1 John 4 - Yak'usda Ooghuni

¹ Ookꞌesiꞌne, nudúdeh-i tsꞌiyawh iloh nohba ꞌalha ꞌootꞌeꞌ junih. Ndi nududeh-i oozúlhdzih Yakꞌusda ba tsꞌihꞌun ꞌuntꞌoh tilah. Lhane huwhutsꞌit whe nus húhooꞌenne yun kꞌehindil ꞌet huwa.

² Ndai nududeh-i Jesus Christ duyustꞌe be ndi yun kꞌut nuseya, ni de, ꞌi Yakꞌusda ba tsꞌihꞌun whe ꞌuntꞌoh. ꞋEt whe Yakꞌusda ooyughi mbe unli tꞌenoohzin.

³ Tsꞌiyai nududeh-i Jesus Christ duyustꞌe be ndi yun kꞌut nuseya, ꞌaw lhdusnih de, ꞌaw Yakꞌusda bulh lhéꞌitꞌoh whe ꞌuntꞌoh. Ndi nududeh-i, ꞌi Christ chꞌaz ditni-i, ꞌi ꞌuntꞌoh. Whusatiyalh whulh ꞌúdahtsꞌo ꞌinkꞌez ꞌudaꞌ ndi yun kꞌut hoonli whe ꞌuntꞌoh.

⁴ Tsꞌoodunneyaz Yakꞌusda oochꞌeꞌ ꞌahli ꞌinkꞌez ndunne Christ chꞌaz ditnine ꞌudaꞌ buchꞌaꞌ nulhde. Nududeh-i nohyudinda-un, ꞌen ndi yun kꞌut ꞌuntꞌoh-un netsudule ꞌen ꞌuntꞌoh, yanus ꞌultus whe ꞌuntꞌoh ꞌet huwa.

⁵ Nduntꞌohne ndi yun kꞌut whuchꞌeꞌ hinli. ꞋEt huwa yun kꞌut whutꞌenne bukꞌunꞌa yahalhduk ꞌinkꞌez yun kꞌut whutꞌenne buboohoozílhtsꞌai.

⁶ Wheni Yakꞌusda oochꞌeꞌne tsinli. Mbene la Yakꞌusda tꞌeninzunne, ꞌenne nehuditsꞌo. Mbene la Yakꞌusda oochꞌeꞌ lhilohne, ꞌenne ꞌaw lhunehoozílhtsꞌai. ꞋEt huwa njan nududeh-i tsꞌihꞌun ꞌuntꞌoh-i ꞌinkꞌez tankꞌus ꞌuntꞌoh-i nudúdeh-i tꞌebuznínzun.

Tsꞌiyanne lhkꞌesiꞌne, ꞌenne Yakꞌusda yé ulhtus-i bé huwhuzdli ꞌinkꞌez Yakꞌusda tꞌehinínzun

⁷ Ookꞌesiꞌne tsꞌiyawh lhkꞌetsꞌoosiꞌ. Bé lhkꞌetsꞌusiꞌ-i Yakꞌusda tsꞌu háltsꞌut whe ꞌuntꞌoh. Tsꞌiyanne lhkꞌesiꞌne, ꞌenne Yakꞌusda yé ulhtus-i bé huwhuzdli ꞌinkꞌez Yakꞌusda tꞌehinínzun.

⁸ Ndun dulh dune kꞌelhísiꞌ-un, Yakꞌusda tꞌenuszun whe ꞌuntꞌoh, Yakꞌusda ꞌen nekꞌensiꞌ-un ꞌuntꞌoh ꞌet huwa.

⁹ ꞋAw ꞌílhoghun duYeꞌ ꞌen ndi yun kꞌuz yútilhꞌaꞌ. ꞋEn be ꞌilhiz wheni tsꞌukhoonaꞌ ha. ꞋEt whuz unꞌa Yakꞌusda ye nékꞌensiꞌ-i yunénilhtan.

¹⁰ Njan nduwhutni, wheni Yakꞌusda ookꞌelhtsꞌísiꞌ inleꞌ, ꞌet hoontsꞌi nekꞌensiꞌ ꞌinkꞌez duYeꞌ whusayálhꞌaꞌ nelubeshi kꞌelha datitsa ha. ꞋI be soo cho netsꞌu naítatꞌen.

