2 Peter 1 - Yak'usda Ooghuni

Yakꞌusda soo hoolhtus whe yulh suyinne, Peter hadih ꞌubulhni

¹ Si Simon Peter Jesus Christ ꞌen beꞌ ꞌulhna-un ꞌinkꞌez whelꞌaꞌ-un cha usdli. NeYakꞌusda neulhyis-un Jesus Christ, ꞌen ye tsꞌihꞌun unꞌa ꞌuntꞌoh-i, ꞌi be njan be ꞌalha ꞌuhoontꞌoh-i díztiꞌ-i, nohni cha ꞌinkꞌez wheni cha ꞌalhgoh neghaltsꞌut. ꞋEt huwun nohtsꞌo kꞌeꞌusges.

² Yakꞌusda ꞌinkꞌez Jesus neMoodihti, soo tsꞌihꞌun unꞌa ꞌen ooghun tꞌetsꞌoninzun-un, ꞌet ꞌi be Yakꞌusda ye unzoo-i ꞌinkꞌez ye tsꞌihꞌun ꞌuntꞌoh-i, ꞌi lhanꞌun te oohtꞌeꞌ.

³ Yakꞌusda ba ndi yun kꞌut uzdoltsꞌiꞌ ha, Yakꞌusda dichꞌoh whéulhtus-un, ꞌi be nduwhulcho negha óoninꞌai. ꞋEn ndet ooghun tꞌetsꞌoninzun ꞌi gha, neghá whultsꞌut. Yakꞌusda ye diztiꞌ-i ꞌinkꞌez ꞌaw hoonliyaz whanus hoonzoo-un hooloh, ꞌet whe ꞌuzdutijih huwa nekaꞌ daniꞌ.

⁴ ꞋEt ꞌi be njan khuni kꞌus hooncha-un ꞌinkꞌez khuni diztiꞌ-un, ꞌet whulh netsꞌu náhizya. Njan ꞌet huwa Yakꞌusda dantꞌoh, ꞌet nohni cha whuz unꞌa za ookꞌunꞌa óohtꞌeꞌ. ꞋEt whe ndai ndi yun kꞌut ntsiꞌ-i netilhtselh-i, ꞌet ndi yun kꞌut whutꞌenne ꞌet za whutsꞌó nintꞌi, ꞌet nohni ꞌudaꞌ tsꞌiyawh oochꞌa nasahdil.

Jesus Christ ꞌen ooghun tꞌeoonihzin-un, ꞌi be la ꞌon nus soo nóohyeh

⁵ Njan ꞌet huwa, ꞌet ꞌudaꞌ Yakꞌusda nohba ꞌalhaꞌ ꞌuntꞌoh, nohdzi ndulcho-i be ndiz whuz unꞌa cha oohtꞌeꞌ. Tsꞌihꞌun unꞌa dune unzoone oolhleꞌ, ꞌinkꞌez ꞌon nus cha Yakꞌusda tꞌenoohzeh.

⁶ Hoontsiꞌ-un whuchꞌa khohdleꞌ, ꞌinkꞌez howa whulnaꞌ hoontsꞌi whulh oohyin. ꞋAhoolhyiz Yakꞌusda ooghu nuní noohzut, ꞌinkꞌez ooba whudólhtiꞌ.

⁷ Yakꞌusda ooba ꞌalhaꞌ yintꞌohne bukꞌeoohsiꞌ, ꞌi cha, ꞌinkꞌez be lhkꞌetsꞌutsiꞌ-i, ꞌi be lhkꞌeoohsiꞌ.

⁸ Ndowhi tsꞌiyawh be ndahtꞌen de, ꞌinkꞌez ꞌi be ꞌon nus ulhtus lheh de, ꞌet sih ndi neMoodihti Jesus Christ ꞌen ooghun tꞌeoonihzin-un, ꞌi be ꞌon nus soo nóohyeh, ꞌinkꞌez nohꞌeꞌutꞌen soo tsꞌihꞌun unꞌa ootꞌeꞌ.

⁹ Mbe ndowhi lhuyitꞌiꞌne nilhdukwyaz za kꞌet ꞌaw lhuhoos̱ꞌen. Ndi njan dulhúhustꞌen de, ꞌenne nilhdukwyaz za húhooꞌen leꞌ hintꞌoh. ꞋInkꞌez niz dakꞌez bulubeshi ꞌuhuyalhꞌen-i, ꞌudaꞌ Yakꞌusda tsꞌiyawh bubunayalhde inleꞌ, ꞌet whunahodilhnoh.

¹⁰ ꞋInka sulhutsinke nohdzi ndulcho-i be ꞌinkꞌez ꞌon ꞌun cha, ꞌet ntsꞌenꞌa la dutihjih ha nohkaꞌ daniꞌ, ꞌinkꞌez ꞌutahalyane ꞌahli soo tsꞌihꞌun unꞌa njan ꞌet whunaoodoolhnoh junih. ꞋEt ndi tsꞌiyawh ꞌi be whuz unꞌa ndahtꞌen de, ꞌet de ꞌaw ntoohghalh ꞌaitꞌoh.

