2 Corinthians 4 - Yak'usda Ooghuni

Christ ooghuni unzoo-i, ꞌi neba be hootꞌen-i unli

¹ ꞋEt huwa ndi ꞌandit netsꞌu hoozi-un, ꞌet huba Yakꞌusda ba neꞌútꞌenne tsinli. ꞋEt Yakꞌusda ye teꞌ ninzun-i neghaltsꞌut, ꞌet whe ꞌaw ꞌetsul ꞌutsꞌooneh ꞌaitꞌoh.

² ꞋEt hoontsꞌi dune nunúlꞌiꞌne hukwaya hoonli, ꞌet huwa wheni tsꞌiyawh ꞌet whuchꞌa dah tsꞌutni. Dune naznaꞌah-un, ꞌet wheni ꞌaw ndúlhtsꞌustꞌen. ꞋInkꞌez Yakꞌusda ooghuni ꞌaw whutsꞌit bulh lhtalhtsꞌusdloh. ꞋEt hoontsꞌi khuni ꞌalhaꞌ ꞌuntꞌoh-i búbuznulhtun. ꞋEt whuz unꞌa Yakꞌusda nalh tsꞌiyanne buyo tsꞌe oogha tꞌetsꞌoninzun-i, ꞌi tsꞌun buba natsꞌoodutadziꞌ.

³ ꞋEt ndi khuni unzoo-i be yatsꞌulhduk-i ookꞌeꞌuzbal de, mbene kwuncho yo tsꞌu tídulhne, ꞌenne buchꞌa ookꞌeꞌuzbal whe ꞌuntꞌoh.

⁴ Ooba ꞌalhaꞌ lheꞌhóotꞌohne ꞌuhintꞌoh. ꞋInkꞌez ndi yun kꞌut whuyakꞌusda, dudeni be lhuhoos̱ꞌen ꞌubulhtsi. ꞋEt whula gha tsꞌe Christ ooghuni unzoo-i yé diztiꞌ-i, Christ, ꞌen Yakꞌusda kꞌéguz-i, ndai la ootsꞌu há yanduz-i dudeni be lhuhoos̱ꞌenne doo ka si dudedodi huninzun.

⁵ ꞋAw whenichꞌoh khuyanatsꞌulduk iloh. Christ, ꞌen Jesus neMoodihti, ꞌen ghun ꞌunohtsꞌútni. ꞋEt Jesus ꞌen ba noheꞌustlenne tsinli.

⁶ ꞋEt Yakꞌusda tsahólhgus be hootꞌen-i yukaꞌ daniꞌ ibulh hootꞌen suliꞌ. ꞋEt Yakꞌusda yé diztiꞌ-i ghun tꞌezninzun-i, ꞌi neba be hóotꞌen-i whe ꞌuntꞌoh. ꞋEt ꞌi nedzi bé dindi. ꞋInkꞌez ndi yé diztiꞌ-i, ꞌi Jesus Christ oonin ootsꞌu ha yánduz whe ꞌuntꞌoh.

Tsꞌiyaitsuk hoontsiꞌ-un netsꞌó tukat ꞌet hoontsꞌi ꞌaw nechꞌaꞌ oodeh ꞌaitꞌoh

⁷ ꞋEt beꞌ tilalh-i lhadzeh be ꞌulya, neyustꞌe ꞌet whuz unꞌa ꞌúntꞌoh. Ndi ye hoonzoo ꞌuntꞌoh-i tsꞌutꞌi-i, ꞌi Yakꞌusda negha ininla. ꞋAw whenichꞌoh nechꞌeꞌ iloh. ꞋEt Yakꞌusda ootsꞌu haíyankat-i ꞌuntꞌoh, ꞌaw wheni netsꞌu haínkat iloh.

⁸ Tsꞌiyaitsuk hoontsiꞌ-un netsꞌó tukat ꞌet hoontsꞌi ꞌaw nechꞌaꞌ oodeh ꞌaitꞌoh. Tube whetsꞌíntsaz ꞌet hoontsꞌi ꞌawhuz uznintꞌi zaꞌ tsꞌintꞌoh.

