1 John 2 - Yak'usda Ooghuni

¹ Suzkehkeyaz, lubeshi ꞌutilhꞌelh whuchꞌa ꞌet ndi khuni ꞌi be nohtsꞌó kꞌeꞌusges. Mbene lubeshi ꞌulhꞌenne, ꞌenne buba neBá Yakꞌusda but neba yatilhduk-un, Jesus Christ, tsꞌihꞌun unꞌa ꞌuntꞌoh-un, ꞌen ꞌuntꞌoh.

² ꞋInkꞌez ꞌen ꞌuntꞌoh nelubeshi kꞌelha dazsai. ꞋAw wheni za iloh. Yinka ndulcho whe whulubeshi kꞌelha cha. ꞋI be la neBá soo cho netsꞌu naítotꞌen ꞌet hukwa.

Jesus Christ mbe unli, whuz unꞌa tꞌezninzun

³ Khuni netlꞌa idanꞌai-i ookꞌuneꞌtsꞌutꞌen de, ꞌet whuz unꞌa tꞌetsꞌonínzun ꞌi gha Jesus Christ tꞌezninzun.

⁴ Dune ꞌutni, “ꞋEn tꞌenuszun,” ni de, ꞌinkꞌez yughuni yukꞌunulheꞌustꞌen de, ꞌen whutsꞌit-un ꞌuntꞌoh ꞌinkꞌez ndi khuni ꞌalhaꞌ ꞌuntꞌoh-i ꞌaw lhiyítꞌih whe ꞌuntꞌoh.

⁵ ꞋEt ndan yughuni kꞌuneꞌ ꞌutꞌen-un, ꞌen ꞌalhaꞌ Yakꞌusda ye nékꞌensiꞌ-i be tsꞌihꞌun unꞌa lhadúlya whe ꞌuntꞌoh. ꞋEt whe tꞌetsꞌonínzun Jesus Christ ooyúzdultsꞌi wheꞌ tsꞌintꞌoh.

⁶ Mbe la ye yudínda-un ni de, ntsꞌenꞌa la nusuya-un, ꞌet whuz unꞌa za nóyaꞌ hubaꞌ hoontꞌoh.

⁷ Sulhutsinke ꞌaw khuni ꞌandidi-i netlꞌa idanꞌai-i, ꞌi ghun iloh nohtsꞌó kꞌeꞌusges. ꞋUdechoo whutsꞌun tꞌenahzun ndi khuni ꞌudaꞌ-i ꞌuntꞌoh. Ndi khuni ꞌudaꞌ-i, ꞌudechoo whutsꞌun dahtsꞌo-i, ꞌi ꞌuntꞌoh.

⁸ Tsalhgus yo ꞌawet whedúdeh ꞌinkꞌez tsꞌihꞌun be hóotꞌen-i ꞌawet be hóotꞌen suliꞌ. ꞋEt huwa nohtsꞌó kꞌeꞌusges ꞌinkꞌez doo cha ꞌunohdúsni, ꞌandit khuni netlꞌa ídanꞌai-i, ꞌi ndi ꞌalhaꞌ khuni ꞌi yulh ꞌúntꞌoh, ꞌinkꞌez nohni cha bulh ꞌáhtꞌoh.

⁹ Dune ꞌutni, be hóotꞌen niz ꞌuntꞌoh ni de, ꞌinkꞌez dulhutsin tsꞌu dutni, ꞌen ꞌawhuz tsalhgus yo usda whé ꞌuntꞌoh.

¹⁰ Mbe dudulhutsin kꞌensiꞌ-un, ꞌen be hóotꞌen toh ꞌuntꞌoh ꞌinkꞌez ꞌaw tankꞌus ꞌutitꞌelh-un whutsꞌu nóolhtꞌi ꞌaitꞌoh.

