1 Timothy 6 - Yak'usda Ooghuni

ꞋUlhna unline, ꞌenne cha dumoodihne hubodólhtiꞌ

¹ ꞋEt mbene ꞌulhna unline cha dumoodihne tsꞌihꞌun unꞌa bughu nuni hunoodeh whe soo cho ubodolhtiꞌ. ꞋEt nduhutꞌen de, ꞌet de Yakꞌusda booziꞌ ꞌinkꞌez ye whubodalhꞌeꞌ ꞌi cha ꞌaw ꞌuyoonne yuchꞌaz dotni ꞌaitꞌoh.

² ꞋEt ꞌulhnane bumoodih ooba ꞌalha ꞌuhoontꞌoh hinline de, ꞌenne butsꞌu hudootni junih, lhulhutsinke hinli ꞌet huwa. Kꞌus ndunne ꞌulhnane, ꞌenne ꞌon nus ulhtus-i be bubaꞌ hutꞌen. Ndunne bumoodihne, ꞌenne Jesus Christ ghun ooba ꞌalhaꞌ yintꞌohne hinli ꞌinkꞌez bukꞌensiꞌ. ꞋEt huwa ꞌon nus ulhtus-i be bubaꞌ hutꞌen whe dude ꞌutꞌen be bulaꞌ hutꞌen wheꞌ hutꞌen. ꞋEt ndi khuni be nyulh yasduk-i, ꞌi ꞌuyoonne soo cho hubodilhꞌeh ꞌinkꞌez budzi donaꞌ ꞌinleh.

Sooneya nohyakꞌusda ooleꞌ junih

³ ꞋEt dune whutsꞌit be dune hodulhꞌeh-un, ꞌen Jesus Christ neMoodihti ooghuni unzoo-i italhchulh hukwa lheꞌnizun-un. ꞋInkꞌez Yakꞌusda ba ndi yun kꞌut uzdoltsꞌiꞌ ha hukwꞌunꞌa ubodutilhꞌeh hukwa lheꞌnizun de,

⁴ ꞌen dune ꞌududiltiꞌ whe ꞌuntꞌoh. Hoonli tꞌeoonuszun. ꞋEt huwa ꞌahoolhyiz dune dachꞌe za ꞌudinelh ꞌinkꞌez khuni ghun dune dulhyoh ꞌutni. Nduntꞌohne dune ꞌoonih ooghu dizꞌai whe ꞌuhintꞌoh. ꞋUyoonne cha dulhyoh ꞌuhutni, khuni ntsiꞌ-i be ꞌuyoonne cha ghu yahalhduk. ꞋEt ꞌuyoonne lubeshi eꞌutꞌen za ghu nuni hunudeh.

⁵ Ndunne bubeni ntsiꞌ suliꞌ whe ꞌahoolhyiz lhdulhyoh ꞌuhunudzun. Khuni ꞌalhaꞌ ꞌuntꞌoh-i lhuhitꞌiꞌ. ꞋEnne ꞌuhuninzun mbe la Yakꞌusda be ꞌutꞌen koh hukwꞌu neꞌutꞌen-un, ꞌen ꞌutinilh hoonzooꞌ tinelh. Nduntꞌone buchꞌaz nasindaih.

⁶ ꞋEt soo tsꞌuhoontꞌiꞌ whe Yakꞌusda be ꞌutꞌen kꞌoh ꞌutsꞌuwhulhꞌen de, nedzi hoontꞌiꞌ whe ꞌet neba ꞌukꞌelha whuzdliꞌ wheꞌ hoontꞌoh.

⁷ Tsꞌuwhuzdliꞌ daꞌ, ꞌaw hoonliyaz whusalhtsꞌilel, ꞌinkꞌez ꞌalhaꞌ neba dzin whula toh suliꞌ de, ꞌaw hoonli ꞌuztoolaꞌ ꞌaitꞌoh.

⁸ ꞋEt huwa ꞌutꞌalh-i ꞌinkꞌez be dune tsinli-i tsꞌutꞌi de, ꞌet neba sooꞌ hotꞌeꞌ.

⁹ ꞋEt hoontsꞌi ndunne hoonzooꞌ tinelh hukwaꞌ ninzunne, ꞌenne whunih ooghu lhdiꞌohne ꞌinkꞌez hoonli hiye nintaꞌtitꞌelh, ꞌi ꞌaw ꞌi za highu nuni nudeh. ꞋEt whula gha tsꞌe yo ubonilhtꞌi ꞌet whe ndi yun kꞌut hudilhtsꞌi-un nintaꞌwhutatꞌelh ꞌinkꞌez hoontsiꞌ tsꞌe hutidulh.

¹⁰ Sooneya ooba ditiꞌ-i, ꞌi lhat-un hoontsiꞌ oogha wheꞌ whududitꞌih. ꞋI gha whulohne dahatni kꞌet be ꞌalha ꞌuhoontꞌoh-i chꞌa hudulh ꞌinkꞌez lhat-un budzi unduda-un khaná huwhutꞌai.

