2 Peter 2 - Yak'usda Ooghuni

Khuni whutsꞌit-i be whubodulhꞌehne

¹ ꞋEt ꞌoh daꞌ ndunne whahutsꞌit whe nus hooꞌenne, ꞌenne cha dune toh hudilhtsꞌi inleꞌ. ꞋInkꞌez khuni whutsꞌit-i be whubodulhꞌehne, ꞌenne cha nohtoh hudutáltsꞌilh. Ndunne whuꞌiz whe khuni whutsꞌit-i, bé nohba ꞌalha ꞌuhoontꞌoh-i, ꞌi musai hitilhtselh hukwaꞌ hutitꞌelh, ꞌet whuz unꞌa whunohodutilhꞌeh. NeMoodihti, mbe la naboket-un, ꞌen hoontsꞌi hitsꞌoodutádlai. Ndunne whuz unꞌa dune hodulhꞌehne, ꞌenne ꞌilhudzin de Yakꞌusda ye huske-i, ꞌi khuntsul bugha ítaltsꞌulh.

² ꞋInkꞌez khuni duwhutsꞌit-i be lhane nahuntiꞌah bubuhuntoodilh ha. ꞋEt huwa ꞌenne bugha ꞌuyoonne njan Yakꞌusda buznidulh-un, ꞌet tsꞌuwhutsꞌit whe ꞌutsꞌutꞌen, hudutinelh.

³ ꞋUyoonne chꞌeꞌ haꞌ huninzun ꞌet whe bughuni whutsꞌit-i be nohgha háꞌ hunduntatꞌo. ꞋEt hoontsꞌi Yakꞌusda ꞌen buba nahutiyeh-un, ꞌudaꞌ buba lhadintꞌoh. ꞋInkꞌez ꞌen ꞌuntꞌoh ye huske-i bugha whútaꞌalh, ꞌen ꞌaw lhitoh whe ꞌuntꞌoh.

Dune nanaꞌahne Yakꞌusda dabutilelh la

⁴ ꞋOh daꞌ whuz unꞌa za njan dúhooja, nyoonne lizasne lubeshi inlane, ꞌenne Yakꞌusda ꞌaw buba whula lhdítnel. ꞋEt huwa tsa kꞌet whutlꞌah hooloh-un, Tartarus tsꞌutni, whuz tsꞌe whébalhdil. ꞋInkꞌez whuz tsꞌe tsalhgus yo buba nahutiyeh whutsꞌun lhuztih tlꞌool be whénubudizguz.

⁵ ꞋInkꞌez yoo niz de haóodanzut daꞌ, ꞌudaꞌ yun kꞌut whutꞌenne, mbene la Yakꞌusda ghu nuni lhnuszutne ꞌinkꞌez ꞌaw lhahidilhtiꞌne, ꞌenne cha ꞌaw buba whula lhdítnel. ꞋEnne bugha ndi yun kꞌut ndulcho whe too didilhtꞌo ꞌinkꞌez too ꞌubanghan. ꞋOh daꞌ lhkꞌudine (8) ꞌaw ꞌenne za ꞌet whuchꞌa Yakꞌusda bubulhyih. Too didutálhtꞌo whutso Noah, ꞌen Yakꞌusda ye tsꞌihꞌun unꞌa ꞌuntꞌoh-i, ꞌi be dune ubulh yailhduk, ꞌen bubulh ꞌilhoghun ꞌuntꞌoh.

⁶ ꞋInkꞌez nat-un keyoh Sodom ꞌinkꞌez Gomorrah huwhútni-un, ꞌet nawhultꞌoh kwun nailhtan whe whudálhkꞌun ꞌinkꞌez lhez gaih za whulhtsi. ꞋEt whuz unꞌa musai ꞌubulhtsi ꞌet whe buba nahizya. Nus de mbene la Yakꞌusda highu nuní lhuntiszutne ꞌinkꞌez ꞌaw lhahidutálhtiꞌne, ꞌenne huwa tꞌéhonozin ha ꞌinkaꞌ hóonla.

