2 Corinthians 11 - Yak'usda Ooghuni

Paul bughuni unli

¹ Ndi khuni ꞌantsꞌi ꞌoh be neyasduk nuhzun la, ꞌet huwa ꞌatsulyaz nducha ꞌon ꞌunle sgha óonahꞌaih. ꞋInkꞌez ꞌalhaꞌ ꞌi be whuz unꞌa soo zúlhtsꞌai.

² ꞋEt Yakꞌusda be ꞌoonih be si cha nohba ꞌooznih. Nohba nahizúsya ꞌilhoghun dune ooghu tihdalh, Christ ꞌen ꞌuntꞌoh. Nohni ꞌaw dune tꞌenuszun-un nohtsun hoolohne leꞌ ꞌahtꞌoh whe Christ gha nóhnusdla.

³ ꞋEt hoontsꞌi ꞌudaꞌ nyoo tlꞌughus ye ꞌutsꞌun ꞌuninzun-i, ꞌi be Eve yunanꞌa, ꞌet whenuzjut nohni cha ꞌet whuz unꞌa noheni nintaꞌitálhꞌelh. ꞋEt ndúhooja de, noheni Christ tsꞌun ꞌaw ꞌilho ooleꞌ ꞌaitꞌoh.

⁴ ꞋInkꞌez lheꞌahja nulhꞌen, ꞌilhoghun dune nohghu ninya whe ꞌuyoon Jesus ghun nohbulh yalhduk, ꞌaw ꞌen whuz unꞌa Jesus nohyulh yalhtsꞌilhdih. Kꞌus ꞌuyoo ꞌuyughi úlhchoot de, ꞌaw wheni neghá iloh úlhchoot. Kꞌus ꞌuyoo khuni unzoo-i úlhchoot de, ꞌaw wheni neghá iloh úlhchoot. ꞋEt ꞌalha ꞌuhoontꞌoh nahzún eh?

Whelꞌaꞌ naꞌdudilꞌine

⁵ ꞋInkꞌez whelꞌaꞌ nchane, ꞌaw buba nyo lheꞌustꞌoh naꞌdunusdzun.

⁶ ꞋEt yasduk-un tꞌeoonuzúszun ꞌet hoontsꞌi lhat-un tꞌéoonuszun whe ꞌustꞌoh. ꞋInkꞌez tsꞌiyawh tꞌéoonóhzun nohzúsi.

⁷ Yakꞌusda ooghuni unzoo-i ꞌaw ꞌukꞌelha iloh bé nohbulh yasduk. Teꞌduduzꞌen ꞌet whe ꞌi be nchane tihle. ꞋI be lubeshi úschoot nahzun eh?

⁸ ꞋUyoonne Yakꞌusda ba ꞌilhozdilne ꞌenne buzooneya sba ꞌukꞌelha hohoolhꞌi. ꞋEt hoontsꞌi bughi ndunustꞌih le ꞌustꞌen, ꞌet nohni nohba neꞌústꞌen whutoh.

⁹ ꞋOh daꞌ nohtoh susda whe hoonliyaz be tsꞌuwhuzdoh-i, ꞌet hoontsꞌi ꞌaw nohtsꞌu deꞌ lhduzusnih. ꞋEt sulhutsinke Macedonia tsꞌe ha hándil whe tsꞌiyaitsuk be slaꞌ hitꞌen. ꞋEt huwa nohtsꞌu deꞌ dusni-un whuchꞌaꞌ ꞌududuzdzun. ꞋEt whuz unꞌa za ndutistꞌelh ꞌahoolhyiz.

¹⁰ Christ khuni yé ꞌalhaꞌ ꞌuntꞌoh-i, ꞌi be dúsbun. ꞋEt huwa njan Achaia yun kꞌut ndulcho whe bé oonustꞌeꞌ-i, ꞌaw ꞌetsul ꞌudósnih ꞌaitꞌoh.

¹¹ Di ha ꞌududúsni? ꞋAw nohkꞌelhúsiꞌ nahzún tilah? Yakꞌusda tꞌéoonínzun nohkꞌesiꞌ.

