1 Peter 3 - Yak'usda Ooghuni

Tsꞌekoo nohkike buba nyo ꞌudúdoolhdzin

¹ Nohni tsꞌekoo ndiz unꞌa za nohkike buba nyo ꞌudúdoolhdzin whe butlꞌaꞌ dudoolhyelh. Whulohne Yakꞌusda ooghuni hikꞌú nulheꞌustꞌen whe buꞌatke, ntsꞌenꞌa ꞌuhintꞌoh huwa tilah khuni yit hoontsꞌi dudeni náhondunoolelh.

² Dálhdzooꞌ la ꞌinkꞌez Yakꞌusda enulhjut-un, ꞌet whuz unꞌa nohonilhꞌen de, ꞌet huwa la dudeni náhondunoolelh.

³ Yoo ꞌaz tsꞌe daóohtꞌen la, whuz unꞌa za iloh. Nohtsighaꞌ dalhdzun, kꞌus gold nédulhya, kꞌus khusulhya, kꞌus naih unzoo-i be dune ꞌahli de, ꞌohwhi tsꞌiyawh ꞌantsꞌi ꞌuntꞌoh.

⁴ ꞋEt hoontsꞌi nohdzi yo dáhoontꞌoh la, nohyo tsꞌe tꞌewhudusnih ꞌinkꞌez soo neꞌahtꞌen, ꞌet ꞌi be soo nadahtꞌih leꞌ hoontꞌoh. ꞋOhwhi Yakꞌusda oonalh whudíztiꞌ wheꞌ hoontꞌoh.

⁵ Niz de haóodanzut ndunne tsꞌekoo Yakꞌusda oochꞌeꞌne, ꞌenne Yakꞌusda tꞌaníhunantan whe ꞌenne cha soo cho soo nahudutꞌih. Dukike butlꞌáꞌ hududilya.

⁶ Whuz unꞌa za Sarah Abraham yukꞌuneꞌ ꞌustꞌen whe, “Smoodih” yulhni. Nohni cha ooyatseꞌke ulhi ꞌaw whelhnulhjut whe ꞌutꞌen unzoo-i ꞌulhꞌen de, ꞌet de nohni cha Sarah kꞌunꞌa ꞌutihtꞌelh. ꞋAw hoonli whelhnujut de.

Nohni dune nohꞌatke tsꞌihꞌun unꞌa neꞌboolhꞌen

⁷ Nohni cha dune nohꞌatke tsꞌihꞌun unꞌa neꞌboolhꞌen whe buzih dulhtsꞌi, ꞌinkꞌez ubudólhtiꞌ. Nálhtsayaz neꞌboolhꞌen lhihílhtus wheꞌ hintꞌoh ꞌet huwa. Ndi ꞌilhiz be tsꞌuhutinalh-i nohghantꞌai nanúlhtꞌoh be ꞌáhtꞌoh ꞌet huwa. Ndúlhahtꞌoh de nohtenadudli-i Yakꞌusda ꞌaw yoozólhtsꞌai ꞌaitꞌoh.

Kꞌunóohdzin junih

⁸ Njan ꞌudekꞌez-un nohdutásnelh. Nohni tsꞌiyawh noheni ꞌilho za ooleꞌ. Lhgha teꞌnohdzin ꞌinkꞌez ooba ꞌalha ꞌuhoontꞌohne tsꞌiyawh lhkꞌeoohsiꞌ. Lhtsꞌun nohdzi oozooꞌ ꞌinkꞌez soo cho lhtsꞌún kꞌeke oohleꞌ.

⁹ ꞋUyoonne nohtsꞌun tankꞌus ꞌuhuninzun de, khun te kꞌunóohdzin junih. ꞋUyoonne nohchꞌaz yáhalhduk de, nohni khun buchꞌaz yaóolhduk junih. Kꞌus ꞌantsꞌi khuni unzoo-i be za bubulh yaóolhduk. Tꞌeoonáhzun whuz unꞌa Yakꞌusda nohtsꞌo húkwaꞌ ninzun. ꞋEt de la Yakꞌusda yutꞌi-i, ꞌi nohghá holtsꞌit.

¹⁰ Khuni ꞌukꞌehonguz whe njan ndutni, “Mbene la ꞌandit khuna-un hóontꞌiꞌne ꞌinkꞌez dzin totsuk ba hoonzoone, ꞌet nduntꞌohne mbene la ꞌet whuz unꞌa hukwaꞌ ninzunne, ꞌenne hoontsiꞌ túnulheꞌhudoosnih, ꞌinkꞌez khuni whutsꞌit-i be yalhuhoolhduk.

¹¹ Hoontsiꞌ tuneꞌ hutꞌen whuchꞌaz náhoolyeh ꞌinkꞌez ꞌutꞌen unzoo-i za ꞌuhoolhꞌen. Tsꞌihꞌun unꞌa lhtsꞌun ꞌutsꞌootꞌeꞌ, ꞌet za soo cho hukwaꞌ hootꞌen.

