2 Corinthians 5 - Yak'usda Ooghuni

ꞋAw tsꞌanꞌen-i, ꞌi bé iloh whe ndi yun kꞌut uzdilhtsꞌi, be ꞌalha ꞌuhoontꞌoh-i, ꞌet ꞌi be za ndi yun kꞌut uzdilhtsꞌi

¹ ꞋEt ꞌalhaꞌ tꞌetsꞌoninzun ndi nimbali, ꞌi neyustꞌe unli kꞌunꞌa be tsꞌuwhutꞌi ndi yun kꞌut, ꞌet whénilhjut de, ꞌet cha Yakꞌusda ꞌudun yoh neba whulhꞌai. ꞋAw dune dula be ꞌuhóonla-un iloh, ꞌet ꞌilhiz ndo yakꞌuz ꞌet ꞌúhoontꞌoh.

² ꞋInka ꞌalha ndi nimbali be tsꞌuwhutꞌi whe tsꞌukhun dutsó leꞌ tsꞌutni. ꞋInkꞌez neyoh yakꞌuz whuzꞌai ꞌet ookwꞌéznintai. ꞋEt huwa nedzi be nekꞌeyítalhbilh ootsꞌo hukwaꞌ ꞌuzninzun.

³ Nekꞌéyilhbun ꞌi be soo nanedinla leꞌ neyínla, ꞌet de za ꞌaw ꞌustꞌet lhtsꞌíloh leꞌ tsꞌintꞌoh.

⁴ Wheni nimbali be whutꞌine, wheni lhat-un hoontsiꞌ-un nekꞌut whuzꞌai, ꞌet huwa khun dutsꞌutso. ꞋAw nenaih bé ha tsꞌooyaꞌ hukwa lheꞌuznízun. ꞋEt kꞌus ꞌon nus ꞌuyoo lhai beꞌ tsꞌootꞌeꞌ hukwaꞌ ꞌuzninzun. ꞋEt whuz unꞌa be tsꞌukhuna-i be dáztitsah-i ꞌantsꞌi whélno leꞌ titꞌelh.

⁵ ꞋEt mbe la njan wheni ꞌet huba lhanédinla-un, Yakꞌusda ꞌen ꞌuntꞌoh. ꞋUdaꞌ Ndoni be lhanédinla ꞌet whe whulokhun neba ꞌukꞌelha whulhtsi.

⁶ ꞋAw whélhtsꞌuniljut. Tꞌetsꞌonínzun neyustꞌe be ndutsꞌintꞌoh de, ꞌaw neMoodihti bulh lheꞌtsꞌitꞌoh.

⁷ ꞋAw tsꞌanꞌen-i, ꞌi bé iloh whe ndi yun kꞌut uzdilhtsꞌi, be ꞌalha ꞌuhoontꞌoh-i, ꞌet ꞌi be za ndi yun kꞌut uzdilhtsꞌi.

⁸ ꞋEt huwa nedzi hoonli. ꞋInkꞌez neyustꞌe yoh lhtsꞌuhootꞌih de, ꞌet kꞌus neMoodihti bulh uzdilhtsꞌi, ꞌet whe ꞌon nus soo tsꞌuhootátꞌeꞌ.

Yakꞌusda oochꞌeꞌne, Christ ꞌen nahiyilh-un oobut néztiyalh

⁹ ꞋEt huwa ndi yun kꞌut uzdilhtsꞌi kꞌus yakꞌuz uzdilhtsꞌi, Yakꞌusda netsꞌo hukwaꞌ ninzun, ꞌet ꞌahoolhyiz ooba ꞌutsꞌuwhulhꞌen whuz uznintꞌi.

¹⁰ ꞋEt ꞌilhone tsinli whe Christ ꞌen nahiyilh-un oobut néztiyalh. ꞋEt huwa ndi yun kꞌut datsꞌúltsiꞌ, kꞌus datsꞌúldzooꞌ la, ꞌet whuz unꞌa neba ꞌukꞌelha whutaleh.

¹¹ ꞋInkꞌez neMoodihti bé whunujut-un, ꞌet huwun ꞌet tꞌetsꞌonínzun. ꞋEt huwa tsꞌiyanne dune whúz ubuznilhtꞌi. ꞋEt Yakꞌusda ꞌilhone tsinli whe wheni tꞌenenínzun. ꞋInkꞌez ꞌet uncha wheni cha nohyo tsꞌe oogha tꞌetsꞌoninzun-i whe tꞌenenáhzun.

