1 Timothy 1 - Yak'usda Ooghuni

Paul, Timothy hadih yúlhni

¹ Si Paul si cha Jesus Christ ba whelꞌaꞌ-un ꞌustꞌoh. Yakꞌusda, neulhyis-un, ꞌen ooghuni gha whelꞌaꞌ-un susdliꞌ. ꞋInkꞌez neMoodihti Jesus Christ ootꞌa niuznintan-un, ꞌen cha ooghuni gha whelꞌaꞌ-un susdliꞌ.

² Timothy tsꞌun be ꞌalha ꞌuhoontꞌoh-i ꞌi gha soo syeꞌ inli. ꞋInkꞌez ndi ꞌudustlꞌus ntsꞌo tlꞌa sꞌaih-i, Yakꞌusda neBá ꞌinkꞌez Jesus Christ neMoodihti, ꞌen gha ye unzoo-i be ꞌugha teꞌ nudzun-i, ꞌinkꞌez be nedzi doghel-i cha, ꞌi ꞌontꞌeꞌ hukwaꞌ nuszun.

Khuni whutsꞌit-i whuchꞌa khondleꞌ

³ Macedonia yun kꞌut tsꞌu tisya whe keyoh Ephesus ꞌet nenyunusti. Soo cho ꞌutꞌen ꞌutalhꞌelh huba mba nustꞌi. Whute, ꞌet za sinda. Daja nyudasniꞌ, ꞌet doo cha za nyudutasnelh, khuni ulhtus-i be whulohne dune whutsꞌit be dune hubohodoolhꞌeh ꞌet whuchꞌa.

⁴ ꞋEnne ꞌudadaꞌ buba ꞌalhaꞌ yintꞌoh, ꞌinkꞌez lhelhdun butsodaꞌne buba ꞌalha ꞌuhoontꞌoh-un. Ndoohoontꞌoh huwa hukwa lhdulhyoh ꞌuhudutni. ꞋAw Yakꞌusda be ꞌutꞌen kꞌoh iloh ꞌuhoontꞌoh. Be ꞌalha ꞌuhoontꞌoh-i Yakꞌusda negha ininꞌai-i, ꞌi gha ꞌon nus tsꞌinzoo ꞌet huwa.

⁵ Budzi lhditsun, ꞌinkꞌez buyo tsꞌe oogha tꞌetsꞌoninzun-i unzoo-i be cha, ꞌinkꞌez ꞌi be buba ꞌalhaꞌ hotꞌeꞌ cha, ꞌet whuz unꞌa lhkꞌehoosiꞌ. ꞋInka ndi khuni Yakꞌusda netlꞌa ídanꞌai.

⁶ ꞋEt whulohne ꞌantsꞌi iloh tsꞌe whehanya. ꞋEt huwa tankꞌus ꞌuhuja ꞌinkꞌez la hootꞌoh-un howu yahalhduk.

⁷ Ndunne Moses be ꞌudustlꞌus kꞌut ꞌukꞌu nusguz-i hubodutilhꞌeh hukwaꞌ huninzun ꞌinkꞌez daja hutni-un, ꞌaw tꞌehonuszun ꞌet hoontsꞌi ꞌalha ꞌuhoontꞌoh hutni.

⁸ ꞋEt hoontsꞌi tꞌetsꞌoninzun Moses be ꞌudustlꞌus ꞌukꞌu neyuzguz-i mbene la soo tsꞌihꞌun unꞌa hiye ꞌutꞌen te, ꞌenne buba yinzoo.

⁹ Moses be ꞌudustlꞌus ꞌukꞌu neyuzguz-i ꞌaw dune tsꞌihꞌun ꞌuntꞌohne ba lheꞌitꞌoh ꞌet cha tꞌetsꞌoninzun. ꞋInkꞌez nduntꞌohne, ꞌenne bubaꞌ yilya mbene la ꞌi kꞌuneyuzyuzne, ndi khuni netlꞌa diltsꞌut-i ꞌaw hikꞌu nulheꞌitꞌelne cha, budzi dutsunne cha, lubeshi ꞌulhꞌenne cha, Yakꞌusda ghudlohne cha, ooze hoontsiꞌne cha, duloo, dubáke ughanne, ꞌenne cha, dune ughanne cha,

¹⁰ tsꞌekoo kꞌus dune bulh nintaꞌutꞌihne, whulohne dune dudulh dune tsꞌun bubeni untsiꞌne cha, dune ꞌulhnane cha, whutsꞌitne cha, dichꞌoh dughuni kꞌunuyuzne cha, ꞌenne Moses be ꞌudustlꞌus bubaꞌ yilya. Yakꞌusda ooghuni unzoo-i, ꞌi tsꞌiyaitsuk unzoo whe dune whubodulhꞌeh. ꞋEt ꞌudun huwa tsꞌihꞌun khuni huyodilꞌeꞌ-i, ꞌi hichꞌaz ditni de, ꞌenne cha bubaꞌ yilya.

