2 Corinthians 3 - Yak'usda Ooghuni

Nohni Christ whutsꞌó kꞌéyanguz-i léꞌahtꞌoh

¹ Doo cha za ꞌuztitꞌelh tsꞌihꞌun dune tsinli nohtsꞌu dutánelh eh? ꞋAwundooh! ꞋEt whulohne njan nduhutꞌen, nohni nohba ꞌudustlꞌus kꞌut nohba naꞌoodudosdziꞌ. ꞋInkꞌez nohni nohtsꞌun ꞌudustlꞌus kꞌut, ꞌi cha buba naꞌoodutasdziꞌ. ꞋEt wheni ꞌaw ndúlhtsꞌustꞌen.

² Nedzi kꞌut ꞌukꞌu sahguz whe tsꞌiyanne hukwꞌu yahalhduk. ꞋEt whuz unꞌa tsꞌiyanne dune tꞌenohonínzun.

³ Whunulhꞌen whe Christ whutsꞌó kꞌeyanguz-i léꞌahtꞌoh. Ndai la ꞌukꞌeguz-i ꞌaw bé kꞌuneguz be lhéꞌinel, Yakꞌusda ye khuna-i, ꞌen ooyughi ꞌen be ꞌukꞌéguz whe ꞌuntꞌoh. ꞋAw tse kꞌut ꞌukꞌu lhíguz, dune budzi kꞌut ꞌukꞌéguz whe ꞌuntꞌoh.

ꞋUdaꞌ khuni ꞌukꞌeguz-i, ꞌi gha dune yáhádlah, ꞌet hoontsꞌi Yakꞌusda ooyughi be dune hukhuna

⁴ Christ ꞌen gha Yakꞌusda ꞌen za ootꞌa níuznintan, ꞌet huwa whuz unꞌa yatsꞌulhduk.

⁵ ꞋEt hoontsꞌi ndi ꞌutꞌen huba whenichꞌoh duba sóo uzdutneh whe ndi ꞌutꞌen ꞌutsꞌulhꞌih, ꞌet ꞌaw whuz unꞌa lhtsꞌunízun. ꞋEt kꞌus Yakꞌusda ꞌen gha za neghaltsꞌut whe ndi ꞌutꞌen huba sóo uzdutneh ꞌet huwa.

⁶ ꞋEn gha neghaltsꞌut whe wheni cha huba sóo uzduja. Ndi ꞌandit netsꞌu hoozi-un neba neóoninꞌai-un, ꞌet huba Yakꞌusda ba neꞌústꞌenne tsinli. Njan ndi ꞌandit netsꞌú hoozi-un, dichꞌoh duyughi gha ꞌútni. ꞋAw ꞌudaꞌ khuni ꞌukꞌeguz-i ꞌaw ꞌi gha iloh. ꞋEt ndi ꞌudaꞌ khuni ꞌukꞌeguz-i, ꞌi gha dune yáhádlah, ꞌet hoontsꞌi Yakꞌusda ooyughi be dune hukhuna nasdliꞌ ꞌet huwa.

⁷ ꞋEt ndi ꞌudaꞌ khuni ꞌukꞌu nusguz-i, tse kꞌut ookꞌé yiguz-i. ꞋInkꞌez ndi khuni ꞌi gha yaidláne leꞌ binla. ꞋEt ndai la ndi yé diztiꞌ-i, ꞌi be ꞌuyinla. ꞋEt whe Moses oonin kꞌut ootsꞌu ha yánduz suliꞌ. ꞋEt ootsꞌu ha náwhendunide whe ꞌet hoontsꞌi Israel ooduneꞌne ꞌon nus buba hoolhtus ꞌet whe ꞌaw hinoolhꞌen ꞌaitꞌoh.

⁸ ꞋEt hoontsꞌi Yakꞌusda ooyughi, ntsꞌenꞌa nela ꞌutꞌen, ꞌet ꞌon nus neba yé diztiꞌ-i ꞌuntꞌoh.