⁷ ꞋInkꞌez ndun tsꞌihꞌun dune Lot, ꞌen keyoh whudutákꞌun whutso ꞌet whuchꞌa Yakꞌusda oolizas huyúlhyih. Nyoonne butoh indaꞌne, ꞌenne bube ꞌutꞌen kꞌoh whudutsun-un huwu ni inleꞌ.

⁸ ꞋEn dune tsꞌihꞌun ꞌuntꞌoh-un, ꞌen butoh indaꞌ inleꞌ, ꞌet ꞌahoolhyiz ꞌaw khuni kꞌúnulheꞌhustꞌen whe whunilhꞌen-un ꞌinkꞌez whuditsꞌo-un, ndóohoontꞌoh-un huwun dzoh nuzut.

⁹ Mbene Yakꞌusda énuljutne, ꞌenne lubeshi ꞌuhulhꞌen whutsꞌó nintꞌi, ntsꞌenꞌa whuchꞌa nabutálelh-un, ꞌet neMoodihti tꞌeooninzun. ꞋInkꞌez tsꞌihꞌun lheꞌítꞌohne, ꞌenne cha ndet dzin buba nahutiyeh-un, ꞌet whutsꞌun bubeꞌ whuyah-un, ꞌet buboontun.

¹⁰ Mbene soo ꞌukꞌenus buyustꞌe whudutsun-un za whutsꞌu níntꞌine ꞌinkꞌez bumoodihne buba ꞌantsꞌi hinli whe bukꞌu nulheꞌustꞌen. ꞋEnne ꞌuhududíltiꞌ ꞌinkꞌez hukwaꞌ huninzun tuneꞌ hutꞌen. Nyoonne nchane ꞌaw whelhoniljut whe hoontsiꞌ hukwꞌunꞌa bughu yahalhduk.

¹¹ ꞋEt hoontsꞌi lizasne, ndunne khuni whutsꞌit-i be dune hodulhꞌehne, ꞌenne buba nus hilhtus ꞌinkꞌez buba nus hincha wheꞌ hintꞌoh. Ndunne lizasne, ꞌenne hoontsꞌi nyoonne nchane nduhutꞌen-un ꞌaw neMoodihti but hubodilhtsiꞌ whe bukꞌelhúhowhusꞌai.

Ndunne khuni whutsꞌit-i be dune hodulhꞌehne, dahúltsiꞌ wheꞌ hintꞌoh

¹² ꞋEt hoontsꞌi ndunne khuni whutsꞌit-i be dune hodulhꞌehne, ꞌenne chuntoh khuna-i nduhúltꞌoh. Nduntꞌohne whulokhun ꞌaw tꞌehonúszun, ꞌet hoontsꞌi hoontsiꞌ hukwꞌunꞌa howu yahalhduk. ꞋEt huwa chuntoh khuna-i kꞌunꞌa yahitadah, ꞌinkꞌez ndi hiye untsiꞌ-i, ꞌi bulh Yakꞌusda but hutiyin.

¹³ Buyustꞌe whutsꞌu níntꞌi-un ꞌahoolyiz ꞌet za ꞌuhúwhulhꞌen. Tsꞌihꞌun lheꞌhootꞌoh tuneꞌ hustꞌen-un, ꞌet hukwꞌelha buba ꞌukꞌelha whutaleh. Nohtoh bukaya hoonli. Tube huhoontꞌiꞌ whe nanohonaꞌah ꞌet whulh hulhgha nohla ꞌuhaꞌalh.

¹⁴ ꞋUyoonne ꞌat bulh nintaꞌhutꞌih, ꞌet za hunilhꞌen. Lubeshi ꞌuhulhꞌen-un, ꞌaw ꞌetsul ꞌuhooneh ꞌaitꞌoh. Mbene buzul soo lheꞌíltusne, ꞌenne tankꞌus úbonilhtꞌi. ꞋUyoonne chꞌeꞌ haꞌ huninzun ꞌet whuz unꞌa budzi hodilꞌeꞌ. Nduntꞌohne Yakꞌusda bubulh hunilchꞌe whe ꞌudaꞌ buba nahizya wheꞌ hintꞌoh.

