1 Peter 1 - Yak'usda Ooghuni

Lizwifne lhelhdun keyoh whutꞌenne huzdliꞌ, ꞌenne Peter hadih ꞌubulhni

¹ Si Peter Jesus Christ ꞌen gha whelꞌaꞌ-un usdli. Nohni Lizwifne dukeyoh whutꞌenne ꞌahli inleꞌ. ꞋAwet lhelhdun keyoh whutꞌenne suhliꞌ. Pontus, Galatia, Cappadocia, Asia, ꞌinkꞌez Bithynia cha. ꞋEt ꞌóh ho ndulcho whe ꞌatsulyaz huba nenáhtna. Yakꞌusda ba ꞌutahalyane ꞌahtꞌoh. Nohni nohtsꞌo kꞌeꞌisguz.

² Yakꞌusda neBá nus whudizulh-un tsꞌiyawh tꞌeooninzun. ꞋEt huwa ꞌutahalyane ꞌahtꞌoh. Ndiz unꞌa nohba ꞌet ꞌúhooja, Ndoni Yakꞌusda ba ꞌudun nenóhninla Jesus Christ ookꞌuneꞌ tihtꞌen ha, ꞌinkꞌez buzkaiꞌ nohba nadíltꞌiꞌ ꞌi be nohlubeshi tsꞌiyawh nohba gak suliꞌ. Ye unzoo-i ꞌinkꞌez Yakꞌusda tsꞌun be tsꞌihꞌun ꞌahtꞌoh-i, ꞌi lhanꞌun te nohgha óokat.

Yakꞌuz tsꞌe neba ꞌet ꞌuzdla-un

³ Yakꞌusda, Jesus Christ neMoodihti ooBá, ꞌen uzdílhtiꞌ. Hooncha whe negha teꞌnanzin whe nanehílhnaꞌ. ꞋEt huwa hoonzoo-un hukwa tse tsꞌúholeꞌ hubaꞌ hoontꞌoh. Jesus Christ ꞌen yaidlane butoh dunadija. ꞋEt huwa wheni cha ꞌilhiz tsꞌuhutinalh-un hukwa tse tsꞌúhooli.

⁴ ꞋAndit ꞌawet neBá yutꞌi-i negha ítalelh-i, ꞌi cha wheni neba ꞌuntꞌoh. ꞋAw oolhjut ꞌaitꞌoh. ꞋAw ntsiꞌ cha ooleꞌ ꞌaitꞌoh, ꞌinkꞌez dutoodeh ꞌaitꞌoh. ꞋI ꞌudaꞌ yakꞌuz tsꞌe nohba ꞌet whuzdla.

⁵ Nohni nohba ꞌalha ꞌuhoontꞌoh-un be Yakꞌusda ye ulhtus-i búghudli whe whéhudutijih-un huhootálhchulh. ꞋEt ꞌudekꞌez dzin de, yakꞌuz tsꞌe ꞌet neba whuzdla-i, ꞌi tsꞌiyawh tsꞌet ha óotikulh ꞌet wheni lhaóodintꞌoh.

⁶ ꞋEt whe hoonáhtꞌiꞌ. ꞋEt hoontsꞌi ꞌandit ꞌatsulyaz wheni tilah lhelhdun whe dzoh nahzut-un, ꞌet whe nohóolhdzi.

⁷ ꞋEt whuz unꞌa whe nohba ꞌalha ꞌuhoontꞌoh-un, ꞌet nohba ꞌon nus hoonzoo tileh. Gold kwun ꞌi be ꞌuzooꞌ huyulhtsi, ꞌet whe soo tsꞌihꞌun oozai za lhih, ꞌet hoontsꞌi ꞌi cha hooloh tileh. Nohba ꞌalha ꞌuhoontꞌoh-un gold anus whudíztiꞌ wheꞌ hoontꞌoh. Whuz unꞌa za ndet dzin Jesus Christ nenalhtsꞌet be hóodiltsai de, ꞌet de bé nohba ꞌalha ꞌuhoontꞌoh-un huwa Jesus Christ nohba whudutálhtiꞌ, ꞌinkꞌez nohba hooncha tileh.

