2 Corinthians 9 - Yak'usda Ooghuni

Lhadóohtꞌeꞌ ndi sooniya huwa tihꞌalh-un

¹ ꞋEt Yakꞌusda oochꞌeꞌne bula tihnelh, ꞌaw ꞌuyoo khuni nohtsꞌo kꞌeꞌoosges huba lheꞌhootꞌoh.

² ꞋEt ndutíhnelh hukwaꞌ nahzun tꞌeoonuszun. ꞋEt huwa ndunne Macedonia whutꞌenne tsꞌun nohdústiꞌ whe nohghu yasduk. Achaia yun kꞌut nohwhenghoh whutꞌenne lhahódutileh-un, ꞌet nadaꞌ lhahódinla budásniꞌ ꞌet huwa. ꞋA cho ꞌuwhutánelh hukwaꞌ nahzun ꞌet tꞌéoonúszun. ꞋEt huwa nohni nohgha ndunne Macedonia whutꞌenne kꞌus lhane sooniya howa hútiꞌalh ꞌet huhóostꞌet.

³ ꞋInkꞌez be nóhdustiꞌ-i, ꞌi ꞌaw howu tꞌeduzoosnih ꞌaitꞌoh, ꞌet huwa neulhutsinke nohtsꞌun whebisꞌaꞌ. ꞋEt whutsodaꞌ nohdúsni, ꞌinka nohzooneya be lhadóohtꞌeꞌ.

⁴ ꞋEt whulohne Macedonia whutꞌenne, khun la sulh hútooyaꞌ, ꞌet nohni ꞌaw lhalhduzahne de, be nóhdustiꞌ-i, ꞌi wheni ookwaya ꞌuztileh. ꞋInkꞌez nohni, ꞌet doꞌ, nohba dáhoontꞌoh?

⁵ ꞋEt huwa ndunúszun whe neulhutsinke ꞌudaꞌ stso nohtsꞌó toodilh ꞌubudúsni. ꞋEt hoonáhtꞌiꞌ whe howa tíhꞌalh, ꞌet de la nkꞌudada huwa tihꞌalh-i lhadooleh. ꞋEt whuz unꞌa ndi huwa títꞌalh-i, hoonáhtꞌiꞌ whe huwa tíhꞌalh, ꞌet te ꞌaw soo ꞌa ndahneh nohtsꞌudóneꞌ ꞌaitꞌoh.

Hoonáhtꞌiꞌ whe sooniya huwa óohꞌalh. Whuz unꞌa Yakꞌusda nohtsꞌo hukwaꞌ ninzun

⁶ ꞋEt njan ndudusni, mbe la ntsool-i ꞌa nuleh-un, ꞌen ntsool-i ha ntilelh. ꞋInkꞌez mbe la lhai ꞌananla-un, ꞌen lhai há ntilelh.

⁷ ꞋIlhone hinli whe dudzi be hukwaꞌ huninzun huwa hítaꞌalh, ꞌet ꞌultsuk-i huwa hóoꞌalh. ꞋAw dantsiꞌ be iloh kꞌus whuz hinilhtꞌi huwa iloh. Mbe la hoontꞌiꞌ whe huwa ꞌáꞌaih-un, ꞌen Yakꞌusda yukꞌensiꞌ ꞌet huwa.

⁸ Yakꞌusda soo ꞌúltus whe ye unzoo-i, ꞌi ꞌon nus ꞌultsuk-i negha nántikulh. ꞋEt whe be ndunahdzit-i, ꞌi ꞌon ꞌun lhai tihtꞌelh. ꞋEt ꞌutꞌen unzoo-i ꞌulhꞌen-i, tsꞌiyaitsuk nohanus ꞌuniltsuk-i, ꞌi nohtlꞌa nátikulh.

⁹ ꞋEt khuni ꞌukꞌeguz-i ꞌet ndutni, “Ndulcho whe dune la ꞌuja, telꞌenne, ꞌenne cha bula ꞌuja. Ye tsꞌihꞌun unꞌa ꞌuntꞌoh-i, ꞌilhiz wheni ꞌuntꞌoh.”

¹⁰ ꞋEt nohgha íyunle-un, ꞌen ꞌon nus lhai úncha nohghale. ꞋEt la nohꞌeꞌutꞌen tsꞌihꞌun unꞌa ꞌuntꞌoh-i, ꞌi ꞌon nus lhai tileh.

¹¹ ꞋEt ndúwhulcho whe soo dahꞌa ꞌet lhtsꞌun ahzoo-un, ꞌi be ꞌonghohne butsꞌun nohla hoonli. ꞋEt whe Yakꞌusda musi tsꞌutni.

¹² ꞋEt dahoontꞌoh huwa nohsooniya gha nohꞌeꞌutꞌen be neꞌutꞌenne ꞌahli, ꞌet whe Yakꞌusda oochꞌeꞌ unline huye ndunidzit-i buba sooꞌ yunoltsuk. ꞋI gha la lhane Yakꞌusda tsꞌun tube cho musi tsꞌutni.

¹³ ꞋInkꞌez ꞌuyoonne nohꞌeꞌutꞌen kꞌoh whe whubuntalhtun, ꞌi be, ꞌet ndúwhulcho whe ꞌonghohne Yakꞌusda ꞌon nus buba whudálhtiꞌ. Christ ooghuni unzoo-i daja dahni-un, ꞌet hukwꞌúneꞌ ꞌahtꞌen. ꞋEt huwa nohla hoonli whe Jerusalem whutꞌenne, ꞌenne bula ꞌahtꞌen, ꞌinkꞌez nꞌun whutꞌenne, ꞌenne cha bula ꞌahja.

¹⁴ Yakꞌusda ye unzoo-i, hóontꞌiꞌ whe nohyé danꞌai-i, ꞌet huwa nohkꞌeni hinli ꞌinkꞌez nohba tenahududli.

¹⁵ Ndi Yakꞌusda ꞌantsꞌi negha óoninꞌai-un, unzoo kꞌet, ꞌaw ꞌuzdooniꞌ ꞌaitꞌoh. ꞋInka tube cho musi tsꞌutni.