⁹ ꞋEt ndi ꞌudaꞌ-i, ꞌi gha yaidlane leꞌ binla, ꞌi díztiꞌ de, ꞌet de ndi ꞌandit be nela ꞌewhudutꞌen-i whe tsꞌihꞌun dune tsinli, ꞌi ꞌon nus díztiꞌ whe ꞌuntꞌoh.

¹⁰ ꞋEt ndi ꞌudaꞌ ꞌuntꞌoh-i, ꞌi ꞌaw ꞌon nus ꞌukꞌenus yé diztiꞌ-i ꞌuntꞌoh. Ndi ꞌandit yé diztiꞌ-i, ꞌi gha la ndi whutsodaꞌ yé diztiꞌ-i hukwꞌe-i ꞌuntꞌoh ꞌet huwa.

¹¹ ꞋEt ndi ꞌudaꞌ ꞌuntꞌoh-i, ꞌi diztiꞌ hoontsꞌi, ꞌi gak whe ninleꞌ de, ꞌet ndi ꞌandit ꞌuntꞌoh-i, ꞌi ꞌilhiz wheni ꞌuntꞌoh. ꞋEt huwa ꞌi ꞌukꞌenus diztiꞌ whé ꞌuntꞌoh.

¹² ꞋEt huwa ndai la Yakꞌusda tsꞌun hukwa tse tsꞌuhooli-un, ꞌet hooncha. ꞋInka lhtsꞌóojoh whe nohbulh yátsꞌulhduk.

¹³ ꞋAw Moses kꞌunꞌa lheꞌtsꞌustꞌen. Ndi ootsꞌu ha yánduz-i hooloh whénininleꞌ, ꞌet whuchꞌa dunin yutsꞌo álhbal. ꞋEt whula toh tileh-i, Israel ooduneꞌne ꞌaw ꞌahoolhyiz hinoolhꞌen ꞌaitꞌoh.

¹⁴ ꞋEt hoontsꞌi bubeni dutsꞌo suliꞌ. ꞋEt ꞌandit dzin whutsꞌun ndi ndai la ꞌudaꞌ butsꞌu hoozi-un hikꞌu yalhduk-i, ꞌi ootsꞌoh yuzbal-i, ꞌahoolhyiz ꞌet nduntꞌoh. ꞋAw whusanálhuhuyulhchooz. Christ ꞌen za whusanaítilhchus.

¹⁵ ꞋEt hoontsꞌi ꞌandit dzin whutsꞌun ndi Moses ꞌukꞌu néyuzguz-i hukꞌu yalhduk de, budzi ꞌawhuz ootsꞌoh úzbal leꞌ hintꞌoh.

¹⁶ ꞋEt hoontsꞌi ꞌilhoghun neMoodihti tsꞌu nálhꞌa de, ꞌet de ndi ootsꞌoh yuzbal-i whusanátilhchus.

¹⁷ ꞋEt neMoodihti ꞌen Yakꞌusda ooyughi ꞌuntꞌoh. ꞋInkꞌez neMoodihti ooyughi ntsꞌe dizꞌai-un, ꞌet whe nelawhuditni.

¹⁸ ꞋEt wheni tsꞌiyawh nenin ootsꞌoh lheꞌibal whe be naꞌuzdunulꞌen ꞌi be tsꞌonilhꞌen, ꞌet whuz unꞌa neMoodihti yé diztiꞌ-i, ꞌahoolhyiz uznilhꞌen. ꞋInkꞌez ndi ꞌukꞌeguz-i uznilhꞌen-i, ꞌet ꞌi kꞌunꞌa ꞌutsꞌuja. NeMoodihti yé diztiꞌ-i, ꞌi ꞌon nus yé diztiꞌ-i kꞌunꞌa ꞌutsꞌintꞌoh. Dzin totsuk nusyaz za lhéꞌtsꞌitꞌelh. ꞋInkꞌez neMoodihti ooyughi, ꞌen gha whuz unꞌa ꞌuhóoja.