¹¹ ꞋEt hoontsꞌi ndun dudulhutsin tsꞌu dutni-un, ꞌen tsálhgus yo ꞌuntꞌoh ꞌinkꞌez tsálhgus yo nuya. ꞋInkꞌez ntsꞌe tizya-un ꞌaw tꞌeoonúszun, ndi tsahólhgus-i be hoos̱ꞌen suliꞌ ꞌet huwa.

Yakꞌusda ba ulhtusne huzdliꞌ

¹² Tsꞌoodunneyaz Jesus Christ booziꞌ gha nohlubeshi nohba bunaꞌide, ꞌet huwa nohtsꞌó kꞌeꞌusges.

¹³ Nebáke ndultꞌohne ndun mbe ꞌudechoo whutsꞌun hoonli-un, ꞌen tꞌenahzun, ꞌet huwa nohtsꞌó kꞌeꞌusges. Chilke ntsiꞌ-un oochꞌaꞌ nulhde ꞌet huwa nohtsꞌó kꞌeꞌusges. Tsꞌoodunne neBá tꞌenahzun, ꞌet huwa nohtsꞌó kꞌeꞌusges.

¹⁴ Nebáke mbe ꞌudechoo whutsꞌun ꞌuntꞌoh-un tꞌenahzun, ꞌet huwa nohtsꞌó kꞌeꞌisguz. Chilke ulhtus ꞌinkꞌez Yakꞌusda ooghuni nohyudínꞌai, ꞌinkꞌez ntsiꞌ-un oochꞌaꞌ nulhde, ꞌet huwa nohtsꞌó kꞌeꞌisguz.

Ndiz unꞌa ndi yun kꞌut ꞌuzdóltsꞌiꞌ

¹⁵ Ndi yun kꞌut tankꞌus ꞌuwhutꞌen-un ꞌinkꞌez ndi yun kꞌut hoonli, ꞌi cha, whutsꞌu nóohtꞌi junih. Mbe la ndi yun kꞌut tankꞌus neꞌwhutꞌen ndóohoontꞌoh-un whutsꞌu nintꞌi de, ꞌaw neBá ye nékꞌensiꞌ-i ooghu whe yooloh whe ꞌuntꞌoh.

¹⁶ Neyustꞌe whutsꞌú nintꞌi-un, ꞌinkꞌez nena whutsꞌu níntꞌi-un cha, ꞌinkꞌez ndai la ahtꞌi-un be ꞌududulhtiꞌ de, ꞌowhi tsꞌiyawh ndi yun kꞌut huba ꞌuntꞌoh, ꞌinkꞌez ꞌaw neBá tsꞌu ha lhúhooltsꞌut ꞌet huwa.

¹⁷ Ndi yun ꞌawet whewhúltsꞌit ꞌinkꞌez ootsꞌúznintꞌi-i cha, ꞌet hoontsꞌi Yakꞌusda hukwaꞌ ninzun te neꞌútꞌen-un, ꞌen ꞌilhiz hutinalh.

Mbene la Christ chꞌaz ditnine, ꞌenne buchꞌa khóhdleꞌ

¹⁸ Suzkehne ꞌawet ꞌet néꞌhunintꞌo wheꞌ hoontꞌoh. Christ chꞌaz ditni-un whuz de úyalh whulh ꞌúdahtsꞌo wheꞌ hoontꞌoh. ꞋAndit hoontsꞌi Christ chꞌaz ditnine huldlai wheꞌ hoontꞌoh. ꞋEt whe tꞌetsꞌonínzun ꞌawet ꞌet néꞌhunintꞌo wheꞌ hoontꞌóh.

¹⁹ Netsꞌu ha hándil wheꞌ hintꞌoh ꞌet hoontsꞌi ꞌaw nebulh didowhne iloh ꞌuhintꞌoh. Nebulh didowhne ꞌuhintꞌoh de, nebulh za da ꞌuhootꞌeꞌ ooleꞌ. ꞋEt hoontsꞌi whehandil ꞌet huwa la tsꞌiyanne tꞌebunózin ꞌaw nebulh didowhne lhuhíloh.

