1 John 5 - Yak'usda Ooghuni

¹ Tsꞌiyanne Jesus, ꞌen Christ ꞌuntꞌoh, ooba ꞌalha ꞌuhoontꞌoh-un, ꞌen Yakꞌusda yé ulhtus-i be whuzdli-un ꞌuntꞌoh. Mbene la ndun ꞌilhiz be tsꞌuhutinalh-un negha óoninꞌai-un, hikꞌensiꞌ de, mbene la ꞌen be yé ulhtus-i whuzdline, ꞌenne cha bukꞌehoosiꞌ hubaꞌ hoontꞌoh.

² Yakꞌusda ookꞌetsꞌinsiꞌ ꞌinkꞌez ooghuni tsꞌoontun de, ꞌet njan ꞌet huwa tꞌetsꞌoninzun Yakꞌusda buzkeh bukꞌetsꞌinsiꞌ.

³ Ooghuni tsꞌoontun de, ꞌet whuz unꞌa Yakꞌusda ookꞌetsꞌinsiꞌ. ꞋInkꞌez ndi ooghuni ꞌaw oogha lhúhoolnaꞌ whe ookꞌuneꞌ tsꞌootꞌen.

⁴ Mbene Yakꞌusda yé ulhtus-i be whuzdline, ꞌenne ndi yun kꞌut ꞌutꞌen ntsiꞌ-i chꞌaꞌ nilhde. Bé neba ꞌalha ꞌuhoontꞌoh-i, ꞌi be whuchꞌaꞌ nilhde.

⁵ Ndun Jesus ꞌen Yakꞌusda ooYeꞌ unli ooba ꞌalha ꞌuhoontꞌoh-un, ꞌen ndi yun kꞌut ꞌutꞌen ntsiꞌ-i chꞌaꞌ ꞌulhdeh.

Yakꞌusda duYeꞌ dantꞌoh-un ꞌuntꞌoh whunénulhtun

⁶ Jesus ꞌen Christ ꞌuntꞌoh. ꞋEn too ꞌinkꞌez ꞌuskaiꞌ be whusainya. ꞋAw too be za iloh. Too ꞌinkꞌez buzkaiꞌ be whusainya. Ndoni tsꞌihꞌun beꞌ hoontꞌoh-i ꞌuntꞌoh. ꞋEt huwa ꞌen ꞌuja oonalh ꞌóohooja.

⁷ ꞋEt tane ꞌenne yakꞌuz whutsꞌun bunalh ꞌóohooja. NeBá, ꞌinkꞌez ndun khuni cha, ꞌinkꞌez Ndoni cha. Ndunne tane ꞌilhoghun za hinli.

⁸ ꞋEt tane ꞌenne ndi yun kꞌut bunalh ꞌuhooja. Ndoni ꞌinkꞌez too ꞌinkꞌez buzkaiꞌ cha. Ndi tane ꞌi lhghá ꞌuhudija.

⁹ Dune oonalh ꞌóohoojane bughuni tsꞌilhchoot de, Yakꞌusda oonalh ꞌóohooja-un ꞌon nus hooncha wheꞌ hoontꞌoh, ꞌinkꞌez ndi Yakꞌusda duYeꞌ yughu yailhduk-i, ꞌi ꞌuntꞌoh.

¹⁰ Mbe Yakꞌusda ooYeꞌ ooba ꞌalhaꞌ yintꞌoh-un, Yakꞌusda daja ni-un, ooba ꞌalha ꞌuhoontꞌoh whuzdliꞌ. Mbe Yakꞌusda ooba ꞌalhaꞌ lheꞌyitꞌoh-un, ꞌen Yakꞌusda whutsꞌit ninzun. Yakꞌusda duYeꞌ yughu yailhduk-un ooba ꞌalhaꞌ lheꞌyítꞌoh ꞌet huwa.

¹¹ Ndi oonalh ꞌóohooja-i, ꞌi Yakꞌusda ꞌilhiz tsꞌuhutinalh-un negha óoninꞌai. Ndi ꞌilhiz be tsꞌúkhuna-i, ꞌi ooYeꞌ bulh ꞌúntꞌoh.

