1 Thessalonians 2 - Yak'usda Ooghuni

Paul Jesus Christ ba be ꞌutꞌen kꞌoh ꞌuntꞌoh

¹ Neulhutsinke nohnichꞌoh tꞌeoonahzun ꞌaw ꞌantsꞌet nohtsꞌun nalhtsꞌutidulh.

² ꞋEt keyoh Philippi, ꞌenne bugha tube dzoh nutsꞌuzde, ꞌet tsꞌiyawh tꞌeoonuhzun. ꞋEt hoontsꞌi hukwꞌelhꞌaz Yakꞌusda ꞌen gha ꞌaw whelhtsꞌitsaz whe ooghuni unzoo-i be nohbulh yatsꞌulhduk, lhat-un whe nedulhyoh ꞌuhantꞌeꞌ ꞌet hoontsꞌi.

³ ꞋEt ndi khuni ulhtus-i be nohbulh yaduk inleꞌ, ꞌaw tankꞌus lheꞌitꞌoh, kꞌus dutsun-i bulh lheꞌitꞌoh, kꞌus ꞌaw ntsiꞌ-i cha ootoh hooloh, whuz unꞌa nohbulh yatsꞌalhduk inleꞌ.

⁴ ꞋEt hoontsꞌi Yakꞌusda nebulh soo neooninꞌai whe ooghuni unzoo-i, ꞌi be netlꞌa honꞌai, ꞌet whuz unꞌa za yatsꞌulhduk. ꞋEt hoontsꞌi dune hodutátsꞌo ꞌet hukwaꞌ huninzun, ꞌi khuni ꞌaw whuz unꞌa iloh yatsꞌulhduk. ꞋEt kꞌus Yakꞌusda netsꞌu hukwaꞌ ninzun-un, ꞌet za howu yatsꞌoolhduk. Yakꞌusda ꞌen nedzi yoolhdzih.

⁵ Tꞌeoonahzun ꞌaw khuni ꞌuyoo unli ꞌi be iloh nohbulh yatsꞌulhduk. ꞋAw hoonli ahtꞌi-i, ꞌi negha óohlelh, ꞌet whuz unꞌa iloh nohbulh yatsꞌulhduk. ꞋEt Yakꞌusda nalh tsꞌihꞌun unꞌa nohdusni.

⁶ Nohni kꞌus ꞌuyoonne cha nedutalhtiꞌ hukwa lhtsꞌetíꞌen, Christ ooba whelꞌaꞌne tsinli ꞌinkꞌez netlꞌa honꞌai ꞌet huwa be hóolhtus-i, ꞌi be nohando ꞌutsꞌintꞌoh.

⁷ ꞋEt hoontsꞌi nohtoh uzdilhtsꞌi daꞌ, nohtsꞌun tsꞌinzoo. Ntsꞌenꞌa tsꞌeke duduzke nulhyeh ꞌinkꞌez bukꞌehintsiꞌ, ꞌet whuz unꞌa nánilhtsulyaz nunóhtsꞌulhꞌen.

⁸ Nohkꞌenitsinli, ꞌet huwa tsꞌuhoontꞌiꞌ whe Yakꞌusda ooghuni unzoo-i be nohbulh yatsꞌulhduk. Be tsꞌukhuna-i, ꞌi hoontsꞌi nohni nohgha huwáztiꞌalh, nohkꞌetsꞌintsiꞌ ꞌet huwa.

⁹ Neulhutsinke soo cho whunalhnih, ꞌoh daꞌ ntsꞌoh tuneꞌ tsꞌutꞌen ꞌulhdzis ꞌinkꞌez dzin ꞌi bulh lhla tsꞌóodatꞌelh! Tube neba howa whulnaꞌ tꞌeoonahzun, doo ka la nohba howa whulnaꞌ tsꞌuhoolhtselh ꞌet whuchꞌa. ꞋEt whuz unꞌa Yakꞌusda ooghuni unzoo-i be nohbulh yatsꞌulhduk.

¹⁰ Nohni nohnalh ꞌutsꞌutꞌen, Yakꞌusda cha, dalcho-i be teniꞌ uznilhdzun ꞌinkꞌez tsꞌihꞌun unꞌa neꞌtsꞌustꞌen whe nohni ooba ꞌalha ꞌuhoontꞌohne nohtoh nekꞌéholtsꞌit whuchꞌa.

