2 Corinthians 6 - Yak'usda Ooghuni

Yakꞌusda ba neꞌtsꞌutꞌen-un

¹ ꞋInkꞌez wheni Yakꞌusda bulh ꞌilhoh neꞌutꞌenne tsinliꞌ natsꞌutez dudlih, Yakꞌusda ye unzoo-i ꞌantsꞌi ꞌet ólhchoot junih.

² ꞋEt njan ndutni, “Soo ꞌet neóoninzut-un, ꞌet nyudástsꞌo. Ndet dzin dinjih-un, ꞌoh whuya hoozulh ꞌet nla ꞌusja,” ni. Whunulhꞌen ꞌet ꞌawet ꞌet neóoninzut. Whunulhꞌen ndi dzin ꞌet ꞌawet ndúhooja.

³ ꞋAw nohba dzoh-un nohghá tsꞌúhoꞌalh-un hukwa lheꞌuznízun. ꞋEt huwa Yakꞌusda ba neꞌutꞌenne tsinli, ꞌaw whe hukwꞌé holtsꞌit-un hooloh.

⁴ ꞋEt hoontsꞌi ndúwhulcho whe tsꞌihꞌun unꞌa Yakꞌusda ba neꞌutꞌenne ꞌutsꞌintꞌoh. ꞋEt ꞌutsꞌootꞌeꞌ ꞌaitꞌoh ꞌet hoontsꞌi whulh tsꞌooyin. Nekꞌéhootꞌoh-un netsꞌu hóoltsꞌulh-un, hoonli haꞌ ezdunidzut, whulokhun neba howa whúlnaꞌ-un,

⁵ ꞌinkꞌez nehoolhtsas-un, ꞌanehudilhꞌai-un, nebulh hódutulhzuk-un cha, ꞌutꞌen howa whúlnaꞌ-i cha. Lhtsꞌitoh-un cha, soo tsꞌúhooni-un, ꞌet cha.

⁶ Lubeshi chꞌa khutsꞌudlí-un, be tꞌeoonudzun-i, khun lhutsꞌonúschꞌe-un, ꞌuyoonne tsꞌun tsꞌinzoo-un, ꞌi cha, ꞌinkꞌez Ndoni be tsꞌukhuna-un cha, ꞌet tsꞌihꞌun unꞌa be nékꞌetsꞌinsiꞌ-i, ꞌet cha.

⁷ Khuni be ꞌalhaꞌ ꞌuntꞌoh-i be yatsꞌulhduk-un, Yakꞌusda ye ulhtus-i, ꞌi be tsꞌutꞌen-un, be lhtsꞌugan-i, ꞌi tsꞌutꞌi whe tsꞌihꞌun unꞌa, ꞌet lhalhchꞌaz tsꞌe nela be nutsꞌúle-un. Whuz unꞌa Yakꞌusda ba neꞌútꞌenne tsinli.

⁸ Dunne ba uzdíztiꞌ kꞌus buba lhtsꞌu dítiꞌ, hoontsiꞌ kꞌunꞌa neghu yahulhduk kꞌus hoonzoo kꞌunꞌa neghu yahulhduk, ꞌinkꞌez dune uznaꞌah nehutni, tsꞌihꞌun unꞌa khuni be ꞌutsꞌutni ꞌet hoontsꞌi.

⁹ Dune tꞌenehunúszun huninzun, ꞌet hoontsꞌi tsꞌiyanne tꞌenenínzun. Daztitsah leꞌ tsꞌintꞌoh ꞌet hoontsꞌi dáhooja la, ꞌet whulh tsꞌúkhuna. Nehutuzilhghelh hukwꞌunꞌa nehoolhtsas de, ꞌet hoontsꞌi whulh tsꞌúkhuna.

¹⁰ Datsꞌíntꞌoh whula tsꞌodi tsinli ꞌet hoontsꞌi nedzi be tsꞌuhóontꞌiꞌ. Datsꞌíntꞌoh whula tetsꞌulꞌen ꞌet hoontsꞌi tsꞌihꞌun hiye hoonzoo ootꞌeꞌ-i, ꞌi lhane gha tsꞌúꞌaih. Hoonli be tétsꞌulꞌen ꞌinkꞌez lhtsꞌítꞌiꞌ ꞌet hoontsꞌi tsꞌiyaitsuk tsꞌutꞌi. ꞋEt hoontsꞌ tsꞌiyai ꞌi tsꞌutꞌi.

Yakꞌusda ooba tsun unli-i, ꞌi ootꞌa óohnalh junih

¹¹ Nohni Corinth whutꞌenne tsꞌet whucho nohuzdániꞌ. Nohni nohtsꞌun nedzi unzoo cho tsꞌúlhtsi.

¹² ꞋAw wheni neghá iloh kꞌoh náhtꞌiꞌ. Dunne tsꞌun dahtꞌoh-un, ꞌet huwa kꞌoh nahtꞌiꞌ.

¹³ Tsꞌoodunne ꞌahli hukwꞌunꞌa nohbulh yásduk. Nohtsꞌun ꞌútsꞌintꞌoh, nohni cha ꞌet whuz unꞌa netsꞌun óohtꞌeꞌ.

¹⁴ Ooba ꞌalhaꞌ lheꞌhootꞌohne, ꞌenne butsꞌú nedohdilh junih. Ntsꞌenꞌa suba tsꞌihꞌun unꞌa neꞌutꞌen-un ꞌinkꞌez tsꞌihꞌun ꞌunꞌa nulheꞌustꞌen-un, ꞌen ꞌaw lhulh ꞌuhootꞌen ꞌaitꞌoh. ꞋAw whuz unꞌa ꞌuhótꞌeꞌ ꞌaitꞌoh! Ntsꞌenꞌa suba hootꞌen usda-un ꞌinkꞌez tsalhgus yo usda-un bulh, lhzih hookeꞌ?

¹⁵ Ntsꞌenꞌa suba Christ, ꞌen Beliar ꞌen bulh ꞌilhoh ꞌuhootꞌeꞌ? ꞋEt ntsꞌenꞌa suba ooba ꞌalha ꞌuhoontꞌoh-un ꞌinkꞌez ooba ꞌalhaꞌ lheꞌhóotꞌoh-un, bube ꞌutꞌen kꞌoh lhgha ꞌúwhutatꞌelh?

¹⁶ Ntsꞌenꞌa suba Yakꞌusda oolugliz whucho ꞌinkꞌez ꞌukꞌeltsi bulh lhghaꞌ titꞌelh? Soo cho whunulhꞌen Yakꞌusda whe khúna-un, ꞌen oolugliz whucho ꞌahli. ꞋEt Yakꞌusda ndutni, “Budzi yo ꞌustꞌoh ꞌinkꞌez butunusya. BuYakꞌusda tisdleh ꞌinkꞌez ꞌenne sduneꞌne hutileh.”

¹⁷ ꞋInka neMoodihti netsꞌu náhizya whe ndutni, “Nohni ꞌenne butoh tsꞌu ha náhdilh ꞌinkꞌez buchꞌoh ꞌahtꞌoh. Tsun unli-i, ꞌi ootꞌa óohnalh junih, ꞌet de nohitáschulh.

¹⁸ ꞋEt Si nohBá tisdleh, ꞌet nohni syeꞌke ꞌinkꞌez stseꞌke tihleh. NeMoodihti tsꞌiyantsuk whe ulhtus-un, ꞌen ꞌutni.”