1 Thessalonians 4 - Yak'usda Ooghuni

Lubeshi bughu hooloh ꞌet butsꞌu hukwaꞌ ninzun

¹ ꞋEt huwa neulhutsinke, ndi ꞌudekꞌez khuni be nohbulh yátsꞌulhduk-i, neghuni úlhchoot whe Yakꞌusda hótꞌeꞌ ha tóohdilh nohtsꞌútni inleꞌ. ꞋEt doo cha za whuz unꞌa za Jesus neMoodihti, ꞌen be khuni ulhtus-i be nohtsꞌutni, tube cho lhanꞌun te oohzooꞌ, ꞌinkꞌez whuz unꞌa oohtꞌeꞌ.

² Tꞌeoonuhzun neMoodihti Jesus khuni netlꞌaídanla, ꞌi tsꞌiyawh nohtsꞌudaniꞌ.

³ ꞋEt Yakꞌusda ba ꞌudun nenohninlane, lhghu lhdúlhtsꞌi whe lhulh nintaꞌoohtꞌen junih, ꞌet whuz unꞌa Yakꞌusda nohba hukwaꞌ ninzun.

⁴ Tsꞌiyawh ꞌilhoghun ꞌahli nohyustꞌe ꞌi Yakꞌusda ba ꞌudun neóolhtelh hubaꞌ hoontꞌoh ꞌinkꞌez soo cho ooghohleꞌ.

⁵ Nohyustꞌe hoolhtus whe lubeshi tsꞌu nintꞌi, ꞌet ꞌaw whuz unꞌa ꞌahtꞌoh iloh! ꞋUdun yun kꞌut whutꞌenne, Yakꞌusda tꞌenuszunne, ꞌaw ꞌenne bukꞌunꞌa iloh ꞌahtꞌoh.

⁶ Khun te neulhutsin unline neghá whunistꞌen whe buꞌat bulh nintaꞌtsꞌootꞌen junih. ꞋEt whuz unꞌa za whutsodaꞌ nohdasniꞌ. ꞋInkꞌez doo cha za nohdusni, neMoodihti ꞌen za ndóohoontꞌoh-un huwun kꞌútneh-un ꞌuntꞌoh.

⁷ Yakꞌusda ꞌaw ꞌutꞌen untsiꞌ-i ꞌuztilhꞌelh huba iloh uzdoojih ha nekaꞌ daniꞌ ꞌet huwa. ꞋEn ba lubeshi ooghu hoolohne ꞌuztileh ha nekaꞌ daniꞌ.

⁸ ꞋEt huwa mbe la ndi khuni hidotsꞌo hukwa lheꞌhunizun, ꞌaw dune chꞌaz nultꞌine lhuhiloh. Yakꞌusda chꞌaz nultꞌine za ꞌuhintꞌoh. ꞋInkꞌez Yakꞌusda Ndoni ꞌen cha negha ininꞌai-un unli.

Ndi yun kꞌut whutꞌenne, ꞌenne bunalh tsꞌihꞌun unꞌa toohyaꞌ

⁹ Lhulhutsinke yé lhkꞌesiꞌ-i, ꞌi ghun ꞌaw nohtsꞌo kꞌeꞌoosges huba lheꞌhootꞌoh, Yakꞌusda dichꞌoh whunohodalhꞌeꞌ lhkꞌeoohsiꞌ ha.

¹⁰ ꞋEt whuz unꞌa ndahtꞌen tsꞌiyawh neulhutsinke Macedonia yun kꞌut dilhtsꞌine, ꞌenne butsꞌun. Neulhutsinke khuni ulhtus-i be nohtsꞌutni, lhanꞌun te lhkꞌeoohsiꞌ.

¹¹ ꞋInkꞌez cha, nánilhtsulyaz yun kꞌut dólhtsꞌiꞌ, ꞌinkꞌez nohꞌeꞌutꞌen za noolhꞌen. Nohnichꞌoh nohla be oohtꞌen. ꞋEt whuz unꞌa edóhtꞌen nohtsꞌudániꞌ.

¹² ꞋEt whuz unꞌa ndahtꞌoh de, ꞌet de mbene la ooba ꞌalhaꞌ lheꞌhootꞌohne, ꞌenne bunalh soo tsꞌihꞌun unꞌa toohyaꞌ. ꞋEt whe ꞌaw hoonliyaz etsꞌuhólhdoh ꞌaitꞌoh.

Jesus Christ whusanatidalh-un, ꞌet whutꞌaniznintan

¹³ ꞋEt sulhutsinke, ndunne ꞌudaꞌ nanistezne, ꞌenne bughun tꞌewhuntihzeh nohba hukwaꞌ nuszun. Ooba ꞌalhaꞌ lheꞌhootꞌohne ꞌaw buba whula nalhuhóoꞌoh hukwꞌunꞌa tsꞌodi hinli, doo ka si whuz unꞌa ndohtꞌeꞌ.

¹⁴ Jesus dazsai ꞌinkꞌez dunadija-un, ꞌet neba ꞌalha ꞌuhoontꞌoh de, ꞌet whuz unꞌa za mbene la Jesus ooba ꞌalhaꞌ yintꞌoh whe yahadlane, ꞌenne tsꞌiyawh Yakꞌusda Jesus bulh whusanahutidulh.

¹⁵ ꞋInkꞌez neMoodihti ooghuni be njan nohdusni, neMoodihti neka whusanatidalh-un, ntsꞌenꞌa la dawhutanelh-un, mbene la ꞌawhuz khunane, ꞌet ndunne nanistezne, ꞌenne ꞌaw butso uztoodilh ꞌaitꞌoh.

¹⁶ ꞋEt neMoodihti dichꞌoh soo ꞌultus-un hutiyih, ꞌinkꞌez lizas ꞌukꞌenus diztiꞌ-un, ꞌen cha dutinelh, ꞌinkꞌez Yakꞌusda ba be tsꞌujih-i, ꞌi cha ꞌudutinelh. ꞋEt whuz unꞌa Jesus Christ yakꞌuz tsꞌe whusanatidalh. ꞋInkꞌez ndunne Jesus Christ ooba ꞌalhaꞌ yintꞌohne, ꞌet whuz unꞌa yaidlane, ꞌenne cho dunahudutádulh.

¹⁷ ꞋEt hukwꞌelhꞌaz wheni ꞌawhuz khunane, ꞌinkꞌez ndunne cha, ꞌalhgoh ꞌaw lhtsꞌodutílhꞌel whe khun beꞌ ne-eduzgooh leꞌ tsꞌuja whe ndo kwꞌus toh ꞌalhgoh neMoodihti tazai ooduzdutádulh. ꞋEt whuz unꞌa ꞌilhiz wheni neMoodihti bulh ꞌúztitꞌelh.

¹⁸ ꞋEt huwa ndi khuni ꞌi be tsꞌiyawh kꞌúnulhunoohtꞌah.