2 Corinthians 7 - Yak'usda Ooghuni

¹ ꞋEt huwa ookꞌesiꞌne soo zúlhtsꞌai, ndi yé netsꞌu nahizya-i, ꞌi neghun hoonli. ꞋEt huwa neyustꞌe ꞌinkꞌez neyughi ꞌi ndai lubeshi be dutsun suliꞌ, ꞌi tsꞌiyawh bunaꞌtsꞌoolhdeh. Yakꞌusda ꞌen bé uznuljut huwa ꞌet ꞌi be ndi lubeshi ooghu hooloh-un, tsꞌooleꞌ.

ꞋAw ꞌilhone hoontsꞌi dachꞌe núlheꞌtsꞌustꞌen

² Nohdzi neba oodáhaꞌ dahtih. ꞋAw ꞌilhone hoontsꞌi dachꞌe núlheꞌtsꞌustꞌen. ꞋAw ꞌilhone hoontsꞌi ninta lheꞌtsꞌusꞌi. ꞋAw ꞌilhoghun hoontsꞌi gha ha lheꞌtsꞌundunistꞌa.

³ ꞋAw nohkꞌehosꞌalh hukwa iloh ꞌudusnih. ꞋOh daꞌ nohdásniꞌ nedzi yo ꞌahli whe nohbulh yátsꞌitadlah kꞌus nohbulh tsꞌuhutinalh.

⁴ Tube cho ꞌaw whelhusaz whe ꞌet huwun nohbulh yátisduk, nohbe hoonustꞌiꞌ whe nohghu yasduk. Bé kꞌenaznitꞌah-i sdzi dizbun. Hoontsiꞌ-i skꞌuz níntꞌi ꞌet hoontsꞌi tube cho be tsꞌúhoontꞌiꞌ-i sdzi dizbun.

⁵ Soo tsꞌihꞌun unꞌa whunulhꞌen, Macedonia yun kꞌut néznindil whe tsꞌiyaitsuk be nechꞌa tuza néꞌwhutꞌen. ꞋEt whulohne neghun lhdulhyo ꞌuhudutni. Tsꞌiyantsuk whe uznuljut, ꞌet huwa ꞌaw natsꞌoolyis ꞌaitꞌoh.

⁶ ꞋEt hoontsꞌi Yakꞌusda budzi undudane kꞌenaꞌbunanꞌa. ꞋEt Titus neghu ninya whe, ꞌet whe wheni cha kꞌenáneninꞌa.

⁷ ꞋAw ꞌet huwa za iloh. Nohni tsꞌiyawh skꞌé nihtai ꞌet whe la skꞌelhꞌo neóonahꞌai, ꞌinkꞌez skꞌenaih ꞌahli. ꞋEt tube ncha-i be si ba hukwꞌúneꞌ tihtꞌen hukwaꞌ nahzun. Titus tsꞌiyawh ꞌet hukwꞌun nebulh náhoolnuk, ꞌet whe ꞌon nus whunúsni suliꞌ.

⁸ Soo cho nulhꞌen, ndi ꞌudustlꞌus nohtsꞌo tlꞌasꞌai ꞌet huwun tsꞌodi ꞌahli ínleꞌ. ꞋAw whutsꞌulh dusni ꞌet hoontsꞌi sdzi únduda whe ꞌukꞌú nusúsguz. ꞋEt hoontsꞌi ꞌaw sdzi lhúndidowh. Tꞌéoonúszun ndi ꞌudustlꞌus be nohdzi dúntidaꞌ, ꞌet hoontsꞌi ꞌatsulyaz huba za nohdzi unduntidaꞌ.

⁹ ꞋEt ꞌandit ꞌawet whunúsni. Tsꞌodi ꞌahli ꞌaw ꞌet huwa iloh whunúsnih. Ndi tsꞌodi gha nohdzi kꞌoh naꞌahla ꞌet huwa whunúsnih. Yakꞌusda hukwaꞌ ninzun kꞌunꞌa tsꞌodi ꞌahli inleꞌ ꞌet huwa. ꞋEt ꞌatsulyaz tsꞌodi ꞌahli hoonli huwun wheni negha nitálhowháhꞌal.

¹⁰ Yakꞌusda hukwaꞌ ninzun kꞌunꞌa tsꞌodi tsinli de, ꞌet lhtꞌanaznoodilh uzdoojih ha, whuz unꞌa ꞌaw nedzi úndoodaꞌ ꞌaitꞌoh ꞌet huwa. ꞋEt hoontsꞌi ndi yun kꞌut tsꞌodi, ꞌi be yatsꞌadlah.

¹¹ Howu nuní nuhzut, Yakꞌusda hukwaꞌ ninzun kꞌunꞌa tsꞌodi ꞌahli inleꞌ. ꞋEt dahooja la tsꞌiyawh ꞌa cho ndutíhnelh hukwaꞌ nahzun. Yakꞌusda ꞌen tsꞌukꞌeke dutihnelh hukwaꞌ nahzun. ꞋEt nohba dzoh whuzdliꞌ. ꞋEt huwun whenulhjut léꞌahtꞌoh, ꞌet whe skꞌenihtai. Tube cho tsꞌihꞌun nenaóotahꞌalh hukwaꞌ nahzun. Nohba dzoh ꞌuhoontꞌoh-un, ꞌet cha tsꞌiyawh. ꞋEt whe ndúwhulcho whe lubeshi nohghu hooloh suliꞌ.

¹² ꞋUdustlꞌus nohtsꞌó kꞌésguz-i, mbe la nintaꞌantꞌen-un ꞌinkꞌez mbe tsun nintaꞌantꞌen-un ꞌaw ꞌenne bugha iloh nohtsꞌó kꞌeísguz. ꞋEt hoontsꞌi Yakꞌusda nalh tsꞌihꞌun unꞌa whunoh uznulhtun, ꞌet huwa nohtsꞌó kꞌeꞌisguz.

Titus nedaniꞌ-un tube hoonústꞌiꞌ

¹³ ꞋEt whula gha tsꞌe kꞌenánihtꞌa. ꞋEt ꞌi be za wheni cha kꞌenáznitꞌa. ꞋEt ꞌon ꞌun cha, Titus ooyughi nohni nohgha ꞌet whe ꞌandidi nasdliꞌ léꞌuja. ꞋEt huwa ꞌon nus tsꞌonílhni.

¹⁴ ꞋEt ntsꞌoh te la Titus tsꞌun nohéꞌoonustꞌeꞌ whe za nohghu yasduk-un, ꞌaw ꞌet hukwayá lhusdloh. ꞋEt kꞌus ndi khuni be ꞌalhaꞌ ꞌuntꞌoh-i be yatsꞌulhduk-i, ꞌi be za nohbúlh yatsꞌulhduk. ꞋInkꞌez ꞌet whuz unꞌa za ntsꞌoh te la Titus tsꞌun nohéꞌoonustꞌeꞌ whe za nohghu yasduk-un, ꞌet cha ꞌalha ꞌuhoontꞌoh whe Titus nahoonꞌai.

¹⁵ ꞋEt whunalnih khuni kꞌuneꞌ ꞌahtꞌen. ꞋEt nohyustꞌe dutlut ꞌinkꞌez nohba wheóonujut whe nꞌaz de nohtsꞌóyalh whe nulhꞌen. ꞋEt whe ꞌon nus nohkꞌesiꞌ suliꞌ.

¹⁶ ꞋEt tsꞌiyantsuk whe neꞌahtꞌen tsꞌihꞌun unꞌa neꞌahtꞌen, ꞌet huwa ꞌi be tube cho whunúsnih.