¹¹ Tꞌeoonuhzun ntsꞌenꞌa la nohbáke nohkꞌentsiꞌ whe nohgha hanleꞌ, ꞌet whuz unꞌa nohbulh ꞌutsꞌintꞌoh. ꞋEt huwa khuni ulhtus-i be nohbulh yatsꞌulhduk, ꞌinkꞌez kꞌenánohtsꞌuniꞌa. Datihtꞌelh-un, ꞌet whunoh uznulhtun.

¹² ꞋInkꞌez Yakꞌusda ba sooꞌ whuldzooꞌ kꞌunꞌa toohdilh. ꞋEn ꞌuntꞌoh ntsꞌe la usda-un, ꞌet lerwe unli, ꞌet whe tsꞌiyantsuk whe kꞌuneꞌ whutꞌen unli, ꞌinkꞌez ye diztiꞌ-i cha bulh ꞌuntꞌoh. ꞋEt whuz de ꞌanih nohúlhni.

Jesus Christ hitsꞌu nalhya-un

¹³ ꞋEt huwa wheni negha Yakꞌusda ooghuni dáhtsꞌo ꞌet tsꞌiyawh hoonáhtꞌiꞌ whe ulhchoot. Yinka dune ghuni iloh kꞌunꞌa úlhchoot. ꞋAlhaꞌ hoontꞌoh Yakꞌusda ooghuni ꞌuntꞌoh. Ndi khuni ꞌi be ꞌon nus ulhtus nóhulhtsi. Nohni ooba ꞌalhaꞌ yintꞌohne, ndi khuni ulhchoot ꞌet huwa ꞌetsul lheꞌtsꞌudísni whe Yakꞌusda musi tsꞌutni.

¹⁴ Neulhutsinke nyoonne Christ Jesus ꞌen oochꞌeꞌ unline, mbene Judea yun kꞌut whe Yakꞌusda ba ꞌilhunaoodulhne, ꞌenne bukꞌunꞌa ꞌahtꞌoh. ꞋEt ndunne Judea dilhtsꞌine, ꞌenne ꞌonghoh Lizwifne dzoh nubuhulhdeh, ꞌenne bukꞌunꞌa za nohbulh keyoh whutꞌenne, ꞌenne dzoh nunóhohulhde.

¹⁵ Lizwifne, ꞌenne ꞌuhuja neMoodihti Jesus Christ hizilhghi. ꞋInkꞌez mbene la buba Yakꞌusda be nus hooꞌenne, ꞌenne cha buhuhanghan. ꞋInkꞌez wheni cha duyun kꞌut hukwꞌu nanehuntízyoot. Tsꞌiyanne chꞌaz huditni, ꞌet huwa ꞌaw Yakꞌusda hoontꞌiꞌ hukwꞌunꞌa nulhéꞌhustꞌen.

¹⁶ ꞋUdun yun kꞌut whutꞌenne hudoojih ha bubulh yaztilhduk, ꞌet whuchꞌa nehuniyoot. Ndunne Lizwifne ꞌuhuyulhꞌen-i ꞌet whe lubeshi be hudizbun. ꞋEt huwa Yakꞌusda ye bubulh hunilchꞌe-i, ꞌi ꞌilhiz wheni huyulh ꞌutitꞌelh.

Bukꞌeninli

¹⁷ ꞋEt neulhutsinke, ꞌatsulyaz wheni nohchꞌa nehunízyoot, ꞌet hoontsꞌi nedzi be nohbulh ꞌutsꞌintꞌoh. Tube cho nanohtsꞌutitꞌelh-un, ꞌon nus hukwa tsꞌuninzun.

¹⁸ ꞋEt huwa tube nohtsꞌuztidulh hukwaꞌ uznanzin. ꞋAlhaꞌ si, Paul, nat whucho nohtsꞌu toosyaꞌ hukwa ꞌistꞌen, ꞌet hoontsꞌi Satan ꞌen nedádinya.

¹⁹ ꞋEt ndet ꞌuhoontꞌoh hukwa tse tsꞌuhooli, kꞌus ndai be tsꞌuhoontꞌi? Ndai la neba ꞌukꞌelha tileh-i, ꞌi be eh tsꞌoohootatꞌeꞌ? NeMoodihti Jesus Christ nkede whusanatidalh ꞌinkꞌez nohni cha tsꞌiyawh oobulh ꞌutihtꞌelh, ꞌet za ꞌuhoontꞌoh!

²⁰ Nohni be uzdiztiꞌ-i, ꞌinkꞌez be tsꞌúhoontꞌiꞌ-i ꞌahli ꞌet huwa.