1 Peter 2 - Yak'usda Ooghuni

¹ ꞋEt huwa ꞌuyoonne tsꞌun noheni untsiꞌ-i, whutsꞌit be yalhduk-un, ꞌinkꞌez duba naꞌahdzooꞌ. ꞋInkꞌez ꞌuyoonne ghe oolhnih, ꞌinkꞌez khuni untsiꞌ-i be yálhduk-un cha, ꞌet tsꞌiyawh ꞌilhiz wheni whula doohtnih.

² ꞋAndit tsꞌoodunne whuzdline lilet ꞌi za hika dátni, nohni cha bukꞌunꞌa ndi khuni tsꞌihꞌun ꞌuntꞌoh-i, ꞌi za ookwa daóohtni ꞌon nus ulhtus tihleh ha.

³ NeMoodihti daldzooꞌ la ꞌet nawhahꞌai de, ꞌet de ndi khuni ꞌi za ookwa daóohtni.

Jesus Christ ꞌen ꞌutahayálhti-un, ꞌinkꞌez wheni cha ꞌutaháltine ꞌutsꞌintꞌoh

⁴ Jesus ꞌen tse khuna-i ndultꞌoh. Lizwifne, ꞌenne lhane ꞌun hitizno leꞌ huja. ꞋEt hoontsꞌi Yakꞌusda ꞌutahayálhti-un ꞌinkꞌez ꞌen tube diztiꞌ whe ꞌuntꞌoh. ꞋEn za ootsꞌu tóohdilh.

⁵ ꞋInkꞌez nohni cha tse khuna-i, ꞌi kꞌunꞌa ꞌahtꞌoh. ꞋEt whuz unꞌa Ndoni ꞌen lugliz whucho nohni nohbéꞌ whulneh. ꞋInkꞌez ꞌen be nohnih Yakꞌusda ba lubretne ꞌahtꞌoh. ꞋEt whe ndai la Ndoni nohtsꞌo hukwaꞌ ninzun-un, ꞌet Jesus Christ ꞌen be ndai la Yakꞌusda ooba sooꞌ yintꞌoh-i, ꞌi oogha ióhlelh.

⁶ ꞋEt huwa Yakꞌusda ooghuni ndutni whe ꞌukꞌu nusguz, “Whunulhꞌen, nohni keyoh Zion whutꞌenne, ꞌet koontlꞌat tse, soo ꞌukꞌenus ookwa dahotni-i ꞌet nédisꞌai. ꞋEn ꞌutahasti, ꞌinkꞌez diztiꞌ whe ꞌuntꞌoh, ꞌinkꞌez mbene buba ꞌalhaꞌ yintꞌohne, ꞌaw yooya hooleꞌ ꞌaitꞌoh.”

⁷ ꞋEt huwa mbene la nohba ꞌalha ꞌuhoontꞌohne, nohba diztiꞌ whe ꞌuntꞌoh. ꞋEt hoontsꞌi mbene la hikꞌu nulheꞌustꞌenne, ꞌenne bughun njan ndutni, “Ndunne yoh ꞌuwhulhꞌenne ndi tse ꞌun hidutlꞌuz leꞌ huja, ndi koontlꞌat tse ꞌukꞌenus ookwa dahotni-i suliꞌ.”

⁸ ꞋInkꞌez ooghuni ndutni, “Ndi tse ꞌi hitꞌaz nunughalh ꞌinkꞌez ꞌi be ꞌahoolhyiz buba dzoh lhih.” Yakꞌusda ooghuni hikꞌu nulheꞌustꞌen, ꞌi gha nónughalh. ꞋEt whuz unꞌa Yakꞌusda bubaꞌ hóonla.

⁹ ꞋEt hoontsꞌi nohni dune ꞌutꞌahályane ꞌahli. Yakꞌusda lerwe oolubretne ꞌahli. Yakꞌusda oochꞌeꞌne ꞌahtꞌoh. Nohni ooduneꞌ ꞌuntꞌohne ꞌahli. ꞋOnghohne, ꞌenne tsꞌihꞌun unꞌa daldzooꞌ whe ꞌuntꞌoh, tsꞌiyawh budutáhnelh ha. ꞋAwhuz tsalhgus yo dulhtsꞌi whe ꞌanih nohdániꞌ, ootsꞌu toohdilh ha. Oogha ꞌítꞌen-i be hootꞌen-i ꞌet ꞌuhoontꞌoh.

¹⁰ ꞋUdaꞌ Yakꞌusda ooduneꞌ lháhloh inleꞌ. ꞋEt ꞌandit Yakꞌusda ooduneꞌ suhliꞌ. ꞋUdaꞌ ꞌaw bé nohgha teꞌwhunizeh-i lhulhchulh inleꞌ. ꞋAndit ꞌawet bé nohgha teꞌwhunizeh-i nohghantꞌai.

ꞋUdun yun kꞌut whutꞌenne toh tsꞌihꞌun unꞌa yinka dólhtsꞌiꞌ

¹¹ Nohni ookꞌesiꞌne ꞌahli, ookeyoh hoolohne kꞌunꞌa, ꞌatsulyaz za ndi yun kꞌut dulhtsi. ꞋEt huwa ntsꞌe nohyustꞌe whutsꞌu nintꞌi-un, whuyit oohtꞌeꞌ, ꞌet hukwa nohtsꞌu tédusdli.

