1 John 3 - Yak'usda Ooghuni

¹ Dalcho-i be neBá nekꞌensiꞌ-un negha óoninꞌai, Yakꞌusda dichꞌoh ꞌuneúlhni buzkeh ꞌutsꞌintꞌoh soo cho whunulhꞌen. ꞋEt huwa ndi yun kꞌut whutꞌenne tꞌenehunúszun, didut ꞌaw tꞌehinúszun ꞌet huwa.

² Ookꞌesiꞌne ꞌandit Yakꞌusda buzkeh tsinli. Daztitꞌelh-un ꞌawhuz nenalhtsꞌet ha lhúwhulhtsꞌit. ꞋEt hoontsꞌi tꞌetsꞌoninzun tsꞌanꞌen de, soo bunduz tiltꞌelh, soo ntsꞌenꞌa la dantꞌoh, whuz unꞌa ꞌuztilhꞌelh ꞌet huwa.

³ ꞋInkꞌez mbene whuz unꞌa hitsꞌun hukwa tse hooline, dutsun hooloh naꞌhudutiltselh, dantꞌoh la ootsun hooloh, whuz unꞌa.

Lubeshi ꞌutsꞌulhꞌen-un tsꞌiyawh whulazdootnih hubaꞌ hoontꞌoh

⁴ Mbe lubeshi ꞌulhꞌen, ꞌaw Yakꞌusda ooghuni yukꞌú nulheꞌustꞌen-un whe ꞌuntꞌoh. ꞋEt khuni kꞌutsꞌuyus de, lubeshi ꞌuhoontꞌoh.

⁵ ꞋInkꞌez tꞌeoonáhzun nelubeshi neba ꞌún yutoolhdilh ha ndi yun kꞌut nusuya. ꞋInkꞌez didut ꞌaw lubeshi ooghu hooloh whe ꞌuntꞌoh.

⁶ Mbe ye yudinda-un, ꞌaw lubeshi oolhꞌen ꞌaitꞌoh whe ꞌuntꞌoh. Mbe lubeshi ꞌulhꞌen-un, ꞌaw lhuyíꞌel ꞌinkꞌez ꞌaw tꞌeinúszun.

⁷ Tsꞌoodunneyaz ꞌuyoon nanohnooꞌah junih. Mbe la tsꞌihꞌun neꞌutꞌen-un, ꞌen tsꞌihꞌun ꞌuntꞌoh. Dantꞌoh la Jesus Christ tsꞌihꞌun ꞌuntꞌoh, whuz unꞌa nduntꞌoh whé ꞌuntꞌoh.

⁸ ꞋUdechoo whutsꞌun netsudule lubeshi ꞌulhꞌen. Mbe lubeshi ꞌulhꞌen, ꞌen netsudule uniyalh-un ꞌúntꞌoh. Njan ꞌet huwa Yakꞌusda ooYeꞌ ndi yun kꞌut nusúya whe netsudule be ꞌutꞌen musai yoolhtselh ha.

⁹ Kꞌus mbe Yakꞌusda yé ulhtus-i bé whuzdli-un, ꞌen lubeshi lheꞌulhꞌen. Ndi Yakꞌusda tsꞌu hainzut-i, ꞌi be ꞌilhiz wheni tsꞌuhutinalh, ꞌinkꞌez ꞌilhiz wheni yulh ꞌuntꞌoh. ꞋEt mbene ꞌi be whuzdline, ꞌenne ꞌaw lubeshi ꞌuhoolhꞌen ꞌaitꞌoh.

Wheni Jesus Christ unidulhne tsꞌiyawh lhkꞌetsꞌootsiꞌ

¹⁰ ꞋEt ndiz unꞌa Yakꞌusda buzkeh ꞌinkꞌez netsudule buzkeh cha tꞌehunudzun: Mbe la tsꞌihꞌun nulheꞌustꞌen, kꞌus dudulhutsin kꞌelhísiꞌ, ꞌen Yakꞌusda uniyalh-un iloh whe ꞌuntꞌoh.

¹¹ Soo ꞌudechoo wheꞌ whuditꞌen whutsꞌun ndi khuni dahtsꞌo njan ndutni, lhkꞌetsꞌoosiꞌ, ni.