¹² ꞋUtꞌen ꞌusꞌen-i, ꞌi kꞌelha nohtsꞌu déꞌ doosniꞌ ꞌaitꞌoh, ꞌet za ndutístꞌelh. ꞋEt nyoonne wheni nekꞌunꞌa huhóolhdzih hukwaꞌ hutꞌenne ꞌinkꞌez óontꞌeꞌ be howu yahulhduk de, ꞌet ꞌetsul ꞌahudutánelh ubutiselh.

¹³ ꞋEt nduntꞌohne ꞌaw tsꞌihꞌun whelꞌaꞌne iloh ꞌuhintꞌoh. Dichꞌoh dude ꞌutꞌen kꞌoh hukwꞌunꞌa ꞌuyoonne nahunaꞌah. Christ oowhelꞌaꞌne naꞌhududilꞌi.

¹⁴ Khun te nohba hooncha ooleꞌ junih! Satan ꞌen lizas be hootꞌen-un naꞌdudilꞌi ꞌet huwa.

¹⁵ ꞋEt huwa yula ꞌutꞌenne, ꞌenne dichꞌoh tsꞌihꞌun unꞌa neꞌútꞌenne naꞌhududilꞌi. ꞋEt hoontsꞌi ꞌaw lhuhóocha-un ꞌuhoontꞌoh. ꞋEt ndutꞌenne dichꞌoh bube ꞌutꞌen kꞌoh hukwꞌunꞌa buba ꞌukꞌelha whatáleh!

Si whusni-un usdli noohzin junih

¹⁶ ꞋEt doo cha za nohdusni, ꞌaw dune whusni-un ꞌuntꞌoh sonózin junih. ꞋEt hoontsꞌi whuz unꞌa za ꞌunahzun de, whute, whusni kꞌunꞌa nesúnulhti ꞌet whe hoontꞌum-unyaz óontꞌeꞌ be yatisduk.

¹⁷ Daja nohdusni-un, ꞌaw neMoodihti yalhduk hukwꞌunꞌa iloh ꞌudusni. ꞋAntsꞌi whusnine kꞌunꞌa ꞌunohdusni. Sdzi hoonli whe óontꞌeꞌ sghu dizꞌai.

¹⁸ Lhane ooyustꞌe tsꞌu níntꞌine hukwꞌunꞌa óontꞌeꞌ be yahalhduk. ꞋEt si cha whuz unꞌa óontꞌeꞌ be ꞌet yatisduk.

¹⁹ Noheni hoonli ꞌet hoontsꞌi ndunne dune ꞌaw lheꞌhootꞌoh kꞌunꞌa dune unline nohtoh hudilhtsꞌi, ꞌet hoontsꞌi ꞌaw nohba dalhúhootꞌoh.

²⁰ Lheꞌahtꞌen, ꞌilhoghun nohtoh usda whe de ꞌustlenne nohulhtsi, kꞌus ꞌilhoghun nohúlhgooh, kꞌus ꞌilhoghun ahtꞌi-i nohghu yílhchoot, kꞌus ꞌilhoghun nohtoh ncha naꞌdudulhtsi, kꞌus ꞌilhoghun nohóonúkat, ꞌet ndúwhulcho nohba dalhúhootꞌoh.

²¹ Hukwaya usdli whe nohbulh yatisduk. ꞋOh daꞌ nohtoh úzdilhtsꞌi daꞌ ꞌantsꞌi tetsꞌutsun léꞌtsꞌintꞌoh. ꞋEt hoontsꞌi mbe la huwun lhoojoh-un, ꞌen ookꞌunꞌa, si cha lhóosjoh whe yatisduk.

Christ ꞌen ba dzoh nususzut-un

²² Ndunne Hebrew bughuni yalhdukne naꞌhududútni, ꞌet si cha ꞌilhoghun ꞌustꞌoh. Israel whuduneꞌne naꞌhududutni, ꞌet si cha ꞌilhoghun ꞌustꞌoh. Abraham ootsꞌu haíndene naꞌhududútni, ꞌet si cha ꞌilhoghun ꞌustꞌoh.