²⁰ ꞋEt hoontsꞌi ndun Christ lubeshi ooghu hooloh-un, ꞌen Ndoni nohyídanꞌai ꞌinkꞌez tsꞌiyaintsuk tꞌeoonáhzun.

²¹ Ndi khuni ꞌalhaꞌ ꞌuntꞌoh-i tꞌenuzahzun huwa iloh nohtsꞌó kꞌeꞌisguz. Ndi khuni tꞌenahzun ꞌet huwa nohtsꞌó kꞌeꞌisguz ꞌinkꞌez ndi khuni ꞌalhaꞌ ꞌuntꞌoh-i whutsꞌit ooghu hooloh.

²² Mbe Jesus ꞌen Christ unli ꞌet whutsꞌoodidlai-un, ꞌen whutsꞌit-un ꞌuntꞌoh. ꞋEn Christ chꞌaz ditni-un ꞌuntꞌoh. ꞋEn ꞌuntꞌoh neBá ꞌinkꞌez ooYeꞌ bulh butsꞌoodidlai.

²³ Mbe la neBá ooYeꞌ tsꞌoodidlai-un, neBá cha lhiyítꞌih whe ꞌuntꞌoh. Mbe neBá ooYeꞌ ooba ꞌalhaꞌ yintꞌoh de, ooBá cha yutꞌi whe ꞌuntꞌoh.

ꞋUdechoo whutsꞌun whudáhtsꞌo-un ꞌilhiz wheni bulh óohtꞌeꞌ

²⁴ ꞋEt huwa ꞌudechoo whutsꞌun whudáhtsꞌo-un ꞌilhiz wheni ꞌóohtun. ꞋEt ꞌudechoo whutsꞌun whudáhtsꞌo-un nohbulh ꞌúhoontꞌoh de, ꞌet sih neBá ꞌinkꞌez ooYeꞌ cha bubulh ꞌútihtꞌelh.

²⁵ Njan netsꞌú hoozi-un, ꞌilhiz tsꞌuhutinalh-un, ꞌet ꞌuwhúlhni.

²⁶ Mbene la nanohuntiꞌah hukwaꞌ ꞌutꞌenne, ꞌenne bughun ndi nohtsꞌó kꞌeꞌisguz.

²⁷ ꞋInkꞌez Ndoni neBá nohyeídanꞌai-i, ꞌilhiz nohbulh ꞌúntꞌoh, ꞌinkꞌez ꞌuyoonne dune ꞌaw ꞌon ꞌun whunohodoolhꞌeh huba lheꞌhóotꞌoh. ꞋEt kꞌus ndi nohyudíltsꞌut-i tsꞌiyantsuk whunohdulhꞌeh ꞌinkꞌez tsꞌihꞌun ꞌuntꞌoh, ꞌaw whutsꞌit-i iloh ꞌuntꞌoh. ꞋEt soo ntsꞌenꞌa la whunohdalhꞌeꞌ, whuz unꞌa za bulh óohtꞌeꞌ.

Wheni Yakꞌusda ooduneꞌne, ꞌaw hoonli hukwaya lhtsꞌiloh whe la oobut núzdolyaꞌ

²⁸ Suzkehkeyaz ndun ꞌen za bulh óohtꞌeꞌ. ꞋEt whe la nohnalhtsꞌet hainya de, ꞌinkꞌez whusanája de, nedzi ulhtus unli ꞌinkꞌez ꞌaw hoonli hukwaya lhtsꞌiloh whe la oobut núzdolyaꞌ.

²⁹ ꞋEn tsꞌihꞌun unꞌa ꞌuntꞌoh tꞌeoonáhzun de, tꞌeoonahzun mbene la tsꞌihꞌun neꞌútꞌenne ꞌenne Yakꞌusda yé ulhtus-i be huwhuzdli wheꞌ hintꞌoh.