¹¹ Ookꞌesiꞌne, ꞌet whuz unꞌa Yakꞌusda nekꞌensiꞌ de, wheni cha lhkꞌetsꞌoosiꞌ hubaꞌ hoontꞌoh.

Lhkꞌetsꞌutsiꞌ de, Yakꞌusda neyudinda

¹² ꞋAw dune Yakꞌusda yanꞌenne hooloh. Lhkꞌetsꞌusiꞌ de, Yakꞌusda neyudinda ꞌinkꞌez ye nékꞌensiꞌ-i nedzi yo soo tsꞌihꞌun unꞌa lhadulya.

¹³ Njan ꞌet huwa tꞌetsꞌoninzun Ndoni negha íninꞌai ꞌet whe Yakꞌusda bulh ꞌutsꞌintꞌoh ꞌinkꞌez didut cha neyudínda.

¹⁴ Ndi yun kꞌut whutꞌenne bubutilhyis-un ha neBá duYeꞌ whusayálhꞌaꞌ. ꞋEt tsꞌohonꞌen ꞌinkꞌez howu yatsꞌulhduk.

¹⁵ Mbe Jesus Yakꞌusda ooYeꞌ ꞌuntꞌoh ni-un, ꞌen Yakꞌusda yuyudínda ꞌinkꞌez didut cha Yakꞌusda bulh ꞌuntꞌoh whé ꞌuntꞌoh.

¹⁶ Yakꞌusda ye nékꞌensiꞌ-i tꞌeznanzin ꞌinkꞌez neba ꞌalha ꞌuhoontꞌoh. Yakꞌusda nekꞌensiꞌ-un ꞌuntꞌoh. Mbe bé lhkꞌetsꞌusiꞌ-i bulh ꞌúntꞌoh-un, ꞌen Yakꞌusda bulh ꞌuntꞌoh ꞌinkꞌez Yakꞌusda yuyudínda whe ꞌuntꞌoh.

Ndiz unꞌa be lhkꞌetsꞌutsiꞌ-i soo tsꞌihꞌun unꞌa neba lhadúlya suliꞌ

¹⁷ Neba nahudeh dzin ꞌet sih nedzi oolhtus ha, ꞌet whuz unꞌa be lhkꞌetsꞌusiꞌ-i soo tsꞌihꞌun unꞌa neba lhadúlya suliꞌ. Christ ꞌet nduntꞌoh huwa, wheni cha ndi yun kꞌut ꞌet ndutsꞌíntꞌoh ꞌet huwa.

¹⁸ Bé lhkꞌetsꞌusiꞌ-i ꞌaw nujut ooghu hooloh. ꞋEt hoontsꞌi bé lhkꞌetsꞌusiꞌ soo tsꞌihꞌun unꞌa lhadúlya suliꞌ-i, ꞌi nujut ꞌun whenaínuyukw. Nujut dzoh nunéulhdzut whe ꞌuntꞌoh. Mbe la nuljut-un, ꞌen bé lhkꞌetsꞌusiꞌ-i ooyo soo tsꞌihꞌun unꞌa lhálhditꞌoh whe ꞌuntꞌoh.

¹⁹ Yakꞌusda didut ꞌudechoo nekꞌensiꞌ ꞌet huwa ookꞌetsꞌinsiꞌ.

Be ꞌalha ꞌuhoontꞌoh-i, ꞌi be Yakꞌusda ookꞌuneꞌ tsꞌootꞌen

²⁰ ꞋIlhoghun dune Yakꞌusda ookꞌesiꞌ ni de, ꞌinkꞌez dudulhutsin tsꞌu dutni, ꞌen whutsꞌit-un ꞌuntꞌoh. Ntsꞌenꞌa dudulhutsin yunilhꞌen hoontsꞌi yukꞌelhísiꞌ de, Yakꞌusda ꞌaw lhuyisꞌen, ꞌinkꞌez ntsꞌenꞌa ꞌen yukꞌetisiꞌ?

²¹ ꞋInkꞌez ndi khuni netlꞌa ídanꞌai-i, ndiz unꞌa njan dúhoontꞌoh; mbe Yakꞌusda yukꞌensiꞌ-un, dudulhutsin cha kꞌeoosiꞌ hubaꞌ hoontꞌoh.