1 Thessalonians 3 - Yak'usda Ooghuni

Buba ꞌalha ꞌuhoontꞌoh-un, ꞌet huwu ninli

¹ ꞋEt huwa ꞌaw ꞌon ꞌun whulh tsꞌooyin ꞌaitꞌoh suliꞌ. ꞋEt neba hoonzoo nídzun whe whenichꞌoh keyoh Athens íkeꞌ.

² ꞋInka ndun neulhutsin, Timothy Yakꞌusda ba neꞌutꞌen-un, ꞌen nohtsꞌu whe tsꞌalhꞌaꞌ. ꞋEn ꞌuntꞌoh Christ ooghuni unzoo-i ooghá tsꞌana nela ꞌutꞌen-un. ꞋEn gha nohba ꞌalha ꞌuhoontꞌoh-un, ꞌet whuz unꞌa ꞌilhiz ooleꞌ hukwꞌunꞌa za ꞌutihtꞌelh, ꞌinkꞌez dughuni be nus nohnilhtꞌi.

³ ꞋEt njan dune dzoh nuneulhdeh-un whe nohba dzoh ooleꞌ junih. Nohnichꞌoh tꞌeoonahzin njan nebaꞌ hóolya wheꞌ hoontꞌoh.

⁴ ꞋEt nohzih íkeꞌ whe dzoh nuztideh wheꞌ hoontꞌoh nohdátniꞌ inleꞌ. ꞋEt whuz unꞌa ꞌuhooja ꞌinkꞌez kꞌan ꞌet tꞌeoonahzun.

⁵ ꞋEt huwa si cha ꞌaw ꞌon ꞌun whulh óosyin ꞌaitꞌoh. ꞋEt huwa Timothy, ꞌen nohtsꞌu whesꞌaꞌ whe be ꞌalha ꞌuhoontꞌoh-i ghun dahtꞌoh tsꞌiyawh neba nahootaꞌalh. Doo ka si mbe la neóolhdzih-un, nohni cha tilah nohóolhdzai de, ꞌet de ne-eꞌutꞌen ꞌantsꞌet ꞌutitꞌelh.

Timothy daja nedaniꞌ-un, ꞌet huwa nedzi hoontꞌiꞌ

⁶ ꞋEt ꞌandit Timothy nohtsꞌu ha nája. ꞋInkꞌez dahtꞌoh la ꞌet hukwꞌun nebulh nahoolnuk. Ndi be ꞌalha ꞌuhoontꞌoh-i, be nekꞌesiꞌ-i cha, ꞌet tsꞌiyawh nawhusꞌai. ꞋEt netsꞌun ahzoo ꞌinkꞌez wheni netihꞌelh hukwaꞌ nahzun, ꞌet cha hukwꞌun nebulh nahoolnuk. ꞋInkꞌez wheni cha whuz unꞌa za nohuztiꞌelh hukwaꞌ ꞌuzninzun.

⁷ ꞋEt huwa neulhutsinke ꞌuyoonne gha dzoh nutsꞌudeh ꞌinkꞌez dzoh nebulh ꞌuhoontꞌoh, ꞌet hoontsꞌi be ꞌalha ꞌuhoontꞌoh-i ahtꞌi, ꞌet ꞌi be nedzi do naꞌuja.

⁸ ꞋEt neMoodihti ꞌen ba ulhtus whe núdulhya de, ꞌet tsꞌukhuna.

⁹ Ndai be tsꞌoohoontꞌiꞌ-i, ꞌi be tsꞌiyawh Yakꞌusda but nohba tsꞌuhoontꞌiꞌ? Ntsꞌenꞌa suba soo ꞌulcho-i be Yakꞌusda nohba musi uzdóniꞌ?

¹⁰ Be ꞌalha ꞌuhoontꞌoh-i ahtꞌi-un, ndet la tsꞌihꞌun tꞌeoonuzahzun ꞌet tsꞌiyawh nohba lhatsꞌodutileh. ꞋEt huwa ꞌulhdzis ꞌinkꞌez dzenis ꞌi bulh tube Yakꞌusda ootsꞌo hukwaꞌ tsꞌutni. Nohtsꞌutiꞌelh hukwaꞌ tsꞌuninzun.

Yakꞌusda ba ꞌilhunaoodulhne buba tenahududli

¹¹ ꞋEt Yakꞌusda ꞌen dichꞌoh neBá, ꞌinkꞌez neMoodihti Jesus Christ, ꞌen nohtsꞌun nétoolhꞌaꞌ ha tenazdudli.

¹² ꞋInkꞌez ntsꞌenꞌa whe nohkꞌetsꞌinsiꞌ, ꞌet whuz unꞌa neMoodihti ꞌen gha tube cho lhkꞌuz te lhkꞌehsiꞌ. ꞋInkꞌez ꞌuyoonne cha ꞌenne tsꞌiyawh nducha bukꞌehsiꞌ.

¹³ ꞋEt whe neMoodihti Jesus Christ ꞌinkꞌez oochꞌeꞌ unline, ꞌenne tsꞌiyawh whusanahidil de, ꞌet de la neBá, Yakꞌusda, ꞌen nalh, ꞌaw nohdzi be ye nohkꞌehoꞌalh-i hootaloh, ꞌinkꞌez nohlubeshi cha hootaloh.