¹² Ndun Cain ꞌen kꞌunꞌa iloh. ꞋEn ndun ntsiꞌ-un uniyalh-un inleꞌ ꞌinkꞌez dudulhutsin yuzilhghi. Ndet hukwa yinla yuzilhghi? Be ꞌutꞌen untsiꞌ ꞌinkꞌez bulhutsin ꞌen tsꞌihꞌun neꞌutꞌen, ꞌet hukwaꞌ yinla.

¹³ Sulhutsinke ndi yun kꞌut whutꞌenne nohtsꞌo dutni de, khun te nohba hócha junih.

¹⁴ Neulhutsinke bukꞌetsꞌinsiꞌ, ꞌet huwa tꞌetsꞌoninzun datsꞌuzsai leꞌ tsꞌintꞌoh ꞌinkꞌez natsꞌukhítnaꞌ tsꞌintꞌoh. Mbe dulhutsin kꞌelhisiꞌ-un, ꞌawhuz dazsai leꞌ ꞌuntꞌoh.

¹⁵ Mbe dulhutsin tsꞌu dutni-un, ꞌen neghan-un ꞌuntꞌoh. ꞋInkꞌez tꞌeoonáhzun mbe neghan-un, ꞌen ꞌilhiz be tsꞌukhuna-i ooghu whe yooloh whe ꞌuntꞌoh.

Jesus Christ neba daja la ꞌet huwa be lhkꞌetsꞌutsiꞌ-i tꞌezninzun

¹⁶ Jesus Christ ꞌen ye khuna-i neba yula ditni, ꞌet huwa be lhkꞌetsꞌusiꞌ-i tꞌezninzun. ꞋInkꞌez wheni cha neulhutsinke be tsꞌúkhuna-i buba oolazdootnih hubaꞌ hoontꞌoh.

¹⁷ ꞋEt hoontsꞌi mbe ndi yun kꞌut hoonli ꞌutꞌi-un whe bulhutsin ꞌeꞌdunidzit de, ꞌinkꞌez dudzi be ꞌaw yugha telheꞌnizil de, ntsꞌenꞌa Yakꞌusda ye nékꞌensiꞌ-i yulh ꞌútitꞌelh? ꞋEt dutꞌen de, ntsꞌenꞌa Yakꞌusda kꞌetitsiꞌ?

¹⁸ Tsꞌoodunneyaz ꞌaw khuni be za lhkꞌetsꞌoosiꞌ uzdoonꞌ. Soo tsꞌihꞌun unꞌa ne-eꞌutꞌen be cha lhkꞌetsꞌootsiꞌ.

¹⁹ Njan ꞌet huwa tꞌetsꞌoninzun khuni ꞌalhaꞌ ꞌuntꞌoh-i bulh ꞌutsꞌintꞌoh. ꞋEt la oobut nedzi tsꞌihꞌun ootꞌeꞌ.

²⁰ Nedzi gha neba nahisda de, Yakꞌusda ꞌon nus negha teꞌninzun whe ꞌuntꞌoh, tsꞌiyantsuk tꞌeoonínzun ꞌet huwa.

²¹ Ookꞌesiꞌne nedzi neba nalhuhusye de, whélhtsꞌuniljut whe Yakꞌusda oobut núzdilhya.

²² Di ootsꞌo óokaꞌ tsꞌutni-i, ꞌi negha íyunle, ooghuni tsꞌoontun ꞌinkꞌez hoonzoo whe oonalh neꞌtsꞌutꞌen ꞌet huwa.

²³ Ndi dughuni netlꞌa ídanꞌai, ooYeꞌ Jesus Christ mbe unli neba ꞌalha ꞌootꞌeꞌ ꞌinkꞌez lhkꞌetsꞌoosiꞌ. ꞋEt whuz unꞌa dughuni netlꞌa ídanꞌai.

Soo cho huwohleꞌ lhane whe nus hooꞌenne naꞌhududilꞌi ꞌudaꞌ netoh ꞌuhutꞌen wheꞌ hoontꞌoh

²⁴ Mbe yughuni oontun-un, ꞌen Yakꞌusda yudínda ꞌinkꞌez Yakꞌusda yulh ꞌuntꞌoh. Ndoni neyídanꞌai ꞌen be tꞌetsꞌonínzun neyo tsꞌe nebulh ꞌuntꞌoh.