²³ Ndunne Christ ba neꞌutꞌenne eh ꞌuhintꞌoh? ꞋAntsꞌi seni hooloh hukwꞌunꞌa yasduk, ꞌet hoontsꞌi si ꞌon nus ꞌustꞌoh. Si ꞌon nus ꞌutꞌen buba nus ꞌultus ꞌi be ꞌustꞌen. ꞋOn nus lhat suhólhtsus kꞌet ꞌaw ꞌuzdooniꞌ ꞌaitꞌoh. ꞋOn nus lhat schꞌaz dáꞌ danꞌaꞌ, ꞌinkꞌez kꞌus lhat-un whe ꞌankwꞌus dasúsai.

²⁴ Nyoonne Lizwifne ꞌalhgoh kwulat stsꞌo holhtsus. ꞋIlhoh suhoolhtsas totsuk, tat whunizyat ꞌon ꞌat ꞌilho hooloh stséꞌ hulhtsus.

²⁵ Tat tutꞌoh be suholhtꞌo. ꞋIlhoh tse be sozoolhghelh hukwaꞌ sahalhꞌen. Tat tsꞌi sulh nádizghuz. ꞋIlhoh yatooꞌ kꞌut lhulcho nusúsdlat, ꞌilhe ꞌúlhdzis ꞌinkꞌez ꞌilhudzin.

²⁶ Lhat te nukediszut. ꞋEt ꞌukoh cha tube sba whe whunujut. ꞋUndunutꞌíne ꞌenne butsꞌun sba howa ꞌóodli-un. Sulh didohne, ꞌenne hoontsꞌi, butsꞌu tse hoosli. ꞋUdun yun kꞌut whutꞌenne, ꞌenne cha butsꞌu tse hoosdli. Keyoh susda-un, sba howa ꞌóodli. Dune hooloh-un susda de, ꞌet cha sba howa ꞌóodli. Yatoo kꞌut ꞌet cha sba howa ꞌóodli. ꞋInkꞌez mbene la sulh didowh naꞌdudilꞌíne, ꞌenne butoh cha sba howa ꞌóodli.

²⁷ ꞋUtꞌen ulhtus-i be ꞌustꞌen. ꞋEt huwa whuloh te tube nenúsi. Lhat ꞌaw lhústoh. Lhat syeꞌúltsꞌilh ꞌinkꞌez taꞌóosda. Lhat-un whe sóo hoosnih, kꞌus lhat hukwꞌuz yo nusúsya dzoh ꞌet dune usdli whe.

²⁸ ꞋAw ꞌet za iloh, Yakꞌusda ba ꞌilhunaoodúlhne bughusdli, ꞌet whe ꞌantsꞌi dutuszas le ꞌustꞌoh.

²⁹ ꞋAw tꞌeoonuzáhzun eh ꞌilhoghun oodzi tetsun suliꞌ de, si cha sdzi tetsun lhih. ꞋInkꞌez mbe la nebulh dune ꞌonghohne lubeshi be naltsꞌuk leꞌ ꞌutꞌihne ꞌet huwun huzúske ꞌinkꞌez ꞌantsꞌi duskꞌun le ꞌustꞌoh.

³⁰ Hoonli huwun ootástꞌeꞌ de, ꞌet dastꞌoh whe tesun, ꞌet la whé ꞌostꞌeꞌ.

³¹ Yakꞌusda, Jesus Christ ꞌen neMoodihti ooBá, ꞌen za ꞌilhiz wheni uzdílhtiꞌ, ꞌen tꞌeoonínzun ꞌaw lhozustsꞌit.

³² ꞋEt lerwe Aretas huyulhni-un, ookeyoh Damascus, ꞌet humoodih-un dune, ꞌen setálhchulh hukwaꞌ huwunli.

³³ ꞋInkꞌez sih dadintꞌaz kꞌet, ꞌet chalhyal cho be súhalhti. ꞋInkꞌez nanásahalhdlukw. ꞋEt whe oola kꞌéhanasja.