1 Corinthians 8 - Yak'usda Ooghuni

Nohulhutsinke bugha teꞌnoohzin

¹ ꞋEt ꞌawet ndi tꞌalh-i ꞌukꞌeltsi gha tꞌaíh-i ꞌet huwun nohbulh yátisduk. Soo tꞌetsꞌonínzun be tꞌeoonudzun-i tsꞌutꞌi ꞌinkꞌez ndi be tꞌeoonudzun-i ꞌet whuloh te ꞌuzdudíltiꞌ neilhꞌi. ꞋEt hoontsꞌi be nekꞌensiꞌ-i, ꞌi be ꞌon nus Yakꞌusda ba tsꞌilhtus neílhꞌi.

² ꞋEt mbe tsꞌiyantsuk duba tꞌenaoonúdzun-un, ꞌen ndet tꞌeóonózin hubaꞌ hoontꞌoh-un, ꞌet ꞌaw tꞌeóonúszun.

³ ꞋEt hoontsꞌi mbe Yakꞌusda kꞌensiꞌne, ꞌen Yakꞌusda tꞌebunínzun.

⁴ ꞋEt ndi tꞌalh-i ꞌukꞌeltsi gha tꞌaih-i ꞌuztiꞌulh, ꞌi ghun nohbulh yatisduk. ꞋEt ꞌukꞌeltsi ꞌantsꞌi unli ꞌi tꞌetsꞌonínzun. ꞋInkꞌez ꞌuyoo Yakꞌusda lhiloh, ꞌilhoghun za Yakꞌusda unli.

⁵ Lhane ꞌet nduhútni, yakꞌuz tsꞌe yakꞌusda huldlai. ꞋInkꞌez ꞌalha ꞌuhoontꞌoh ndunne nduhutni yakꞌusda huldlai ꞌinkꞌez moodihtine cha huldlai hutni.

⁶ ꞋEt nduhútni ꞌet hoontsꞌi, wheni neba Yakꞌusda ꞌilhoghun za unli, neBá ꞌen ꞌuntꞌoh. ꞋEn za tsꞌiyaitsuk ootsꞌu ha yúkat wheꞌ hoontꞌoh. ꞋEn za ba tsꞌootꞌen ha ndi yun kꞌut uzdilhtsꞌi. ꞋInkꞌez neMoodihti ꞌilhoghun za unli, Jesus Christ ꞌen ꞌuntꞌoh. ꞋEn gha tsꞌe tsꞌiyaitsuk ꞌulya, ꞌinkꞌez wheni cha ꞌen gha za tsꞌukhuna.

⁷ ꞋEt hoontsꞌi ꞌaw tsꞌiyanne ndi be tꞌeoonudzun-i lhuhítꞌiꞌ. ꞋInkꞌez ꞌandit whutsꞌun ndi tꞌalh-i ꞌukꞌeltsi gha tꞌaih-i, ꞌi huyaꞌalh whe nyoo ꞌukꞌeltsi oochꞌeꞌ huninzun ꞌinkꞌez ꞌawhuz buba ꞌalha ꞌuhoontꞌoh. ꞋEt huwa ꞌet ndi huyaꞌalh ꞌet whe buyo tsꞌe oogha tꞌetsꞌoninzun-i tetsun-i, ꞌi be hintsiꞌ hulih.

⁸ ꞋEt hoontsꞌi ꞌantsꞌi ꞌutꞌalh-i ꞌaw ꞌi be Yakꞌusda nalh unzoone lhtsꞌíloh. Tsꞌanꞌal de, ꞌet whe ꞌaw ꞌon nus tsꞌinzooꞌ tsꞌooleꞌ ꞌaitꞌoh. ꞋEt ꞌaw lhtsꞌiꞌulh de, ꞌet whe ꞌaw ꞌon nus neba hoontsiꞌ le lheꞌtsꞌitꞌoh.

⁹ Nohnichꞌoh khahdli doo ka la khuni nohtlꞌa idanꞌai-i gha ndunne tetsunne tankꞌus hunootꞌi.

¹⁰ Soo cho whunilhꞌen, nyun be tꞌeoonudzun-i ꞌintꞌi, ꞌinkꞌez nyulhutsin buyo tsꞌe oogha tꞌetsꞌoninzun-i tetsun de, ꞌen ꞌukꞌeltsi lugliz ꞌet higha hiyaꞌaih-i ꞌet sinda whe nyunilhꞌen ꞌutꞌalh-i ꞌukꞌeltsi gha tꞌaih-i, ꞌi ꞌinꞌalh de, ꞌet ꞌalhaꞌ lakw ꞌen cha whuz nilhtꞌi ndi tꞌalh-i ꞌukꞌeltsi gha tꞌaih-i ꞌutiꞌulh eh? A, ꞌalhaꞌ ꞌen cha whuz ntalhtꞌi yutiꞌulh wheni.

¹¹ ꞋEt ꞌinka nyulhutsin ꞌukꞌeltsi ghun beni toh dizꞌai-i tetsun-un unli, ꞌen be tꞌeoonudzun-i ꞌintꞌí-i, ꞌi be nintaꞌwhutálhꞌelh, Christ yuba dazsai hoontsꞌi.

¹² ꞋEt nohulhutsinke nohni nohgha lubeshi ꞌuhulhꞌen de, buyo tsꞌe oogha tꞌetsꞌoninzun-i cha undólhdah la. ꞋEt whuz unꞌa ndutihtꞌelh de, ꞌet de Christ oochꞌa lubeshi itálhchulh.

¹³ ꞋEt huwa ndi ꞌutꞌalh-i huwa tꞌaih-i, ꞌi gha sulhutsin tankꞌus óoneh de, ꞌet de ꞌaw ꞌon ꞌat ꞌutsung óosꞌalh ꞌaitꞌoh, doo ka la si sgha sulhutsin tankꞌus óoneh.