¹⁵ Tsꞌihꞌun ti ꞌet tinchꞌu huzdil. Balaam, Beor ooyeꞌ, ꞌen be ꞌutꞌen kꞌoh huhóolhchoot. Datꞌen inleꞌ la ꞌet whuz unꞌa ꞌuhutꞌen. ꞋEn tsꞌihꞌun lheꞌhootꞌoh tuneꞌ ꞌutꞌen-un, hoontꞌiꞌ whe ꞌet sooniya be ooba ꞌukꞌelha hoonli.

¹⁶ ꞋEt hoontsꞌi hoontsiꞌ kꞌunꞌa ꞌitꞌelh-un ꞌet huwa. Ndun nus hooꞌen-un, ꞌen whusni kꞌunꞌa neꞌutꞌen whe donkey dune kꞌunꞌa khuniti be yulh yalhduk whe Balaam, “Dah!” yulhni.

¹⁷ ꞋEt ndunne nduntꞌohne, ꞌenne ꞌantsꞌi too kꞌet naoodizgih whunduhúltꞌoh. ꞋEt ndo kwꞌus búlh nodultsꞌut, leꞌ uhintꞌoh. Soo ntsꞌe la tsahólhgus ꞌinkꞌez múgaih hoonli, ꞌet ꞌilhiz wheni ꞌet buba ꞌudun whuzꞌai.

Dune nanaꞌahne

¹⁸ Mbene la ooba ꞌalha ꞌuhoontꞌohne ndunne ndi yun kꞌut tankꞌus ꞌitꞌelhne, ꞌenne buchꞌa nahusdil. Nyoonne khuni whutsꞌit-i hodulhꞌehne, ndunne ooba ꞌalha ꞌuhoontꞌohne hubuhoolhgooh hukwaꞌ buhalhꞌen. Ntsꞌenꞌa hoolhtus whe neyustꞌe lubeshi whutsꞌu nintꞌi-un, ꞌenne whutsꞌit-i khuni ncha-i be bubulh yahalhduk whe tankꞌus úbonilhtꞌi hukwaꞌ ba halhꞌen.

¹⁹ Tsꞌiyantsuk kꞌuneꞌ ꞌuhootꞌen ꞌet butsꞌú hoozi. ꞋEt hoontsꞌi didutchꞌoh whudutsun-un ꞌuhuwhulhꞌen ꞌet whe netsudule be ꞌulhna huzdliꞌ. ꞋEt nawh lheꞌhóotꞌoh, mbe whuchꞌa bunílhde-un, ꞌen bube ꞌulhna hinli.

²⁰ ꞋEt neMoodihti ꞌinkꞌez neulhyis-un Jesus Christ, ꞌen soo tsꞌihꞌun highu tꞌewhunínzun, ꞌi be ndi yun kꞌut hoontsiꞌ-un, ꞌet tsꞌiyawh whuchꞌa hudujih de, ꞌinkꞌez doo cha za buchꞌaꞌ ninde, ꞌinkꞌez ntsiꞌne butanahandil de, ꞌet de whutsodaꞌ Yakꞌusda tꞌehunuszun daꞌ, dahítꞌen la, ꞌet whanus buba hotátsiꞌ tileh.

²¹ ꞋEt nduntꞌohne, ꞌenne njan tsꞌihꞌun ti ꞌaw tꞌehonuszun de, ꞌet de daꞌ buba sooꞌ hotꞌeꞌ ooleꞌ. ꞋEt hukwꞌelhꞌaz tꞌehonanzin de ꞌinkꞌez butlꞌa hidanꞌai whe ꞌantsꞌi hichꞌaz nálhya, ꞌet whuz unꞌa ꞌudekꞌez ꞌi ꞌudechoo whanus hotátsiꞌ.

²² ꞋInkꞌez bubulh dahooja, ndi khuni ꞌi gha whutsꞌodulꞌeh, ntsꞌenꞌa la daja ni, ꞌet whuz unꞌa ꞌuhooja whe ndiz unꞌa njan ndutni, “Lhike nahuyulkooh-i, doo cha za nahuyutꞌulh.” ꞋInkꞌez njan ndutni, “Gugoos too be soo cho bubunaꞌhulhdoh, ꞌinkꞌez hukwꞌelhꞌaz whutlꞌus tanahalgok.” Ndunne ꞌet whuz unꞌa nduhintꞌoh.