2 Corinthians 12 - Yak'usda Ooghuni

Yakꞌusda dune yunalhtsꞌet ha hónꞌai-un

¹ ꞋAlhaꞌ ndi ꞌududítiꞌ khuni be yasduk-un, ꞌaw sba lheꞌhóozooꞌ wheꞌ dusnih. NeMoodihti be nghun newhúkat-un ꞌinkꞌez ba be hóodiltsih-i, ꞌi ghun nohbulh yátisduk hukwaꞌ nuszun.

² ꞋIlhoghun Christ uniyalh-un, ꞌen tꞌenuszun. ꞋEt ndun ꞌoh daꞌ whunizyat ꞌon ꞌat dit yus kꞌut inleꞌ whe ꞌen whulh tat-un yakꞌuz ꞌet khun beꞌ dúzgooh leꞌ ꞌuja. Ooyustꞌe bulh kꞌus ooyit, ꞌaw si tꞌéoonuzúszun, Yakꞌusda ꞌen tꞌéoonínzun.

³ ꞋEt ndun ꞌen tꞌenuszun. Ooyustꞌe bulh kꞌus ooyit, ꞌaw si tꞌéoonuzúszun, Yakꞌusda ꞌen tꞌéoonínzun.

Yakꞌusda ꞌuntꞌoh whe wheni tsꞌiyai-i be kꞌenáneniꞌoh

⁴ Kꞌus hoonzoo-un neltí léꞌuja, ꞌet ꞌantsꞌi khun beꞌ dúzgooh hukwꞌunꞌa ꞌuntꞌoh. ꞋEt whutsꞌun ndai la khuni ꞌaw ye yátoolhdih ꞌaitꞌoh, ꞌet whudántsꞌo. ꞋAw huwu yátilhduk-un oogha lhoosꞌal ꞌet huwa.

⁵ ꞋEt nduntꞌoh-un dune, ꞌen béꞌ oonustꞌeꞌ whe ooghu yatisduk. ꞋEt hoontsꞌi ꞌaw seꞌ ꞌutꞌen kꞌoh huwa wheꞌ oonustꞌeꞌ kꞌunꞌa howu yaoosduk ꞌaitꞌoh. Dastꞌoh whe tesun, ꞌet za whe ꞌóonustꞌeꞌ whe howu yasduk.

⁶ ꞋEt beꞌ ꞌoonústꞌeꞌ-un kꞌunꞌa yatisduk hukwaꞌ nuszun de, ꞌet hoontsꞌi ꞌaw whuzusni tisdleh hukwa lheꞌnúszun. ꞋEt huwa ndai la khuni ꞌalhaꞌ ꞌuntꞌoh-i, ꞌi gha za yatisduk. Beꞌ ꞌóotastꞌeꞌ whuchꞌa whuz unꞌa ꞌutistꞌelh. Doo ka la nꞌawh dunene sonilhꞌen ꞌinkꞌez sulhóditsꞌo de, ꞌet whuz unꞌa za dune unli sontázin.

Satan ntsiꞌ-un nududeh-un, ꞌen gha ꞌustꞌen dzoh nuszut

⁷ ꞋEt njan ndet la senghun newhúnkat-un, ꞌet whula ꞌududutáztiꞌ whuchꞌa ꞌinkꞌez ncha-un naꞌdudutizselh ꞌet whuchꞌa, ꞌet whula gha tsꞌe whus cho soo dulhkaih le ꞌustꞌen. Satan ntsiꞌ-un nududeh-un, ꞌen gha ꞌustꞌen dzoh nuszut. ꞋEt whuz unꞌa ꞌaw ꞌududóztiꞌ ꞌaitꞌoh.

⁸ Tat neMoodihti ootsꞌu tédisdli, khun la whus cho stsꞌuhanaóokat.

⁹ ꞋInkꞌez ꞌusúlhni, “Be úszoo-i ꞌawet ꞌi mba soo ꞌúntꞌoh. Be ústus-i, ꞌi be teinsun-i, ꞌi tsꞌiyawh lhaóoduja ꞌet huwa.” ꞋEt huwa hoonústꞌiꞌ whe be tesun-i, ꞌi gha ꞌet whe oonustꞌeꞌ. ꞋEt whe Christ ye ulhtus-i sulh óotꞌeꞌ.

¹⁰ ꞋInka ndet tesun-un, ꞌinkꞌez sghu hudloh, ꞌinkꞌez hoonli sba howa whúlnaꞌ, ꞌinkꞌez ndet la dzoh nusahalhdzut, ꞌinkꞌez hoontsiꞌ-un sghá honinla, ꞌi tsꞌiyawh ꞌalhgoh Christ ꞌen gha sba ꞌuhóoja de, ꞌet de ꞌoonústꞌeꞌ. ꞋEt whuz unꞌa be tesun-i, ꞌi be ústus nasdleh, ꞌet huwa hoonústꞌiꞌ.

Whelꞌaꞌne bube ꞌutꞌen kꞌoh-un

¹¹ Nja whe oonustꞌeꞌ-un, ꞌet ꞌi be whuzusni le ꞌustꞌoh. Nohni whuz sunulhtꞌi ꞌet ndósni ha. ꞋEt nohni nohgha buba naꞌóodudosdziꞌ hubaꞌ hoontꞌoh. Whélꞌaꞌ nchane, ꞌaw hoonli whe bukꞌelhꞌih lheꞌústꞌoh, ꞌantsꞌi ꞌustꞌoh ꞌet hoontsꞌi.

