2 Corinthians 8 - Yak'usda Ooghuni

Tsꞌiyaitsuk ꞌilhꞌen-i, ꞌi ꞌukꞌenus hoonzoo kꞌunꞌa ꞌuhóonla

¹ ꞋEt ꞌawet sulhutsinke unline, ꞌet Macedonia yun kꞌut Yakꞌusda ba ꞌilhunaoodúlhne, Yakꞌusda ye unzoo-i ꞌet butlꞌa hóoltsꞌut, ꞌet huwun tsꞌiyawh ꞌet tꞌewhuntihzeh hukwaꞌ ꞌuzninzun.

² Tube teꞌhilꞌen-un whutoh ꞌet hoontꞌi tube huhóontꞌiꞌ. ꞋEt hoontsꞌi bula hoonli whe ꞌonghohne bulaꞌ huja.

³ ꞋInkꞌez cha dahíntꞌoh whe dáwhultsuk-un bugha húwhunle, ꞌet hoontsꞌi ꞌet ꞌon nus ꞌuwhultsuk-un, ꞌet za bughaꞌ huninꞌa, whuz unꞌa hukwaꞌ huninzun ꞌinkꞌez ꞌet whuz unꞌa nduhuja. ꞋEt tꞌewhuniszin ꞌet tsꞌihꞌun unꞌa ꞌuhoontꞌoh.

⁴ Ndi ye unzoo-i, ꞌet butlꞌa hónꞌai ꞌet whe Yakꞌusda oochꞌeꞌne lhulh ꞌuhintꞌoh hukwꞌunꞌa whe bula hutinelh. ꞋEt hukwa soo cho nehoodulhkut ꞌet Yakꞌusda oochꞌeꞌne buba tsꞌuyílhchoot.

⁵ ꞋEt ndahúja, ꞌaw hukwa tse lhtsꞌuhoolih kꞌunꞌa unehínla. ꞋUdechoo dichꞌoh Yakꞌusda ghaꞌ hududulya. ꞋEt ꞌinkꞌez Yakꞌusda hukwaꞌ ninzun kꞌunꞌa neghaꞌ hududulya.

⁶ ꞋEt ꞌinka Titus khuni ulhtus-i be uzdániꞌ, ꞌutꞌen unzoo-i nohni ꞌudechoo nohbulh wheꞌ yudilhꞌen, ꞌet tsꞌiyawh lhaóodooleh ha.

⁷ Tsꞌiyaitsuk ꞌulhꞌen-i, ꞌi ꞌukꞌenus hoonzoo kꞌunꞌa ꞌuwhuhla. Be ꞌalha ꞌuhoontꞌoh-i, ꞌi be, ꞌinkꞌez nohghuni cha. Be tꞌéoonudzun-i, ꞌi cha. ꞋA cho ndutihnelh-un, ꞌet cha. ꞋEt be nekꞌehsiꞌ-i, ꞌi cha. ꞋI tsꞌiyawh ꞌukꞌenus hoonzoo hukwꞌunꞌa ꞌuhóonla. ꞋEt whuz unꞌa ndi ye unzoo-i, ꞌi be hoonzoo whuzúlhtsi.

Christ ꞌen kꞌunꞌa ꞌutsꞌootꞌen

⁸ ꞋAw ꞌet ndahneh nohdusni iloh. ꞋEt hoontsꞌi ꞌuyoonne ꞌenne ꞌa cho ꞌuhudutinelh-un, ꞌinkꞌez be nékꞌensiꞌ-i whunéuntalhtun, ꞌet whuz unꞌa ꞌunohdusni.

⁹ NeMoodihti Jesus Christ, ꞌen ye unzoo-i ooghu tꞌeoonáhzun ꞌet huwa. Dalcho-i be la hoonzooꞌ ꞌuntꞌoh, ꞌet hoontsꞌi nohni nohba telꞌen suliꞌ. ꞋEt whe ndai la ye telꞌen-i, ꞌi nohni be hoonzooꞌ oohneh.

¹⁰ Ndi daja nuszun la ꞌet tsꞌihꞌun nohdutasnelh, ꞌet ꞌukꞌenus nohba hootázooꞌ. Nadaꞌ nohni hukwaꞌ nahzun ꞌinkꞌez hoonáhtꞌiꞌ whe ndahtꞌen, ꞌet ꞌawhuz ꞌet ndahtꞌen.

¹¹ ꞋAndit ꞌet lhaóodoohleh hubaꞌ hoontꞌoh. ꞋEt noheni lhadáhla, whuz unꞌa lhaóodoohleh.

