞌez wheni whelꞌaꞌne ꞌutsꞌintꞌoh, neMoodihti neulhyis-un ooghuni, ꞌi be nohbulh yatsꞌalhduk ꞌinkꞌez nohuzdániꞌ, ꞌet huwa la tsꞌiyawh whunaoolhnih.

³ Njan ꞌet ꞌudechoo soo cho tꞌewhunoohzeh hubaꞌ hoontꞌoh. ꞋUdekꞌez dzin de, Yakꞌusda ghudlohne, ꞌenne ntsꞌenꞌa buyustꞌe whutsꞌu níntꞌi-un, ꞌet whuz unꞌa za ꞌuhutitꞌelh hukwaꞌ huninzun, ꞌenne cha nohtoh ꞌuhutitꞌelh.

⁴ ꞋInkꞌez ꞌuhudutinelh, “ꞋAlha eh Jesus Christ nohtsꞌu nahizya doo cha whusanatidalh-un. Ndun ꞌudáhni-un, ꞌen ntsꞌé ꞌutꞌen? Netsodaꞌne tsꞌiyawh yahadla ꞌet hoontsꞌi ꞌawhuz whusanálhusdai. Ndi yun ꞌulya ꞌinkꞌez ꞌandit dzin whutsꞌun, tsꞌiyantsuk dawhútꞌen, ꞌet za nduwhútꞌen.”

⁵ ꞋUdaꞌ dahooja la ꞌaw whunahoolnih hukwa lheꞌhunízun. Yakꞌusda ooghuni, ꞌi be ꞌudechoo ꞌudaꞌ ndo yat ꞌuhóolya inleꞌ. ꞋInkꞌez ndi yun whuloh tehtlꞌah ꞌuntꞌoh ꞌinkꞌez whuloh yun unli inleꞌ.

⁶ Yakꞌusda ooghuni ꞌi be too dudilhtꞌo. ꞋEt whe tsꞌiyawh gak whulhtsi.

⁷ ꞋEt hoontsꞌi ꞌandit yat ꞌinkꞌez yun bulh Yakꞌusda ooghuni be za huwudli, kꞌat le whudutakꞌun. Yakꞌusda ba lheꞌustꞌenne buba nahutideh ꞌinkꞌez musai hutileh.

⁸ ꞋEt hoontsꞌi nohni ookꞌesiꞌne, njan ꞌilhoghun whunaoodoolhnoh junih. NeMoodihti ꞌilhudzin ꞌet ꞌantsꞌi 1,000 yus kꞌut ooba ndúwhultꞌoh. Kꞌus 1,000 yus kꞌut ꞌet ꞌantsꞌi ꞌilhudzin ooba ndúwhultꞌoh.

⁹ NeMoodihti ntsꞌenꞌa netsꞌu náhizya-un, ꞌaw saꞌ nulhéꞌustꞌen. ꞋEt whulohne saꞌ sla ꞌutꞌen huninzun. ꞋEt hoontsꞌi tube saꞌ neba sulhꞌi. ꞋAw ꞌilhoghun ninta ooltsꞌit hukwa lheꞌnizun. ꞋEt tsꞌiyanne dudzi nahondunooleh ꞌet za butsꞌu hukwaꞌ ninzun.

NeMoodihti oodzin whusaóotiltsꞌulh

¹⁰ ꞋEt ooka tse lhúhoodli whe dune ꞌundunutꞌih-un ꞌulhdzis whusayaih, ꞌen kꞌunꞌa ooka tse lhúhoodli whe neMoodihti oodzin whusaóotiltsꞌulh. Ndet ndúhooja de, ꞌet ndo yat ꞌusdla-i kwun dilhtulh hukwꞌunꞌa gak whutaleh. ꞋInkꞌez ndai ꞌulya-i, tsꞌiyawh kwun ulhtus-i be tsꞌiyaitsuk natilgheh. Ndi yun ꞌinkꞌez ndai ookꞌeyuzdla-i, ꞌi bulh tsꞌiyawh dutákꞌun.

