1 Peter 5 - Yak'usda Ooghuni

Nohni dune tso whudilhdzulhne, Yakꞌusda be ꞌusbaine bughahli

¹ Nohni Yakꞌusda ba ꞌilhunaoodulhne, mbene nohtoh ꞌutso whudilhdzulhne, si cha nohbulh ꞌilhoghun ꞌustꞌoh. ꞋInkꞌez Christ, ꞌen dzoh nusuzut daꞌ, si cha ꞌet hoosꞌen. ꞋInkꞌez ndi ye diztiꞌ-i ꞌawet nilhdukw nenalhtsꞌet ha ootiltsꞌulh, ꞌet huwa si cha sulh ꞌuwhutanelh. ꞋEt huwa khuni ulhtus-i be nohtso hukwa ꞌudusni.

² Yakꞌusda be ꞌusbaine butoh dúlhtsꞌi, ꞌenne buba ꞌusbai ghundline oohleꞌ. ꞋUyoonne nanóhonuyoot ꞌet huwa ꞌet dóhtꞌen junih. Nohnichꞌoh hukwaꞌ nahzun huwa bughohleꞌ. Nohba kꞌelha whutaleh noohzin junih, nohnichꞌoh hoonáhtꞌiꞌ huwa oohtꞌen.

³ Nohtlꞌályanne bumoodih cho oohleꞌ junih. Ndunne ꞌilhoh nuyehne, ꞌenne bunalh tsꞌihꞌun unꞌa oohtꞌen, ꞌet de la ꞌenne cha nohkꞌunꞌa ꞌuhootꞌeꞌ.

⁴ ꞋInkꞌez ndun Jesus Christ ꞌusbai ghundline butso whudilhdzulh-un, ndet la nenalhtsꞌet haínya de, ꞌet de ndi whudíztiꞌ-un be ꞌindindi-i, ꞌaw gak oodleꞌ ꞌaitꞌoh, ꞌet nohgha óotaltsꞌulh.

Yakꞌusda ootlꞌaꞌ dudulhye ꞌinkꞌez netsudule oochꞌaz dahtni

⁵ ꞋEt whuz unꞌa za nohni niyilhne mbene yoo ꞌun udohne, ꞌenne butlꞌaꞌ dudoolhyelh. ꞋAlhaꞌ nohni cha tsꞌiyawh whuz unꞌa lhtlꞌaꞌ dudoolhyelh. Be yo úzdudildzun-i, ꞌantsꞌi naih kꞌunꞌa bé dolhtsꞌiꞌ. ꞋUkꞌehonguz whe njan ndutni, “Ndunne ꞌududíltiꞌne, ꞌenne Yakꞌusda buchꞌaz ditni. ꞋEt hoontsꞌi mbene la yo údudildzunne, ꞌenne ye unzoo-i bugha yúꞌaih.”

⁶ ꞋEt huwa Yakꞌusda soo cho oobut yo ꞌúdudulhdzun. ꞋEt de la whusahóoltsꞌut de nohdólhtiꞌ.

⁷ Ndet huwu ni ꞌahli-un, tsꞌiyawh Yakꞌusda ootlꞌa wháhle. ꞋAhoolhyiz nohghunli ꞌet huwa.

⁸ Duba whahtnih ꞌinkꞌez soo cho huwahli! Netsudule, nohchꞌaz ditni-un, ndi khuna-iti, lion tsꞌutni, ꞌi kꞌunꞌa nohtunudúlgho. Nintaꞌ butalhꞌelhne, ꞌenne bukunúta.

⁹ Yakꞌusda ootꞌa nínohtan whe ndun oochꞌaz dohtni. Tꞌeoonáhzun ndet la dzoh nahdeh, ndi yun kꞌut ndulcho whe ooba ꞌalhaꞌ yintꞌohne, ꞌenne cha whuz unꞌa za dzoh nuhudeh.

¹⁰ ꞋEt Yakꞌusda, ye unzoo-i, ꞌi tsꞌiyawh yulh ꞌúntꞌoh, ꞌi gha Christ Jesus neba daja la-un, ꞌet huwa ꞌuzdutijih ha nekaꞌ daniꞌ. ꞋEt huwa ꞌilhiz wheni yakꞌuz whudiztiꞌ tsꞌe uzdutaltsꞌilh. ꞋEt hoontsꞌi ꞌatsulyaz dzoh nutihdoh. ꞋEt hukwꞌelhꞌaz dichꞌoh soo cho lhanóhdutileh. Ulhtus nóhtilhtselh ꞌinkꞌez yoh ookꞌu whuzꞌai-i kꞌunꞌa ꞌaw nahóohtnah ꞌaitꞌoh nohtilhtselh.

¹¹ Yakꞌusda ꞌen tsꞌun ye diztiꞌ-i ꞌinkꞌez ye ulhtus-i, tsꞌiyawh oochꞌeꞌ ꞌuntꞌoh. ꞋI ꞌilhiz wheni ꞌinkꞌez ꞌilhiz wheni, ꞌet ndo honeh.

Tsꞌiyawh nohdzi unzoo-un nohbulh ꞌuhotꞌeꞌ

¹² ꞋEt neulhutsin, Silvanus, ꞌen ootꞌa níwhunintan-un unli, daja nohdasniꞌ-un, ꞌen sba ꞌukꞌunéyuzguz. Khuniti be ndi Yakꞌusda ye unzoo-i, tsꞌiyawh huwun nohdásniꞌ. ꞋI be núdulhya, ꞌinkꞌez ꞌi soo tsꞌihꞌun unꞌa ꞌalhaꞌ ꞌuntꞌoh.

¹³ ꞋEt keyoh Babylon, ndun tsꞌeke ꞌen cha nohbulh ꞌutahálti-un ꞌuntꞌoh, ꞌen cha hadih nohúlhni. Mark syeꞌ ꞌen cha hadih nohúlhni.

¹⁴ Lhkꞌehsiꞌ-i be nalhadahtsꞌoos, ꞌi be hadih lhudahtni. Mbene Jesus Christ yulh ꞌuntꞌohne, nohni tsꞌiyawh nohdzi unzoo-un nohbulh ꞌuhotꞌeꞌ. ꞋEt ndo honeh.