¹² ꞋEt dune dudeni lhaídinla whe sooniya daltsuk huwa ítaꞌalh, ꞌi ꞌaw ꞌet soo ꞌúltsuk whe ꞌuntꞌoh. Huwa ítaꞌalh-i ꞌon ꞌunyaz huwa ítaꞌalh hukwaꞌ ninzun hoontsꞌi, ꞌaw ooneh ꞌaitꞌoh-un, ꞌet sooꞌ hoontꞌoh.

¹³ ꞋEt nohni nohba howa whulnaꞌ ꞌinkꞌez ꞌonghunne ꞌaw hoonliyaz lheꞌhustꞌen, ꞌaw ꞌet ꞌuwhudúsni iloh.

¹⁴ ꞋEt kꞌus tsꞌiyanne ba lhghaꞌ hotꞌeꞌ. ꞋEt nohni lhai ahtꞌi te, ndunne lheꞌítꞌihne, ꞌenne whuloh bughahꞌaih. ꞋEt whuz unꞌa lhla tsꞌootꞌen hubaꞌ hoontꞌoh.

¹⁵ ꞋEt whutsodaꞌ ꞌukꞌehóoguz whe ndutni, “ꞋEt ndun mbe la kꞌus lhai ilhehoot-un, ꞌen ꞌaw chꞌuditízkat-i hoontsꞌi lhitꞌiꞌ, ꞌinkꞌez ndun mbe hukwꞌe-i ilhchoot-un, ꞌaw hoonliyaz ye ndunidzit-i hóoloh.”

Yun kꞌut Judea tsꞌe Christ oochꞌeꞌne, ꞌenne buba sooniya ilhunatsꞌootáꞌalh

¹⁶ Yakꞌusda tsꞌun musi tsꞌutni. Titus oodzi lhtus yulhtsi, ꞌet whe soo cho nohla titꞌelh ꞌet hukwaꞌ ninzun.

¹⁷ ꞋAw neghuni ulhtus-i ilhchoot ꞌaw ꞌet za iloh huwa, ꞌet dichꞌoh hukwaꞌ ninzun huwa nohtsꞌú whinya.

¹⁸ ꞋInkꞌez ꞌuyoon neulhutsin, khuni unzoo-i be yalhduk-un, ꞌet huwa Yakꞌusda ba ꞌilhunaoodúlhne, ꞌenne tsꞌiyawh hiba oodílhtiꞌ. ꞋEn cha Titus bulh whuz nohtsꞌún whe tsꞌalhꞌaꞌ.

¹⁹ ꞋAw ꞌet za iloh, ndun ꞌen Yakꞌusda ba ꞌilhunaoodúlhne neba ꞌutahahúyalhti nebulh tíꞌus ꞌinkꞌez nelaꞌ titꞌelh whuba. ꞋEt ndi ꞌutꞌen unzoo-i ꞌonghohne buba neꞌutꞌenne tsinli. ꞋI be neMoodihti dichꞌoh ye diztiꞌ-i tꞌehinoozeh. ꞋInkꞌez ꞌi be la noheni lhadíntꞌoh tꞌetsꞌonózin.

²⁰ Ndi huwantꞌai-i whutaztilelh-i ꞌaw ooka nekꞌéholtsꞌi junih. ꞋEt whuchꞌa neꞌtsꞌutꞌen.

²¹ ꞋEt neMoodihti nalh ꞌinkꞌez tsꞌiyanne nalh cha soo tsꞌihꞌun unꞌa ꞌutsꞌotilelh.

²² ꞋInkꞌez neulhutsin, ꞌen cha, ꞌenne bubulh whe tsꞌalhꞌaꞌ. Ndun lhat whe tsꞌóolhdzai ꞌet whe tꞌetsꞌonínzun ꞌahoolhyiz huba sulhꞌi tube cho ꞌet ndutínelh huba. ꞋEn za nohbulh oodzi hoonli whe nohni ꞌa cho nohtsꞌutíyalh hukwaꞌ ninzun.

²³ ꞋEt mbe la Titus háꞌ ꞌoodulhkutne, ꞌen tsꞌúditni-un, nohni nohba sulh ꞌutꞌen-un ꞌuntꞌoh, budóhni. ꞋEt mbene la neulhutsinke háꞌ ꞌoodulhkutne, ꞌenne Yakꞌusda ba ꞌilhunaoodúlhne khuni buba naꞌáne ꞌinkꞌez Christ ye diztiꞌne ꞌuhintꞌoh, budóhni.

²⁴ ꞋEt ꞌinka Yakꞌusda ba ꞌilhunaoodúlhne whubunulhtun be nekꞌetsꞌinsiꞌ-i ahtꞌi, ꞌinkꞌez si nohba tsꞌodilhtiꞌ-un, ꞌet tsꞌiyawh teꞌ hontizeh.