¹² ꞋEt ꞌalhaꞌ whélꞌaꞌ-un be whe hóodalꞌen-i, ꞌi tsꞌiyawh si sgha lhawhúdintꞌoh nohba whuzúsi. Dzoh nusuzut-un whulh súsyin, ꞌinkꞌez huwa ꞌítꞌen-un cha, ꞌinkꞌez hooncha túneꞌ zustꞌen cha, hoolhtus-un cha túneꞌ ꞌustꞌen, ꞌet tsꞌiyawh nohtoh huwhúsdla.

¹³ ꞋOnghohne Yakꞌusda ba ꞌilhunaoosdilne, nohnih ntsꞌenꞌa hukwꞌeꞌih ꞌahtah? ꞋEt ꞌaw hoonli nohtsꞌe ꞌúkalheꞌduzusnih. ꞋEt huwa eh nintaꞌustꞌih nahzún eh? Ndi ꞌutsꞌun unꞌa be neꞌzustꞌen-i, ꞌet tsꞌiyawh sba whunawhudoolhnoh!

Dahoontꞌoh huwa bukꞌentsiꞌ

¹⁴ ꞋEt ꞌawet lházduja whe whulh tat nohtsꞌu nátisdalh. ꞋAw ndai la ahtꞌi ookwaꞌ lheꞌnúszun, nohni za nohkaꞌ nuszun. ꞋEt huwa nohtsꞌu dátiso ha íloh. ꞋEt tsꞌoodunne ꞌaw dudusneke ubonoolhyeh huba lheꞌhóotꞌoh. Kꞌus budusneke duzkeh ꞌenne ubonoolhyeh hubaꞌ hoontꞌoh.

¹⁵ ꞋInkꞌez ꞌukꞌenus be nohkꞌesiꞌ, nohni hukwꞌeꞌih skꞌehsiꞌ ꞌet hoontsꞌi sba ꞌutsꞌun unꞌa lheꞌhóotꞌoh. Nohzul ꞌi ba hoonústꞌiꞌ whe ookwꞌelha whutiselh. Be khusna-i, ꞌi hóontsꞌi kwꞌelhá yutiselh.

¹⁶ Ntsꞌoh dája nahzun ꞌet hoontsꞌi hoonliyaz whe nohchꞌa nulhéꞌzustꞌen, nohnichꞌoh tꞌéoonúhzun. ꞋEt hoontsꞌi lheꞌusja, nunúzꞌiꞌ-un hukwꞌunꞌa whutsꞌit bulh nohúschoot léꞌusja.

¹⁷ Mbe nohtsꞌú whesꞌaihne, ꞌenne bugha ꞌet whe nohgha háꞌ dunustꞌah nahzun tílah?

¹⁸ ꞋEt Titus khuni ulhtus-i be dásniꞌ whe ndun neulhutsin ꞌen bulh nohtsꞌó whebisꞌaꞌ. ꞋEn cha eh nohgha háꞌ dunitꞌah? ꞋAwundooh! Tsꞌuhóontꞌiꞌ whe lhgha za whe nohtoh ꞌutsꞌutꞌen? Lhkꞌunꞌa za eh uzditꞌus?

¹⁹ ꞋEt doo cha za nohoodutaskut, wheni nohtsꞌu kꞌúzdutitnelh nahzun eh? ꞋAwundooh! Yakꞌusda nalh Christ ꞌen gha ꞌutsꞌútni, ookꞌesiꞌne ndai la hoonliyaz nohtoh ꞌutsꞌalhꞌen-i, ꞌet ndúwhulcho whe nohni za nohbaꞌ tsꞌitꞌen. ꞋEt whe nus za lhéꞌtilhtus oohleꞌ.

²⁰ ꞋEt tube whesaz whe doo cha za nohtsꞌu nátisdalh. Khun ꞌet ndusja de, ꞌet si ndiz unꞌa tilah nahósꞌalh. ꞋEt ndet la nohtsꞌo húkwaꞌ nuszun, ꞌet ꞌaw whuz unꞌa tilah lheꞌzoohne. Nohni cha stsꞌo hukwaꞌ nahzun-un, ꞌaw whuz unꞌa lheꞌustꞌoh-un tilah nahóhꞌalh. Nohghu nusya de, ꞌet ndiz unꞌa tilah oohtꞌeꞌ, tsꞌiyawh lhedáhdulh ꞌinkꞌez lhgheꞌ oolhnih. ꞋEt lhulh húnulhchꞌoh ꞌinkꞌez lhchꞌaz nedahdulh. Lahootꞌoh whe lhchꞌá nedahniꞌ. Tsꞌiyawh lhghuneꞌ dahtniꞌ. Nchane naꞌdudulhꞌi ꞌinkꞌez tsꞌiyantsuk hoontsiꞌ-un nohba lhtꞌaꞌwhúntꞌen.

²¹ ꞋInka whesaz whe doo cha za nohtsꞌu natisdalh. Kꞌus lhane nohtoh lubeshi ꞌuhínla tilah. Lheꞌhóozooꞌ tuneꞌ hutꞌen. Dune tsꞌeke bulh nintaꞌutꞌi ꞌet whe lubeshi ꞌulhꞌen. ꞋInkꞌez lubeshi dutsun-i ꞌuhulhꞌen. ꞋEt ꞌawhuz tilah budzi kꞌoh nalheꞌhuyilel. ꞋEt whuz unꞌa ꞌet ndúhoontꞌoh de, ꞌet howa sdzi yo ꞌútinelh ꞌinkꞌez howu ni tisdleh. ꞋEnne bugha Yakꞌusda ꞌet yo úsutilelh.