1 Corinthians 9 - Yak'usda Ooghuni

Paul didutchꞌoh khuna yalduk ntsꞌenꞌa la Jesus Christ ba whelꞌaꞌ-un unli

¹ ꞋEt ꞌalhaꞌ lakw si whelꞌaꞌ-un usdli? ꞋEt ꞌalhaꞌ lakw ndai Yakꞌusda ba ꞌutisꞌelh-i, ꞌi tsꞌiyawh stlꞌa honꞌai? ꞋEt ꞌalhaꞌ lakw neMoodihti Jesus Christ ꞌusꞌen? ꞋEt ꞌalhaꞌ lakw ndi ꞌutꞌen neMoodihti ꞌen ba ꞌusꞌen-i, ꞌi be buba ꞌalha ꞌuhoontꞌohne suhliꞌ?

² ꞋEt ꞌonghohne buba whelꞌaꞌ-un lhusdloh de, ꞌet hoontsꞌi ꞌalhaꞌ nohni nohba whelꞌaꞌ-un usdli. ꞋInkꞌez tsꞌiyanne tꞌehinozin si whelꞌaꞌ-un ꞌustꞌoh, ꞌet neMoodihti nohyudinda ꞌinkꞌez ꞌet whe snutsi kꞌoh tsꞌe ꞌahtꞌoh.

³ ꞋEt mbene la schꞌaz ditnine, ꞌenne ꞌet njan dubudutasnelh,

⁴ ꞌet ꞌalhaꞌ lakw hukwaꞌ ꞌuzninzun totsuk ꞌuztiꞌulh ꞌinkꞌez ꞌuztitnelh, ꞌet Yakꞌusda nebaꞌ hoonla?

⁵ ꞋInkꞌez wheni cha eh nebaꞌ hoonla whe neulhtuske butsꞌutni hukwaꞌ ꞌuzninzun de, ꞌenne hoontsꞌi bughu tsꞌoodaꞌ hubaꞌ hoontꞌoh? ꞋEt ꞌonghunne whelꞌaꞌne cha, neMoodihti bulhutsinke, ꞌinkꞌez Cephas cha, ꞌenne cha buꞌat hoonli. ꞋEt ꞌenne bukꞌunꞌa ꞌutsꞌootꞌeꞌ ha eh ꞌuneinla?

⁶ ꞋEt kꞌus si ꞌinkꞌez Barnabas ꞌaw wheni za eh lheꞌtsꞌoostꞌen? Nohba tsꞌihꞌun ꞌuhoontꞌoh eh? ꞋAwundooh!

⁷ ꞋEt mbe la salda unli whe ndai la ye ndunidzit-i dichꞌoh yukꞌelha lhuhoolhꞌih eh? Kꞌus mbe la soo haꞌ nulhyeh-un, ꞌen ndai la ha inulhyeh-i, ꞌi yuloh tiꞌulh eh? Kꞌus mbe la musdoos yughunli-un unli whe oolilet yuloh ꞌutnai eh?

⁸ ꞋEt njan nohbulh yasduk-un dune kꞌunꞌa iloh ꞌunohdusni. Moses be ꞌudustlꞌus ꞌi kꞌunꞌa ꞌunohdusni.

⁹ ꞋEt ndutni, “Ndet la musdoos dune tlꞌo maiꞌ ꞌuztiꞌulh wheni ꞌuyulhꞌen te, ꞌaw ꞌutiꞌulh whuchꞌa ꞌenolꞌaꞌ ꞌaitꞌoh,” ni.

¹⁰ Yakꞌusda musdoos dune yughu ni unli kꞌus wheni neba ꞌet ndi tsꞌiyawh ꞌutni eh? ꞋEt ꞌalhaꞌ wheni neba ndi ꞌukꞌu neyuzguz. ꞋEt whe la ꞌet mbe la ha niyeh kꞌet ꞌet whulh chꞌul-un, ꞌinkꞌez mbe la tlꞌo maiꞌ oonuyin-un khun la whuloh butsꞌu natookat huninzun.