¹² ꞋUdun yun kꞌut whutꞌenne toh tsꞌihꞌun unꞌa yinka dólhtsꞌiꞌ. ꞋEt sih nohchꞌaz ditnine, ꞌenne hoontsiꞌ tuneꞌ ꞌahtꞌen nohohútni, ꞌinkꞌez ꞌutꞌen unzoo-i ꞌahla ꞌet honilhꞌen de, ꞌet de nkede Yakꞌusda whusanaja de, ꞌet huwa ꞌon nus hoonzoo kꞌunꞌa hidutálhtiꞌ.

Ntsꞌenꞌa la dune neꞌhutitꞌen-un ꞌukꞌehonguz-un, ꞌet tsꞌiyawh hukwꞌúneꞌ oohtꞌen

¹³ ꞋInka neMoodihti, ꞌen gha dune neꞌhutitꞌen-un ꞌukꞌehonguz-un, ꞌet tsꞌiyawh whukꞌúneꞌ oohtꞌen. Dantꞌohne dune hinli ꞌet hoontsꞌi, bukꞌuneꞌ oohtꞌen. Lerwe unli-un, soo ꞌudetso whudilhdzulh-un, ookꞌuneꞌ oohtꞌen.

¹⁴ Kꞌus ndi yun moodihne, ꞌenne cha. Lerwe ba whelꞌaꞌne ꞌuhintꞌoh. Keyoh huwunli kꞌunyisne lerwe ba bubeꞌ whutilhya-un ꞋEt hoonzoo-un ꞌuwhulhꞌenne, ꞌenne budutálhtiꞌ.

¹⁵ ꞋEt whuz unꞌa Yakꞌusda hukwaꞌ ninzun-un, tsꞌihꞌun unꞌa neꞌahtꞌen de, ꞌi be whusni be yalhdukne buze whudánaꞌdohꞌalh.

¹⁶ Jesus gha lubeshi chꞌa nasdilne ꞌahtꞌoh. ꞋEt hoontsꞌi ꞌet whutꞌanínahtan whe nohba ꞌantsꞌi hoonli whe lubeshi oolhꞌen junih! ꞋEt kꞌus Yakꞌusda be ꞌulhnane kꞌunꞌa yinka dólhtsꞌiꞌ.

¹⁷ ꞋInkꞌez ooba ꞌalha ꞌuhoontꞌohne, tsꞌiyawh soo cho budólhtiꞌ ꞌinkꞌez bukꞌeoohsiꞌ. Yakꞌusda be noolhjut ꞌinkꞌez lerwe ꞌen cha dólhtiꞌ.

Nohni ꞌulhnane nohmoodih bube núlhjut whe butlꞌaꞌ dudoolhyelh hubaꞌ hoontꞌoh

¹⁸ ꞋUlhnane nohmoodih bube núlhjut whe butlꞌaꞌ dudoolhyelh hubaꞌ hoontꞌoh. Unzoone ꞌinkꞌez soo neꞌutꞌenne, ꞌenne za iloh bukꞌúneꞌ oohtꞌen. ꞋAw tsꞌihꞌun lheꞌitꞌohne, ꞌenne hoontsꞌi bukꞌúneꞌ oohtꞌen.

¹⁹ Tsꞌihꞌun ꞌahtꞌoh ꞌet hoontsꞌi dzoh nunohohulhdeh de, ꞌahoolhyiz Yakꞌusda ghu nuní nahzut-un huwa nohba ꞌantsꞌi hoonli whe dzoh nahdeh de, ꞌet Yakꞌusda ba hoonzoo wheꞌ hoontꞌoh.

²⁰ ꞋEt huwa tankꞌus unꞌa ꞌahja de ꞌet hukwa yanohahulhtsus de, tꞌezahnih whe whúlhchoot de, di suba nohgha óokat? ꞋEt hoonzoo ꞌuwhulhꞌen ꞌinkꞌez ꞌantsꞌi nohba hoonli whe hukwꞌelha dzoh nahzut de, ꞌet Yakꞌusda ba hoonzoo wheꞌ ꞌuhoontꞌoh.

²¹ Njan ꞌet wheni nohkaꞌ whudaniꞌ, Christ ꞌen cha neba dzoh nusúzut. ꞋEn ookꞌunꞌa buneꞌúznootꞌen ha whunénilhtan. ꞋEt huwa ꞌen za butsꞌun toodilh hubaꞌ hoontꞌoh.

²² ꞋEn ꞌaw lubeshi lheꞌilel, ꞌinkꞌez ꞌaw whutsꞌit-i be yalhulhduk.

²³ ꞋEt khuni untsiꞌ-i be hiyulh yalhduk ꞌet hoontsꞌi ꞌaw khuni untsiꞌ be butsꞌun kꞌulhditnel. ꞋOh daꞌ dzoh nusúzut whe, ꞌet hoontsꞌi ꞌaw bubulh lheꞌoonílhjoot. ꞋEt kꞌus mbe la soo tsꞌihꞌun unꞌa nahiyilh-un, ꞌen yutlꞌaꞌ dudilti.

²⁴ Nelubeshi didutchꞌoh duyustꞌe be tulalhgus tsꞌú yoozdla. ꞋEt huwa ꞌaw ꞌon ꞌun nelubeshi nemoodih ooleꞌ ꞌaitꞌoh. ꞋEt sih tsꞌihꞌun unꞌa tsꞌukhoonaꞌ. Ooka kꞌet ꞌet whe tsꞌiyawh soo náꞌtsꞌulya.

²⁵ ꞋAntsꞌi ꞌusbaiyaz ninta nilhꞌaz-i leꞌ ꞌahtꞌoh inleꞌ. ꞋEt ꞌandit ndun ꞌusbai ghunli leꞌ ꞌuntꞌoh-un ꞌinkꞌez nezul ghúndli-un cha, Jesus ꞌen ꞌuntꞌoh, ꞌen ooghu nanahdil.