¹¹ Ndi khuni unzoo-i ꞌukꞌenus diztiꞌ, ꞌinkꞌez Yakꞌusda za unzoo-un, ꞌen ghun za ꞌuntꞌoh. ꞋEt stꞌa ninintan whe stlꞌa idanꞌai.

Yakꞌusda ye unzoo-i, ꞌi gha uzdólhtiꞌ

¹² Christ Jesus neMoodihti ꞌen stꞌa ninintan whe ꞌustus sulhtsi ꞌinkꞌez de ꞌutꞌen kꞌoh oobaꞌ ꞌutistꞌelh-un, ꞌet stlꞌa honꞌai, ꞌet huwa ꞌen tsꞌun musi dusni.

¹³ Niz de ha oodanzut Yakꞌusda chꞌaz dasni ꞌinkꞌez ooba ꞌalha ꞌuhoontꞌohne, dzoh nubuzusde. Tsꞌiyanne ba dzoh ꞌudusni inleꞌ. ꞋEt hoontsꞌi ꞌaw tꞌeoonuzuszun-un, sba ꞌalhaꞌ lheꞌhootꞌoh ꞌet huwa ꞌistꞌen, ꞌet hoontsꞌi sgha teꞌduninzin.

¹⁴ ꞋEt neMoodihti ye stsꞌun unzoo-i tube lhai whe ꞌuntꞌoh, ꞌinkꞌez Christ Jesus ꞌen ye nekꞌensiꞌ-i, be ꞌalha ꞌuhoontꞌoh-i, cha lhai whe yutꞌi.

¹⁵ Ndi khuni be nyulh yasduk-i, ꞌi ꞌalhaꞌ ꞌuntꞌoh ꞌinkꞌez ꞌi soo tsꞌiyawh ootꞌa ninintan, ꞌet ndutni: Christ Jesus ꞌen ndi yun kꞌuz nusiya lubeshi ꞌulhꞌenne bubutilhyih wheni, ꞌinkꞌez si ꞌukꞌenus dune unsiꞌ-un usdli inleꞌ.

¹⁶ ꞋEt hoontsꞌi Jesus Christ, ꞌen sgha teꞌninzin. ꞋEt ꞌinkꞌez ꞌen ba ꞌudechoo ꞌoh te neꞌustꞌen-un oosdleꞌ. ꞋEt huwa sgha teꞌninzin. Ndunne ꞌawet nilhdukw buba ꞌalhaꞌ yintꞌoh whe ꞌilhiz huhutinalh-un hotitꞌelh, ꞌenne whubunilhtan-un usdli.

¹⁷ ꞋEt ꞌandit ndun ꞌilhiz wheni whulerwe unli-un, ꞌen ba tsꞌodilhtiꞌ. ꞋEn ꞌukꞌenus diztiꞌ-un unli. ꞋEn ꞌuntꞌoh dalhtisa ꞌinkꞌez ꞌaw tsꞌooꞌen ꞌaitꞌoh. ꞋEn za Yakꞌusda whunih-un unli. ꞋEn ꞌilhiz wheni ba tsꞌodilhtiꞌ. ꞋEt ndo honeh.

Netsudule soo cho be óonyaih

¹⁸ Timothy syeꞌ inli. Di khuni ulhtus-i Yakꞌusda be nus hooꞌenne, ꞌudaꞌ nghu yahalhduk inleꞌ, ꞌet si cha whuz unꞌa ntlꞌa hoosꞌai. ꞋI be netsudule chꞌa tsꞌihꞌun unꞌa bube óonyaih.

¹⁹ Be ꞌalha ꞌuhoontꞌoh-i ꞌinkꞌez nyo tsꞌe oogha tꞌetsꞌoninzun-i ndi ꞌutꞌen wheni, ꞌi be soo ubontun. Whulohne bubeni toh yudizꞌai-i, ꞌi tsꞌiyawh hukwa lheꞌhunizun. ꞋEt huwa be buba ꞌalha ꞌuhoontꞌoh-i nintaꞌhonilhꞌen.

²⁰ Ndunne Hymenaeus ꞌinkꞌez Alexander ꞌenne duhulya. ꞋEnne Yakꞌusda chꞌaz yahalhduk. ꞋEt tꞌehonozin ndulhuhoostꞌen ha, ꞌet huwa Satan tlꞌa bisti inleꞌ. Tsꞌiyanne ba tenadondli.