⁸ Jesus Christ ꞌaw lhuzihꞌen ꞌet hoontsꞌi ookꞌehsiꞌ. ꞋAw lhuzihꞌen ꞌet hoontsꞌi nohba ꞌalhaꞌ ꞌuntꞌoh. ꞋInkꞌez ndi be tsꞌuhoontꞌiꞌ-i ncha kꞌet ꞌaw ꞌuzdooniꞌ ꞌaitꞌoh, ꞌinkꞌez tube diztiꞌ whe ꞌuntꞌoh. ꞋEt huwa hoonáhtꞌiꞌ.

⁹ ꞋUdekꞌez dzin de nohba ꞌalha ꞌuhoontꞌoh ꞌet whe nohzul dutijih wheꞌ hoontꞌoh.

¹⁰ Ndunne Yakꞌusda be nus honꞌenne, ꞌenne ndi ye unzoo-i nohtsꞌu hóoltsꞌulh-un, ꞌet huwun nus huhonꞌen. Ndi whézdujis-un, ꞌet huwun ꞌet soo tsꞌihꞌun ꞌukꞌenus huwaꞌ hooli whe nahahootáꞌalh hukwaꞌ hutꞌen.

¹¹ ꞋOh daꞌ Christ ooyughi buyudinda ꞌinkꞌez ꞌuwhutanelh whutso, ꞌen bugha yalhduk ntsꞌenꞌa la Christ dzoh nutizut, ꞌet hukwꞌelhꞌaz ooba hooncha tuneꞌ titꞌen-un ꞌuwhutanelh. ꞋEt nduhoontꞌoh-un nkede njan ꞌet nduwhutanelh, ꞌinkꞌez ntsꞌenꞌa ꞌuwhutanelh, ndunne nus honꞌenne nahahootáꞌalh hukwaꞌ hutꞌen.

¹² ꞋInkꞌez ndunne nus hooꞌenne, ꞌenne Yakꞌusda whubunilhtan ꞌaw ꞌenne buba lheꞌhootꞌoh. ꞋEt kꞌus wheni za neba nus húhonꞌen. ꞋEt ꞌawet ndunne khuni unzoo-i be yalhdukne, ꞌenne Ndoni yakꞌuz ndus de hálꞌaꞌ-un, ꞌen be nohodániꞌ. ꞋInkꞌez nduhoontꞌoh-un, lizasne, ꞌenne hoontsꞌi nahahootáꞌalh hukwaꞌ huninzun.

Yakꞌusda neBá, ꞌen ookꞌunꞌa za ꞌutsꞌootꞌeꞌ

¹³ ꞋEt huwa noheni lhadáhle. Huwahli. ꞋEt whuz unꞌa ye unzoo-i nohtsꞌu tihkulh, whula toh whutsꞌun ooka tse hóohli. Ndet dzin ꞌutinelh Jesus Christ nenalhtsꞌet be hóodutaltsilh. ꞋOh de whézdujis-un, ꞌet nohgha whútaltsꞌulh.

¹⁴ Tsꞌoodunne kꞌunꞌa ꞌukꞌuneꞌ ꞌutꞌenne oohleꞌ. ꞋAw niz de ha ꞌíhtꞌen, Yakꞌusda tꞌenuzahzun, ꞌet huwa hoontsiꞌ tsꞌunáhtꞌi. ꞋAw ꞌon ꞌun ndóhtꞌen junih.

¹⁵ ꞋEt hoontsꞌi mbe la dutihjih ha nohkaꞌ daniꞌ-un, ꞌen lubeshi ooghu hooloh, nohni cha ndahtꞌen-un la ꞌen ookꞌunꞌa za toohdilh.