Yakꞌusda Christ yudinda whe yinka duneꞌne tsꞌiyawh tsꞌun nenábudilya

¹² ꞋEt wheni cha doo cha za nohba natsꞌoodudodziꞌ ꞌaitꞌoh. ꞋEt kꞌus nohni neyé ootahtꞌeꞌ-un, ꞌet nohtsꞌu hukwaꞌ ꞌuzninzun. ꞋEt whe ꞌonghohne ꞌuyoonne dune buzooꞌ kꞌunꞌa ꞌet whe huhóontꞌiꞌ, ꞌinkꞌez ꞌet dahíntꞌoh la budzi be di hutꞌi, ꞌaw howu nuní lhonusde, ꞌet mbene la nohdulhyoh ꞌutnine, datsꞌíntꞌoh la soo tsꞌihꞌun unꞌa ubudutáhnelh wheꞌ hoontꞌoh.

¹³ ꞋEt ne-eni hooloh leꞌ tsꞌintꞌoh de, ꞌet Yakꞌusda oobaꞌ hoontꞌoh. ꞋEt tsꞌihꞌun nuní nudehne tsinli de, ꞌet nohni nohbaꞌ hoontꞌoh.

¹⁴ Christ ye nekꞌensiꞌ-i, ꞌi be ꞌon nus úzdunultꞌi ꞌet huwa. ꞋIlhoghun tsꞌiyanne ba dazsai de, ꞌet de tsꞌiyanne yahadlah leꞌ hintꞌoh, ꞌet whuz unꞌa tꞌetsꞌoninzun.

¹⁵ ꞋInkꞌez tsꞌiyanne ba dazsai ꞌet huwa wheni mbe khunáne, ꞌaw whenichꞌoh neba za iloh whe ndi yun kꞌut uzdilhtsꞌi. ꞋEt kꞌus mbe neba dazsai ꞌinkꞌez dunadija-un, ꞌen ba ndi yun kꞌut ꞌuzdóltsꞌiꞌ.

¹⁶ ꞋEt ꞌinka ꞌandit dzin whutsꞌun ndi yun kꞌut dune nena be uznilhꞌen dahíntꞌoh la, ꞌet ꞌaw whuz unꞌa iloh whe dune tꞌebuzninzun. ꞋEt hoontsꞌi ꞌet whuz unꞌa Christ ꞌen ghun tꞌezninzun. ꞋEt hoontsꞌi ꞌandit ꞌaw whuz unꞌa za ꞌen ghun tꞌetsꞌonínzun.

¹⁷ ꞋEt huwa mbe la Christ yudínda-un, ꞌen cha ndúwhulcho ꞌándidi nawhúsdliꞌ. ꞋEt whutsodaꞌ hukwꞌunꞌa, ꞌet tsꞌiyawh ba gak whuzdliꞌ.

¹⁸ Tsꞌiyawh Yakꞌusda tsꞌun hakat. Jesus Christ ꞌen gha tsꞌun nenánedilya. ꞋInkꞌez dune tsꞌun nenánedilya-un, ꞌet huwun dune bulh yáztilhduk, ꞌet Yakꞌusda negha óoninꞌai.

¹⁹ ꞋEt whuz unꞌa, Yakꞌusda Christ yudinda whe yinka duneꞌne tsꞌiyawh tsꞌun nenábudilya. Tsꞌiyantsuk whe hichꞌa neꞌustꞌen, ꞌet ꞌaw ꞌon ꞌun bukꞌelhúhooꞌal. ꞋInkꞌez ndi khuni dune yé tsꞌun nenábudilya-i, ꞌi negha íninꞌai.

²⁰ ꞋEt huwa Christ ꞌen ba khuni naꞌáne tsinli. Yakꞌusda wheni nebe nohbulh yálhduk leꞌ ꞌutni. ꞋEt whe nohtsꞌun tézdudli, ꞌandit whutsꞌun soo Yakꞌusda tsꞌun naóolhyeh!

²¹ Christ, lubeshi ooghu hooloh-un, ꞌen Yakꞌusda wheni neba lubeshi suliꞌ ꞌet huwa. ꞋEt whe ꞌen gha Yakꞌusda ye tsꞌihꞌun unꞌa ꞌuntꞌoh-i kꞌunꞌa ꞌutsꞌintꞌoh ha.