¹¹ ꞋInkꞌez wheni nohtoh Yakꞌusda ooghuni nohnat ꞌaꞌ uznule leꞌ ꞌuja de, ꞌet de nohba hooncha eh whe nohtsꞌun ndai be uzdunidzit-i whuloh be neghohleꞌ hubaꞌ hoontꞌoh? A, ꞌalha ꞌuhoontꞌoh.

¹² ꞋEt ꞌuyoo nohghunline, hoonli bughahle, di ha wheni negha lheꞌzahloh? ꞋEt hoontsꞌi ndai la Yakꞌusda negha ooninla ꞌaw ꞌet whuz unꞌa ndulhtsꞌitꞌel inleꞌ. ꞋEt kꞌus tsꞌiyawh whulh tsꞌuzyin doo ka la khuni unzoo-i Christ ghun nintaꞌtsꞌuholhꞌen.

¹³ ꞋAw tꞌeoonuzáhzun mbene Lizwifne bulugliz whucho bez tsꞌe ꞌutꞌenne, ꞌenne ndi lugliz whucho huwa tꞌaih-i hiloh ooꞌalh hubaꞌ hoontꞌoh. ꞋInkꞌez mbene loodel nat ꞌutꞌenne, ꞌenne ndi loodel kꞌut huwa tꞌaih-i ꞌenne cha ꞌet whuz unꞌa za, hiloh buchatꞌáih?

¹⁴ ꞋEt whuz unꞌa mbene khuni unzoo-i be yalhduk unline, ndai la hiye ndunidzit-i, ndi khuni unzoo-i, ꞌi gha ꞌi bugha iyunkat. ꞋEt whuz unꞌa neMoodihti netsꞌu hukwaꞌ daniꞌ.

¹⁵ ꞋEt hoontsꞌi ndai la Yakꞌusda khuni ꞌet netlꞌa ídanꞌai-i, ꞌet ꞌi be ꞌunohdusni, ꞌet hoontsꞌi ꞌaw hoonli ꞌantsꞌet nohghu lhuschulh inleꞌ. ꞋInkꞌez ꞌaw ꞌet whuz unꞌa iloh nohtsꞌo kꞌelheꞌusgus. Soo hoonustꞌiꞌ whe njan duhoontꞌoh-un, ꞌet howu yasduk te, ꞌi ꞌantsꞌi hóleꞌ hukwa lheꞌnuszun. ꞋEt hoontsꞌi ꞌet ndudútisnelh de, ꞌet whutso unducha dasusai ꞌet de sichꞌoh ꞌon nus sba hootazooꞌ.

¹⁶ ꞋAw wheꞌ duduztiꞌ iloh whe ndi khuni unzoo-i be nohbulh yasduk. Ndi khuni stlꞌa díltsꞌut-i ꞌantsꞌi ꞌoh whuya istꞌelh-un ꞌetsul oosdleh ꞌaitꞌoh. ꞋEt ndi khuni unzoo-i be yalhuzusduk de, dawhultsiꞌ-un ꞌet whuchꞌa ootasdoh!

¹⁷ Ndi ꞌusꞌen-i, sdzi ndulcho ꞌi be ꞌusꞌen de, ꞌet de sba ꞌukꞌelha whutaleh. ꞋEt hoontsꞌi ndi ꞌusꞌen oosdleh hubaꞌ hoontꞌoh de ꞌinkꞌez ꞌet huwa ꞌusꞌen de, ꞌet de ꞌantsꞌi ꞌutꞌen stlꞌaltsꞌut-i kꞌunꞌa ꞌusꞌen hukwꞌunꞌa ꞌuwhutatꞌelh.