¹⁶ Whuz unꞌa ꞌukꞌehóoguz whe njan ndutni, “Si lubeshi ooghu hooloh-un ꞌustꞌoh. ꞋEt huwa nohni cha ꞌet dóhtꞌeꞌ hubaꞌ hoontꞌoh.”

¹⁷ ꞋIlhoghun tsinli whe ntsꞌenꞌa la datsꞌitꞌen-un, neBá ꞌaw lhdítni whe neba nahutiyeh. ꞋInka ꞌen tsꞌun za tenadahdli de, soo cho khahdli. ꞋEn be nulhjut whe ndi yun kꞌut ꞌoh whuya lhóhdilh.

¹⁸ ꞋOh daꞌ ndet la nohdusneke whunohodalhꞌeꞌ-un, whulohkhun ꞌaw hoonli lhuhooloh inleꞌ. Silver, gold nduwhi, ꞌi be iloh Yakꞌusda nanohoket. ꞋI tsꞌiyawh hooloh tileh ꞌet huwa.

¹⁹ ꞋEt hoontsꞌi Christ buzkaiꞌ diztiꞌ-i, ꞌi be naneonket. ꞋEn ꞌusbaiyaz ꞌaw hoonli-unyaz bulhodíꞌoh kꞌunꞌa ꞌuntꞌoh.

²⁰ ꞋUdaꞌ ndi yun ꞌutilnelh, whutsodaꞌ Yakꞌusda daóotanelh-un ꞌudaꞌ tꞌewhunínzun. ꞋEt njan ꞌudekꞌez dzin nohba whuzꞌai-un, Jesus Christ ꞌandit nohba tsꞌet ha hóoltsꞌut.

²¹ ꞋEn gha Yakꞌusda ootꞌa ninahtan. ꞋEn ꞌuja yaidlane butoh dunaidilhti ꞌinkꞌez ye diztiꞌ-i, ꞌi cha yugha nínꞌai. ꞋEt Yakꞌusda ootꞌa ninahtan, ꞌinkꞌez ndet la hukwa tse hoohli-un, ꞌet Yakꞌusda ꞌen gha tsꞌiyawh whusaóotiltsꞌulh.

Khuni ꞌilhiz ꞌuntꞌoh-i

²² Ndoni ꞌen be ndi khuni ꞌalhaꞌ ꞌuntꞌoh-i, ꞌi ookꞌuneꞌ ꞌahtꞌen, ꞌi be nohdzi ꞌaw lubeshi ooghu hooloh sulhtsi. Nohdzi ndulcho-i be ooba ꞌalha ꞌuhoontꞌohne bukꞌehsiꞌ. Nohdzi ꞌaw lhdutsun whe ꞌilhoghun ꞌahli whe soo cho lhkꞌeoohsiꞌ.

²³ Yakꞌusda ooghuni ꞌi be doo cha za nawhuzáhdli. Nedusneke gha ꞌilhiz tsꞌukhoonaꞌ ꞌaitꞌoh. Yakꞌusda ooghuni ꞌi be za ꞌilhiz tsꞌuhutinalh wheꞌ hoontꞌoh.

²⁴ ꞋEt huwa ndi khuni njan ndutni, “Tsꞌiyanne ꞌantsꞌi tlꞌo leꞌ hintꞌoh. Ndi tlꞌo ꞌatsulyaz ꞌuntꞌoh. ꞋInkꞌez dune ye diztiꞌ-i, ꞌi oomaiꞌ leꞌ ꞌuntꞌoh. Tlꞌo bisdai dugih ꞌinkꞌez nakuk.

²⁵ ꞋEt hoontsꞌi neMoodihti ooghuni ꞌilhiz wheni ꞌet dizꞌai.” Ndi khuni ꞌi khuni unzoo-i be nohbulh yainduk, ꞌi ꞌuntꞌoh.