Dune hodilhꞌeꞌ-un cha ꞌinkꞌez nyunchꞌoh cha soo cho khondleꞌ

¹¹ ꞋEt hoontsꞌi Timothy Yakꞌusda ooduneꞌ inli. Nyun ndowhi, ꞌi oochꞌa tilgaih, ꞌinkꞌez be tsꞌihꞌun ꞌuhoontꞌoh-i, be Yakꞌusda kꞌuneꞌ whutꞌen-i, be ꞌalha ꞌuhoontꞌoh-i, be nekꞌetsꞌinsiꞌ-i cha, be whulh tsꞌuzyin-un cha, ꞌinkꞌez be yo ꞌuzdudildzun-i cha, ndi ꞌi tsꞌiyawh whunanyalh hukwa ꞌintꞌen.

¹² Neba ꞌalhaꞌ ꞌuntꞌoh-i, ꞌi gha ꞌon ꞌun ꞌoneh ꞌaitꞌoh whe hukwa ꞌintꞌen. Nyun cha ꞌon ꞌun ooneh ꞌaitꞌoh-un hukwa ꞌontꞌen. ꞋIlhiz be tsꞌukhuna-i, ꞌi dutsꞌo cho hontun. Nyun cha dutanjih ha nka hisda ꞌet huwa. ꞋInkꞌez lhane nalh soo hoonzoo-un budaniꞌ.

¹³ ꞋEt Yakꞌusda oobut nyudusni tsꞌiyaitsuk khuna ꞌinkꞌez Christ Jesus ꞌen Pontius Pilate oonalh soo hoonzoo-un dunne budaniꞌ. ꞋEt huwa Yakꞌusda ꞌinkꞌez Christ Jesus ꞌen nalh soo cho nyudutasnelh,

¹⁴ khuni ntlꞌa dísꞌai-i ookwꞌuneꞌ ꞌontꞌen. Khun naooltsꞌit junih. ꞋUyoonne dzoh tsꞌe nghu yahutilhduk, ꞌet ꞌoh te neꞌontꞌen junih. ꞋEt neMoodihti Jesus Christ whusatiyalh whutsꞌun, ꞌet za ndontꞌeꞌ.

¹⁵ Jesus Christ whuz de tiyalh-un, ndet ꞌuwhutanelh, ꞌoh de neMoodihti ꞌen hukwaꞌ ninzun-un ꞌuwhutanelh. ꞋEn ꞌukꞌenus unzoo ꞌinkꞌez neMoodihti ꞌen za kꞌuneꞌ ꞌutꞌen-un unli. Lerwene tsꞌiyawh bulerwe unli ꞌinkꞌez moodihne cha tsꞌiyawh bumoodih unli.

¹⁶ ꞋAw ꞌen za be dalhtsꞌutsa-i yutꞌi. Ndet usda-un, ꞌet ndi ootsꞌu ha yanduz-i, ꞌaw dune yuzih neooyaꞌ ꞌaitꞌoh. ꞋAw dune lhuyisꞌen ꞌinkꞌez ꞌaw dune yooꞌenne hooloh. ꞋAw ꞌen za ꞌilhiz be hoolhtus-i yutꞌi. ꞋEt huwa uzdilhtiꞌ. ꞋEt ndo honeh.

Hoonzooꞌ ꞌuntꞌohne ꞌududólhtiꞌ junih

¹⁷ Ndi yun kꞌut hoonzooꞌ ꞌuntꞌohne, ꞌenne khuni ulhtus-i be budoniꞌ, ꞌaw ndi yun kꞌut beꞌ hoonzooꞌ tsꞌintꞌoh-i hoonli lhiloh. ꞋAw sooniya ootꞌa ninintan-i iloh ꞌuntꞌoh. ꞋEt kꞌus Yakꞌusda mbe la khuna-un, ꞌaw ꞌen za ootꞌa ninoohtan. Yakꞌusda ꞌen oola hoonli whe tsꞌiyaitsuk be tsꞌohotꞌeꞌ ha negha yunleh.

¹⁸ Tsꞌihꞌun unꞌa ꞌuhootꞌen budoniꞌ. Bula hoonli whe ꞌutꞌen unzoo-i ꞌuhoolhꞌen. ꞋAhoolhyiz ꞌuyoonne hiye ndunidzit-i, ꞌi be bulaꞌ hutitꞌelh-un huba lhahúdootꞌeꞌ. Soo hoontꞌiꞌ whe lhtaꞌtsꞌoolyelh.

¹⁹ ꞋEt nduhutꞌen de, ꞌi be ndo yakꞌuz diztiꞌ-i dichꞌoh duba ꞌilheꞌhosdle, whusaootiltsꞌulh-un wheni. ꞋEt de ꞌilhiz be tsꞌukhuna-i huyitálhchulh.

Be ꞌalha ꞌuhoontꞌoh-i soo cho ooghonleꞌ

²⁰ Syeꞌ Timothy ndi khuni ntlꞌa disꞌa-i, ꞌi soo cho ookꞌuneꞌ tantꞌen, ꞌet wheni ꞌusdla. ꞋAntsꞌi ꞌoh neyalhdukne ꞌinkꞌez Yakꞌusda chꞌaz yalhdukne, khun buzih nonyaꞌ junih. Ndunne whuz unꞌa yalhdukne, tꞌehoninzun huninzun hoontsꞌi, ꞌenne nechꞌaz ditnine hinli.

²¹ ꞋEt huwa be ꞌalha ꞌuhoontꞌoh-i whuz unꞌa highu yalhdukne, ꞌenne tankꞌus hidulh wheꞌ hutni. ꞋEt Yakꞌusda ye unzoo-i, ꞌi nyulh ootꞌeꞌ. ꞋEt ndo honeh.