¹² Mbe ooYeꞌ ꞌutꞌi-un ꞌilhiz be tsꞌukhuna-i ꞌutꞌi whe ꞌuntꞌoh. Mbe la Yakꞌusda ooYeꞌ lhitꞌih-un, ꞌen ꞌaw ꞌilhiz be tsꞌukhuna-i lhitꞌih whe ꞌuntꞌoh.

¹³ Mbene Yakꞌusda ooYeꞌ booziꞌ ooba ꞌalhaꞌ yintꞌohne ndowhi nohtsꞌó kꞌesguz. ꞋEt whe la ꞌilhiz khutihnalh-un whahtꞌi tꞌeoonóhzin, ꞌinkꞌez Yakꞌusda ooYeꞌ booziꞌ nohba ꞌalha ꞌootꞌeꞌ za oohtꞌeꞌ.

Yakꞌusda uniyalhne, ꞌenne ndet ootsꞌo hukwaꞌ hutni-un, tsꞌiyawh ubuditsꞌo

¹⁴ ꞋEt whelhtsꞌuniljut whe ootsꞌun tezdudli, ꞌet ꞌi ꞌuntꞌoh, ndet hoonli ootsꞌu hukwaꞌ tsꞌutni de, hukwaꞌ ninzun de, neditsꞌo.

¹⁵ ꞋInkꞌez neditsꞌo tꞌetsꞌoninzun de, ndet ootsꞌo húkwaꞌ tsꞌutni, ndi whutsodaꞌ ootsꞌu húkwaꞌ tsꞌutni-un, ꞌet nawh lheꞌhootꞌoh negha tíkulh.

¹⁶ Mbe la bulhutsin lubeshi ꞌaw yukꞌé dalhtisah-i ꞌulhꞌen, yunilhꞌen de, Yakꞌusda yoodolhkut ꞌinkꞌez nyoon lubeshi ꞌaw yukꞌé dalhtisah ꞌulhꞌen-un, ꞌen hutinalh-un yugha óotaꞌalh. ꞋEt lubeshi ooghá daztitsah-i cha hoonli. ꞋAw ꞌet huba tenadondli lhduzúsni.

¹⁷ Tsꞌihꞌun be nulheꞌtsꞌustꞌen-i, ꞌi tsꞌiyawh lubeshi ꞌuntꞌoh. ꞋInkꞌez lubeshi ooghá dalhtitsah-i, ꞌi cha hoonli.

Mbe la Yakꞌusda yé ulhtus-i gha whuzdli-un, ꞌaw lubeshi lheꞌulhꞌen

¹⁸ Mbe Yakꞌusda yé ulhtus-i gha whuzdli-un, ꞌaw lubeshi lheꞌulhꞌen, ꞌet tꞌetsꞌoninzun. ꞋEt hoontsꞌi mbe la Yakꞌusda yé ulhtus-i gha whuzdli-un didutchꞌoh khudli whe ꞌuntꞌoh, ꞌinkꞌez ntsiꞌ-un ꞌaw yutꞌaóonalh ꞌaitꞌoh.

¹⁹ Wheni Yakꞌusda bulh ꞌútsꞌintꞌoh tꞌetsꞌoninzun. ꞋInkꞌez ndi yun kꞌut whutꞌenne, ntsiꞌ-un tsꞌiyawh kꞌúneꞌ bulꞌen.

²⁰ Yakꞌusda ooYeꞌ whusainya ꞌinkꞌez tꞌetsꞌonínzun njan tꞌetsꞌonózin-un, ꞌet negha óoninꞌai. ꞋEt whe ndun ꞌalhaꞌ ꞌuntꞌoh-un tꞌeznoozeh ha. Ndun ꞌalhaꞌ ꞌuntꞌoh-un, ꞌen bulh ꞌutsꞌintꞌoh. OoYeꞌ Jesus Christ ꞌen bulh ꞌutsꞌintꞌoh. Ndun ꞌen ꞌuntꞌoh soo ꞌalhaꞌ Yakꞌusda ꞌuntꞌoh ꞌinkꞌez ꞌilhiz be tsꞌúkhuna-i unli whe ꞌuntꞌoh.

²¹ Tsꞌoodunneyaz ꞌukꞌeltsi-i oochꞌa khahdli. ꞋEt ndo honeh.