¹⁸ ꞋEt di za sba ꞌukꞌelha tileh? Ndi khuni unzoo-i Christ ghun, ꞌi be nohbulh yatisduk, ꞌaw ꞌukꞌelha iloh be nohbulh yatisduk. Whelꞌaꞌ-un ꞌustꞌoh ꞌet huwa stlꞌa hóoltsꞌut whe ndi ꞌutꞌen ꞌusꞌen-i ha nohni sba ꞌukꞌelha hoolhtselh hubaꞌ hoontꞌoh. ꞋEt hoontsꞌi ꞌaw ndulhustꞌoh. ꞋEt sghuni ulhchoot de, ꞌet ꞌawet sba kꞌelha whuzdliꞌ whe ꞌuhoontꞌoh.

Tsꞌiyanne ba ꞌulhna naꞌduzúzsi, ni Paul

¹⁹ ꞋEt ꞌaw ꞌulhna lhusdloh ꞌet hoontsꞌi tsꞌiyanne ba ꞌulhna naꞌduzuzsi. ꞋEt whe ꞌon nus ꞌultsukne uboosyih.

²⁰ Lizwifne bulh ꞌustꞌoh te, ꞌet Lizwif kꞌunꞌa naꞌduzuzsi, ꞌet tilah Lizwifne ꞌon nus lhane uboosyih. ꞋInkꞌez Moses be ꞌudustlꞌus yukꞌuneꞌ ꞌutꞌenne, ꞌenne bukꞌunꞌa ꞌustꞌoh te, ꞌet tilah ndunne ꞌon nus lhane uboosyih.

²¹ ꞋEt mbene Moses be ꞌudustlꞌus yuyit ꞌuntꞌohne, ꞌenne bukꞌunꞌa ꞌustꞌoh naꞌduzuzsi. ꞋEt tilah mbene Moses be ꞌudustlꞌus yit ꞌuntꞌohne, ꞌenne cha uboosyih. ꞋEt hoontsꞌi ndet Yakꞌusda neba lhuhizyeꞌ ꞌet ꞌaw whuyit lheꞌduzusni, ꞋEt Christ ndet la neba ꞌutni-un hukwꞌunꞌa ꞌustꞌoh ꞌet huwa.

²² ꞋInkꞌez tetsunne toh ꞌustꞌoh te, ꞌenne bukꞌunꞌa si cha tesun usdli, ꞌet whé tilah uboosyih. ꞋI be la whuchꞌa bósdeh. ꞋEt huwa njan ꞌet ndustꞌen-un niz de ha oodanzut ndai la ꞌisꞌen-i ꞌet whe whulohne tilah uboosyih.

²³ ꞋInka ndi khuni unzoo-i, ꞌi gha ꞌustꞌen. ꞋEt de la unzoo-i negha ninla, ꞌi ꞌalhgoh tsꞌólhchoot.

Whuchꞌaꞌ tisdoh hukwaꞌ nuszun, ni Paul

²⁴ ꞋAw tꞌeoonuzuhzun mbe la lhghu natulwusne butoh ꞌilhoghun za whuchꞌa ꞌalhdoh. Nohni cha ꞌet whuz unꞌa whuchꞌa oolhdeh kꞌunꞌa hukwa ꞌahtꞌen.

²⁵ Mbe la soo hoolhdzihne dichꞌoh khadli. ꞋEt lhghu natilwusne ndi whuchꞌa italhdoh-i ꞌutsiꞌ tileh. ꞋEt hoontsꞌi wheni be whuchꞌa tsꞌotalhdoh-i ꞌaw ꞌutsiꞌ ooleꞌ ꞌaitꞌoh.

²⁶ ꞋEt ꞌinka si cha whuz unꞌa ndo whuya uzgih. ꞋAntsꞌi ꞌoh whunilhchoh núzgaih iloh whe ꞌustꞌen. ꞋInkꞌez ndai la be whesyaih-un, ꞌaw ꞌantsꞌi ꞌoh nuduzchus iloh whe ꞌustꞌen.

²⁷ Sichꞌoh syustꞌe be syaih ꞌet whe skꞌuneꞌ titꞌen. ꞋEt ꞌaw ndulhuzustꞌen de, lhelhyoone khuni unzoo-i be bubulh yasduk hoontsꞌi sichꞌoh sba dzoh naóodleꞌ la.