¹² ꞋEt ꞌalhaꞌ neMoodihti mbene tsꞌihꞌun ꞌuntꞌohne, ꞌahoolhyiz bughunli. Hitsꞌun tedudlih totsuk uboozilhtsꞌai. ꞋEt hoontsꞌi mbene la lubeshi ꞌulhꞌenne, ꞌenne buchꞌaz nalꞌah.”

Tsꞌihꞌun unꞌa ꞌahtꞌen hukwꞌelha dzoh nahzut de, ꞌet ꞌukꞌenus hoonzoo-un nohgha whútaltsꞌulh

¹³ Ndet la hoonzoo hukwꞌunꞌa ꞌahtꞌoh de, ꞌet de mbe nohunduntálhdah?

¹⁴ ꞋEt hoontsꞌi tsꞌihꞌun unꞌa ꞌahtꞌen hukwꞌelha, huwa dzoh nahdzut de, ꞌet ꞌukꞌenus hoonzoo-un nohgha whútaltsꞌulh. ꞋInkꞌez nohéꞌ hoonulhjoot de whénoolhjut junih, kꞌus huwu ni oolhleꞌ junih!

¹⁵ ꞋEt hoontsꞌi Yakꞌusda neMoodihti, nohdzi be soo ꞌukꞌenus dólhtiꞌ. ꞋEt whuz unꞌa mbe nohoodutalhkut ndet hukwa tse hoohli-un, ꞌet huwa ꞌahoolhyiz khuni lhadóolhdzin. Tsꞌihꞌun unꞌa bunulhꞌen ꞌinkꞌez soo cho neꞌbulhꞌen whe budóhniꞌ.

¹⁶ ꞋEt lubeshi nohghu hooloh de, ꞌet ꞌuyoonne hoontsiꞌ kꞌunꞌa nohchꞌaz yáhalhduk, ꞌet hoontsꞌi tꞌehoninzun Christ, ꞌen be hoonzoo hukwꞌunꞌa whe ndi yun dúlhtsꞌi, ꞌet sih hukwaya hooleꞌ.

¹⁷ ꞋEt Yakꞌusda, hukwaꞌ ninzun de, ꞌutꞌen unzoo-i huwa dzoh nahzut de, ꞌet nohba hoonzoo wheꞌ hoontꞌoh. ꞋEt hoontsꞌi tankꞌus unꞌa ꞌahtꞌen-un huwa dzoh nahzut de, ꞌaw nohba lheꞌhóozooꞌ.

Christ neba dzoh nusuzut-un, ꞌi be whutsꞌodulꞌeh

¹⁸ Christ ꞌen cha dichꞌoh ꞌilhoh za nelubeshi kꞌelha dzoh nusuzut. ꞋEn tsꞌihꞌun ꞌuntꞌoh ꞌinkꞌez wheni ꞌaw tsꞌihꞌun lheꞌtsꞌitꞌoh. Whuz unꞌa neba ꞌet ndúja whe Yakꞌusda tsꞌun néootalelh ha. Ooyustꞌe hizilhghi ꞌet hoontsꞌi Ndoni be ooyustꞌe nakhítnaꞌ.

¹⁹ ꞋInkꞌez cha ꞌen be ntsꞌe la nududehne ꞌahudinla tsꞌe, whuz butsꞌun whinya ꞌinkꞌez ndet whe butsꞌun hóoltsꞌulh-un huwun bubulh yailhduk.

²⁰ Ndunne ꞌoh daꞌ ꞌaw hikꞌú nulheꞌitꞌel inleꞌ. ꞋEt ꞌoh daꞌ Noah tsꞌi cho ꞌuyuleh whe Yakꞌusda ubulh dzoh nuzut, ꞌinkꞌez bubailhꞌeꞌ. ꞋAlhgoh lhkꞌudine, (8) ꞌaw ꞌenne za, too butighan whuchꞌaz hudujih.

²¹ ꞋEt ndiz whuz unꞌa huwaꞌ tꞌetsꞌonanzin. ꞋEt njan too beꞌ tsꞌulya-un whézdujih dultꞌoh. ꞋAw neyustꞌe tsun bunaꞌtsꞌulhde, whuz unꞌa iloh. ꞋEt kꞌus Yakꞌusda tsꞌoodulhkut hoonzoo-un neyo tsꞌe oogha tꞌetsꞌoninzun-i whudoꞌaꞌ, ꞌet whuz unꞌa uzdujih. Jesus Christ dunadija-un, ꞌet huwa.

²² Yakꞌuz whe naja ꞌinkꞌez ꞌandit Yakꞌusda yughu nailhni tsꞌe usda. ꞋInkꞌez ndunne lizasne, ꞌudedone, ꞌenne ꞌonghohne hiye óolhtus ha, ꞌenne cha, ꞌinkꞌez ndunne hiye ulhtus-i ꞌutꞌine, ꞌenne tsꞌiyawh Jesus Christ hikꞌuneꞌ ootꞌen hubaꞌ ꞌubínla.