1 John 1 - Yak'usda Ooghuni

Ndi khuni be tsꞌúkhuna-i, ꞌi ghun

¹ Soo ꞌudechoo daꞌ whutsꞌun hoonli-un soo tsꞌihꞌun unꞌa whuzdántsꞌo-un, nena be cha tsꞌonalhꞌen, ꞌinkꞌez nela be cha ootꞌá tsꞌaznai khuni be tsꞌúkhuna-i, ꞌi ghun.

² Ndi be tsꞌukhuna-i nenalhtsꞌet haltsꞌut ꞌinkꞌez tsꞌohonꞌen ꞌinkꞌez howu yatsꞌalhduk. Ndi ꞌilhiz be tsꞌukhuna-i neBá bulh ꞌuntꞌoh. ꞋI nenalhtsꞌet ha hóoltsꞌut, ꞌet huwun nohtsꞌudániꞌ.

³ Ndet tsꞌohonꞌen-un ꞌinkꞌez tsꞌodántsꞌo-un, ꞌet huwun nohtsꞌútni. ꞋEt la lhulh ꞌutsꞌintꞌoh tsꞌooleꞌ. ꞋEt ꞌalhaꞌ neBá ꞌinkꞌez ooYeꞌ Jesus Christ bubulh ꞌilhoh uzdidowh.

⁴ ꞋInkꞌez ndi tsꞌiyawh huwun nohtsꞌó kꞌeꞌtsꞌanguz, ꞌet sih tube cho whunólhni.

Ndi be hootꞌen-i, ꞌi ooniz tsꞌidulh de, ꞌet de ꞌilhoh ꞌutsꞌintꞌohne tsinli

⁵ Ndi khuni tsꞌodántsꞌo-un ꞌi ꞌuntꞌoh, ꞌen tsꞌaháltsꞌut-i, ꞌi ghun nohtsꞌútni Yakꞌusda be hóotꞌen-i ꞌuntꞌoh, ꞌinkꞌez ꞌaw tsálhgus ooghu hooloh gaih.

⁶ ꞋEn bulh lhulh ꞌútsꞌintꞌoh tsꞌutni de, ꞌinkꞌez tsálhgus yo tsꞌe tsꞌidulh de, ꞌet tsꞌuwhutsꞌit wheꞌ tsꞌutni, ꞌinkꞌez ꞌaw khuni ꞌalhaꞌ ꞌuntꞌoh-i ookꞌu nulheꞌtsꞌustꞌen.

⁷ ꞋEt hoontsꞌi be hootꞌen-i bulh ꞌuntꞌoh, ꞌi ooniz tsꞌidulh de, ꞌet de ꞌilhoh lhulh ꞌutsꞌintꞌohne tsinli ꞌinkꞌez ooYeꞌ Jesus Christ buzkaiꞌ be nelubeshi tsꞌiyawh yunaꞌalhde.

⁸ ꞋAw lubeshi lhtsꞌitꞌih tsꞌutni de, naꞌuzdunutꞌah ꞌinkꞌez khuni ꞌalhaꞌ ꞌuntꞌoh-i neghu hooloh.

⁹ Lubeshi ꞌutsꞌalhꞌen tsꞌutni de, ꞌaw nelalhdutisni ꞌinkꞌez tsꞌihꞌun ꞌuntꞌoh whe nelubeshi neba yunaoodutilnoh ꞌinkꞌez tankꞌus unꞌa ꞌuhoontꞌoh-un, tsꞌiyawh whuchꞌa neyunaꞌtilhdoh.

¹⁰ ꞋAw lubeshi lheꞌtsꞌílel tsꞌutni de, Yakꞌusda whutsꞌit-un ꞌuntꞌoh tsꞌutni wheꞌ tsꞌutni, ꞌinkꞌez ooghuni, ꞌaw neghu hooloh.