⁹ Whuloh te nechꞌa neꞌwhutꞌen ꞌet hoontsꞌi Yakꞌusda ꞌaw nela dootnih ꞌaitꞌoh. Khuni be nanéhulhdulh de, ꞌet hoontsꞌi ꞌaw nechꞌaꞌ oodeh ꞌaitꞌoh.

¹⁰ Jesus neMoodihti neba dazsai-un, ꞌet ꞌilhiz neyó whudizꞌai. ꞋEt ꞌi be tsꞌiyanne tꞌewhuntizeh Jesus ye khuna-i, ꞌi neyustꞌe ootoh ꞌuyintꞌoh.

¹¹ Wheni ꞌilhiz be khútna ꞌutꞌine, wheni tsꞌiyawh Jesus ꞌen ooba daztitsah ꞌet wheni butlꞌazdudilya ꞌet huwa. ꞋEt neyustꞌe, ꞌi be Jesus ye khúna-i tsꞌiyanne tꞌehontizeh.

¹² ꞋEt wheni be daztitsah-i, ꞌi neyustꞌe ghu hoonli. ꞋInkꞌez nohni ꞌilhiz be khútna-i, ꞌi nohni nohghu hoonli.

¹³ ꞋInkꞌez nohni be nohba ꞌalha ꞌuhoontꞌoh-i ꞌinkꞌez wheni cha be neba ꞌalha ꞌuhoontꞌoh-i, ꞌi bulh lhgha zaꞌ ꞌuntꞌoh. ꞋEt huwa ꞌudaꞌ ꞌukꞌeguz-i ndet ꞌuwhulhni, ꞌet ndiz unꞌa njan ndutni whe ndutni, “ꞋEt sba ꞌalhaꞌ ꞌuntꞌoh ꞌet huwa ꞌi khuni be yasduk.” ꞋEt wheni cha neba ꞌalhaꞌ ꞌuntꞌoh ꞌet huwa ꞌi khuni be yatsꞌulhduk.

¹⁴ ꞋEt huwa ndutsꞌútni, mbe Jesus neMoodihti dunaidilhtí-un, ꞌet wheni Jesus ꞌen bulh dunánedutálelh. ꞋEt wheni ꞌinkꞌez nohni cha tsꞌiyawh ꞌilhunaneoozdla whe dubut nenétalelh.

¹⁵ Whunilhchoh nebulh neꞌwhutꞌen ꞌet whe nohba hootázooꞌ ꞌet huwa. ꞋEt ndi ꞌukꞌenus yé unzoo-i, nohtoh hoonli, ꞌet whe nohni nohgha ꞌon nus Yakꞌusda tsꞌun musi tsꞌutni. ꞋEt whe ooba whudíztiꞌ.

Ndai la lhtsꞌisꞌen-i, ꞌi hoontsꞌi be ꞌalha ꞌuhoontꞌoh-i, ꞌi be uznilhꞌen

¹⁶ ꞋEt huwa ꞌetsul lheꞌtsꞌoone. Neyustꞌe whénilhjut ꞌet hoontsꞌi neyughi unli-i, ꞌi dzin totsuk ꞌandidi nadleh.

¹⁷ ꞋEt ndet la hóontsiꞌ-un neghá whunkat-un, ꞌet ꞌatsulyaz za neba ꞌuwhutꞌih ꞌet huwa. ꞋEt neba ꞌantsꞌi leꞌ ꞌuhoontꞌoh. ꞋEt kꞌus ndi be hóontsiꞌ-un neghá whunkat, ꞌet ꞌi be ꞌon nus neba be óodiztiꞌ-i neba yulhtsi. ꞋInkꞌez ndi be óodiztiꞌ-i, ꞌilhiz wheni ꞌuyínla.

¹⁸ Tsꞌiꞌen-i, ꞌi neba ꞌantsꞌi unli. ꞋAw lhtsꞌisꞌen-i, ꞌi za neba tsꞌihꞌun ꞌuntꞌoh. Tsꞌiꞌen-i, ꞌet ꞌatsulyaz neba whutátꞌelh ꞌet huwa. ꞋEt hoontsꞌi lhístꞌen-i, ꞌi ꞌilhiz wheni ꞌuntꞌoh.