1 Timothy 2 - Yak'usda Ooghuni

¹ ꞋEt huwa soo cho nyudusni, ꞌudechoo Yakꞌusda tsꞌun tsꞌiyanne buba ootsꞌu tedindli. ꞋEt whuz unꞌa bula titꞌelh, ꞌinkꞌez Yakꞌusda tsꞌun musi dini.

² Lerwene cha ꞌinkꞌez tsꞌiyawh neando ꞌuntꞌohne cha buba tenadindli. ꞋEt de la tꞌezdusni ꞌinkꞌez nedzi doghel whe ndi yun kꞌut uzdoltsꞌiꞌ. ꞋEt Yakꞌusda ba ndi yun kꞌut uzdoltsꞌiꞌ ꞌinkꞌez tsꞌiyanne ba tsꞌinzoo ooleꞌ.

³ ꞋEt whuz unꞌa yinka uzdilhtsꞌi-un, ꞌet hoonzoo wheꞌ hoontꞌoh ꞌinkꞌez Yakꞌusda neulhyis-un oonalh ndutsꞌootꞌeꞌ.

⁴ ꞋEn tsꞌiyanne butilhyih hukwaꞌ ninzun ꞌinkꞌez khuni ꞌalhaꞌ ꞌuntꞌoh-i tꞌehinoozeh ha.

⁵ Yakꞌusda ꞌilhoghun za unli. Yakꞌusda ꞌinkꞌez ndi yun kꞌut dilhtsꞌine hubulheguz ꞌilhoghun buba yalhduk-un za unli, ndun dune Christ Jesus ꞌen ꞌuntꞌoh.

⁶ Wheni tsꞌiyawh naneootakulh ha butlꞌaꞌ dudilti. Ndet la whusahooltsꞌut-un soo ꞌet ꞌuja, tsꞌiyanne whunilhtan ꞌet whuz unꞌa.

⁷ ꞋEt wheni Yakꞌusda ꞌutahasalhti whelꞌaꞌ-un tisdleh ꞌinkꞌez ooba yatisduk ha. Si ꞌutisnelh ꞌudun yun kꞌut whutꞌenne be ꞌalha ꞌuhoontꞌoh-i ꞌinkꞌez khuni ꞌalhaꞌ ꞌuntꞌoh-i cha ꞌet whúbuntistun ha. ꞋEt Christ oonalh daja dusni ꞌalhaꞌ ꞌuntꞌoh-i beꞌ dusni, ꞌaw lhozustsꞌit.

Dune ꞌinkꞌez tsꞌekoo ooba ꞌalha ꞌuhoontꞌohne Yakꞌusda ba ꞌilhunhodulh-un dahutitꞌelh-un

⁸ ꞋEt huwa ndi yun kꞌut ndulcho whe dunene tenahudoodli. ꞋEt bula lubeshi ooghu hooloh whe dodolnih. ꞋAw huske bubeni toh hooloh ꞌinkꞌez buba nawh lheꞌhostꞌeꞌ whe tenahudoodli. ꞋEt whuz unꞌa buba hukwaꞌ nuszun.

⁹ ꞋInkꞌez whuz unꞌa tsꞌekoo cha tsꞌihꞌun unꞌa whe soo nahudootꞌih. Huwhunih hukwꞌunꞌa soo hudootꞌeꞌ, buyustꞌe tsꞌiyawh ookꞌeꞌuzdla hukwꞌunꞌa. Dutsighaꞌ lhat te cho nahídoolhtsiꞌ junih. Gold, kꞌus kwꞌusul nehídilya-i, kꞌus naih ꞌon nus diztiꞌ-i, ꞌet ndóohoontꞌoh-un ꞌet huwa whulohne dune tankꞌus hunintꞌi, ꞌet huwa ꞌutni,

¹⁰ ꞌet hoontsꞌi tsꞌekoo, Yakꞌusda tsꞌun teni nilhdzunne, ꞌutꞌen unzoo-i ꞌuhutilhꞌelh, ꞌi be, ꞌet whuz unꞌa tsꞌekoo soo otꞌenne hutileh.

¹¹ ꞋEt tsꞌekoo dune butlꞌaꞌ hududoolyelh ꞌinkꞌez tꞌehudusnih whe O Yakꞌusda ooghuni huyodoolꞌeh.

¹² ꞋEt tsꞌeke ꞌaw dune hodoolhꞌeh ha, ꞌinkꞌez yumoodih ooleꞌ ha ootlꞌa lhuwhusꞌal. ꞋInkꞌez tꞌedoosnih hubaꞌ hoontꞌoh.

¹³ Yakꞌusda Adam ꞌen cho ꞌuyinla, ꞌet hukwꞌelhꞌaz Eve ꞌinla ꞌet huwa.

¹⁴ ꞋInkꞌez Adam ꞌaw nalhnitꞌoh, kꞌus ndun tsꞌeke ꞌen nainanꞌa ꞌinkꞌez tankꞌus ꞌuja.

¹⁵ ꞋEt hoontsꞌi tsꞌekoo tsꞌihꞌun unꞌa dudeni be khuhudli whe be ꞌalha ꞌuhoontꞌoh-i hutꞌi, Yakꞌusda kꞌehinsiꞌ, ꞌinkꞌez buyustꞌe lubeshi ooghu hooloh de, ꞌet ndihintꞌoh de, buyaz whulhih te hudutijih.