2 John 1 - Yak'usda Ooghuni

Hadih nohdúsni, ni John

¹ Si ꞌutso whudilhdzulh-un, tsꞌeke ꞌutahálti-un ꞌinkꞌez buzkeh cha butsꞌó kꞌeꞌusges. ꞋEnne bukꞌesiꞌ. ꞋAw si za iloh. Mbene khuni ꞌalhaꞌ ꞌuntꞌoh-i tꞌeninzunne, ꞌenne cha bukꞌehinsiꞌ.

² Ndi khuni ꞌalhaꞌ ꞌuntꞌoh neyúdizdla-i, ꞌinkꞌez ꞌilhiz wheni nebulh ꞌútitꞌelh-i, ꞌi gha ꞌudusni.

³ Yakꞌusda neBá ꞌinkꞌez neMoodihti Jesus Christ neBá ooYeꞌ, ꞌenne huye unzoo-i, huye téꞌninzun-i, ꞌinkꞌez nedzi whudizghel-i, ꞌohwhi ꞌilhiz wheni nebulh óotꞌeꞌ. Khuni ꞌalhaꞌ ꞌuntꞌoh-i ꞌinkꞌez be lhkꞌetsꞌusiꞌ-i bulh.

NeBá khuni netlꞌa ídanꞌai-i, lhkꞌetsꞌootsiꞌ, ni

⁴ NeBá khuni netlꞌa ídanꞌai-i, tsꞌilhchoot kꞌunꞌa, whuz unꞌa whulohne nohyuzkeh khuni ꞌalhaꞌ ꞌuntꞌoh-i bulh hídulh. ꞋEt nawhusꞌai whe tube hoonústꞌiꞌ.

⁵ ꞋInkꞌez tsꞌeke ꞌandit ntsꞌu tédusdlih. ꞋAw khuni yugha néꞌulhꞌai-i, ꞌandidi be ntsꞌó kꞌeꞌusges iloh. Ndi khuni ꞌudechoo whutsꞌun tꞌezninzun. Lhkꞌetsꞌoosiꞌ, ni.

⁶ Ndai la khuni yugha néulhꞌa oogha nutsꞌóodilh huba ꞌuntꞌoh. Ndi ꞌi bé lhkꞌetsꞌusiꞌ-i, ꞌi ꞌuntꞌoh. ꞋUdechoo whutsꞌun dahtsꞌo ndi khuni yugha néulhꞌa, ꞌi ooghá nohdilh hubaꞌ hoontꞌoh.

Lhane dune nanaꞌáhne yun kꞌéhindil, ꞌet huwa khahdli

⁷ Lhane dune nanaꞌáhne yun kꞌéhindil ꞌet huwa. Nduntꞌohne ꞌaw Jesus Christ ndi yun kꞌut duyustꞌe be nuséya lhuhudusni. Nduntꞌoh-un, ꞌen dune nanaꞌah-un ꞌuntꞌoh ꞌinkꞌez Christ chꞌaz ditni-un cha ꞌuntꞌoh.

⁸ Nohnichꞌoh khahdli! Ndai ꞌutꞌen beni ꞌutsꞌitꞌen-i ninta tsꞌoolelh whuchꞌa. ꞋEt de la soo cho neba ꞌukꞌelha hóleꞌ.

⁹ Mbe nintaꞌutꞌih-un ꞌinkꞌez Christ khuni be ooghu yaduk-i, ꞌaw lhuyóotun de, ꞌaw Yakꞌusda cha lhítꞌih. Mbe la ndi Christ ooghu yaduk-i yoontun de, neBá duYeꞌ bulh nahúltꞌoh ubutꞌi whé ꞌuntꞌoh.

¹⁰ Mbe Christ ooghu yaduk-i lhuyóotun-un whunoh dutilhꞌeh huba nohghu ninya de, nduntꞌoh-un ꞌaw nohyoh daóoyaꞌ junih, kꞌus danínyaih dóhniꞌ junih!

¹¹ Mbe danínyaih yúlhni-un, ꞌen cha tankꞌus neꞌútꞌen-un yula ꞌutꞌen whe ꞌuntꞌoh ꞌet huwa.

John ꞌubulhni, “ꞋIlhudzin de nohtsꞌu tisyalh hukwaꞌ nuszun”

¹² Lhat-un huwun nohtsꞌó kꞌetisgus, ꞌaw ꞌudustlꞌus ꞌinkꞌez ꞌudustlꞌus tooꞌ be iloh. Nohtsꞌu tísyalh ꞌinkꞌez soo nohnin tsꞌe nohbulh yatisduk ꞌet hukwaꞌ nuszun. ꞋEt de la tube cho tsꞌuhótꞌeꞌ.

¹³ Nohulhtus ꞌutahálti-un buzkeh, ꞌenne hadih nohuhútni. ꞋEt ndo honeh.