¹¹ Ndiz unꞌa neMoodihti ꞌinkꞌez neulhyis-un Jesus Christ, ntsꞌe ꞌilhiz wheni lerwe unli-un, ꞌet hoonzoo whe nohba dáhaꞌ dutikwus.

Peter ꞌawet datítsah-un

¹² ꞋEt huwa njan tsꞌiyawh tꞌeoonáhzun ꞌinkꞌez khuni ꞌalhaꞌ ꞌuntꞌoh-i, ꞌi cha úlhchoot whe soo cho oohtun. ꞋEt hoontsꞌi nohdásniꞌ-un ꞌahoolhyiz lhkꞌuz te nohnalhtsꞌet ha náwhusꞌaih.

¹³ ꞋEt tꞌeoonúszun ꞌawhuz tsꞌihꞌun ꞌuhoontꞌoh khusna ꞌet whutsꞌun, nohdásniꞌ-un nohba whunaznih ꞌinkꞌez nohnalhtsꞌet nunáwhusꞌaih. ꞋI be la hoohnih oohleꞌ.

¹⁴ Tꞌeoonúszun ꞌawet nilhdukw whe datítsah. Ntsꞌenꞌa datísah-un, ꞌet neMoodihti Jesus Christ whusunilhtan.

¹⁵ ꞋInka ꞌon ꞌun oosneh ꞌaitꞌoh-un ꞌet hukwa ꞌustꞌen, ꞌet dustꞌen-un ꞌet huwa dasúsai hukwꞌelhꞌaz njan hodilhꞌeꞌ-un tsꞌiyawh la whunaoolhnih.

Yakꞌusda oochꞌeꞌne, ꞌenne ntsꞌenꞌa Ndoni hubunulhtun yahutilhduk-un, ꞌet whuz unꞌa za yahalhduk whe ꞌukꞌehónguz

¹⁶ ꞋEt neMoodihti Jesus Christ, ꞌen ye ulhtus-i ꞌinkꞌez whusanatidalh-un cha, ꞌet whunohuznilhtan. Ndunne tube whunistꞌi be yalhdukne, ꞌenne ꞌet whuz unꞌa whulohne tsꞌihꞌun unꞌa khuni lheꞌitꞌoh-i ꞌuhulhꞌen. ꞋEnne bukꞌunꞌa iloh wheni whunoh uznulhtun. ꞋEt kꞌus ꞌoh daꞌ whenichꞌoh ꞌet nena be hooncha whe ootsꞌu ha yanduz-un, ꞌet cha tsꞌonalhꞌen.

¹⁷ ꞋEt ꞌoh daꞌ ꞌuhooja-un, neBá Yakꞌusda duYeꞌ yudálhtiꞌ ꞌinkꞌez dádiztiꞌ whe ꞌuntꞌoh, ꞌet whunénilhtan. Kꞌus hooncha-un, ꞌen oochꞌeꞌ ꞌuhoontꞌoh, ꞌet dichꞌoh duYeꞌ yugha ooninꞌai. Yakꞌuz tsꞌe whe ꞌukꞌenus hooncha-un, ꞌet Yakꞌusda ooghuni ndus de ha díltsꞌut whe ndutni, “Ndun ꞌen sYeꞌ ookwꞌesiꞌ-un, ꞌen ꞌuntꞌoh. ꞋEn be tube hoonústꞌiꞌ.”

¹⁸ ꞋOh daꞌ dzulh kꞌut whudiztiꞌ-un ꞌet, ꞌen bulh nutsꞌudilh whe ndi ooghuni, ꞌi yakꞌuz tsꞌe hadiltsꞌut-i, ꞌi ꞌuzdántsꞌo.

¹⁹ ꞋInka ndi Yakꞌusda be nus hooꞌenne bughuni, ꞌi ꞌukꞌenus ootꞌaz ꞌuhoontꞌoh. ꞋEt ndi khuni soo cho ulhchoot de, ꞌet de ꞌukꞌenus nohba hootázooꞌ. Ntsꞌenꞌa tsahólhgus-un kwun be hootꞌen, ꞌet ndi khuni nohba ꞌet nduntꞌoh. Christ, sum cho tsꞌutni, ꞌen whusanátidalh, ꞌoh de ꞌet dúhooja de, nohdzi ndulcho-i be ndi khuni olhchoot.

²⁰ Ndi soo ꞌukꞌenus hooncha-un tꞌewhunoohzeh hubaꞌ hoontꞌoh. Yakꞌusda ooghuni nus tꞌeznanzin-i, ndet ꞌuwhulhni-un, ꞌaw dune didutchꞌoh dukꞌunꞌa naꞌhuyooleh ꞌaitꞌoh.

²¹ ꞋEt ndi khuni ꞌi be nus tꞌeznanzin-i, ꞌaw dune didutchꞌoh hukwaꞌ huninzun huwa iloh whe neba ꞌukꞌeguz. ꞋEt kꞌus Yakꞌusda ooduneꞌne, mbe la oochꞌeꞌne, ꞌenne ntsꞌenꞌa Ndoni whubúnilhtan yahutilhduk-un, ꞌet whuz unꞌa za yahalhduk whe ꞌukꞌehónguz.