¹¹ Ndowhi tsꞌiyawh gak tileh. ꞋOh de ꞌet dó tanelh de? Lubeshi yit ꞌinkꞌez Yakꞌusda be ꞌutꞌen kꞌoh ꞌet za hukwꞌu neꞌoohtꞌen, ndiz unꞌa dune unline oohleꞌ hubaꞌ hoontꞌoh.

¹² Yakꞌusda oodzin whuz de hóoltsꞌulh-un, hubalhꞌi ꞌinkꞌez ꞌa cho whusahóoltsꞌit-un hukwaꞌ hoolhꞌen. Ndo yat ndulcho whe kwun be gak whutaleh. Ndo tsꞌiyaitsuk ꞌulya-i, kwun nulwus kꞌet ꞌi be tsꞌiyaitsuk natilgheh.

¹³ ꞋEt hoontsꞌi njan netsꞌu hoozi-un, ndi yun ꞌinkꞌez yat ꞌet ꞌawhundidi-un, ꞌet ꞌahoolhyiz hukwa tse tsꞌúholeꞌ. Ye tsꞌihꞌun unꞌa ꞌuntꞌoh-i, ꞌi ꞌet za ꞌilhiz wheni ꞌet ꞌutitꞌelh.

Soo tsꞌihꞌun za oohtꞌeꞌ

¹⁴ ꞋEt huwa nohni ookꞌesiꞌne ndi ꞌi tsꞌiyawh ooka tse hóhleꞌ. Nahtꞌi, ꞌaw hoonliyaz hukwaya lhuzoohleꞌ. ꞋEt de la hoonliyaz nohkꞌelhúholhtsꞌit, ꞌinkꞌez Yakꞌusda be tsꞌihꞌun ꞌahtꞌoh-i, ꞌet whuz unꞌa ꞌen ba hóolhdzih. ꞋEt Jesus Christ whusanája de, bulh tsꞌihꞌun oohtꞌeꞌ.

¹⁵ ꞋInkꞌez neMoodihti tube saꞌ neba sulhꞌi, ꞌet lhane hudoojis huba, ꞌet whuz unꞌa huwu nuni noohdeh hubaꞌ hoontꞌoh. ꞋInkꞌez neulhutsin ookꞌetsꞌinsiꞌ-un, Paul, ꞌen ye whunih-i, ꞌi oogha yultsꞌut, ꞌet ꞌi gha Yakꞌusda ooghuni nohtsꞌo kꞌeꞌanguz.

¹⁶ ꞋEt tsꞌiyawh be ꞌudustlꞌus ꞌi kꞌut ꞌet howu yalhduk. Whulukhi khuni tube howa whúlnaꞌ whe tꞌeznuzih. ꞋEt mbene ꞌaw whulhodílꞌelne, ꞌinkꞌez ꞌaw soo lheꞌíltusne cha, Yakꞌusda ooghuni ꞌi dichꞌoh hukwaꞌ huninzun kꞌunꞌa naꞌhuyínla. ꞋOnghoh-i ooghuni ꞌi cha ꞌet nduhúyinla. ꞋEt huwa hoontsiꞌ-un, ꞌet dichꞌoh khaná huwhuntꞌai.

¹⁷ ꞋEt huwa nohni mbene la ookꞌesiꞌne, njan ꞌet nduwhútanelh whutso, ꞌudaꞌ tꞌeoonáhzun. ꞋEt huwa howahli! Ntsꞌenꞌa la ꞌahtꞌoh, whuz unꞌa za ꞌoohtꞌeꞌ. Doo ka ndunne ntsiꞌne, ꞌenne nintaꞌhutꞌih-un, ꞌenne bukꞌunꞌa ꞌoohneh. Bukꞌunꞌa ꞌahja de, ꞌet tehtsun tihleh.

¹⁸ ꞋEt hoontsꞌi neMoodihti ꞌinkꞌez neulhyis-un Jesus Christ ye unzoo-i, ꞌinkꞌez tꞌeooninzun ꞌi be, ꞌon nus ooghun hodoolhꞌeh. ꞋEn tsꞌun ye diztiꞌ-i nawhultꞌoh ꞌandit ꞌinkꞌez ꞌilhiz wheni. ꞋEt ndo honeh.